Bantu Mingi na Ntoto ya Mvimba Ke Kudiwaka Bo Mosi—Nki Nge Lenda Sala Sambu na Kudiwa Ve Nge Mosi?

• Mukanda mosi (Notre épidémie de solitude et d’isolement : avis du chirurgien général des États-Unis sur les effets curatifs des liens sociaux et de la communauté, 2023) monisaka nde: “Kiteso ya kati-kati ya bambuta na États-Unis tubaka nde bo ke kudiwaka bo mosi mingi-mingi bantu ya bamvula banda na 18 tii na 25.”

• Na 15 novembre 2023, Kimvuka ya bo ke bingaka Organisation mondiale de la santé (OMS) tubaka nde: “Beto me pona kimvuka mosi ya bantu mpi kisalu na bo ta vanda ya kubaka maladi yai bonso maladi ya nsaka ve, bo ta songaka bantu na kusala bikesa ya kuta kinduku ti bantu ya nkaka mpi bo ta sosaka mitindu ya kuluta mbote ya kusansa maladi yai na ntoto ya mvimba, ata na bansi yina kinsukami kele mingi.”

Biblia ke pesaka bandongisila ya mbote yina lenda sadisa beto na kusala kinduku ya mbote ti bantu ya nkaka sambu na kudiwa ve beto mosi.

Bandongisila ya Biblia yina lenda sadisa nge

Kusala ve mingi mambu yina ke bikila nge ve ntangu ya kuvanda ti bantu ya nkaka. Mambu yango ke tadila mpi kulutisa ntangu mingi na Internet. Na kisika na yo, sosa kulutisa ntangu ti bantu kimuntu-kimuntu mpi sala kinduku ya kieleka ti bantu.

• Ndongisila ya Biblia: “Nduku ya kieleka ke zolaka konso ntangu, mpi yandi kele mpangi yina me butukaka sambu na bantangu ya mpasi.”—Bingana 17:17.

Sosa mabaku ya kusadisa bantu ya nkaka. Kusadila bantu ya nkaka mambu ya mbote ke salaka nde kinduku na beto ti bo kukuma ngolo mpi yo ke pesaka beto kiese.

• Ndongisila ya Biblia: “Kiese ke vandaka mingi na kupesa, kansi na kubaka kiese ke vandaka fioti.”—Bisalu 20:35.

Kota na site Internet na beto sambu na kuzaba mambu mingi ya mfunu yina Biblia ke tubaka sambu na kusala kinduku ya mbote ti bantu ya nkaka.