Bamfumu ya Kukonda Masonga Ta Vanda Diaka Ve

Bantu kele ti mfunu ya bantwadisi yina bo lenda tudila ntima; bo me lemba bantwadisi ya me fuluka ti luvunu. Bo yulaka bantu ya babwala mingi na ntoto ngindu ya bo kele ti yo sambu na bantwadisi mpi na 2023 bo basisaka mambu yina bantu tubaka. Bantu mingi tubaka nde kana yo kele ti bantu yina bo ke tudilaka ve ntima, yo kele bamfumu ya luyalu.a

Biblia ke tubila luyalu mosi yina Ntwadisi na yo me fwana kibeni na kutudila ntima mpi yandi kele muntu ya masonga, yandi ke kusaka ve ata fioti mpi yandi ta kusaka ve. Luyalu yina kele Kimfumu ya Nzambi mpi Ntwadisi na yo kele Yezu Kristu.—Yezaya 9:7.

Mambu yina Yezu salaka monisaka nde yandi ke tudilaka kibeni bantu dikebi. (Matayo 9:35, 36) Mutindu Yezu kele Ntotila ya Kimfumu ya Nzambi, yandi ta sala nde bantu yonso yina ke ndima lutwadisu na yandi, kuzinga na ngemba mpi yandi ta sadila bo mambu ya mbote.—Nkunga 72:12-14.