Luyalu ya Kimfumu ya Nzambi Ke na Kuyala Bubu Yai

Zulunalu mosi ya Australie The Age, kuyulaka nde: “Inki mutindu bansi mingi ya ke na luzingu ya kuswaswana ngolo mpi ya metomaka na kiteso mosi ya kuswaswana mingi lenda wakana? Bantu ketubaka nde kima tavukisa bantu kele kaka dyambu mosi ya mpasi yina takatuka na planete yankaka mpi yina tanwanisa inza ya mvimba.”

DYAMBU mosi ya mpasi yina takatuka na planete yankaka? Ata beto kezaba ve kana dyambu ya mpasi ya mutindu yina tavukisa makanda yonso ya ntoto to ve, Biblia ketubila pwelele mpasi ya tabwa na bilumbu kekwisa yina tapusa makanda ya inza na kuvukana. Mpasi yango takatuka na bangolo yina kevandaka na zulu.

Na mbikudulu mosi, Ntotila Davidi ya Izraele ya ntama kutubilaka dyambu yai ya tabwila inza. Mpeve ya Nzambi kupusaka yandi na kusonika nde: “Bantotila na bo me yilama sambu na kunwana bitumba, bo ke zola kunwanisa Mfumu Nzambi ti ntotila ya yandi me tula, bo ke tuba nde: ‘[Beto zenga bansinga na bo, mpi beto losa bansinga na bo ntama ti beto, NW]!’” (Nkunga 2:2, 3; Bisalu 4:25, 26) Zaba nde bantotila ya inza zolaka kuvukana kumosi sambu na kunwanisa Yehowa, Ngangi ya luyalanganu, ti mupakulami na yandi to Ntotila ya yandi metulaka, Yezu Kristu. Inki mutindu yo zolaka kusalama?

Manaka ya Biblia mpi bambikudulu yina melunganaka kemonisa nde Nzambi metulaka Yezu Kristu ntotila na Kimfumu na yandi ya zulu banda na mvu 1914.a Na ntangu yina makanda yonso ya ntoto kuvandaka ti dibanza mosi. Na kisika ya kulemfukila kiyeka ya Kimfumu yina kubutukaka na ntangu yina, bo kudikotisaka na mavwanga ya kunwanina kimfumu. Yo yina bo basisaka Mvita mosi ya Nene to Mvita ya Ntete ya Inza ya Mvimba.

Inki mutindu Yehowa ketadila dyambu yai ya bantotila kesala? “Mfumu Nzambi ke seka-seka bo; kuna na zulu na kiti na yandi ya kimfumu, yandi ke mona bo mpamba. Yandi ke tubila bo na makasi, yandi ke pesa bo boma.” Na nima, Yehowa tasonga Mwana na yandi yina kele Ntotila ya kupakulama ya Kimfumu yango nde: “Lomba mono, mono ta pesa nge bantu yonso, nsi-ntoto ya mvimba mpi ta vanda ya nge. Nge ta yalaka bantu na kiyeka yonso, nge ta yalaka bo ti fimbu ya kibende na maboko, nge ta fwaka bo mutindu bo ke pasulaka nzungu ya ntoto bipesi-bipesi.”​—Nkunga 2:4, 5, 8, 9.

Yezu tasadila fimbu ya kibende sambu na kufwa kimakulu makanda ya bambeni na Armagedoni. Mukanda ya nsuka ya Biblia, Kusonga, ketendula dyambu yai ya nene yina tasalama na nsuka nde yo kele “bitumba ya kilumbu ya nene ya Nzambi Nkwa-Ngolo Yonso,”(NW) yina ya “bantotila ya ntoto ya mvimba,” ke na kuvukanina kisika mosi. (Kusonga 16:14, 16) Bupusi ya bademo tasala nde, nsukansuka, makanda ya ntoto kuvukana sambu na kulungisa lukanu yai mosi: kunwanisa Nzambi Nkwa-Ngolo Yonso.

