Keti Nge Kemonaka Kyese na ‘Bansiku ya Yehowa’?

“Kiese na muntu yina . . . ke monaka kiese na bansiku ya Mfumu Nzambi.”​—NKUNGA 1:1, 2.

1. Sambu na nki beto bansadi ya Yehowa kevandaka na kyese?

YEHOWA kesadisaka mpi kesakumunaka beto sambu beto kele bansadi na yandi ya kwikama. Ya kyeleka, beto kekutanaka ti mambu mingi ya mpasi. Kansi, beto kevandaka mpi ti kyese ya kyeleka. Yo kele ve dyambu ya kuyituka, sambu beto kesadilaka ‘Nzambi ya kiese,’ mpi mpeve santu na yandi kebutaka kyese na ntima na beto. (1 Timoteo 1:11; Galatia 5:22) Kyese kele nsai ya kyeleka yina muntu kekumaka na yo ntangu yandi kevingila kima mosi ya mbote to yandi mezwa yo. Ntembe kele ve nde Tata na beto ya zulu kepesaka beto makabu ya mbote. (Yakobo 1:17) Mpila ya kuyituka kele ve na kumona nde beto kevandaka na kyese!

2. Inki bankunga beto tatadila?

² Mukanda ya Bankunga ketubilaka mingi kyese. Mu mbandu, na Nkunga ya 1 ti ya 2. Balongoki ya ntete ya Yezu Kristu kutubaka nde muntu kusonikaka yo kuvandaka Davidi, Ntotila ya Izraele. (Bisalu 4:25, 26) Nsoniki ya nkunga ya ntete, yina zina na yandi mezabana ve, keyantika nkunga na yandi ya kupemama ti bangogo yai: “Kiese na muntu yina ke ndimaka ve ngindu ya bantu ya mbi.” (Nkunga 1:1) Na disolo yai ti yina talanda beto tatadila mutindu Nkunga ya 1 ti ya 2 kepesa beto bikuma ya kuvandila na kyese.

Kinsweki ya Kuvanda na Kyese

3. Na kutadila Nkunga 1:1, inki bikuma kesalaka nde muntu yina kezitisaka bansiku ya Nzambi kuvanda na kyese?

³ Nkunga ya 1 kemonisa sambu na nki muntu yina kezitisaka bansiku ya Nzambi kevandaka na kyese. Ntangu muyimbi-bankunga kuyimbaka, yandi pesaka bikuma ya kepesaka kyese ya mutindu yina: “Kiese na muntu yina ke ndimaka ve ngindu ya bantu ya mbi, ke landaka ve banzila ya bantu ya masumu, ke vandaka ve kisika mosi na bantu yina ke sekaka Nzambi.”​—Nkunga 1:1.

4. Zakaria ti Elizabeti kuvandaka ti luzingu ya nki mutindu?

⁴ Sambu na kuvanda na kyese ya kyeleka, beto fwete lungisa mambu ya lunungu yina Yehowa kelombaka. Zakaria ti Elizabeti, yina kuvandaka na dibaku ya kukuma bibuti ya Yoane-Mbotiki, “vandaka bantu ya [lunungu, NW] na meso ya Nzambi. Bo vandaka kulanda mbote-mbote bansiku yonso ya Mfumu Nzambi.” (Luka 1:5, 6) Beto lenda vanda na kyese kana beto kezinga bonso bo mpi kebuya na ntima mosi ‘kundima ngindu ya bantu ya mbi’ to nde bandongisila na bo ya mbi kutambusa beto.

5. Inki lenda sadisa beto na kutina “banzila ya bantu ya masumu”?

⁵ Kana beto kebuya bandongisila ya bantu ya mbi, beto ‘talandaka ve banzila ya bantu ya masumu.’ Yo ketendula nde, beto takwendaka ve mbala na mbala na bisika yina bantu yango kevandaka, disongidila na bisika ya bo kesalaka bansaka ya nsoni to ya mbi. Inki beto tasala kana mpusa ya kuvukana ti bantu ya masumu na mambu na bo ya mbi mekwisila beto? Kana mpusa yango mekwisila beto, beto samba sambu na kulomba lusadisu ya Nzambi na mpila nde yandi sadisa beto na kusala mambu ya kewakana ti bangogo yai ya ntumwa Polo: “Beno kwenda kuvukana ve ti bamimpani, sambu mambu ya mutindu yina lenda salama ve. Nki mutindu mambu ya mbote lenda vukana ti mambu ya mbi? Nki mutindu mwini lenda vukana ti mpimpa?” (2 Korinto 6:14) Kana beto ketula ntima na Nzambi mpi ke na “ntima ya mpembe,” beto tabuya bangindu mpi kuzinga bonso bantu ya masumu, mpi beto tavanda na bangindu mpi bampusa ya kukonda mvindu, ebuna beto tavanda na “lukwikilu ya kieleka.”​—Matayo 5:8; 1 Timoteo 1:5.

