Jeová ta obi nhas orason?

1-2. Pamodi ki talvês nu ta xinti ma Jeová ka sta responde nos orason?

‘ATXA kel alegria más grandi ki ten na Jeová, i El ta da-u kes kuza ki bu korason ta dizeja.’ (Sal. 37:4) Fórti promésa sábi! Má, nu debe pensa ma Jeová ta da-nu tudu kel ki nu ta pidi-l lógu? Pamodi ki nu pode faze kel pergunta li? Odja alguns izénplu. Un irman soltera sta ta ora pamodi el krê bai pa Skóla pa Pregadoris di Reinu. Má dja pasa alguns anu i ti inda el ka konvidadu. Un irmon jóven sta pidi Jeová pa el rekupera di un duénsa gravi pa el pode faze más na kongregason. Má simé, inda el ka rekupera. Un pai ku un mai ki ta sirbi Jeová sta ora pa ses fidju kontinua na verdadi. Má ses fidju ta disidi para di sirbi Jeová.

² Talvês bo tanbê dja bu ora ta pidi Jeová algun kuza, má el ka da-u el. Pamodi kel-li bu pode pensa ma Jeová ta responde orason di otus, má el ka ta responde bus orason. Ô talvês bu pode pensa ma bu faze algun kuza mariadu. É si ki un irman ki txoma Janiceb xinti. El ku se maridu ora pa Jeová pamodi es tinha gana di bai sirbi na Betel. Janice fla: “N tinha serteza ma lógu es ta txomaba nos pa bai sirbi na Betel.” Má, pasa txeu anu i es ka konvidadu. El fla: “N xinti tristi i konfuzu. N fika ta pergunta kuzê ki N faze ki magua Jeová. N ora txeu sobri kel dizeju ki nu tinha di bai Betel. Pamodi ki el ka responde nha orason?”

3. Kuzê ki nu sta ben odja na kel studu li?

³ Alvês nu pode pergunta si Jeová sta ta obi nos orason. Ti mésmu alguns ómi fiel di pasadu dja kustuma xintiba si. (Jó 30:20; Sal. 22:2; Hab. 1:2) Kuzê ki pode djuda-u ten serteza ma Jeová ta responde bus orason? (Sal. 65:2) Pa djuda-nu atxa respósta, primeru nu meste responde kes pergunta li: (1) Kuzê ki nu pode spera di Jeová? (2) Kuzê ki Jeová ta spera di nos? (3) Pamodi ki talvês nu meste faze alguns mudansa na kuzas ki nu ta pidi na orason?

KUZÊ KI NU PODE SPERA DI JEOVÁ?

4. Sima sta na Jeremias 29:12, kuzê ki Jeová promete ma el ta faze?

⁴ Jeová promete ma el ta obi nos orason. (Lé Jeremias 29:12.) Nos Deus ta ama se sérvus fiel, pur isu nunka el ka ta dexa di obi ses orason. (Sal. 10:17; 37:28) Má kel-li ka krê fla ma el ta da-nu tudu kel ki nu pidi-l. Nu meste spera ti ki mundu novu ben pa nu pode resebe alguns di kes kuza ki nu ta pidi-l.

5. Kuzê ki Jeová ta leba en kónta óras ki el ta responde nos orason? Splika.

⁵ Jeová ta djobe si nos pididu sta di akordu ku se vontadi. (Isa. 55:8, 9) Vontadi di Jeová ta involve intxi téra ku ómis i mudjeris ki ta ben sta unidu i kontenti dibaxu di se govérnu. Má Satanás fla ma pesoas ta sérba más filís si es governa ses kabésa. (Gén. 3:1-5) Pa prova ma kel ki Diabu fla é mintira, Jeová dexa pa ómis governa ses kabésa. Má govérnu di ómi traze txeu prubléma ki nu sta odja oji. (Ecl. 8:9) Nu sabe ma Jeová ka ta ben kaba ku tudu prubléma gósi. Si el faze kel-li alguns algen pode pensa ma ómis ta konsigi rezolve ses prubléma i tanbê es ta konsigi ten bons rezultadu na governa ses kabésa.

