Sambu na Nki Kimbeni Me Fuluka na Ntoto?—Inki Biblia Ke Tuba?

Bubu yai bansangu ke tubila mingi mpila bantu ke menga bantu ya nkaka mpi bo ke sadila bo mambu na nku sambu bo bakilaka bo bangindu ya mbi, mpila bantu ke nwanisa bantu ya nkaka sambu bo kele bantu ya kimvuka ya nkaka mpi mpila bitumba kele mingi.

Zulunalu mosi (The New York Times) tubaka na 15 novembre 2023 nde: “Na Internet, bantu ke tuba mambu ya ke monisa nde bo ke menga bantu ya nkaka. Yo kele sambu na bitumba yina Israel ke nwana ti Gaza mpi sambu bantu ya nkaka ke pusa bo na kusala mubulu mpi kumenga bantu.”
Dennis Francis, prezida ya kimvuka ya bo ke bingaka Assemblée générale des Nations unies tubaka na 3 novembre 2023 nde: “Banda na 7 octobre, bantu ke tuba mambu ya ke monisa nde bo ke menga mpenza bantu ya nkaka mpi bo ke sala mubulu mingi kibeni sambu bo ke bakila bantu ya nkaka bangindu ya mbi.”

Kutuba mambu ya ke monisa nde bo ke menga bantu ya nkaka, mubulu mpi bitumba me banda ve bubu. Biblia ke tubila bantu yina na bilumbu me luta vandaka “[kuyidika] bangogo na bo ya nku bonso batolo-tolo” mpi vandaka kunwana bitumba mpi kusala mubulu. (Nkunga 64:3; 120:7; 140:1) Ata mpidina, Biblia ke monisa nde kimbeni ya beto ke mona bubu yai kele ti kikuma.

Kimbeni—Kima ya fwete monana mingi na ntangu na beto

Biblia ke monisa bikuma zole yina ke salaka nde kimbeni kukuma mingi bubu yai.

1. Yo tubilaka ntangu yina “zola ya bantu mingi ta mana.” (Matayo 24:12) Na kisika ya kumonisa zola, bantu mingi ta monisa bikalulu yina ta sala nde bo kuma kumengana.—2 Timoteo 3:1-5.
2. Satana diabulu muntu ke sala nde kimbeni kulanda kukuma mingi na ntoto. Biblia ke tuba nde “nsi-ntoto ya mvimba kele na nsi ya kiyeka ya muntu ya mbi.”—1 Yoane 5:19; Kusonga 12:9, 12.

Kansi, Biblia ke monisa nde ntama ve Nzambi ta katula mambu yina ke salaka nde kimbeni kuvanda. Kima kuluta mbote, yandi ta belula mpasi yina yonso kimbeni me nataka. Biblia ke tuba nde:

Nzambi “ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve. Mambu ya ntama me vila.”—Kusonga 21:4.