Jeová ten txeu amor pa bo

1. Kuzê ki bu ta pensa na el óras ki bu ta pensa na Jeová?

DJA bu kustuma imajina modi ki Jeová é? Óras ki bu ta pâpia ku el na orason, kuzê ki bu ta pensa na el? Enbóra nu ka ta odja Jeová, Bíblia ta pâpia di el di txeu manera. Jeová ta txomadu di ‘sól i skudu’ i “un lumi ki ta kaba ku tudu kuza.” (Sal. 84:11; Ebr. 12:29) Un skritor di Bíblia fla ma Jeová é sima pédra di safira, féru ki ta brilha i arkuíris ki ta brilha. (Eze. 1:26-28) Alguns di kes kuza li pode dexa-nu txeu dimiradu ô ti mésmu ku medu.

2. Kuzê ki pode ka dexa alguns algen ser amigu di Jeová?

² Dja ki nu ka ta konsigi odja Jeová, pode ser difísil nu kridita ma el ta ama-nu. Alguns algen ta atxa ma Jeová nunka ka ta ama-s pamodi kuzas ki es faze na pasadu. Talvês nunka es ka tevi un pai ki ta ama-s. Jeová ta intende kes sentimentu li i modi ki es ta afeta-nu. Pa djuda-nu, el ta dexa-nu sabe através di Bíblia ma el é un Deus ki ten txeu konpaxon.

3. Pamodi ki nu debe prende más sobri amor di Jeová?

³ Amor é kel palavra ki ta mostra más midjór ken ki Jeová é. (1 Juan 4:8) Jeová é amor. Tudu kuza ki el ta faze ten bazi na amor. Amor di Deus é txeu grandi i el ten txeu puder, ki el ta mostra-l ti pa kes ki ka ta ama-l. (Mat. 5:44, 45) Na kel artigu li, nu ta ben pâpia sobri Jeová i se amor. Kantu más nu prende sobri nos Deus, más nu ta ama-l.

JEOVÁ TA AMA-NU TXEU

4. Modi ki konpaxon di Jeová ta pô-nu ta xinti? (Odja fotu.)

⁴ “Jeová ten txeu konpaxon”. (Tia. 5:11) Na Bíblia, el ta konpara se kabésa ku un mai ki ten konpaxon. (Isa. 66:12, 13) Imajina un mai ki ta kuida di se fidju pikinoti ku amor. Ku amor, el ta karega-l na se brasus i el ta pâpia ku el ku un vós kalmu i suavi. Óras ki se fidju ta txora ô el ta xinti dór, el ta faze di tudu pa el kuida di el. Óras ki nu sta ta sufri, nu pode ten serteza di amor di Jeová. Salmista skrebe: ‘Kantu preokupasons toma kónta di mi, Bu konsola-m i bu pô-m ta fika kalmu.’ — Sal. 94:19.

5. Kuzê ki amor lial di Jeová ta siginifika pa bo?

⁵ Jeová é lial. (Sal. 103:8) El ka ta dizisti di nos óras ki nu ta faze algun kuza mariadu. Kes israelita mágua Jeová txeu bês. Má, óras ki es ta rapendeba di kes kuza mariadu ki es fazeba, Jeová ta daba es serteza di se amor lial ki el tinha pa es. Pur izénplu, el fla-s: ‘Bu pasa ta ten txeu valor pa nhas odju, bu dadu ónra i N ta ama-u.’ (Isa. 43:4, 5) Amor di Jeová ka muda. Nu pode sénpri kunfia na el. Sikrê nu faze un pekadu gravi, Jeová ka ta bandona-nu. Óras ki nu ta rapende i nu ta volta pa Jeová, nu ta odja ma inda el ta ama-nu. El promete ma ‘el ta púrdua txeu.’ (Isa. 55:7) Bíblia ta fla ma óras ki kel-li kontise “Jeová pode traze ténpu di alíviu”. — Atus 3:19.

