Juízis
11 Jefté éra un trópa balenti ki ta moraba na Jiliade. El éra fidju di un prostituta, i se pai txomaba Jiliade. 2 Má Jiliade tanbê tevi fidju ku se mudjer. Kantu kes fidju di se mudjer kria, es kóre ku Jefté i es fla-l: “Bu ka ta erda nada di nos pai pamodi bo é fidju di otu mudjer.” 3 Nton, Jefté fuji di ses irmon i el ba mora na téra di Tobe. I alguns ómi ki ka tinha trabadju djunta ku Jefté, i es fika ta sigi-l.
4 Un ténpu dipôs, kes amonita ba luta kóntra Israel. 5 Kantu kes amonita kumesa ta luta kóntra Israel, kes ansion di Jiliade bai faxi pa téra di Tobe pa ba buska Jefté. 6 Es fla Jefté: “Ben, nu krê pa bu bira nos komandanti, asi pa nu pode luta kóntra kes amonita.” 7 Má Jefté fla kes ansion di Jiliade: “É ka nhos mê ki kóre ku mi di kaza di nha pai pamodi nhos tinha txeu ódiu di mi? Pamodi ki gósi ki nhos tene prubléma nhos sta ta ben buska-m?” 8 Nton, kes ansion di Jiliade fla Jefté: “É pur isu ki nu ben buska-u. Si bu bai ku nos i bu luta kóntra kes amonita, bu ta bira líder di tudu algen di Jiliade.” 9 Nton, Jefté fla kes ansion di Jiliade: “Si N bai ku nhos pa luta kóntra kes amonita i Jeová djuda-m ganha-s, nton N ta bira nhos líder!” 10 Kes ansion di Jiliade fla Jefté: “Pa Jeová ser nos tistimunha* i pa el julga-nu si nu ka faze sima bu fla.” 11 Nton, Jefté bai ku kes ansion di Jiliade, i povu pô-l ta ser ses líder i ses komandanti. Na Mispá, dianti di Jeová, Jefté ripiti tudu kes kuza ki el flaba kes ansion.
12 Dipôs, Jefté manda alguns mensajeru pa fla rei di kes amonita: “Kuzê ki bu ten kóntra mi* pa bu ben ataka nha país?” 13 Rei di kes amonita fla kes mensajeru di Jefté: “N ben ataka nhos pamodi kantu Israel sai di Ijitu, el toma un párti di nha téra désdi riu Arnon ti riu Jaboki, i ti Jurdon. Gósi nhos da-m el na pas.” 14 Má Jefté torna manda kes mensajeru na rei di kes amonita 15 pa fla-l:
“É kel-li ki Jefté fla: ‘Israel ka toma téra di kes moabita nen téra di kes amonita, 16 pamodi kantu Israel sai di Ijitu, es anda pa dizértu ti mar Brumedju i es txiga na Kades. 17 Dipôs, Israel manda alguns mensajeru pa fla rei di Edon: “Favor, dexa-nu pasa na téra di nho”. Má rei di Edon ka obi ku es. Es pidi rei di Moabe mésmu kuza, má el ka seta. Pur isu, Israel fika ta mora na Kades. 18 Kantu ki es kontinua ta anda na dizértu, es da vólta pa téra di Edon i pa téra di Moabe. Es pasa na lésti di téra di Moabe i es arma ses ténda na zóna di riu Arnon. Riu Arnon ta fikaba na frontera di Moabe, pur isu es ka entra na tiritóriu di Moabe.
19 “‘Dipôs, Israel manda alguns mensajeru na Sion, rei di kes amoreu, ki ta governaba Esbon. Israel fla-l: “Favor, dexa-nu pasa na téra di nho pa nu bai pa nos téra.” 20 Má Sion ka dexa Israel pasa na se téra pamodi el ka ta kunfiaba na es. Pur isu, el djunta tudu ses trópa i es arma ses ténda na Jas i es ba luta kóntra Israel. 21 Pamodi kel-li, Jeová, kel Deus di Israel, intrega Sion i tudu se povu na mô di Israel. Israel ganha-s i el toma tudu téra di kes amoreu. 22 Di kel manera li, es toma tudu tiritóriu di kes amoreu, désdi riu Arnon ti riu Jaboki, i désdi dizértu ti Jurdon.
