Fé é un kualidadi ki ta da-nu forsa

FÉ É un kualidadi ki ten txeu puder. Pur izénplu, Satanás ta faze di tudu pa el kaba ku nos amizadi ku Deus, má é fé ki ta da-nu kapasidadi di ‘paga tudu flexas di lumi di kel Malvadu.’ (Efé. 6:16) Ku fé, nu ta konsigi vense prublémas ki pode parse grandi sima un montanha. Jizus fla se disiplus: ‘Si nhos ten fé di tamanhu di un gran di mustarda, nhos ta fla kel monti li: “Muda di li pa la, i el ta muda”’. (Mat. 17:20) Dja ki fé é un kualidadi ki ta bira nos amizadi ku Jeová más fórti, nu debe faze kes pergunta li: Kuzê ki é fé? Modi ki fé pode ser influensiadu pa kel ki nu ten na korason? Modi ki nu pode bira nos fé más fórti? Na kenha ki nu debe ten fé? — Rom. 4:3.

KUZÊ KI É FÉ?

Fé é mutu más di ki kridita na kuza ki Bíblia ta fla, pamodi ‘ti dimónis ta kridita [ma Deus izisti] i es ta treme.’ (Tia. 2:19) Nton, kuzê ki é fé?

Bíblia ta fla ma fé ta nvolve dôs kuza. Primeru, ‘fé é kel kunfiansa sértu ma kel ki nu sta ta spéra ta kontise’. (Heb. 11:1a) Si bu ten fé, bu ka ten dúvida ma tudu kuza ki Jeová ta fla é verdadi i ta ben kontise. Pur izénplu, Jeová fla israelitas: ‘Si nhos ta pode anulaba nha kontratu di dia i nha kontratu di noti, pa ka tinha dia ku noti na ténpu markadu, sô na kel kazu li é ki nha kontratu ku Davidi, nha sérvu, ta sérba anuladu’. (Jer. 33:20, 21) Bu ten medu ma algun dia sól ta dexa di parse na séu i dia ku noti ta dexa di izisti? Klaru ki nau. Pamodi ten kes lei di fízika ki ta poi ta ten dia ku noti i ki ta poi Téra sénpri ta jira na vólta di sól. Si bu ka ten dúvida di leis di fízika, bu debe duvida di kes promésa ki Kriador di kes lei faze pa nos? Klaru ki nau! — Isa. 55:10, 11; Mat. 5:18.

Sugundu, fé é ‘próva klaru di kuzas ki nu ka ta odja má ki é rial.’ Bíblia ta fla ma fé é ‘próva klaru’, ô ‘próva ki ta konvense’ di kuzas ki nu ka ta odja, má ki é rial. (Heb. 11:1b; nóta di rodapé) Di ki manera? Imajina ma un mininu ta pergunta-u: ‘Modi ki bu sabe ma ar ta izisti?’ Nunka bu ka odja ar, má di sertéza bu ta djudaba kel mininu rasusina ku bazi na kuzas ki ta prova ma ar ta izisti, sima ar ki nu ta respira, kuzas ki béntu ta faze i otus próva. Kes próva li pode konvense kel mininu, i el ta seta ma ar ta izisti sikrê el ka ta odja-l. Di mésmu manera, fé meste ten bazi na próva ki ta konvense. — Rom. 1:20.

FÉ TA NVOLVE NOS KORASON

Dja ki fé meste di próvas, un algen sô ta pode ten fé si primeru el ‘ten un konhisimentu izatu di verdadi.’ (1 Tim. 2:4) Má sô konhisimentu ka ta txiga. Apóstlu Polu skrebe: ‘Ku korason ta mostradu fé’. (Rom. 10:10) Un algen ka debe sô kridita na verdadi, má tanbê el debe da-l valor. Sô asi é ki el ta konsigi mostra fé, ô vive di un manera ki ta agrada Deus. (Tia. 2:20) Pa más ki un algen ten próvas ki ta konvense, si el ka ta da valor pa verdadi di korason, el sta ta nega muda se krénsas ki el tinha ô el sta ta ranja diskulpa pa el faze kel ki el krê. (2 Ped. 3:3, 4; Jud. 18) É pur isu ki na ténpu ki Bíblia skrebedu, é ka tudu algen ki odja kes milagri ki dizenvolve fé. (Núm. 14:11; João 12:37) Spritu santu di Deus sô ta dizenvolve fé na korason di kes algen ki ta ama verdadi. — Gál. 5:22; 2 Tes. 2:10, 11.

MODI KI DAVIDI DIZENVOLVE UN FÉ FÓRTI

Entri kes algen ki tinha un fé fórti nu ta atxa Rei Davidi. (Heb. 11:32, 33) Má é ka tudu algen na família di Davidi ki tinha un fé sima el. Odja izénplu di Eliabi ki éra irmon más bédju di Davidi. Kantu Gulias dizâfia povu di Deus, Davidi fika txeu xatiadu. Má Eliabi mostra falta di fé kantu el fla Davidi ma el tinha mau intenson. (1 Sam. 17:26-28) Ningen ka ta nase ku fé; nen el ka ta erda fé di se mai ku se pai. Pur isu, fé di Davidi éra pamodi el tinha un amizadi fórti ku Deus.

