Kuzê ki Bíblia ta fla sobri kalor ki sta txeu dimás na mundu interu?

Duránti mês di julhu di 2022, dadu na notísias na mundu interu ma kalor sta txeu dimás:

• “Dja é sugundu bês na kel mês li ki autoridadis na Xina sta ta aviza algen ma na kuazi 70 sidadi kalor sta txeu dimás.” — 25 di julhu di 2022, CNN Wire Service.

• “Pamodi na Europa interu ténpu sta kenti dimás, floréstas na txeu país sta ta pega lumi.” — 17 di julhu di 2022, The Guardian.

• “Na dumingu txeu sidadi di Mérka tevi tenperatura más altu di ki dja es tevi i kel kalor spadja pa Kósta Lésti, pa pártis di Sul i Séntru Oésti.” — 24 di julhu di 2022, The New York Times.

Kuzê ki tudu kel-li krê fla? Ma talvês ka ta da pa vive na téra más? Kuzê ki Bíblia ta fla?

Bíblia dja flaba ma ta ben tinha kalor txeu dimás?

Sin. Kalor dimás ki sta na mundu interu sta di akordu ku kuzê ki Bíblia ta fla ma ta ben kontiseba na nos ténpu. Pur izénplu, Jizus fla ma nu ta ben odjaba ‘kuzas ki ta poi algen medu’. (Lucas 21:11) Dja ki kalor sta dimás na mundu interu, txeu algen tene medu ma kuzas ki ómis sta ta faze ta kaba ku vida na téra.

Ka ta da pa nu ben vive na téra más?

Ta da sin. Deus faze téra pa ser nos kaza pa tudu ténpu. (Salmo 115:16; Eclesiastes 1:4) Envês di Deus dexa ómis distrui téra, el ta ben ‘distrui kes ki sta distrui Téra’, sima el promete. — Apocalipse 11:18.

Odja dôs profesia ki ta mostra kuzê ki Deus promete faze ku téra:

• ‘Dizértu i téra séku ta ben fika kontenti, kes lugar planu na dizértu ta ben grita ku txeu alegria i es ta ben da flor sima asafron.’ (Isaías 35:1) Deus ka ta dexa pa téra bira un dizértu ki ka ta da pa algen mora na el, má el ta ben konpo kes párti di téra ki sta stragadu.

• ‘Bu ta kuida di téra, bu ta pô-l ta da kumida txeu dimás i ku txeu rikéza.’ (Salmo 65:9) Deus ta ben bira téra un paraízu.

Pa sabe más sobri modi ki mudansas di klima sta kunpri profesias di Bíblia, lé artigu “O que é que a Bíblia diz sobre mudanças climáticas e o futuro da Terra e da humanidade?”

Pa sabe más sobri promésa di Bíblia di rekupera téra, odja artigu “Kenha ki ta ben salva Téra?”