Kópa di mundu ta konsigi uni pesoas di verdadi? — Kuzê ki Bíblia ta fla?

Es sta ta spéra ma uns 5 bilhon di algen ta odja Kópa di mundu, ki kumesa désdi dia 20 di novenbru i ta bai ti dia 18 di dizenbru di 2022. Txeu algen ta atxa ma kes tipu di atividadi li ta faze más di ki sô uni pesoas óras ki es sta ta odja-l.

• “Disportu ten puder di muda mundu. El ten puder di motiva algen. I el ten puder di uni pesoas di un manera spesial.” — Nelson Mandela, ki éra prizidenti di Áfrika di Sul.

• Futibol ta uni pesoas pamodi el ta da-s “speransa, alegria, el ta pô-s ta gosta di mésmu kuza, ta ama kunpanheru i ta xinti ma es ten mésmu obijetivu na algun kuza.” — Gianni Infantino, ki é prizidenti di FIFA.a

Má Kópa di mundu ô kes tipu di atividadi li ta konsigi kes bon rezultadu li? Ten algun speransa pa pas i union?

El ta konsigi uni pesoas di verdadi?

Kópa di mundu di es anu, poi pesoas ta pensa na más di ki sô disportu. Kel Kópa li dja poi pesoas ta pâpia sobri kes prubléma ki ta kontise na sosiadadi i pulítika, sima direitus umanu, rasismu i prublémas di dinheru.

Txeu algen gosta di odja atividadis sima Kópa di mundu. Má, ka ta inporta kantu sforsu ki pesoas faze, kes tipu di atividadis li ka ta uni pesoas pa tudu ténpu. Envês di kel-li, kes atividadi li ta poi pesoas ta mostra kes atitudi i konportamentu ki Bíblia dja flaba ma pesoas ta tinha na ‘ténpu di fin’. — 2 Timóteo 3:1-5.

Kuzê ki ta ben uni pesoas di verdadi

Bíblia ta da-nu speransa ma ta ben ten union na mundu interu. El ta promete ma tudu algen ta ben sta unidu dibaxu di kel govérnu na séu ki txoma “Reinu di Deus.” — Lukas 4:43; Mateus 6:10.

Jizus Kristu, ki é Rei di Reinu di Deus, ta ben traze pas na mundu interu. Bíblia ta fla:

• ‘Justu ta ben bira txeu, i ta ben ten txeu pas’. — Salmo 72:7.

• ‘El ta ben salva kes algen póbri ki ta sta ta txora ta pidi ajuda. El ta libra-s di abuzu i di violénsia’. — Salmo 72:12, 14.

Mésmu gósi, kes kuza ki Jizus inxina dja uni milhons di algen na 239 país. Dja es para di ôdia kes algen ki é diferenti di es. Pa bu sabe más, lé kel Sentinéla ku téma “Nu pode vense ódiu”.