6. Sambu na nki beto fwete keba na bantu yina kesekaka Nzambi?

⁶ Ya kyeleka, sambu na kupesa Yehowa kyese beto fwete “vandaka ve kisika mosi ti bantu yina ke sekaka Nzambi.” Bantu mingi kevwezaka bansiku ya Nzambi, kansi na ‘bilumbu yai ya nsuka,’ bantu yina kuvandaka ntete Bakristu mpi ya mekumaka ba aposta kemonisaka mbala mingi kuvweza na bo na maseka kibeni. Ntumwa Piere kukebisaka bampangi na yandi Bakristu nde: “Bampangi na mono ya mono kezolaka, . . . Beno fweti zaba ntete nde; na bilumbu ke kwisa na ntwala, bantu ta kwisa kubasika, bo ta zingaka mutindu nzala na bo ke tindaka bo na kusala. Bo ta sekaka beno ebuna bo ta tubaka nde: ‘Mfumu Yesu silaka nde yandi ta kwisa kuvutuka diaka si! Ebuna wapi yandi ko? Bankaka na beto me fwaka ntama, kansi mambu yonso kele kaka kiteso mosi, katuka ntangu ya Nzambi salaka bima yonso tii bubu yai!’” (2 Piere 3:1-4) Kana beto kevanda ve ata fyoti ‘kisika mosi na bantu yina kesekaka’ Nzambi, beto takuditanina na kigonsa yina takumina bo.​—Bingana 1:22-27.

7. Sambu na nki beto fwete zitisa bangogo ya Nkunga 1:1?

⁷ Kana beto kezitisa ve bangogo yina kele na luyantiku ya Nkunga ya 1, beto lenda vidisa kimpeve ya beto mekumaka na yo na nima ya kulonguka Biblia. Nkutu, luzingu na beto lenda beba dyaka mingi kuluta. Kima ya ntete ya lenda monisa nde beto meyantika kuvidisa kimpeve na beto kele kana beto kelanda bandongisila ya bantu ya mbi. Na nima beto lenda yantika kuvukana ti bo mbala na mbala. Nsukansuka, beto lenda kuma ba aposta ya kukonda lukwikilu yina kesekaka Nzambi. Yo ke pwelele nde, kinduku ti bantu ya mbi lenda buta mpeve ya mbi na ntima na beto mpi yo lenda bebisa bangwisana na beto ti Yehowa Nzambi. (1 Korinto 15:33; Yakobo 4:4) Bika nde dyambu ya mutindu yai kukumina beto ve!

8. Inki tasadisa beto na kutula mabanza na beto yonso na mambu ya kimpeve?

⁸ Kisambu tasadisa beto na kutula mabanza na beto yonso na mambu ya kimpeve mpi na kubuya kusala kinduku ti bantu ya mbi. Polo kusonikaka nde: “Beno kumona mpasi ve na ntima sambu na konso mambu yina; kansi konso ntangu ya beno ke samba Nzambi, beno lomba yandi konso mambu yina ya beno ke na yo mfunu; ntangu beno ke lomba yandi yo, beno pesa yandi mersi. Ebuna ngemba ya Nzambi, ngemba yina me luta mambu yonso ya bantu ke yindulaka, yo ta keba ntima na beno ti mabanza na beno sambu na kimvuka yina ya beno kele ti Yesu Kristo.” Polo kusyamisaka bampangi na yandi na kutula mabanza na bo na mambu yina kele ya kyeleka, ya luzitu, ya kufwana, ya kinzambi, ya kyese, ya lukumu, ya mbote, mpi ya bo fwete zitisa. (Filipi 4:6-8) Bika beto sala mambu yina kewakana ti ndongisila ya Polo mpi beto bwa ve sambu na kukuma kiteso mosi ti bantu ya mbi.