23 “‘É Jeová, kel Deus di Israel, ki tra kes amoreu di dianti di se povu Israel, i gósi bu krê kóre ku Israel? 24 Bu ka ta toma kalker kuza ki bu deus Kemós da-u? Nton, nos tanbê nu ta kóre ku tudu kes ki Jeová, nos Deus, tra di nos dianti. 25 Pur akazu bo é midjór di ki Balaki, rei di Moabe i fidju di Zipor? Algun bês el tevi prubléma ku Israel ô el luta kóntra es? 26 Israel tevi 300 anu ta vive na Esbon i na kes vila pértu di la, na Aroer i na kes vila pértu di la, i na tudu kes sidadi ki ta fikaba pértu di riu Arnon. Pamodi ki duránti tudu es ténpu nhos ka tenta toma kes lugar li otu bês? 27 N ka faze-u nada mariadu, pur isu bu ka ten motivu pa ben ataka-m. Pa Jeová, ki é Juís, julga oji entri povu di Israel i povu di Amon.’”
28 Má rei di kes amonita iginora kel mensajen ki Jefté manda-l.
29 Spritu di Jeová ben riba Jefté, i Jefté pasa pa Jiliade i pa tiritóriu di Manasés pa bai pa Mispá, na Jiliade. Di Mispá el ba luta kóntra kes amonita.
30 Nton, Jefté faze un votu pa Jeová i el fla: “Si bu intrega-m kes amonita na nha mô, 31 nton kel algen ki sai di pórta di nha kaza pa inkontra ku mi óras ki N volta na pas dipôs ki N ganha kes amonita, el ta bira di Jeová, i N ta oferese-l sima un oférta kemadu.”
32 Nton, Jefté ba luta kóntra kes amonita, i Jeová intrega-s na se mô. 33 El mata-s désdi Aroer ti Minite i ti Abel-Keramin. Jefté mata txeu algen i el toma 20 sidadi. Di kel manera li, kes israelita ganha kes amonita.
34 Kantu Jefté volta pa se kaza na Mispá, se fidju-fémia ba inkontra ku el. El staba ta toka tanbor i ta badja! El éra se úniku fidju-fémia. Alén di el, el ka tinha nen fidju matxu i nen fidju-fémia. 35 Kantu Jefté odja-l, el ratxa se ropa i el fla: “Ó nha fidju-fémia! Dja bu poi nha korason ta fika tristi dimás,* pamodi N ten ki manda-u pa lonji. N faze un promésa pa Jeová i N ten ki kunpri-l.”
36 Má, el fla-l: “Nha pai, si dja bu da Jeová bu palavra, faze ku mi sima bu promete, pamodi Jeová djuda-u ganha kes amonita, ki é bus inimigu.” 37 I el fla se pai: “N ta pidi-u sô un kuza: dexa-m bai pa montanha duránti dôs mês pa N ba txora nha virjindadi, sô mi ku nhas amiga.”*
38 Jefté fla-l: “Bu pode bai!” Nton el dexa-l bai pa dôs mês, i el ba txora se virjindadi na montanha djuntu ku ses amiga. 39 Dipôs di kes dôs mês, el volta pa se pai, i se pai kunpri kel votu ki el fazeba sobri el. Nunka el ka tevi relason seksual ku ninhun ómi. I kel-li bira un kustumu* na Israel: 40 tudu anu, kes minina di Israel ta ba vizitaba fidju-fémia di Jefté, di Jiliade, pa ilojiaba el. Es ta vizitaba el kuatu dia pa anu.