PERGUNTAS KI JÓVENS TA FAZE

Modi ki N pode pâpia midjór ku otus algen?

Na kel artigu li

Pamodi ki nu debe pâpia ku otus algen róstu ku róstu?

Alguns algen ta atxa ma pâpia ku un algen róstu ku róstu é difísil i ta pô-s stresadu. Pur isu, es ta atxa más fásil manda otus algen mensajen di testu.

“Óras ki bu ta pâpia ku otus algen róstu ku róstu, bu ta xinti más preson, pamodi bu ka ta pode paga ô torna skrebe algun kuza ki bu fla.” — Anna.

“Óras ki bu sta manda mensajen di testu é sima si bu sta sisti un vídiu gravadu. Má, óras ki bu sta pâpia ku un algen róstu ku róstu é sima si bu sta sisti un vídiu ki sta ta gravadu manenti. Timenti N sta ta pâpia, N ta fika ku medu di fla algun kuza ki N ka debe.” — Jean.

Sô ki, más sédu ô más tardi, bu ta meste prende pâpia ku pesoas róstu ku róstu. Pur izénplu, óras ki bu prende pâpia ku otus algen, kel-li ta djuda-u ranja novus amigu i konsigi i kontinua ku un trabadju. Tanbê, kel-li pode djuda-u óras ki bu sta prontu pa kumesa un namoru.

Má, bu ka meste xinti medu di pâpia ku otus algen róstu ku róstu. Bu ta konsigi faze kel-li, sikrê bo é un algen tímidu.

“Di vês en kuandu, nos tudu nu ta fla algun kuza ki ta pô-nu ta xinti vergónha. Má, prende ri di kes kuza ki bu ta fla.” — Neal.

Modi ki nu pode kumesa ta pâpia

Faze perguntas. Pensa na un asuntu ki ta interesa pesoas, i dipôs uza kel asuntu pa tenta kumesa un konbérsu. Pur izénplu:

“Kuzê ki bu faze na kel últimu feriadu?”

“Odja un pájina di internet interesanti li. Dja bu kustuma uza-l?”

“Ku kuzê ki bu ta trabadja?”

Pa djuda-u más txeu, pensa na algun kuza ki bo ku kel algen ten igual ku kunpanheru. Pur izénplu, nhos ta studa na mésmu skóla ô nhos ta trabadja na mésmu lugar? Nton, tenta uza kes kuza ki nhos ten igual pa faze-l perguntas.

“Pensa na kes pergunta ki bu ta atxa interesanti i ki bu ta gostaba di obi opinion di otus algen.” — Maritza.

Sujiston: Kes pergunta ki dja nu pâpia di el, pode djuda-nu kumesa ta pâpia ku pesoas. Má si ta da, tenta faze perguntas ki pesoas ka ta responde, “sin” ô “nau”. Pur izénplu, si bu pergunta un algen: “Bu gosta di kel filmi li?”, talvês el pode responde-u sin ô nau. Má pode ser midjór pergunta-l: “Ki párti di kel filmi li ki más bu gosta?”.

Toma kuidadu: Ka bu faze kel algen perguntas un tras di kel otu sima si bo é un pulísia. Tanbê, tenta ka faze-l perguntas ki pode dexa-l ku vergónha. Kes pergunta sima “Di kuzê ki bu ten más medu?” ô “Pamodi ki bu ta sta sénpri bistidu di azul?”, pode poi kel algen ta fika sen jetu. Kel sugundu pergunta pode ti parse ma bu sta kritika kel algen!

Pa ka da ideia ma bu sta ta faze kel algen perguntas sima un pulísia, bu pode fla bu opinion antis ô dipôs ki kel algen responde bu pergunta. Si bu faze si, nhos sta ta pâpia ku kunpanheru, envês di parse ma bu sta ta entrivista-l.

Kes pergunta ki bu ta faze, ta poi kel algen ta xinti sima si bo é un pulísia?

Konsedju di Bíblia: ‘Pensamentus na korason di un ómi é sima agu ki sta na un lugar fundu, má kel ómi ki ten sabedoria ta puxa-s pa fóra.’ — Provérbios 20:5.

Obi ku atenson. Pa bu kontinua ta pâpia ku un algen, é más inportanti sabe obi ku atenson di ki ser bon na pâpia.

“Sénpri N ta sforsa pa N tenta prende algun kuza novu sobri kel algen ki N sta pâpia ku el. Dipôs, N ta sforsa pa N lenbra kuzê ki kel algen fla-m, asi pa N pode pensa na un otu pergunta ki N pode faze-l otu bês ki nu pâpia.” — Tamara.

Sujiston: Ka bu fika preokupadu si timenti bu sta ta pâpia ku un algen bu ka konsigi pensa na otus kuza pa pâpia di el. Presta atenson na kuzê ki sta ta kontise na bu vólta. Bu sta na skóla? Bu sta na trabadju? Bu sta na algun atividadi? Ti mésmu kel lugar na undi ki nhos sta, pode ser un asuntu pa nhos pâpia di el. Pur izénplu, bu pode pergunta un koléga di trabadju: “Kantu ténpu bu ta leba pa bu txiga trabadju?”.

Toma kuidadu: Ka bu preokupa dimás ku kuzê ki bu sta ba fla dipôs. Si bu obi kel algen ku atenson, bu ta sabe kuzê ki bu pode fla pa bu kontinua ta pâpia ku el.

Konsedju di Bíblia: “Tudu algen debe sta prontu pa obi, má el ka debe pâpia faxi”. — Tiagu 1:19.

Mostra ma bu ta inporta ku kel algen di verdadi. Bu pode gosta más txeu di pâpia ku kel algen si bu ta inporta ku el.

“Si kel otu algen xinti ma bu ta inporta di verdadi ku kuzê ki el sta ta fla, nhos konbérsu pode fika más sábi, sikrê alvês bu fika sen jetu.” — Marie.

Sujiston: Ilojia kel algen di korason i dipôs faze-l un pergunta. Pur izénplu: “N gosta di bu ropa! Na undi ki bu kunpra-l?”.

Toma kuidadu: Ka bu faze perguntas ki ta mostra falta di idukason, sima: “N gosta di bu ropa! Kantu ki bu kunpra-l?”.

Konsedju di Bíblia: “Ka nhos djobe sô nhos própi interesi, má nhos djobe interesi di otus algen tanbê.” — Filipensis 2:4.

Modi ki bu pode tirmina un konbérsu? Un jóven ki txoma Jordan, fla: “Tenta tirmina un konbérsu ku un pensamentu puzitivu. Si bu fla un kuza, sima: ‘N gosta txeu di pâpia ku bo’ ô ‘N ta spera ma bu ta ten un bon dia’, pode fika más fásil pa nhos pâpia ku kunpanheru otu bês ki nhos odja.”