Keti Bantu Ta Monaka Lunungu Yina Bo Ke Sosaka?
Mambu ya kukonda lunungu me fuluka na ntoto. Beto tubila bambandu zole ya me tadila lunungu ya nsi-ntoto:
Na Janvier 2018, zuzi mosi na États-Unis pesaka nswa na kubasisa muntu yina salaka bamvula pene-pene ya 38 na boloko. Bo basisaka yandi sambu bo zwaka banzikisa ya mbote na ekzame yina minganga salaka (ekzame ya ADN).
Na Septembre 1994, bo tulaka batoko tatu ya Afrique na boloko sambu bo buyaka kisalu ya kisoda. Na Septembre 2020, bo lungisaka bamvula 26 na boloko kukonda nde bo songa bo mbi yina bo me sala to kusambisa bo na ntwala ya tribinale.
Kana bo me sadilaka nge deja mambu ya mbi, nge lenda kudiwa bonso Yobi, yina zingaka na ntangu ya ntama. Yandi tubaka nde: “Mono ke landa kuboka sambu na kulomba lusadisu, kansi lunungu kele ve.” (Yobi 19:7) Ata beto lenda yindula nde lunungu ya kieleka ta vandaka ve, Bible ke tuba nde na bilumbu bantu ta mona lunungu yina bo ke sosaka. Diaka, mayele yina kele na Bible lenda sadisa nge na kukanga ntima na mambu ya mbi yina ke salama bubu.
Inki ke salaka nde mambu ya mbi kusalama?
Bantu ya ke lemfukilaka ve Nzambi bantu ke salaka mambu ya mbi. Bible ke tuba nde lunungu ya kieleka ke katukaka na Nzambi. (Yezaya 51:4) Na Bible, ngogo “lunungu” ti “mambu ya mbote” ke vandaka ti kuwakana ya ngolo. (Nkunga 33:5) Mambu yina kele mbote, ya ke wakana ti bansiku ya Nzambi, ke butaka lunungu. Kansi, mambu ya mbi ke katukaka na masumu, bo ke binga kima mosi nde yo kele mbi ntangu yo ke fwa nsiku ya Nzambi. Beto tadila bambandu yai:
Bwimi. Bwimi mpi disumu ke vandaka ti kuwakana ya ngolo. (Yakobo 1:14, 15) Bantu mingi ke sadilaka bankaka mambu ya mbi sambu bo mpamba bo baka mambote. Kansi, Nzambi ke zolaka nde beto tula mambote ya bantu ya nkaka na kisika ya ntete.—1 Bakorinto 10:24.
Kukonda Kuzaba. Bantu ya nkaka ke sadilaka bankaka mambu ya mbi kukonda kuzaba, ata mpidina yo kele kaka masumu na meso ya Nzambi. (Baroma 10:3) Ya kieleka, sambu na kukonda kuzaba, bantu me salaka mbi ya kuluta nene, bo fwaka Yezu Kristu.—Bisalu 3:15, 17.
Bimvuka ya bantu me yidikaka ve mambu. Yo lombaka nde, bimvuka ya politiki, ya mumbongo, mpi ya mabundu kusadila bantu mambu ya mbote mpi ya lunungu. Kansi, bimvuka yai ke vandaka mbala mingi na kisina ya mambu ya mbi, kundima avoka, kupona-pona, lukasi, kukumisa bantu ya nkaka bamvwama bankaka bansukami mpi kubuya bangindu ya bantu ya nkaka, mambu yai yonso ke basisaka kukonda lunungu. Bantu ya nkaka ya bimvuka yai ke vandaka ti bangindu ya mbote. Ata mpidina, bikesa yonso yina bantu ya ke lemfukilaka ve Nzambi ke salaka ke natilaka ve bantu mambote.—Longi 8:9; Yeremia 10:23.
Keti kukonda Lunungu ke pesaka Nzambi mpasi?