9. Ata beto kebuyaka kusala bisalu ya mbi, inki mutindu beto kesalaka kikesa sambu na kusadisa bantu ya mitindu yonso?

⁹ Ata beto kebuyaka kusala bisalu ya mbi, beto ketaka kimbangi na bantu yankaka na mayele yonso, kaka mutindu ntumwa Polo kutubilaka Feliksi, Guvernere ya Roma, mambu ya metala ‘bikalulu ya mbote, kudiyala mpi kilumbu Nzambi tasambisa bantu yonso.’ (Bisalu 24:24, 25; Kolosai 4:6) Beto kelongaka nsangu ya Kimfumu na bantu ya mitindu yonso, mpi beto kezitisaka bo. Beto ketula ntima nde bantu yina ke ya “kuyilama sambu na kubaka luzingu ya mvula na mvula” takuma Bakristu yina tamonaka kyese na bansiku ya Nzambi.​—Bisalu 13:48, NW.

Yandi Kemonaka Kyese na Bansiku ya Yehowa

10. Inki tasadisa beto na mpila nde mambu ya beto ketanga kubikala kimakulu na mabanza mpi na ntima na beto?

¹⁰ Ntangu yandi tubilaka muntu yina kevandaka na kyese, muyimbi-bankunga kutubaka nde: “Yandi ke monaka kiese na bansiku ya Mfumu Nzambi, yandi ke [tangaka yo na ndinga ya nsi-nsi, NW] mpimpa ti mwini.” (Nkunga 1:2) Beto bansadi ya Nzambi, beto ‘kemonaka kyese na bansiku ya Yehowa.’ Kana mpila kele, na ntangu beto kesala kulonguka ya beto mosi mpi keyindulula, beto lenda tanga “na ndinga ya nsi-nsi,” kansi na kubasisaka mpi bangogo na mpila nde yo wakana. Kusala mutindu yai ntangu beto ketanga konso kitini ya Masonuku tasadisa beto na mpila nde mambu yango kubikala kimakulu na mabanza mpi na ntima na beto.

11. Sambu na nki beto fwete tangaka Biblia “mpimpa ti mwini”?

¹¹ “Mpika ya kwikama mpi ya mayele” kesyamisaka beto na kutanga Biblia konso kilumbu. (Matayo 24:45, NW) Sambu beto kele na mpusa ya ngolo ya kuzaba mbotembote nsangu yina Yehowa ke na kuzabisa bantu, beto fwete tangaka Biblia, “mpimpa ti mwini,” ee, ata ntangu mpongi metina beto sambu na konso nki kikuma yina. Piere kulongisilaka beto nde: “Beno vanda bonso bana me butuka sesepi yai: Beno vanda na nzala ya kunwa mabele ya mpembe ti ya kimpeve, ebuna beno ta kula [“yela”], beno ta guluka ntangu beno ke nwa yo.” (1 Piere 2:1, 2) Keti nge kemonaka kyese na kutanga Biblia konso kilumbu mpi kuyindulula Ndinga ya Nzambi mpi balukanu na yandi na mpimpa? Muyimbi-bankunga vandaka kusala yo.​—Nkunga 63:6.

12. Inki beto tasala kana beto kemonaka kyese na bansiku ya Yehowa?

¹² Sambu na kuvanda na kyese ya mvula na mvula, beto fwete monaka kyese na bansiku ya Nzambi. Yo kele ya kukuka mpi ya lunungu, mpi muntu yina kezitisaka yo kebakaka balusakumunu mingi. (Nkunga 19:8-12) Longoki Yakobo kusonikaka nde: “Muntu yina ke wa yo kaka na kuwa yo ve, ke vila yo mpi ve, kansi ke tala yo mbote-mbote ti ke sala mambu yina ya yo ke tinda yandi na kusala, Nzambi ta sakumuna yandi na kisalu na yandi.” (Yakobo 1:25) Kana beto kemonaka mpenza kyese na bansiku ya Yehowa, beto talutisa ve ata kilumbu mosi kukonda kutadila mambu ya kimpeve. Ya kyeleka, beto tavanda na kikesa ya kusosa ‘mambu yonso yina me bumbanaka mpenza na nsi ya ntima ya Nzambi’ mpi kutula mambu yina ketala Kimfumu ya Nzambi na kisika ya ntete na luzingu na beto.​—1 Korinto 2:10-13; Matayo 6:33.

