Ajuda ki dadu duránti dizastris ki kontise na 2022 — Irmons mostra ses amor pa kunpanheru

Bíblia dja flaba ma na nos ténpu ta ben tinha géra, tremor di téra, duénsas ki ta spadja i ma pesoas ta ben odjaba “kuzas ki ta da-s medu”. (Lukas 21:10, 11) Kes profesia li kontinua ta kunpri duránti anu di sirvisu di 2022.a Pur izénplu, géra na Ukránia kontinua i kel-li afeta vida di milhons di algen. Na txeu párti di mundu pesoas inda staba ta rekupera di koronavírus, kel duénsa ki spadja. Tanbê, txeu algen fika afetadu ku kes dizastri na naturéza ki kontise, sima tremor di téra na Aiti i kes tenporal ki faze txeu stragu na Mérka Sentral, na Filipinas i na sudésti di Áfrika. Modi ki Tistimunhas di Jeová djuda kes ki fika afetadu?

Duránti anu di sirvisu di 2022, nos organizason djuda pesoas na uns 200 dizastri! Pa tudu, nu gasta kuazi 12 milhon di dóla pa djuda.b (Más ô ménus 1 bilhon di skudu di Kabu Verdi.) Nu ben odja modi ki uzadu nhos kontribuison pa djuda kes ki fika afetadu na dôs di kes dizastri ki kontise.

Tremor di téra na Aiti

Na dia 14 di agostu di 2021, kontise un tremor di téra ku forsa di 7.2 na sul di Aiti. Nu fika tristi pamodi móre dôs irman i un irmon di nos. Kes ki skapa tevi ki lida ku pankadas na korpu i txeu tristéza pamodi kel tremor di téra. Un irmon ki txoma Stephane fla: “Na sidadi interu móre tantu algen ki duránti más di dôs mês tevi txeu intéru tudu simana.” Un otu irmon ki txoma Eliézer fla: “Txeu irmon ka tinha lugar di mora, ka tinha ropa, ka tinha sapatu i nen otus kuza ki más es ta mesteba. Duránti txeu mês, un monti di algen vive ku medu pamodi fika ta kontise otus tremor di téra más fraku.”

Nos organizason djuda rápidu. Filial na Aiti manda más di 53 tonelada di kumida i tanbê es manda téndas, lónas, koltxons i kes karegador di telemóvel ki ta karega ku lus di sól. Tanbê, duránti anu di sirvisu di 2022 más di 100 kaza fazedu ô konpodu. Uzadu más di un milhon di dóla (más di 100 mil kontu di Kabu Verdi) pa djuda nos irmons ku irmans.

Nos irmons ku irmans fika txeu kontenti ku kes ajuda li. Lorette fla: “Tremor di téra distrui nos kaza i nos nogósiu. Nu ka tinha más nada pa kume, má organizason di Jeová kuida dretu di nos. Es da-nu tudu kuza ki nu mesteba.” Micheline fla: “Tremor di téra straga kel lugar undi N ta moraba mi ku nhas dôs fidju matxu. N ka sabia kuzê ki N ta fazeba alén di ora, i Jeová uza se organizason pa responde nhas orason. Gósi nu tene un kaza dretu pa nu mora. N krê faze tudu kel ki N ta pode pa N mostra nha gratidon pa Jeová.”

Autoridadis di kes lugar odja sforsu ki nu faze pa djuda. Diretor di Kanbra Munisipal di sidadi di L’Asile fla: “N ta ilojia nhos pa manera rápidu ki nhos djuda i tanbê pamodi nhos mostra txeu ruspetu pa autoridadis. N sta kontenti di odja ma nhos ka sta interesadu na dinheru, má na djuda pesoas. Nhos ta faze kel-li pamodi amor.”

Tenporal Ana pasa pa Malauí i Mosanbiki

Na dia 24 di janeru di 2022, Tenporal Ana pasa pa Mosanbiki i dipôs el bai pa oésti pa Malauí. Kel tenporal li traze txuba fórti i béntu fórti ku velosidadi di 100 kilómetru pa óra. El distrui fiu di lus i pontis, i tevi txeu txeia.