6. Pamodi ki nu pode ten serteza ma Jeová sénpri ta faze kuzas ku amor i di manera justu?

⁶ Jeová pode responde dôs pididu igual di manera diferenti. Pur izénplu, kantu Rei Ezekias staba txeu duenti, el pidi Jeová pa djuda-l rekupera. Jeová responde se orason i el kura-l. (2 Reis 20:1-6) Má kantu apóstlu Paulu inplora Jeová ta pidi-l pa afasta di el se “spinhu na karni”, ki talvês éra un prubléma di saúdi, Jeová ka kaba ku se prubléma. (2 Kor. 12:7-9) Tanbê odja kuzê ki kontise ku apóstlus Tiagu i Pedru. Rei Eródis krê mataba es dôs. Kongregason ora pa Pedru i talvês es ora pa Tiagu tanbê. Má Tiagu matadu i Jeová faze un milagri pa salva Pedru. (Atus 12:1-11) Nu pode pergunta: ‘Pamodi ki Jeová salva Pedru, má el ka salva Tiagu?’ Bíblia ka ta fla.c Má nu pode ten serteza ma manera di Jeová faze kuzas ‘nunka é ka injustu’. (Deut. 32:4) I nu sabe ma Jeová ta amaba Pedru sima el ta amaba Tiagu. (Apo. 21:14) Alvês, Jeová pode ka responde nos orason di un manera ki nu staba ta spera. Má, dja ki nu ta kunfia ma Jeová sénpri ta responde nos orason ku amor i di manera justu, nu ka ta kexa di manera ki el ta skodje responde nos orason. — Jó 33:13.

7. Kuzê ki nu ka debe faze i pamodi?

⁷ Nu ka debe konpara nos situason ku situason di otus algen. Pur izénplu, nu pode pidi Jeová pa djuda-nu ku un kuza, má el ka responde nos orason. Dipôs, nu ta fika ta sabe ma otu algen faze orason ta pidi mésmu kuza ki nos i ta parse ma Jeová responde se orason. Un irman ki txoma Ana, pasa pa kel situason li. El ora ta pidi pa se maridu ki txomaba Mateus rekuperaba di kánser. Na kel mésmu ténpu, dôs irman ki dja staba di idadi tanbê staba ta luta kóntra kánser. Ana faze txeu orason ta pidi pa Mateus i pa kes irman. Kes irman rekupera má Mateus móre. Na komésu Ana ta perguntaba si kes irman midjora pamodi Jeová ki djuda-s. I si é Jeová ki djuda-s, pamodi ki el ka obi kes orason ki el faze ta pidi pa se maridu midjoraba? É klaru ki nu ka sabe pamodi ki kes dôs irman rekupera. Má nu sabe ma Jeová ta ben kaba ku tudu sufrimentu i el tene gana di resusita se amigus ki dja móre. — Jó 14:15.

8. (a) Sima sta na Isaías 43:2, modi ki Jeová ta djuda-nu? (b) Modi ki orason pode djuda-nu óras ki nu sta pasa pa prublémas difísil? (Odja vídiu Orason ta djuda-nu aguenta ténpus difísil.)

⁸ Jeová sénpri ta djuda-nu. Dja ki el é nos Pai ki krê-nu txeu, Jeová ka ta krê odja-nu ta sufri. (Isa. 63:9) Má simé, el ka ta libra-nu di tudu nos prubléma ki pode ser sima rius ô lumi. (Lé Isaías 43:2.) Má el promete ma el ta djuda-nu óras ki nu ta ‘pasa’ pa prublémas. I el ka ta dexa pa nos prubléma prujudika-nu pa tudu ténpu. Jeová tanbê ta da-nu se spritu santu ki ten txeu puder pa djuda-nu aguenta firmi. (Luk. 11:13; Fil. 4:13) Pamodi kel-li nu pode ten kunfiansa ma sénpri nu ta ten kel ki nu meste pa nu pode aguenta firmi i kontinua fiel pa el.d

KUZÊ KI JEOVÁ TA SPERA DI NOS?