Yandi Kele Bonso Nti

13-15. Na nki mutindu beto lenda vanda bonso nti yina bo mekunaka na lweka ya masa yina kekaukaka ve?

¹³ Ntangu yandi tubilaka dyaka muntu ya mbote, muyimbi-bankunga kutubaka nde: “Yandi kele bonso nti yina ke menaka penepene na mwa-masa; yo ke butaka bambuma na yo konso mvula, matiti na yo mpi ke yumaka ve. Mambu yonso ya yandi ke salaka [tanunga, NW].” (Nkunga 1:3) Bonso bantu yankaka yonso ya kukonda kukuka, beto bantu ya kesadilaka Yehowa, beto kekutanaka mpi ti mambu ya mpasi na luzingu. (Yobi 14:1) Beto lenda kutana ti mbangika mpi bampasi yankaka sambu na lukwikilu na beto. (Matayo 5:10-12) Kansi na lusadisu ya Nzambi, beto lenda nunga bampasi yango, kaka mutindu nti mosi ya ngolo kebikalaka kaka ya kutelama ata mupepe ya ngolo menikisa yo.

¹⁴ Nti yina bo mekunaka penepene na masa kekaukaka ve na mwini ya ngolo to na ntangu mvula kenoka dyaka ve. Kana beto kele bantu ya ketinaka Nzambi boma, ngolo na beto kekatukaka na Nto mosi ya kekaukaka ve, disongidila na Yehowa Nzambi. Polo kusosaka lusadisu na Nzambi mpi yandi tubaka nde: “Mono me lunga kusala mambu yonso na ngolo yina ya [Yehowa] ke pesaka mono.” (Filipi 4:13) Ntangu mpeve santu ya Yehowa ketwadisaka beto mpi kepesaka beto ngolo na kimpeve, beto kelembaka ve, mpi beto keyambulaka ve na kubuta bambuma to kufwa na kimpeve. Beto kebutaka bambuma na kisalu ya Nzambi mpi kemonisaka mbuma ya mpeve na yandi.​—Yeremia 17:7, 8; Galatia 5:22, 23.

¹⁵ Ntangu yandi sadilaka ngogo ya Kiebreo ya bo mebalula nde “bonso,” muyimbi-bankunga kusadilaka kutuba ya kifwani. Yandi fwanisaka bima zole ya kuswaswana, ata bima yango mefwanana na kima mosi. Bantu kele ya kuswaswana ti banti, kansi ntembe kele ve nde kitoko ya nti yina bo mekunaka na lweka ya masa yina kekaukaka ve vandaka kuyibusa muyimbi-bankunga kimvwama ya kimpeve yina bantu ya ‘kemonaka kyese na bansiku ya Yehowa’ kevandaka na yo. Kana beto kemonaka kyese na bansiku ya Nzambi, bilumbu na beto lenda kuma mingi bonso bilumbu ya nti. Yo ketendula nde, beto lenda zinga mvula na mvula.​—Yoane 17:3.

16. Sambu na nki mpi na nki mutindu ‘mambu yonso ya beto kesalaka kenungaka’?

¹⁶ Na ntangu beto kelandaka luzingu mosi ya mbote, Yehowa kesadisaka beto na kununga mimekamu mpi bampasi. Beto kemonaka kyese mpi kebutaka bambuma na kisalu ya Nzambi. (Matayo 13:23; Luka 8:15) ‘Mambu yonso ya beto kesalaka kenungaka’ sambu lukanu na beto ya ntete kevandaka ya kusala luzolo ya Yehowa. Sambu balukanu na yandi kenungaka kaka, mpi beto kemonaka kyese na bansiku na yandi, beto kekumaka bamvwama na kimpeve. (Kuyantika 39:23; Yozue 1:7, 8; Yezaya 55:11) Beto kenungaka kaka, ata beto kekutanaka ti mambu ya mpasi.​—Nkunga 112:1-3; 3 Yoane 2.

Bantu ya Mbi Kemonanaka Bonso Bamvwama

17, 18. (a) Na nki muyimbi-bankunga kufwanisaka bantu ya mbi? (b) Ata bantu ya mbi kekuma bamvwama na kinsuni, sambu na nki lutaninu na bo kevandaka ve ya nda?