6. Kuzê ki Zacarias 2:8 ta inxina-nu sobri Jeová?

⁶ Lé Zacarias 2:8. Pamodi Jeová ta ama-nu, el ta intende modi ki nu ta xinti i el tene gana di proteje-nu. El ta xinti tristi óras ki nu sta preokupadu. Pur isu, nu pode ten serteza ma Jeová ta responde nos orason óras ki nu ta fla: ‘Guarda-m sima minina di bus odju’. (Sal. 17:8) Odju é un párti di korpu sensível i ki ten txeu valor. Nton, óras ki Jeová konpara-nu ku minina di se odju, é sima si el sta fla: ‘Kalker algen ki mexe ku nhos, nha povu, es sta mexe ku un kuza ki ten txeu valor pa mi.’

7. Pamodi ki nu meste bira nos kunfiansa na amor di Jeová más fórti?

⁷ Jeová krê pa nu ten serteza ma el ta ama-nu. Má el sabe ma pamodi kuzas ki dja nu pasa na vida, nu pode pergunta si el ta ama-nu mê. Ô talvês gósi nu pode sta pasa pa un situason ki pode poi nos kunfiansa na amor di Jeová na próva. Kuzê ki ta bira nos kunfiansa más fórti? É óras ki nu ta prende modi ki Jeová mostra se amor pa Jizus, pa kes skodjedu ku spritu santu i pa nos tudu.

MODI KI JEOVÁ TA MOSTRA SE AMOR

8. Pamodi ki Jizus tinha serteza ma se Pai ta amaba el?

⁸ Duránti milharis di anu, Jeová ku se Fidju ki el krê txeu, vive djuntu na séu i es dizenvolve un amor fórti pa kunpanheru. Kel amizadi entri es dôs é más antigu di ki mundu. Jeová mostra klaru ma el ten txeu amor pa Jizus, sima nu ta odja na Mateus 17:5. El pode sô flaba: ‘Kel-li é kel ki N ta aprova.’ Má el krê pa nu sabeba modi ki el ta amaba Jizus, pur isu el txoma-l di “nha Fidju, ki N ta ama”. Jeová staba ku txeu orgulhu di ken ki Jizus éra i di kuzê ki el sta ba fazeba. (Efé. 1:7) I Jizus ka tinha dúvida ma se Pai ta amaba el. El tinha tudu serteza di amor di se Pai. Txeu bês, el fla ku kunfiansa ma se Pai ta ama-l. — Juan 3:35; 10:17; 17:24.

9. Ki palavra ta mostra ma Jeová ta ama kes skodjedu ku spritu santu? Splika. (Romanus 5:5)

⁹ Jeová tanbê mostra ma el ta ama kes skodjedu ku spritu santu. (Lé Romanus 5:5.) Repara kel palavra “bazadu”. Un livru ta konpara kel palavra li ku “un korenti di agu ta kai riba nos”. Kel izénplu li ta mostra ma Jeová ta ama kes skodjedu ku spritu santu txeu! I es sabe ma Deus ‘ta ama-s’. (Judas 1) Apóstlu Juan mostra modi ki el staba ta xinti kantu ki el skrebe: “Nhos odja ki tipu di amor ki nos Pai mostra-nu, asi pa nu pode txomadu fidjus di Deus!” (1 Juan 3:1) Amor di Jeová é sô pa kes skodjedu ku spritu santu? Nau, Jeová prova ma el ta ama nos tudu.

10. Kal ki é maior próva di amor di Jeová pa bo?

¹⁰ Kal ki é maior próva di amor di Jeová ki nu ten? É resgati. Kel-li é kel próva di amor más grandi ki dja mostradu na mundu! (Juan 3:16; Rom. 5:8) Jeová dexa se Fidju, ki ten txeu valor pa el, móre pa tudu algen, asi pa nos pekadu purduadu i pa nu pode ser Se amigus. (1 Juan 4:10) Sima nu ta midita na présu ki Jeová i Jizus paga, más nu ta konsigi intende modi ki es ta ama kada un di nos txeu. (Gál. 2:20) Jeová ka paga resgati sô pamodi se justisa. Resgati é un prezenti ki nu dadu ku amor. Jeová mostra ma el ta ama-nu kantu ki el sakrifika kel ki tinha más valor pa el, Jizus. Jeová dexa se Fidju sufri i móre pa djuda-nu.

