Mutindu Biblia Lenda Sadisa Babakala Ntangu Bo Kele ti Basusi
Ntangu nge ke yindula bantu yina kele ti basusi,a nge lenda yindula muntu mosi yina ke wa boma mingi mpi ke kuka diaka ve kusala ata kima, to muntu mosi yina ke kuka ve kutelama na mbetu na suka, to muntu yina ke tubilaka ntangu yonso bampasi na yandi.
Bantu ya nkaka ke salaka mutindu yina sambu na kumonisa basusi na bo. Kansi bantu ya mayele me bakisaka nde bantu ya nkaka, mingi-mingi babakala, ke salaka ve mutindu yina. Rapore mosi monisaka nde babakala “ke sepelaka mingi kunwa malafu to bima ya nkaka yina ke lawusaka sambu bo yindula diaka ve basusi na bo, beto lenda mona muntu mosi ke lawuka mingi kansi kieleka lenda vanda nde yandi ke salaka yo sambu na kuvila bampasi na yandi. Mbala mingi kana babakala kele ti basusi bo ke monisaka yo na bikalulu bonso kuwa makasi mpi kiseku mingi.”
Ya kieleka babakala yonso ve ke monisaka basusi na bo mutindu mosi. Kansi yo vanda konso mutindu yina muntu ke monisa susi na yandi, basusi ke landa kukuma mingi na ‘bilumbu yai ya nsuka ya mpasi.’ (2 Timoteo 3:1) Inki mutindu Biblia lenda sadisa nge kana nge kele ti basusi?
Bandongisila ya Mbote ya Biblia Sambu na Kununga Basusi
Biblia kele ti bandongisila ya mbote yina lenda sadisa beto kana beto kele ti basusi. Beto tubila bandongisila tatu.
1. “Beno kudiyangisa ve ata fioti sambu na kilumbu yina ke landa, sambu kilumbu yina ke landa ta vanda ti basusi na yo. Konso kilumbu ke vandaka ti bampasi na yo.”—Matayo 6:34.
Ntendula na yo: Beto ta monisa mayele kana beto ke kudiyangisa ve mingi sambu na mambu yina lenda salama to ve na bilumbu ke kwisa. Mbala mingi, mambu yina beto ke wilaka boma ke salamaka ve mutindu beto vandaka kuyindula. Nkutu bantangu ya nkaka, mambu ke sobaka na mutindu ya mbote yina beto yindula ve.
Meka diambu yai: Yibuka bantangu yina nge yindulaka nde diambu mosi ya mpasi ta salama kansi na nima yo salamaka ve. Tadila ntangu yai mambu yina ke yangisa nge bilumbu yai, tadila yo na mutindu ya mbote mpi tala kana yo lenda kuma mambu ya mpasi mingi.
2. “Mutindu kibende ke tulaka kibende makasi,mutindu mosi mpi, muntu ke semisaka nduku na yandi.”—Bingana 27:17.
Ntendula na yo: Bantu ya nkaka lenda sadisa nge na kununga basusi na nge kana nge songa bo. Sambu bo mosi me kutanaka ti mambu mingi na luzingu, bo lenda pesa nge bandongisila ya mbote. Nkutu bo lenda songa nge mutindu ya mbote ya kutadila diambu yango.
Meka diambu yai: Yindula muntu mosi yina lenda pesa nge ndongisila ya mbote, mu mbandu nduku mosi yina me kutanaka ti mambu bonso yina nge ke kutana ti yo. Yula yandi mambu yina yandi sa
3. ‘Beno losa basusi na beno yonso [mambu yonso ya ke yangisa beno] na yandi sambu yandi ke kudibanzaka sambu na beno.’—1 Piere 5:7.
Ntendula na yo: Nzambi ke tudilaka bantu yina ke mona mpasi dikebi mingi. Yandi ke lomba beto na kusonga yandi na kisambu mambu yonso ya ke yangisa beto.
Meka diambu yai: Sonika mambu yonso yina ke pesa nge mpasi. Na nima, samba Nzambi sambu na mambu yango, tendudila yandi konso diambu mpi lomba yandi na kusadisa nge na kununga yo.
Ntangu Basusi Ta Vanda Diaka Ve
Biblia kele ti bandongisila mingi ya ke sadisaka bantu na kukatula basusi. Yo ke sila nde ntama mingi ve mambu ya ke niokulaka beto bubu yai ta vanda diaka ve. Inki mutindu yo ta salama?
Kimfumu ya Nzambi ta katula mambu yina ke natilaka beto bampasi. (Kusonga 21:4) Ya kieleka, ntangu Kimfumu ya Nzambi ta yala ntoto, mabanza na beto ta yindulaka diaka ve mambu yina lenda pesa beto mpasi.—Yezaya 65:17.
Yai kele luzingu ya mbote yina “Nzambi yina ke pesaka ngemba” ke zola nde beto vanda na yo na bilumbu ke kwisa. (Baroma 16:20) Yehowa ke ndimisa beto nde: “Sambu mono me zaba mbote bangindu yina mono ke yindula sambu na beno, . . . bangindu ya ngemba, kansi ya mpasi ve, sambu na kupesa beno makwisa mpi kivuvu.”—Yeremia 29:11.