Keti Nge Lenda Tudila Dibundu Ntima na Yina Me Tala Mvita?

Alberto salaka kisalu ya kisoda kiteso ya bamvula kumi me luta. Yandi ke yibuka nde: “Pastere na beto vandaka kusakumuna beto mpi kutuba nde: ‘Nzambi kele ti beno.’ Kansi mono kuditubilaka nde: ‘Mono ke kwenda kufwa bantu, kansi Biblia ke tubaka nde: “Nge fwete fwa ve muntu.”’”

Ray vandaka mosi ya basoda yina nwanaka na masa na Mvita ya Zole ya Ntoto ya Mvimba. Kilumbu mosi, yandi yulaka pastere nde: “Nge ke kwisa na kati ya maswa mpi ke samba sambu na basoda mpi lunungu na bo. Keti bambeni kele ve ti bangidika ya mutindu mosi?” Pastere pesaka mvutu nde Mfumu ke salaka mambu na mutindu beto lenda bakisa ve.

Kana mvutu yina me sepedisa nge ve, nge kele ve nge mosi.

BIBLIA KE LONGAKA INKI?

Yezu tubaka nde mosi ya bantuma ya kuluta nene ya Nzambi kele ‘kuzola nkweno na nge bonso nge mosi.’ (Marko 12:31) Keti Yezu tulaka ndilu nde zola na beto sambu na bamfinangani ke tadila kisika yina bo ke zingaka to insi na bo? Ve. Yandi zabisaka balongoki na yandi nde: “Na diambu yai, bantu yonso ta zaba nde beno kele balongoki na mono, kana beno kele ti zola na kati na beno.” (Yoane 13:34, 35) Zola yina bo ta monisa na kati na bo ta vanda ngolo na mpila nde yo ta vanda kidimbu ya kuzabila bo. Bo ta buya kaka ve kufwa bankaka; kansi mpi kuvanda ya kuyilama na kupesa luzingu na bo sambu na bankaka.

Bakristu ya mvu-nkama ya ntete zitisaka bangogo ya Yezu. Ansiklopedi mosi (Encyclopedia of Religion) ke tuba nde: “Batata-mabundu ya ntete, tanga mpi Tertullien ti Origène, ndimaka nde Bakristu vandaka ti ntuma ya kukatula ve luzingu ya muntu, munsiku yina vandaka kubuyisa bo na kukuma soda ya Roma.”

BAMBANGI YA YEHOWA KE SALAKA INKI MUTINDU?

Bambangi ya Yehowa ke zingaka na bansi yonso, mpi bankaka na kati na bo ke zingaka na bansi yina makanda ke vandaka ya kukabwana. Ata mpidina, bo ke salaka bikesa ya ngolo sambu na kumonisa zola.

Mu mbandu, na Rwanda na 1994, Bahutu mpi Batutsi vandaka kuwakana ve; kansi Bambangi ya Yehowa landaka kuzolana na kati na bo. Bambangi ya Bahutu bumbaka Batutsi mpi Bambangi ya Batutsi bumbaka Bahutu, ata yo vandaka kigonsa ya nene sambu na luzingu na bo. Ntangu bo kangaka Bambangi zole ya babakala ya Bahutu yina bumbaka Batutsi, soda mosi ya Hutu ya Interahamwe songaka bo nde: “Beno fwete fwa sambu beno ke sadisa Batutsi na kutina.” Diambu ya mawa, na nima bo fwaka Bambangi yina zole ya Bahutu.​—Yoane 15:13.

Inki nge ke yindula: Keti mambu yina Bambangi ya Yehowa ke salaka ke wakana ti bangogo ya Yezu ya me tala zola ya kuditambika?