¹⁷ Luzingu ya bantu ya mbi kevandaka mpenza ya kuswaswana ti ya bantu ya mbote! Bantu ya mbi lenda monana nde bo mekuma bamvwama na kinsuni na ntangu mosi buna, kansi bo kekumaka ve bamvwama na kimpeve. Dyambu yai kemonana pwelele na bangogo yina muyimbi-bankunga kuyikaka: “Bantu ya mbi kele mpidina ve; bo kele bonso [bimpusu ya bankeni, NW] ya mupepe ke nata. Yo yina Nzambi ta bedisa bantu ya mbi ntangu yandi ta sambisa bo; bantu ya masumu ta vanda ve kisika mosi ti bantu ya mbote.” (Nkunga 1:4, 5) Simba nde muyimbi-bankunga ketuba nde, “bantu ya mbi kele mpidina ve.” Yandi zolaka kutuba nde bo kele ve bonso bantu yina kezitisaka bansiku ya Nzambi, yina beto mekatuka kufwanisa ti banti yina kebutaka bambuma, mpi ya kezingaka bilumbu mingi.

¹⁸ Ata bantu ya mbi kekumaka bamvwama na kinsuni, bo kevandaka ve na lutaninu ya nda. (Nkunga 37:16; 73:3, 12) Bo kele bonso mvwama ya zoba yina Yezu kutubilaka na kingana na yandi ntangu mvwama yango kulombaka yandi na kuzengila bo dikambu ya metala mutindu ya kukabula kimvwama na bo. Yezu kutubilaka bantu yina kuvandaka pana nde: “Beno keba! Beno katula mabanza yonso ya kuzola kimvwama. Sambu luzingu ya kieleka ya muntu yo kele ve sambu na bima na yandi, ata na ntangu yina ya yandi kele mvwama.” Yezu kusadilaka kingana mosi sambu na kutendula ngindu yai ntangu yandi tubaka nde, bilanga ya mvwama mosi kubutaka bima mingi, mpi mvwama yango kubakaka dibanza ya kubwisa banzo ya yandi vandaka kubumbila bima sambu yandi kutunga banzo ya kuluta nene yina talunga na bima na yandi yonso ya mbote. Ebuna muntu yango kuyindulaka nde ntangu yai yandi takuma kaka kudya, kunwa, mpi kumona kyese. Kansi Nzambi kusongaka yandi nde: “Nge zoba yai, na mpimpa yai kaka, mono ke [lomba, NW] moyo na nge. Ebuna bima yai yonso ya nge me bumba, yo ta vanda ya nani?” Sambu na kumonisa pwelele ngindu na yandi, Yezu kuyikaka nde: “Yo kele mpidina na konso muntu yina ke bumbaka kimvwama sambu na yandi mosi, kansi yandi kele mvwama ve na meso ya Nzambi.”​—Luka 12:13-21.

19, 20. (a) Tendula mutindu bo vandaka kukatula bankeni na banti ti na bimpusu na yo na ntangu ya ntama. (b) Sambu na nki bo kefwanisa bantu ya mbi ti banti mpi bimpusu ya bankeni?

¹⁹ Bantu ya mbi ‘kevandaka ve bamvwama na meso ya Nzambi.’ Yo yina, bo kevandaka ve na lutaninu mpi ngolo na bo kevandaka bonso ya kimpusu ya nkeni, disongidila kimpusu ya fyoti yina kefikaka nkeni na kati. Na ntangu ya ntama, na nima ya kukatula bankeni na bilanga, bo vandaka kunata yo na kisika mosi ya bo vandaka kukatula bimpusu ya bankeni na ntoto, na kisika mosi ya kipalapala mpi ya kamwa ngumba. Na nima ya kutula bankeni ti banti na yo na kisika yango, bo vandaka kusadila pusupusu yina kuvandaka ti matadi mpi bibende ya meno mingi na nsi na yo. Bambisi vandaka kupusa pusupusu yango na zulu ya bankeni sambu bankeni kukatuka na banti mpi na bimpusu na yo. Na nima, bo vandaka kusadila pau sambu na kunangula bankeni ti mvindu na yo yonso mpi kulosa yo na zulu na mupepe. (Yezaya 30:24) Bankeni vandaka kubwa na kisika yina bo vandaka kututila yo, ebuna mupepe vandaka kunata mfututu ya banti ti bimpusu mpi kulosa yo mwa ntama. (Ruti 3:2) Na nima, bo vandaka kutula bankeni na muyungulu sambu na kukatula mvindu yonso yina kubikalaka, ebuna bo vandaka kubaka bankeni sambu na kubumba to kututa yo. (Luka 22:31) Kansi banti ti bimpusu yonso ya bankeni vandaka kumonika dyaka ve.

