Salmu
Kántiku. Un múzika di kes fidju di Korá. Pa diretor di múzika. Pa toka na ton di malate,* pa kes grupu kanta un di kada bês. Maskil* di Eman, kel ezraíta.
88 Ó Jeová, Deus di nha salvason,
Di dia N ta pidi-u ajuda,
I di noti N ta txiga bu dianti.
2 Dexa nha orason txiga na bo,
Inbaxa bu obidu* i obi nha gritu di ajuda.
4 Pesoas sta ta odja-m sima un algen ki sta kuazi pa móre.*
N bira un ómi sen forsa,
5 N fika bandonadu na meiu di mortus.
Mi é sima un korpu ki sta detadu na un sipultura,
Ki bu ka sta lenbra di el más
I ki ka ten bu proteson.*
6 Bu pô-m na kóba más fundu,
Na kes lugar sukuru, na un braku fundu.
7 Bu raiba sta sima un karga pizadu riba mi,
Kes kuza ki bu ta faze é sima óndias grandi ki ta da na mi. (Selá)
8 Bu poi kes algen ki N konxe pa fika lonji di mi.
Bu pô-s ta odia-m.
N sta prézu i N ka ta konsigi fuji.
9 N sta sufri txeu ti ki nhas odju dja bira sukuru.
Ó Jeová, dia interu N ta txoma-u.
N ta labanta nha mô pa faze orason pa bo.
10 Pur akazu, kes algen ki sta mortu ta konsigi odja bus milagri?
Kes algen ki sta mortu ta konsigi labanta pa lova-u? (Selá)
11 Pur akazu, ta papiadu di bu amor lial na sipultura,
I di bu lialdadi na lugar di distruison?*
12 Pur akazu, bus milagri ta ben konxedu na sukuru,
Ô bu justisa na téra di kes ki ta skesedu?
13 Ó Jeová, N ta kontinua ta grita ta pidi-u ajuda,
Tudu dia di palmanhan nha orason ta txiga na bo.
14 Ó Jeová, pamodi ki bu nega-m?*
Pamodi ki bu ta sukundi bu róstu di mi?
15 Désdi ki mi éra jóven N sta ta sufri,
I N sta kuazi ta móre.
Bu sta dexa-m pasa pa kuzas kasábi, má gósi N ka sta pode más.
16 Bu raiba sta dexa-m txeu kansadu.
Kes kuza ki bu faze sta kaba ku mi i sta dexa-m ku txeu medu.
17 Dia interu es ta serka-m sima agu;
Es ta serka-m pa tudu ladu.*
18 Bu poi nhas amigu i nhas kunpanheru ta fika lonji di mi.
Gósi, sukuru é nha kunpanheru.