Telefone ya Bantu Yonso Sambu na Kulonguka Biblia ti Bantu

Daiane kele Mbangi ya Yehowa mpi yandi kele mupasudi-nzila ya ntangu yonso na insi Brésil. Kilumbu mosi na ntangu yandi vandaka kulonga nsangu ya Biblia na telefone, yandi solulaka ti nkento mosi mpi bakala na yandi ya katukaka kukwelana mpi bo monisaka mpusa. Bo songaka Daiane nde bo ke kwenda kuzinga na bwala mosi ya ke vandaka ve ti kura mpi Internet. Katula yo, ata Mbangi mosi ya Yehowa ke vandaka ve kuna. Sambu na kulanda kusolula mambu ya Biblia, bankwelani yina pesaka Daiane nimero ya telefone yina bantu yonso ya bwala yina ke sadilaka. Bo yonso tatu wakanaka kilumbu mpi ntangu ya bo fwete solulaka.

Na kilumbu mpi na ntangu yina bo wakanaka, Daiane bingaka na telefone yina ya bantu yonso mpi bankwelani yina yambaka. Na nima ya bamposo zole ya landaka, bo solulaka ti Daiane mbala kuluta tatu na telefone yango.

Kansi na nima, bankwelani yina vandaka kuyamba diaka ve telefone. Ata mpidina, Daiane lembaka ve nitu. Yandi landaka kubinga bo na telefone yina mbala tatu konso mposo mpi yandi vandaka kusolula ti konso muntu ya vandaka kuyamba telefone mambu ya Biblia. Yo salaka nde Daiane kukuma kulonguka Biblia ti bantu mingi na bwala yina.

Kilumbu mosi, ntangu Daiane ti bakala na yandi vandaka kulonguka Biblia ti mwana-bakala mosi na telefone yina ya bantu yonso, mfumu ya dibundu ya bwala yina waka masolo yina bo vandaka kusolula. Yandi telemaka na lweka ya longoki yina ya Biblia sambu na kuwa mbote-mbote disolo yango. Ebuna mfumu yina ya dibundu lombaka na kusolula ti Daiane mpi bakala na yandi. Mfumu yango sepelaka mingi ti mambu yina yandi waka, ebuna yandi zolaka mpi kulonguka Biblia.

Na ntangu yina Daiane ti bakala na yandi vandaka kulonguka Biblia ti bantu sambanu ya bwala yina na telefone yango, yo vanda mpi mfumu yina ya dibundu. Mingi na kati na bo vandaka dezia kulanda balukutakanu ya Bukristu na nzila ya telefone, bo vandaka kusadila kaka telefone yina. Longoki mosi na kati na bo salaka banc sambu balongoki ta vandaka sambu na kulonguka Biblia.

Daiane ti bakala na yandi ke monisa ntonda sambu na dibaku yina bo zwaka ya kupanza nsangu ya Kimfumu na bwala yina ya ntama. Daiane ke tuba nde, “Yehowa lenda yidika mambu sambu nsangu ya mbote kukumina muntu yonso, ata bayina ke zingaka na konso kisika yina kele ntama.”