9. Modi ki Tiagu 1:6, 7, ta djuda-nu odja ma nu meste kunfia ma Jeová ta djuda-nu?

⁹ Jeová ta spera ma nu ta kunfia na el. (Ebr. 11:6) Alvês nu ta xinti ma nos prublémas é difísil dimás pa nu lida ku es. Nu pode ti kumesa ta duvida si Jeová ta ba djuda-nu. Má, Bíblia ta da-nu serteza ma ku ajuda di puder di Deus, nu ta pode ‘subi un muralha.’ (Sal. 18:29) Nton, envês di dexa pa nos dúvida fika más txeu nu debe ora ku txeu fé i kunfia ma Jeová ta responde nos orason. — Lé Tiagu 1:6, 7.

10. Da un izénplu ki ta mostra modi ki nu pode aji di akordu ku nos orason.

¹⁰ Jeová ta spera ma nu ta aji di akordu ku nos orason. Pur izénplu, un irmon pode pidi Jeová pa djuda-l tra uns dia di fólga di se trabadju pa el pode sisti kongrésu. Modi ki talvês Jeová pode responde kel orason li? El pode da kel irmon koraji ki el meste pa el ba pâpia ku se patron. Má simé, kel irmon ta meste bai ti se patron i pidi kes dia di fólga. Talvês el ta meste pidi txeu bês. I ti mésmu el pode pidi pa el trabadja na un otu dia ô pa diskonta na dinheru ki el ta resebe fin di mês.

11. Pamodi ki nu debe kontinua ta ora sobri kes kuza ki sta preokupa-nu?

¹¹ Jeová ta spera ma nu ta kontinua ta ora sobri kes kuza ki sta preokupa-nu. (1 Tes. 5:17) Jizus fla ma alguns di nos orason ka ta respondedu lógu. (Luk. 11:9) Nton ka bu dizisti! Ora di korason i txeu bês. (Luk. 18:1-7) Óras ki nu ta kontinua ta ora sobri un asuntu, nu ta mostra Jeová ma kel kuza é inportanti pa nos. Tanbê nu ta mostra nos fé na se kapasidadi di djuda-nu.

PAMODI KI TALVÊS NU MESTE FAZE ALGUNS MUDANSA NA NOS ORASON?

12. (a) Kal ki é kel primeru pergunta ki nu debe faze nos kabésa sobri kes kuza ki nu ta pidi na nos orason i pamodi? (b) Modi ki nu pode ten serteza ma nos orason ta mostra ruspetu pa Jeová? (Odja kuadru “Nhas orason ta mostra ruspetu pa Jeová?”)

¹² Si nu ka resebe un kuza ki nu pidi na orason nu pode faze três pergunta. Primeru é: ‘N sta ta ora ta pidi kuza dretu?’ Txeu bês nu ta atxa ma nu sabe kuzê ki é midjór pa nos. Má, kes kuza ki nu ta pidi pode ka ser midjór pa nos. Si nu sta ta ora sobri un prubléma, talvês ten un manera mutu más midjór di rezolve kel prubléma. I alguns kuza ki nu sta pidi pode ka sta di akordu ku vontadi di Jeová. (1 Juan 5:14) Pensa na izénplu di kel pai ku mai ki dja nu papiaba di es antis. Es pidiba Jeová pa ses fidju kontinua na verdadi. Kel-li ta parse ma é un bon pididu. Má, Jeová ka ta obriga ningen pa sirbi-l. El krê pa tudu nos, i kel-li ta inklui nos fidjus, skodje sirbi-l. (Deut. 10:12, 13; 30:19, 20) Nton, envês di kel pai ku mai pidi Jeová pa ses fidju kontinua na verdadi, es pode pidiba pa el djuda-s toka korason di ses fidju, asi pa ses fidju ama Jeová i bira se amigu. — Pro. 22:6; Efé. 6:4.