Ntangu yina bantu tavukana sambu na kunwanisa kimfumu ya Nzambi ke na kupusana nswalu mpenza. Yo kele mawa mingi sambu “bumosi” na bo tanatila bo ve mambote. Kansi, mambu ya bo tasala tanata ngemba ya bantu kevingilaka banda ntama. Na nki mutindu? Na nsuka ya mvita yina, Kimfumu ya Nzambi “tafwa mpi tasukisa bimfumu yai yonso, mpi yo tayala mvula na mvula.” (Daniele 2:44, NW) Kimfumu ya Nzambi talungisa mpusa ya bantu ya kuvanda na ngemba na inza ya mvimba, kansi ata organizasio mosi ve ya bantu takuka kusala yo.

Mfumu Yina Tatwadisa Luyalu ya Kimfumu ya Nzambi

Kimfumu ya Nzambi kele Kimfumu yina bantu mingi ya masonga kelombaka na bisambu nde: “Bika Kimfumu na nge kukwisa. Bika luzolo na nge kusalama awa na ntoto bonso na zulu.” (Matayo 6:10) Kimfumu ya Nzambi kele ve ngindu mosi ya kukonda kumonana yina kevandaka na ntima, kansi yo kele luyalu ya kyeleka yina mesalaka mambu ya kuyituka banda yo meyantikaka kuyala na zulu na mvu 1914. Bika beto tadila mwa mambu ya mfunu yina kemonisa nde Kimfumu ya Nzambi ke na kusala mpenza kisalu bubu yai.

Ntetentete, yo kele ti biro ya ketambusaka mambu yonso, mpi Yezu Kristu, Ntotila yina mebakaka kimfumu, muntu kele mfumu na yo. Na mvu ya 33 ya T.B., Yehowa Nzambi kutulaka Yezu Kristu Mfumu ya dibundu ya Bukristu. (Efezo 1:22) Banda na ntangu yina, Yezu kelungisaka mukumba na yandi ya kimfumu sambu na kumonisa mayele na yandi ya kutwadisa. Mu mbandu, ntangu nzala ya ngolo kukotaka na Yudea na mvu-nkama ya ntete, dibundu ya Bukristu kuyantikaka mbala mosi na kusadisa bampangi na bo. Bo bakaka bangidika mpi bo tindaka Barnabasi ti Saule na Antioshi na kupesa bo lusadisu.​—Bisalu 11:27-30.

Beto lenda tula kivuvu nde Yezu Kristu mefwana na kusala mambu mingi ntangu yai ya luyalu ya Kimfumu ke na kusala kisalu na yo. Konso ntangu yina bampasi kebwaka, mu mbandu, kunikana ya ntoto, banzala, bamvula ya ngolo, mipepe ya ngolo, to kupanzana ya volkan, dibundu ya Bukristu ya Bambangi ya Yehowa kesukininaka ve na kusadisa bampangi na bo Bakristu ti bantu yankaka yina kevandaka na kisika yina. Mu mbandu, ntangu ntoto kunikanaka na El Salvador na Yanuari mpi Februari ya mvu 2001, bampangi kusalaka bisalu na bandambu yonso ya insi yina sambu na kusadisa bo, mpi Bambangi ya Yehowa yina kukatukaka na Canada, na Guatemala, mpi na États-Unis kupesaka lusadisu. Na nsungi mosi ya nkufi, bo tungilaka bo dyaka bisika tatu ya lusambu ti banzo ya kulala kuluta 500.

Bantu yina Luyalu ya Kimfumu Keyalaka

Banda Kimfumu ya zulu ya Nzambi meyantikaka kuyala na mvu 1914, yo kevukisaka mpi ketulaka ndonga na kati ya bantu ya inza ya mvimba yina yo keyalaka. Mambu yina yo kesalaka kelungisa mbikudulu mosi ya nene ya Yezaya kusonikaka nde: “Na bilumbu ke kwisa ngumba yina kele Nzo-Nzambi [lusambu na yandi ya kyeleka ya kuzanguka, NW] ta kuma ngumba mosi ya nda mpenza, yo ta luta bangumba yonso na nda. Bantu mingi ta kwisa kufuluka kuna.” Mbikudulu yango kemonisa nde “bantu mingi” tamata na ngumba yina mpi tandima bantuma ti bansiku ya Yehowa.​—Yezaya 2:2, 3.