Ee, Nzambi ke mengaka kukonda lunungu, bikalulu mpi mambu yina ke basisaka kukonda lunungu. (Bingana 6:16-18) Yandi songaka profete Yezaya na kusonika nde: “Mono, Yehowa,a mono ke zolaka lunungu; mono ke mengaka kimuyibi ti kukonda kusungama.”—Yezaya 61:8.
Nsiku yina Nzambi pesaka bantu ya Izraele na ntangu ya ntama monisaka nde yandi ke zolaka nde bantu kusala mambu na lunungu. Yandi songaka bazuzi na kubuya avoka mpi mambu ya nkaka yina lenda basisa kukonda lunungu. (Kulonga 16:18-20) Yandi pesaka ndola na bantu ya Izraele yina vandaka kufwa nsiku na yandi na mutindu bo vandaka kusadila ve bansukami mpi bantu ya kukonda mfunu mambu na lunungu, yandi yambulaka bo sambu bo vandaka ve kuzitisa bansiku na yandi.—Yezaya 10:1-3.
Keti Nzambi ta manisa kukonda lunungu?
Ee. Na nzila ya Yezu Kristu, Nzambi ta katula disumu ti mambu yonso yina ke basisaka kukonda lunungu, mpi ta sadisa bantu na kukuma bantu ya kukuka. (Yoane 1:29; Baroma 6:23) Diaka, yandi me tulaka Kimfumu mosi yina ta nata nsi-ntoto ya mpa ya lunungu mpi ta sadila bantu yonso mambu na lunungu. (Yezaya 32:1; 2 Piere 3:13) Sambu na kuzaba mambu mingi ya me tala Kimfumu ya Nzambi, tala video Kimfumu ya Nzambi Kele Nki?
Luzingu ta vanda nki mutindu na nsi-ntoto ya mpa ya lunungu?
Ntangu lunungu ta kuma mingi na ntoto, bantu yonso ta zinga na ngemba mpi na lutaninu. (Yezaya 32:16-18) Nzambi ke monaka bantu yonso kiteso mosi, yo yina yandi ta sadila bantu yonso mambu na lunungu. Mawa, bidilu, mpi mpasi yina kukonda lunungu me nataka ta vanda diaka ve, mpi malembe-malembe beto ta yibukaka diaka ve bampasi yina beto me kutanaka ti yo sambu na kukonda lunungu. (Yezaya 65:17; Kusonga 21:3, 4) Sambu na kuzaba mambu mingi, tala disolo “Que fera le royaume de Dieu?”
Keti nge ndima kibeni lusilu ya Nzambi ya nsi-ntoto mosi ya lunungu?
Ee. Bible kele ti balusilu ya kutudila ntima, yo ke tubilaka masolo mpi mambu yina bantu ya mayele ke ndimaka, mpi mambu yina yo ke tubaka ke wakanaka, mambu yai ke ndimisa nde beto fwete tula ntima na basilu ya Bible. Masolo yai ya ke landa kele tubila diaka banzikisa mingi:
Inki mutindu beto lenda telemina kukonda lunungu bubu yai?
Bansadi ya Nzambi ya ntangu ya ntama teleminaka bantu yina vandaka kuzola kusadila bo mambu ya kukonda lunungu. Mu mbandu, tribinale mosi tadilaka ve mambu ya ntumwa Polo na lunungu mpi yo lendaka kunatila yandi lufwa. Na kisika ya kuvanda kaka pima mpi kundima mambu yina ya kukonda lununga, yandi sadilaka mambu yina nsiku vandaka kutuba mpi lombaka nde Sezare kutadila mambu na yandi.—Bisalu 25:8-12.
Ata mpidina, bikesa yina bantu ke salaka sambu na kuyidika mambu yonso ya kukonda lunungu me nungaka ve. (Longi 1:15) Diaka, bantu mingi me ndimaka nde kutula ntima na lusilu ya Nzambi ya nsi-ntoto ya mpa ya lunungu me sadisaka bo na kuvandaka diaka ve na mawa sambu na mambu ya kukonda lunungu kansi na kuvanda na ngemba ya mabanza.
a Yehowa kele zina ya Nzambi.—Nkunga 83:18.