Skerda: furakon Ian na Florida, Mérka, na setenbru di 2022 (Sean Rayford/Getty Images); na meiu: un mai ta fuji ku se fidju na Donetsk, Ukránia, na julhu di 2022 (Alex Chan Tsz Yuk/SOPA Images/LightRocket via Getty Images); direita: un monti di algen ta faze testi di koronavírus na Beijing, Xina, na abril di 2022 (Kevin Frayer/Getty Images)
NU MANTE SIENTI!
2022: Un anu xeiu di prubléma — Kuzê ki Bíblia ta fla?
Duránti anu 2022, nu obi txeu notísia di géra, prublémas di dinheru i dizastris na naturéza. Sô Bíblia ki pode splika kuzê ki kes kuza li ta siginifika.
Kuzê ki kes kuza ki kontise na anu 2022 ta siginifika
Kes kuza ki kontise na anu ki pasa ta mostra klaru ma sima Bíblia dja flaba nu sta ta vive na ‘ténpu di fin’. (2 Timóteo 3:1) Kel ténpu li kumesa na anu 1914. Repara modi ki kes kuza ki kontise ta mostra kuzê ki Bíblia dja flaba ma ta kontiseba na nos ténpu:
“Géra”. — Mateus 24:6.
“Anu 2022 é [kel] anu ki Europa pasa pa géra otu bês.”a
Odja artigu “Rúsia invadi Ukránia”.
“Falta di kumida”. — Mateus 24:7.
“2022: Un anu ki txeu algen pasa pa fómi.”b
Odja artigu “Géra na Ukránia traze más falta di kumida na mundu”.
“Duénsas ki ta spadja”. — Lukas 21:11.
“Poliomeliti torna parse, vírus di makaku kumesa ta ser un grandi prubléma i koronavírus kontinua ta prujudika txeu algen. Kel situason li mostra klaru modi ki kes duénsa ki ta spadja é prigozu i modi ki ómi é fraku.”c
“Grandis sinal”. — Lukas 21:11.
“Tevi kalor dimás, sékas, lumi ki pega na floréstas i txeias. Di sertéza veron di anu 2022 ka ta skesedu di el, pamodi el traze txeu stragu ki mata milharis di algen i dexa milhons di algen sen lugar di mora.”d
“Revólta [ô, “dizórdi; konfuzon,” nóta di rodapé]”. — Lukas 21:9.
“Pamodi prublémas di dinheru pesoas fika txeu xatiadu prinsipalmenti pamodi présu di tudu kuza fika ta subi. Pur isu, na anu 2022 es faze txeu manifestason kóntra govérnu.”e
Odja artigu “Présu di tudu kuza sta ta subi — Kuzê ki Bíblia ta fla?”.
Kuzê ki ta ben kontise prósimu anu?
Ninhun algen ka ta pode fla ku sertéza kuzê ki ta ben kontise na anu 2023. Kuzê ki nu sabe é ma ka ta dura Reinu di Deus, ô kel govérnu na séu ta ben rezolve tudu prubléma na téra. (Daniel 2:44) Kel govérnu li, ta ben kaba ku tudu kuza ki ta poi algen ta sufri i el ta ben poi vontadi di Deus ta fazedu na téra. — Mateus 6:9, 10.
Nu ta insentiva-u pa bu sigi konsedju di Jizus i “mante sienti” pa bu odja modi ki kes kuza ki sta ta kontise sta kunpri kes profesia di Bíblia. (Markus 13:37) Pa bu sabe más, pidi un Tistimunha di Jeová pa mostra-u modi ki Bíblia pode djuda-u gósi i modi ki el pode da-u bo ku bu família speransa di verdadi pa un futuru midjór.
a AP News, “Anu 2022 é kel anu ki Europa pasa pa géra otu bês”, Jill Lawless, 8 di dizenbru di 2022.
b Programa Mundial de Alimentos, “Falta di kumida na mundu interu”.
c Fórum de Saúde JAMA, “Vida na ténpu di duénsas — Di COVID-19 ti vírus di makaku, poliomeliti i duénsa X”, Lawrence O. Gostin, JD, 22 di setenbru di 2022.
d Earth.Org, “Pamodi ki tevi txeu prubléma di klima na veron di anu 2022 di un manera ki nunka ka kontiseba antis?”, Martina Igini, 24 di otubru di 2022.
e Fundação Carnegie para a Paz Internacional, “Txeu manifestason na mundu na anu 2022 foi pamodi prublémas di dinheru”, Thomas Carothers i Benjamin Feldman, 8 di dizenbru di 2022.