Dyambu yai mesalaka nde kimvuka mosi ya bantu mingi kudibongisa sambu na kulungisa lukanu mosi na ntangu na beto. Dibuta mosi ya inza ya mvimba ya Bakristu kuluta 6 000 000 kele na bansi kuluta 230 na ntoto ya mvimba. Na ntangu Bambangi ya Yehowa kesalaka balukutakanu na bo ya distrike, bantu yina ketalaka bo keyitukaka mbala mingi na kumona zola, ngemba, ti bumosi yina kevandaka na kati ya bibuka ya bantu mingi ya mutindu yina, ya kekabwanaka dyaka ve sambu na luswaswanu na bo ya bansi, ya luzingu, mpi ya bandinga. (Bisalu 10:34, 35) Keti nge kendima ve nde luyalu yango ke na kusala mpenza kisalu na yo mpi yo ke ya kyeleka, yo yina yo kekuka kuvukisa bimvuka ya bantu ya bandinga mingi ya kuswaswana yina kezinga na ngemba mpi na bumosi?

Kimfumu ya Nzambi mpi Malongi na Yo

Konso luyalu kevandaka ti bansiku yina basitwaye na yo fwete zitisa, mpi konso muntu yina kezola kuvanda na nsi ya luyalu yango fwete zitisa bansiku yango. Mutindu mosi, Kimfumu ya Nzambi kevandaka ti bansiku na yo yina bantu yonso yina kezolaka kuvanda na nsi ya luyalu yango fwete zitisa. Kansi, kusadisa bantu ya mekatukaka na bisika mingi ya kuswaswana na kundima mpi kuzitisa bansiku yina kele kisalu mosi ya mpasi kibeni. Yai mpi kele dyambu yankaka ya kemonisa nde Kimfumu ya Nzambi kele ya kyeleka: yo kele ti programe ya malongi yina kesimbaka mpi kebalulaka mabanza ya bantu mpamba ve kansi mpi bantima na bo.

Inki mutindu luyalu ya Kimfumu kelungisaka kisalu yai ya mpasi? Bo kesadilaka metode ya bantumwa ya kusamuna “nzo na nzo” (NW) mpi ya kulonga Ndinga ya Nzambi na muntu mosi mosi. (Bisalu 5:42; 20:20) Inki mbuma kisalu yai ya kulonga mebutaka? Jacques Johnson, nganga-Nzambi mosi ya Katolika, kusonikaka na zulunalu mosi ya Canada yina kebasikaka konso mposo sambu na kumonisa kikesa ya yandi salaka na kubuyisa nkento mosi na kulonguka ti Bambangi ya Yehowa. Yandi tubaka nde: “Mayele kusukaka mono mpi mu bakisaka nde mu vandaka kusala kisalu ya mpunda. Mu yantikaka kubakisa nde na nima ya bangonda mingi, bankento yai ya Bambangi kusalaka kinduku ya ngolo ti mama yina ya kuvandaka dyaka ve ti ngolo ya kubasika na nganda. Bo kangamaka ti yandi na mpila bo vandaka kusadisa yandi, kubaka yandi bonso nduku, mpi kuzola yandi na ntima na bo yonso. Mama yina kusukininaka ve na kukota na dibundu na bo mpi mu kukaka dyaka ve kusala ata kima mosi sambu na kubuyisa yandi.” Kaka mutindu nsangu ya Biblia yina Bambangi ya Yehowa kelongaka ti bikalulu na bo ya mbote ya Bukristu kusimbaka ntima ya nkento yai ya kuvandaka ntete muntu ya Katolika, yo kesimbaka mpi bantima ya bamilio ya bantu na inza ya mvimba.

