Ntalu ya Bantu Yina Ke Kudiwa Bo Mosi Ke Landa Kaka Kumata—Inki Biblia Ke Tuba

Bansosa ya bo me katuka kusala na bansi mingia na ntoto me monisa nde muntu mosi na kati ya bantu iya ke kudiwaka yandi mosi.

• Chido Mpemba ya kele prezida ya zole ya kimvuka mosi ya OMS (Commission sur la connexion sociale de l’Organisation mondiale de la santé) tubaka nde: “Kukonda kuvanda ti banduku mpi bantu ya kusolula ti bo lenda kumina bantu yonso, yo vanda bamvula ya bo kele ti yo to kisika ya bo ke zingaka.”

Bantu mingi ke yindulaka nde bantu ya ke kudiwaka bo mosi kele kaka minunu to bantu ya ke zingaka bo mosi. Kansi kieleka kele nde yo vanda baleke, bayina kele ti sante ya mbote, bamvwama mpi bantu ya me balaka lenda kudiwa mpi bo mosi. Kana muntu ke kudivandila mpi yandi ke kudiwa yandi mosi, yo lenda bebisa sante na yandi mpi yandi lenda kuma kuyindula diaka ve mbote.

• Doktere Vivek Murthy tubaka nde: “Kana muntu ke kudiwa yandi mosi, yo ke tendula kaka ve nde yandi ke wa ve bien.” Yandi yikaka nde: “Kigonsa nde muntu kufwa sambu yandi kele ve ti banduku to bantu ya kusolula ti yandi kele kiteso mosi bonso ya muntu yina ke nwa banti ya makaya 15 na kilumbu mosi.”

Mambu yina Biblia ke tuba

Nzambi yina salaka beto ke zolaka ve nde beto kudivandila. Nzambi ke zolaka kaka nde bantu kuzinga mbote ti bantu ya nkaka mpi bo vanda banduku ya mbote.

• Verse ya Biblia: “Nzambi tubaka nde: ‘Yo kele mbote ve nde muntu kulanda kuvanda yandi mosi.’”​—Kuyantika 2:18.

Nzambi ke zolaka nde beto kuma banduku na yandi. Yandi ke sila nde yandi ta kwisa pene-pene na beto kana beto sala bikesa ya kupusana pene-pene na yandi.​—Yakobo 4:8.

• Verse ya Biblia: “Kiese na bantu yina ke bakisaka mbote nde bo kele ti nzala ya mambu ya kimpeve, sambu Kimfumu ya zulu kele ya bo.”​—Matayo 5:3.

Nzambi ke zolaka nde beto sambila yandi ti bantu ya nkaka. Kana beto sala mpidina, yo ta sadisa beto na kuvanda na kiese.

• Verse ya Biblia: “Beto tudila bankaka dikebi sambu na kupusa bo na kumonisa zola mpi na kusala bisalu ya mbote, beto yambula ve kuvukana kumosi, . . . kansi beto pesana kikesa.”​—Baebreo 10:24, 25.

Sambu na kuzaba mambu mingi ya me tala mambu ya nge fwete sala sambu na kudiwa diaka ve nge mosi, tanga disolo “La solitude à l’ère de la communication.”