Na Salmo 27, Davidi mostra kuzê ki djuda-l ten un fé fórti. (v. 1) Davidi ta pensaba txeu na kuzas ki kontiseba ku el i modi ki Jeová lida ku se inimigus. (vs. 2, 3) El ta daba txeu valor pa tabernákulu di Jeová. (v. 4) Davidi ta adoraba Deus djuntu ku se kunpanherus na tabernákulu. (v. 6) Sénpri el ta fazeba orason pa Jeová. (vs. 7, 8) Davidi tanbê kria pa Jeová inxina-l se kaminhu. (v. 11) Fé éra rei di inportanti pa Davidi ki el pergunta: ‘Undi ki N ta staba si N ka tinha fé?’ — v. 13.

MODI KI NU PODE BIRA NOS FÉ MÁS FÓRTI

Bu pode ten tanbê un fé sima Davidi si bu imita kes kuza ki el pâpia di el na Salmo 27. Dja ki fé ten bazi na konhisimentu izatu, é inportanti studa Bíblia i publikason. Kantu más bu ta studa, ta fika más fásil pa bu ten kel kualidadi li ki spritu di Deus pode djuda-u dizenvolve. (Sal. 1:2, 3) Óras ki bu ta studa tra ténpu pa pensa txeu. Si bu ta pensa txeu na kuzê ki bu ta studa, bu ta xinti más gratidon pa Jeová. Sima bu gratidon pa Jeová ta bira más txeu, bu vontadi di mostra bu fé ta omenta i bu ta xinti más gana di adora-l na runions i di pâpia sobri bu speransa pa otus algen. (Heb. 10:23-25) Tanbê, bu pode mostra bu fé óras ki bu ta ‘kontinua ta ora sénpri.’ (Lúkas 18:1-8, BPK ) Pur isu, ‘faze orason sénpri’ pa Jeová, i kúnfia ma el ta ‘kuida di bo.’ (1 Tes. 5:17; 1 Ped. 5:7) Fé ta pô-nu ta aji, i kuzas ki nu ta faze ta bira nos fé más fórti. — Tia. 2:22.

TEN FÉ NA JIZUS

Na kel noti antis di Jizus móre, el fla se disiplus: ‘Nhos mostra fé na Deus; nhos mostra fé na mi tanbê.’ (João 14:1 ) Nton nu meste kúnfia na Jeová, má tanbê na Jizus. Modi ki nu pode mostra fé na Jizus? Nu ben odja três manera.

Primeru, pensa na resgati sima un prezenti di Deus pa bo. Apóstlu Polu fla: ‘N ta vive pamodi fé na Fidju di Deus, ki ama-m i ntrega se kabésa pa mi.’ (Gál. 2:20) Sima Polu, bu pode mostra fé na Jizus, óras ki bu ta kridita ma resgati pode djuda-u, ma el ta sirbi di bazi pa Deus púrdua bus pekadu, ma el ta da-u speransa di vive pa tudu ténpu i ma el é próva más grandi di amor di Deus pa bo. (Rom. 8:32, 38, 39; Efé. 1:7) Si bu ten kel sertéza li, el pode djuda-u kontrola kes sentimentu mariadu. — 2 Tes. 2:16, 17.

Sugundu, bu ta bira más amigu di Jeová óras ki bu ta faze orason. I nu ta faze kel-la pamodi sakrifisiu ki Jizus faze. Através di resgati, nu ta pode ora pa Jeová ‘ku kunfiansa na pâpia, pa nu pode resebe mizerikórdia i atxa bondadi ki ka meresedu pa djuda-nu na ténpu sértu.’ (Heb. 4:15, 16; 10:19-22) Orason ta djuda-nu sta más disididu na ka peka kóntra Jeová. — Luc. 22:40.

Tirseru, obi ku Jizus. Apóstlu Juan skrebe: ‘Ken ki mostra ma el ten fé na Fidju, ta ten vida pa tudu ténpu; ken ki ka obi ku Fidju ka ta odja vida, má raiba di Deus ta kontinua riba di el.’ (João 3:36) Repara ma Juan fla ma un algen ki ka ta mostra fé el ka ta obi. Pur isu, bu ta mostra fé na Jizus óras ki bu ta obi ku el. Un manera di obi ku Jizus é óras ki bu ta sigi ‘lei di Kristu’ ô bu ta sigi tudu kel ki el inxina i ki el manda. (Gál. 6:2) Otu manera di obi ku Jizus é óras ki bu ta sigi orientasons ki ta dadu através di ‘skravu fiel i prudenti’. (Mat. 24:45) Si bu ta obi ku Jizus, bu ta ten forsa pa aguenta prublémas ki pode parse fórti sima un tenporal. — Luc. 6:47, 48.

‘NHOS BIRA NHOS FÉ KI É SANTU MÁS FÓRTI’

Un bês, un ómi fla Jizus: ‘N ten fé! Djuda-m na undi N meste di fé!’ (Mar. 9:24) El tinha algun fé, má el seta ma el mesteba di más fé. Sima kel ómi li, pode ten algun situason na vida ki nu meste ten más fé. Nos tudu nu pode bira nos fé más fórti gósi. Sima dja nu odja, nu meste studa Palavra di Deus i pensa txeu na el. Kel-li ta poi nos korason ta xinti más gratidon pa Jeová. Tanbê, nos fé ta bira más fórti si djuntu ku nos irmons nu adora Jeová, nu pâpia di nos speransa pa otus i nu faze orason sénpri. I más inportanti inda, óras ki nos fé bira más fórti, nu ta resebe kel rekonpénsa más grandi. Bíblia ta fla: ‘Nhas irmon ki N ta ama, nhos bira nhos fé ki é santu más fórti, pa nhos pode kontinua na amor di Deus’. — Jud. 20, 21.