Kel tenporal li afeta más di 30 mil Tistimunha di Jeová na Malauí i na Mosanbiki. Irmon Charles, ki djuda duránti kel dizastri li, fla: “Kantu N odja sufrimentu ki irmons staba ta pasa pa el i tudu kes kuza ki es perde, N xinti tristi dimás i N ka sabia kuzê ki N ta fazeba.” Pa piora situason más inda, txeia leba kes poku kumida ki es tinha i ses plantason. Txeu algen perde ses kaza. Infilismenti, un irmon perde se mudjer i se dôs fidju-fémia, ki móre fogadu, kantu kel boti ki ba salva-s rabida.

Kel tenporal ta daba algen medu. Staba 1:00 di madrugada na Nchalo, Malauí, kantu família Sengeredo obi un barudju fórti di agu ta kóre, pamodi dôs riu ki intxi di agu! Irmon Sengeredo disidi ma es tinha ki sai di kaza. Kel-li éra un bon disizon pamodi lógu ki es sai txeia ronba ses kaza. Tudu kes kuza ki es tinha straga ô bai na txeia. Nton, es disidi bai pa kel Salon di Reinu, ki es ta kustuma andaba uns 30 minutu pa txiga la. Má di es bês dura dôs óra pa es txiga. Es txiga modjadu i kansadu, má suguru.

Kes filial di Malauí i Mosanbiki aji faxi pa djuda irmons. Es pidi kes enkaregadu di grupu di kongregason i ansions pa djobe kuzê ki irmons mesteba i pa inkoraja-s. Txeu Kumison di Ajuda mandadu pa djuda na kel trabadju li, i es kumesa lógu ta djuda irmons ranja kumida i otus kuza ki es staba ta meste. Gastadu más di 33 mil dóla (más di 3 mil kontu di Kabu Verdi) na kes ajuda li, i más di 300 mil dóla (más di 30 mil kontu di Kabu Verdi) na konpo i faze kaza di irmons.

Kes Kumison di Ajuda na ténpu di dizastri uza dinheru dretu i kel-li éra inportanti pamodi présu di kuzas fika más karu. Pur izénplu, na kes primeru 7 mês di trabadju pa djuda, présu di farinha di midju, ki é un farinha ki es ta uza txeu na Malauí, omenta 70 pursentu. Présu di konbustível tanbê subi. I pa popa dinheru, irmons kunpra kumida i kes kuza ki es mesteba pa konstruson la mê i na txeu kuantidadi. Asi, es fazedu diskontu i es ivita gasta txeu dinheru ku transpórti.

Irmons fika txeu kontenti ku ajuda ki es resebe. Un irmon di Mosanbiki, ki txoma Felisberto, fla: “Nunka N ka odja un organizason ta faze txeu kuza si pa otus algen. Es da kuzas sima, material di konstruson, transpórti, algen pa trabadja na konstruson, kumida i orientason ku amor. Kel ajuda li é un izénplu di kel amor ki Jizus fla ma debe izistiba entri irmons, ki sta na Juan 13:34, 35.” Ester, ki é un irman viúva di Malauí i ki se kaza fika distruídu, fla: “N ka sabia kuzê ki N ta fazeba, pamodi N ka tinha dinheru pa N faze un otu kaza. Má kantu irmons ben i es faze-m un kaza, N xinti sima ki dja N staba na Paraízu.”

Sima nu ta ba ta txiga más pértu di mundu novu, nu pode spéra ma ta kontise más dizastri. (Mateus 24:7, 8) Má, pamodi kes kontribuison ki nhos ta faze di korason, nu pode ten sertéza ma povu di Jeová ta kontinua ta resebe kel ajuda ki es ta meste. Alguns di kes kontribuison li ta fazedu na donate.jw.org. Obrigadu di korason pa kes kontribuison ki nhos ta faze ku amor.