13. Sima sta na Ebreus 4:16, na ki ténpu ki Jeová ta ben djuda-nu? Splika.

¹³ Sugundu pergunta é: ‘É ténpu sértu di Jeová responde nha orason?’ Nu pode xinti ma nu meste pa nos orason respondedu lógu. Má na verdadi, Jeová sabe kal ki é ténpu sértu pa el djuda-nu. (Lé Ebreus 4:16.) Óras ki nu ka resebe lógu kuzê ki nu pidi, nu pode pensa ma respósta di Jeová é ‘Nau.’ Má na verdadi, se respósta pode ser ‘Gósi nau.’ Pur izénplu, pensa na kel irmon jóven ki ora pa el rekupera di se duénsa. Si Jeová fazeba un milagri pa kuraba el, Satanás pode flaba ma kel irmon kontinua ta sirbi Jeová sô pamodi Jeová kura-l di se duénsa. (Jó 1:9-11; 2:4) Alén di kel-li, Jeová dja marka un ténpu pa el ben kura-nu di tudu duénsa. (Isa. 33:24; Apo. 21:3, 4) Timenti kel dia ka txiga, nu ka debe spera ma Jeová ta faze milagris pa kura-nu di nos duénsa. Nton, kel irmon pode pidiba Jeová pa da-l forsa i pas déntu di el pa el aguenta se duénsa i kontinua ta sirbi-l di manera fiel. — Sal. 29:11.

14. Kuzê ki nu ta prende ku spiriénsia di Janice?

¹⁴ Pensa na spiriénsia di Janice, ki ora pamodi el krê ba sirbiba na Betel. Sinku anu dipôs el intende modi ki Jeová responde se orason. El fla: “Jeová uza kel ténpu li pa inxina-m i pa djuda-m bira un kriston midjór. N meste biraba nha kunfiansa na el más forti. N meste midjoraba manera ki N ta fazeba nha studu di Bíblia. N meste prendeba ma N pode ser filís ka ta inporta na undi ki N sta ta sirbi Jeová.” Un ténpu dipôs, Janice ku se maridu konvidadu pa fika ta vizita kongregasons. Dipôs di pensa na kuzê ki kontise, Janice fla: “Jeová responde nhas orason, má di manera ki N ka staba ta spera. Leba ténpu pa N intende ma respósta ki Jeová da-m foi un prezenti bunitu. N ten txeu gratidon pamodi el da-m kel oportunidadi li di xinti se amor i se bondadi.”

15. Pamodi ki alvês é bon ka fla kal ki é soluson ki nu krê na nos orason? (Odja fotus.)

¹⁵ Tirseru pergunta é kel-li: ‘N sta meste faze orason sobri algun prubléma?’ Enbóra é bon nu pâpia ku Jeová klaru, si nu ka fla-l kal ki é soluson ki nu krê ta fika más fásil nu diskubri kuzê ki el krê pa nos. Pensa na izénplu di kel irman soltera ki krê kursa Skóla pa Pregadoris di Reinu. El krê ba kursa skóla pa el pode ba sirbi undi ki ten más nisisidadi. Timenti el ta ora pa el konvidadu pa kel skóla, tanbê el pode pidi Jeová pa djuda-l odja otus manera di faze más na pregason. (Atus 16:9, 10) Nton, pa el aji di akordu ku se orason el pode pergunta se enkaregadu di grupu di kongregason si ten algun kongregason pértu ki sta meste más pioneru ô el pode skrebe pa filial pa pergunta undi ki mestedu di más publikador.e

16. Di kuzê ki nu pode ten serteza?

¹⁶ Sima nu prende, nu pode ten serteza ma Jeová ta responde nos orason ku amor i di manera justu. (Sal. 4:3; Isa. 30:18) Alvês respósta pode ka ser kel ki nu staba ta spera, má Jeová nunka ka ta dexa di obi nos orason. El ta ama-nu txeu i nunka el ka ta bandona-nu. (Sal. 9:10) Pur isu, kontinua ta ‘kunfia sénpri na el’ i abri bu korason pa el na orason. — Sal. 62:8.