Bamvutu na Bangyufula na Beno

◼ Keti bibuti yonso zole fwete kotisa na rapore na bo ntangu yina bo kelutisaka na kulonguka ya dibuta ya bo kesalaka mbala na mbala?

Ata batata bantu kele ti mukumba ya ntetentete ya kulonga bana “malongi ti mambu ya” Yehowa, bibuti yonso zole kevukanaka na kulonga bana na bo. (Ef. 6:⁠4) Biblia kesyamisa bana nde: “Mwana na mono, wa malongi ya tata na nge, kubuya ve mambu ya mama na nge ke tubaka.” (Bing. 1:⁠8) Mutindu mosi ya mfunu yina bibuti kelongaka bana na bo kele kulonguka ya Biblia ya dibuta.

Na bilumbu meluta, kaka kibuti yina ketwadisa kulonguka ya dibuta ti bana yina mebakaka ntete ve mbotika muntu vandaka kukotisa ntangu yina na rapore na yandi, ata ntangu bibuti yonso zole vandaka kutuba na ntangu ya kulonguka. Kansi, beto mesoba dyambu yai. Kana na ntangu ya kulonguka ya dibuta bibuti yonso zole kevukana na kulonga bana, bo yonso zole lenda tanga kiteso ya ngunga mosi konso mposo na kisalu ya bilanga. Ya kyeleka, konso mposo bibuti kelutisaka ntangu mingi sambu na kulonga bana na bo kansi ngunga mosi kaka ve. Kulonga bana kelombaka nde bibuti yonso zole kusala bikesa mbala na mbala. (Kul. 6:​6-9) Kansi, rapore ya kisalu ya bilanga ya konso ngonda fwete vanda ti bangunga yina beto lutisaka na bilanga. Yo yina, beto lenda tanga ve bangunga mingi kuluta ngunga mosi ata kulonguka ya dibuta kubakaka bangunga mingi, kusalamaka mbala mingi na mposo mosi, to bibuti kulongukaka ti mwana mosi-mosi. Kaka kibuti mosi mpamba muntu fwete vutula rapore ya kulonguka ya Biblia ya dibuta mpi kutanga mvutukila mosi mpamba konso mposo yina yandi twadisaka kulonguka.