11. Kuzê ki nu ta prende di Jeremias 31:3?

¹¹ Sima dja nu odja, Jeová ka ta guarda se sentimentus sô pa el, má el ta mostra se amor. (Lé Jeremias 31:3.) Jeová atrai-nu pa el pamodi el ta ama-nu. (Konpara ku Deuteronómio 7:7, 8.) Nada nen ningen ka ta pode sipara-nu di kel amor li. (Rom. 8:38, 39) Modi ki kel amor li ta pô-u ta xinti? Lé Salmo 23 i odja modi ki amor i konpaxon di Jeová poi Davidi ta xinti i modi ki el pode pô-u ta xinti.

MODI KI AMOR DI JEOVÁ TA PÔ-U TA XINTI?

12. Modi ki bu ta rezumiba Salmo 23?

¹² Lé Salmo 23:1-6. Salmo 23 é un kántiku ki ta mostra kunfiansa na amor i konpaxon di Jeová. Davidi, skritor di kel salmu li, pâpia di kel amizadi fórti ki tinha entri el i se Pastor, Jeová. Davidi ta dexaba Jeová giaba el i el tinha tudu kunfiansa na Jeová. Davidi sabia ma Jeová ta mostraba el kel amor ki el ta xintiba pa el tudu dia. Pamodi ki el tinha kel kunfiansa li?

13. Pamodi ki Davidi tinha serteza ma Jeová ta kuidaba di el?

¹³ ‘Nada ka ta ben falta-m’. Davidi ta xintiba ma Jeová ta kuidaba di el pamodi Jeová sénpri da-l kel ki el mesteba. Davidi tanbê sabia ma Jeová éra se amigu i ma el tinha se aprovason. É pur isu, ki el tinha serteza ma ka ta inporta kuzê ki kontiseba ku el na futuru, Jeová ta kontinua ta kuidaba di el i ta daba el kel ki el mesteba. Kel kunfiansa ki Davidi tinha na amor di Jeová éra más fórti di ki kalker un di se preokupasons i kel-li ta poba el ta xinti kontenti i satisfetu. — Sal. 16:11.

14. Modi ki Jeová pode kuida di nos ku amor?

¹⁴ Jeová ta kuida di nos ku amor, prinsipalmenti óras ki nu sta pasa pa situason difísil na vida. Klara,a ki ten 20 anu ta sirbi na Betel, ka sabia modi ki el ta djudaba se família kantu ki es pasa pa prublémas gravi un tras di kel otu. Se pai panha tronbózi, un di se irman dizasosiadu i se família perde ses nogósiu i ses kaza. Modi ki Jeová kuida di el ku amor? Klara fla: “Jeová djuda pa nha família tinha sénpri kel ki es mesteba pa kada dia. Txeu bês, Jeová ti mésmu da-nu más di ki kel ki nu mesteba! Di vês en kuandu, N ta pensa na modi ki Jeová djuda-nu i nunka N ka ta skese se amor. Kes lenbransa li djuda-m kontinua ta sirbi Jeová ku alegria kantu N pasa pa otus prubléma na vida.”

15. Pamodi ki Davidi xinti animadu? (Odja dizenhu.)

¹⁵ ‘El ta anima-m’. Alvês, Davidi ta xintiba preokupadu pamodi tudu kes prubléma i dizafiu ki el ta pasaba pa el. (Sal. 18:4-6) Má amor di Jeová ta animaba el. Jeová leba se amigu ki staba kansadu pa ‘padja verdi’ i ‘pa lugaris di diskansu ben regadu.’ Pamodi kel-li, Davidi ganha forsa i el kontinua ta sirbi Jeová ku alegria. — Sal. 18:28-32.

16. Modi ki amor di Jeová ta anima-nu?

¹⁶ Di mésmu manera, oji ‘é pamodi amor lial di Jeová ki nu ka kabadu ku el’ óras ki nu ta pasa pa provasons i difikuldadis na vida. (Lam. 3:22; Kol. 1:11) Odja izénplu di Rakel. El fika dizorientadu kantu se maridu bandona-l i bandona Jeová duránti COVID-19. Kuzê ki Jeová faze pa el? El fla: “Jeová ranja manera pa N xinti ma N ta amadu. El da-m amigus ki ta pasaba ténpu ku mi, ta trazeba mi kumida, ta mandaba mi mensajen i testus di Bíblia ki da-m koraji, es ta daba mi un sorizu i es kontinua ta lenbra-m ma Jeová staba ta kuida di mi. N ta agradese Jeová tudu óra pamodi el da-m un família grandi ki ten txeu amor.”