²⁰ Kaka mutindu bankeni vandaka kubwa na ntoto mpi bo vandaka kubumba yo, mpi banti ti bimpusu vandaka kukwenda na mupepe, mutindu mosi mpi bantu ya mbote tabikala ebuna bantu ya mbi tafwa. Kansi, ntembe kele ve nde, beto kele na kyese na kuzaba nde kubika fyoti bantu ya mbi ya mutindu yina tafwa kimakulu. Na ntangu bo tafwa, bantu ya mbote yina kemonaka kyese na bansiku ya Yehowa tabaka balusakumunu mingi. Ya kyeleka, nsukansuka Nzambi tapesa dikabu ya luzingu ya mvula na mvula na bantu ya bulemfu.​—Matayo 25:34-46; Roma 6:23.

Nzambi Kesakumunaka “Nzila ya Bantu ya Mbote”

21. Inki mutindu Yehowa ‘ketalaka bantu ya mbote’?

²¹ Nkunga ya ntete kesuka na bangogo yai: “Mfumu Nzambi ke talaka [nzila ya, NW] bantu ya mbote, kansi bantu ya mbi ke landaka nzila ya lufwa.” (Nkunga 1:6) Inki mutindu Nzambi ‘ketalaka bantu ya mbote’? Kana beto kezinga luzingu mosi ya mbote, beto lenda tula ntima nde Tata na beto ya zulu kemonaka mutindu beto kezitisaka bansiku na yandi na luzingu na beto mpi yandi kendimaka nde beto kele bansadi na yandi. Ebuna, beto lenda mpi fwete bikila yandi basusi na beto yonso ti kivuvu nde yandi ketudilaka beto mpenza dikebi.​—Ezekiele 34:11; 1 Piere 5:6, 7.

22, 23. Inki takumina bantu ya mbi mpi bantu ya mbote?

²² “Nzila ya bantu ya mbote” tazinga kimakulu, kansi bantu ya mbi yina kebuyaka kusoba tafwa na ndola yina Yehowa tapesa bo. “Nzila,” to luzingu na bo, tafwa kumosi ti bo. Beto lenda tula ntima na kulungana ya bangogo yai ya Davidi: “Kubika fioti kaka bantu ya mbi ta vila, nge lenda sosa bo kansi nge ta mona bo ve; kansi bantu yina ke kudikulumusaka, bo ta zinga mbote na ngemba mpenza na ntoto. Bantu ya mbote ta zinga na ngemba na ntoto yina ya Mfumu Nzambi tubaka na kupesa bo; yo ta vanda ya bo tii kuna.”​—Nkunga 37:10, 11, 29.

²³ Beto tavanda na kyese mingi kibeni kana beto zwa dibaku ya kuzinga na paladisu ntangu bantu ya mbi tavanda dyaka ve! Ebuna bantu ya kudikulumusa mpi ya mbote tazinga na ngemba ya kyeleka sambu bo tamonaka ntangu yonso kyese na ‘bansiku ya Yehowa.’ Kansi na ntwala nde mambu yai yonso kulungana, “mambu ya Yehowa kekanaka kusala” (NW) fwete lungana ntete. (Nkunga 2:7a) Disolo ya kelanda tazabisa beto mambu yango, mpi ntendula na yo sambu na beto mpi sambu na bantu yonso.

Inki Mutindu Nge Tavutula?

• Sambu na nki muntu yina kezitisaka bansiku ya Nzambi kevandaka na kyese?

• Inki kemonisa nde beto kemonaka kyese na bansiku ya Yehowa?

• Inki mutindu muntu lenda vanda bonso nti yina bo mekunaka na lweka ya masa?

• Inki mutindu nzila ya bantu ya mbote meswaswana ti nzila ya bantu ya mbi?

[Kifwanisu ya kele na lutiti 9]

Kisambu tasadisa beto na kubuya kusala kinduku ti bantu ya mbi