Salmu
Un múzika di Davidi.
29 Pa kes ki ten puder,* da Jeová kel ki el merese,
Nhos da Jeová kel ki el merese pamodi se glória i se forsa.
2 Nhos da Jeová kel glória ki se nómi merese.
Nhos inbaxa dianti di* Jeová bistidu ku ropa santu.*
3 Vós di Jeová ta obidu pa riba di núven,
Vós di kel Deus gloriozu é sima strubada.
Jeová sta pa riba di txeu núven.*
4 Vós di Jeová é poderozu,
Vós di Jeová é gloriozu.
5 Vós di Jeová ta kebra sédru,
Jeová ta kebra sédru di Líbanu padás-padás.
6 El ta poi kes monti di Líbanu ta salta sima un bizeru,
I monti di Sirion sima fidju di un toru brabu.
7 Vós di Jeová ta poi relánpagu ta brilha.
8 Vós di Jeová ta poi dizértu ta treme.
Jeová ta poi dizértu di Kades ta treme.
9 Vós di Jeová ta poi kes kórsa ta treme i ta pari,
El ta poi kes folha di florésta ta kai.
I tudu algen na se ténplu ta fla: “Nhos da Deus glória!”
10 Jeová sta xintadu na se tronu riba di txeu agu.*
Jeová é Rei i el ta governa pa tudu ténpu.
11 Jeová ta ben da se povu forsa.
Jeová ta ben abênsua se povu ku pas.