17. Pamodi ki Davidi ‘ka xinti medu di ninhun kuza mariadu’?

¹⁷ ‘N ka ta xinti medu di ninhun kuza mariadu, pamodi bu sta ku mi’. Txeu bês vida di Davidi staba na prigu, i el tinha txeu inimigus poderozu. Má, amor di Jeová pô-l ta xinti suguru i protejedu. Davidi pode xintiba ma Jeová staba ku el na tudu situason, i kel-li pô-l ta xinti kalmu. Pur isu, el kanta: ‘[Jeová] libra-m di tudu nhas medu.’ (Sal. 34:4) Enbóra alvês Davidi ta xintiba txeu medu, el konsigi vense se medu pamodi el sabia ma Jeová ta amaba el.

18. Modi ki ten serteza ma Jeová ta ama-nu, ta da-nu forsa óras ki nu sta ku medu?

¹⁸ Modi ki ten serteza ma Jeová ta ama-nu ta da-nu forsa óras ki nu ta pasa pa un situason difísil? Un pionera ki txoma Suzi, fla modi ki el ku se maridu xinti kantu ses fidju mata kabésa. El fla: “Óras ki un kuza tristi ta kontise na bu vida, kel-li ta afeta-u txeu i bu ta fika ku medu ma otus kuza mariadu ta ben kontise. Má konpaxon di Jeová pô-nu ta xinti suguru i protejedu.” Rakel ki dja nu papiaba di el antis, fla: “Un dia di noti kantu nha korason staba tristi dimás i N staba preokupadu i ku medu, N ora ku vós altu ta txora pa Jeová. Na kel momentu N xinti ma el poi nha korason ta fika kalmu, sima un mai ta faze ku se bebé i N durmi. Nunka N ka ta skese di kel momentu.” Un ansion ki txoma Tásiu, pasa kuatu anu na kadia pamodi el nega bai trópa. Modi ki el xinti amor di Jeová? El fla: “Jeová da-m más ki kel ki N mesteba. Kel-li da-m más serteza ma N pode kunfia na el di tudu nha korason. Jeová uza se spritu santu pa da-m alegria, enbóra N staba na un lugar ki ta poba algen ta xinti tristi. Kel-li djuda-m odja ma kantu más N kunfiaba na Jeová, más N ta xintiba se amor pa mi. Pur isu, N bira pioneru fíksu kantu inda N staba na kadia.”

BIRA AMIGU DI BU DEUS DI KONPAXON

19. (a) Modi ki sabe ma Jeová ta ama-nu ta afeta kuzê ki nu ta fla na nos orason? (b) Ki testu ki ta pâpia sobri amor di Jeová ki más ta toka bu korason? (Odja kuadru “Palavras ki ta djuda-nu xinti amor di Jeová”.)

¹⁹ Kes spiriénsia ki nu pâpia di el ta mostra ma Jeová, “kel Deus di amor”, sta ku nos! (2 Kor. 13:11) El ten interesi na kada un di nos. Nu ten serteza ma nu ‘sta rodiadu di Se amor lial.’ (Sal. 32:10) Sima nu ta ba ta midita na maneras ki Jeová mostra-nu se amor, nu ta odja más klaru ma el ta preokupa ku nos i nu ta xinti más se amigu. Nu pode ora pa el sen medu i fla-l modi ki nu ta meste di se amor. Nu pode pâpia ku el sobri tudu nos preokupason, ku kunfiansa ma el ta intende i ma el tene gana di djuda-nu. — Sal. 145:18, 19.

20. Modi ki amor di Jeová ta pô-nu ta ser se amigu?

²⁰ Sima un lumi ta atrai-nu na un dia ki sta friu, tanbê nu ta xinti atraídu pa amor di Jeová. Enbóra amor di Jeová ten txeu puder, tanbê el ten konpaxon. Nton, fika kontenti ku amor di Jeová na bu vida. I pa nos tudu seta se amor óras ki nu ta fla: ‘N ta ama Jeová’! — Sal. 116:1.