Malongi ya mutindu yai ya kelongaka Kimfumu kekatukaka na Biblia, yo kepesaka kilo na bikalulu na yo ya mbote ti minsiku na yo. Yo kelongaka bantu na kuzolana mpi na kupesana luzitu ata bo mekatukaka na kisika ya nki mutindu. (Yoane 13:34, 35) Yo kesadisaka mpi bantu na kundima ndongisila yai: “Beno landa bikalulu ya bantu ya ntangu yai ve, kansi beno pesa Nzambi nzila na kubalula mabanza na beno sambu beno kukuma mutindu ya nkaka mpenza. Ebuna beno ta zaba mambu yai ya Nzambi ke zolaka: mambu yina kele ya mbote, mambu yina ke pesaka yandi kiese, mambu yina ke na kifu ve.” (Roma 12:2) Sambu bo mebikisaka bikalulu na bo ya ntama mpi bo kezitisaka bansiku mpi minsiku ya luyalu ya Kimfumu na kyese yonso, bamilio ya bantu mekumaka na ngemba mpi memonaka mambote ntangu yai mpi bo kele ti kivuvu ya kitoko sambu na bilumbu kekwisa.​—Kolosai 3:9-11.

Zulunalu yai, Nzozulu ya Nkengi, kele mosi na kati ya mikanda yina lenda sadisa muntu na kumona bumosi ya mutindu yina. Na nsadisa ya bametode mpi bisadilu yina bo meyidikaka sambu na kubalula mpi kubasisa yo na bandinga mingi, masolo ya kuluta mfunu ya Nzozulu ya Nkengi kebasikaka mbala mosi na bandinga 135, mpi bantu kuluta 95 na kati ya nkama yina ketangaka zulunalu yai na inza ya mvimba lenda longuka malongi yango na ndinga na bo mosi mpi na ntangu mosi.

Muntu ya dibundu mosi (yina bo kebingaka Mormon) kusalaka lisiti ya bisalu ya kuluta nene ya bamisionere ya mabundu yankaka mesalaka. Na lisiti yango, yandi tulaka Nzozulu ya Nkengi ti Réveillez-vous !, yina Bambangi ya Yehowa kebasisaka. Yandi monisaka nde yo kele bazulunalu ya kuluta mbote ya kelongaka evanzile mpi yandi tubaka nde: “Ata muntu mosi ve lenda funda Nzozulu ya Nkengi ti Réveillez-vous ! nde yo kekukaka ve kulungisa bampusa ya bantu. Mikanda yai kekangulaka mabanza ya bantu. Mu memonaka ntete ve mikanda ya mutindu yai na mabundu yankaka. Mambu ya kevandaka na Nzozulu ya Nkengi ti Réveillez-vous ! kepesaka bantu kikesa na bantendula na yo ya masonga, ya bansoniki kesosaka mbotembote, mpi ya ketubilaka mambu ya mfunu mpi ya kyeleka yina kesalama na inza.”

Mambu yonso kemonisa pwelele nde Kimfumu ya Nzambi kele ya kyeleka mpi yo ke na kusala mpenza kisalu na yo. Bambangi ya Yehowa kekwendaka kuzabisa bantu yankaka “Nsangu yai ya Mbote ya Kimfumu” na kyese mpi na kikesa yonso, mpi bo kebingisaka bo na mpila nde bo mpi kukuma na nsi ya luyalu na yo. (Matayo 24:14) Keti kivuvu ya mutindu yai kesepedisaka nge? Nge lenda baka balusakumunu yina kekatukaka na kusala kinduku ti bantu yina ke na kuwa malongi mpi kezitisa minsiku ya Kimfumu yango. Kima ya kuluta mbote kele nde nge lenda vanda ti kivuvu ya kuzinga na nsi ya luyalu ya Kimfumu na inza ya mpa ya Nzambi, kisika “lunungu tazinga.”​—2 Piere 3:13, NW.

[Noti na nsi ya lutiti]

[Kifwanisu ya kele na lutiti 5]

Na mvu 1914 makanda kudikotisaka na mvita ya inza ya mvimba

[Bifwanisu ya kele na lutiti 6]

Kisalu ya luzolo ya mbote ya kusadisa bantu kele kidimbu ya kemonisa mutindu Bakristu kemonisaka zola na bo

[Kifwanisu ya kele na lutiti 7]

Bambangi ya Yehowa ya inza ya mvimba kebakaka mambote ya malongi ya mutindu mosi