1. Ken ki é Jizus?

Jizus é un anju poderozu ki ta vive na Séu. Jeová kria-l antis di el faze kalker otu kuza. É pur isu ki el ta txomadu di ‘primeru di tudu kriason’. (Colossenses 1:15) Bíblia ta fla ma Jizus é ‘Fidju unijénitu’ di Deus pamodi é sô el ki Deus kria ku se mô. (João 3:16) Jizus trabadja djuntu ku se Pai, Jeová, i el djuda-l kria tudu kes otu kuza. (Lé Provérbios 8:30.) Jizus kontinua ta ten un amizadi fórti ku Jeová. Ku lialdadi, el ta sirbi sima pórta-vós di Deus, ô ‘Palavra’, i el ta leba Se mensaji i instrusons. — João 1:14.

Nos tudu nu ta peka, nu ta sufri i nu ta móre pamodi Adon ku Eva ka obi ku Deus.a Má nu ka fika sen speransa! Jeová ranja un manera pa salva-nu di pekadu ku mórti kantu el manda se Fidju, Jizus Kristu. Bíblia ta inxina ma kantu Jizus móre el paga resgati. Resgati é présu ki ta pagadu pa liberta un algen. Jizus paga kel présu kantu el da se vida perfetu pa nos. (Lé Mateus 20:28.) Kantu Jizus abri mô di se direitu di vive pa tudu ténpu na Téra, el abri kaminhu pa nu torna ganha tudu kes kuza ki Adon ku Eva perde. Jizus tanbê mostra ma el ku Jeová ta ama-nu txeu. Kel lison li ta ben djuda-u mostra más gratidon pa kuzê ki Jizus faze pa nos.

1. Modi ki mórti di Jizus pode djuda-nu oji?

Dja ki nos é pekador, nu ta faze txeu kuza ki ta poi Jeová tristi. Má, pamodi sakrifisiu di Jizus, nos pekadu pode purduadu. Pa kel-li kontise, nu meste rapende di korason, pidi Jeová pa purdua-nu i faze nos midjór pa nu ka ripiti kes mésmu éru. Si nu faze si nu pode ten un amizadi fórti ku Deus. (1 João 2:1) Bíblia ta fla: ‘Kristu móre pa pekadus un bês pa tudu ténpu, un justu pa injustus, pa pode leba nhos pa Deus.’ — 1 Pedro 3:18.

2. Modi ki mórti di Jizus pode djuda-nu na futuru?

Jeová manda Jizus pa da se vida perfetu ‘pa tudu kenha ki mostra fé na Jizus ka ser distruídu, má pa ten vida pa tudu ténpu.’ (João 3:16) Pur isu, Jeová ta ben kaba ku tudu kes kuza mariadu ki ta kontise pamodi Adon ka obi ku el. Kel-li krê fla ma si nu ten fé na sakrifisiu di Jizus, nu ta ben ten oportunidadi di vive pa tudu ténpu na un paraízu na Téra! — Isaías 65:21-23.

SABE MÁS

3. Mórti di Jizus ta liberta-nu di pekadu ku mórti

VÍDIU: Pamodi ki Jizus móre? — Párti 1 (2:01)

• Ki oportunidadi Adon perde kantu el ka obi ku Deus?

Lé Romanos 5:12, i dipôs pâpia sobri kel pergunta li:

• Modi ki pekadu di Adon afeta bu vida?

Lé João 3:16, i dipôs pâpia sobri kel pergunta li:

• Pamodi ki Jeová manda se Fidju pa Téra?

1. Adon éra un ómi perfetu ki ka obi ku Deus, i pamodi kel-li nu ta peka i nu ta móre

2. Jizus éra un ómi perfetu ki obi ku Deus, i pamodi kel-li nu pode ten oportunidadi di bira perfetu i vive pa tudu ténpu

4. Mórti di Jizus pode salva tudu algen

VÍDIU: Pamodi ki Jizus móre? — Párti 2 (2:00)

• Modi ki mórti di un ómi pode salva tudu algen?

Lé 1 Timóteo 2:5, 6, i dipôs pâpia sobri kel pergunta li:

• Adon éra un ómi perfetu. Má pamodi el peka, nos tudu nu ta peka i nu ta móre. Jizus tanbê éra un ómi perfetu. Modi ki Jizus paga resgati ‘di valor izatu pa tudu algen’?

5. Resgati é un prezenti di Jeová pa bo

Pa kes amigu di Jeová, resgati é un prezenti ki ka ten konparason. Pur izénplu, lé Gálatas 2:20, i dipôs pâpia sobri kel pergunta li:

• Modi ki apóstlu Polu mostra ma el ta odjaba resgati sima un prezenti di Deus pa el?

Kantu Adon peka, ael i tudu kes algen ki ben dipôs di el kondenadu pa móre. Má Jeová manda se Fidju pa móre, asi pa nu pode ten oportunidadi di vive pa tudu ténpu.

Sima bu ta ba ta lé kes versíklu li, imajina modi ki Jeová xinti kantu el odja se Fidju ta sufri. Lé João 19:1-7, 16-18, i dipôs pâpia sobri kel pergunta li:

• Modi ki bu ta xinti ku kuzê ki Jeová i Jizus faze pa bo?

REZUMU

Dja ki Jizus móre pa nos, Jeová pode púrdua nos pekadu i nu pode vive pa tudu ténpu.

Perguntas di rezumu

• Pamodi ki Jizus móre?

• Modi ki vida perfetu di Jizus pode paga resgati di valor izatu pa tudu algen?

• Modi ki mórti di Jizus pode djuda-u?

DJOBE MÁS

Prende pamodi ki vida perfetu di Jizus ta txomadu di resgati.

“Pamodi ki sakrifisiu di Jizus ta salva un monti di algen?” (Artigu na jw.org)

Odja kuzê ki nu meste faze pa nu salva.

“Modi ki Jizus ta salva-nu?” (Artigu na jw.org)

Jeová pode púrdua ti pekadus gravi?

“Respóstas pa perguntas di Bíblia” (Sentinéla, 1 di maiu di 2013)

Odja modi ki prende sobri sakrifisiu di Jizus djuda un ómi muda se manera di ser.

“Ami é ka skravu di violénsia más” (Artigu na jw.org)

1. Kal ki é un manera di mostra ma nu ta da valor pa kuzê ki Deus ku Jizus faze pa nos?

Bíblia ta promete ma ‘tudu kenha ki mostra fé na Jizus’ pode vive pa tudu ténpu. (João 3:16) Kuzê ki siginifika mostra fé? É ka sô fla ma nu ta kridita na Jizus. Má, nu meste mostra fé na disizons ki nu ta toma i na kuzas ki nu ta faze. (Tiago 2:17) Óras ki nu ta mostra fé na kes kuza ki nu ta fla i ki nu ta faze, nos amizadi ku Jizus i ku se Pai, Jeová, ta bira más fórti. — Lé João 14:21.