Keti Nzambi kele?

Mvutu ya Biblia

Ee, Biblia ke tubilaka mambu yina ke monisaka pwelele nde Nzambi kele. Yo ke lombaka beto na kuvanda ti lukwikilu na Nzambi kansi ve na kundima mambu yonso yina mabundu ke longaka. Diaka, beto fwete sadila ‘mayele ya kuyindula’ mpi “mayele ya kubakisa mambu mbote-mbote” sambu na kundima nde Nzambi kele. (Baroma 12:1; 1 Yoane 5:20, noti na nsi ya lutiti) Beto tadila mambu yina Biblia ke tubaka ya ke monisa nde Nzambi kele:

• Mutindu bima yonso kele na ndonga na zulu ti na ntoto mpi mutindu yo ke sadisaka bantu mpi bima yonso na kuzinga ke monisaka nde kele ti Muntu Yina Salaka yo. Biblia ke tuba nde: “Ya kieleka, konso nzo kele ti muntu yina ke tungaka yo, kansi Nzambi muntu tungaka bima yonso.” (Baebreo 3:4) Dilongi yai ke pete kansi bantu mingi ya mayele ke monaka yo dilongi mosi ya nene ya ke ndimisaka.a

• Beto ke butukaka ti mpusa ya kuzaba sambu na nki beto ke zingaka. Mpusa yina ke vandaka kaka ata ntangu beto kele ti bima yonso yina beto kele na yo mfunu. Biblia ke bingaka mpusa yai “nzala ya mambu ya kimpeve” disongidila mpusa ya kuzaba Nzambi mpi ya kusambila yandi. (Matayo 5:3; Kusonga 4:11) Mpusa yai ke monisaka nde Nzambi kele. Yo ke monisaka mpi nde yandi muntu salaka beto, yandi ke zolaka beto mpi yandi ke zolaka nde beto lungisa mpusa yai.

• Biblia tubilaka pwelele mambu yina ta salama na nima ya bamvula mingi mpi yo salamaka kaka mutindu yina. Mutindu mambu yango salamaka kaka mutindu Biblia tubilaka yo, ke monisa mpenza nde yo katukaka na muntu yina me luta bantu na ngolo.—2 Piere 1:21.

• 

  Bantu yina sonikaka Biblia vandaka kuzaba mambu ya siansi yina bantu mingi ya ntangu na bo vandaka kuzaba ve. Mu mbandu, na ntangu ya ntama bantu mingi vandaka kuyindula nde ntoto kele na zulu ya nzoko, ya ngulu ya mfinda to ya ngombe ya bakala. Kansi Biblia ke tubaka nde: “Yandi me tulaka ntoto na zulu ya kima ve.” (Yobi 26:7) Diaka, Biblia ke tubaka na pwelele mutindu ntoto kele. Yo ke tubaka nde ntoto kele bonso “nkongolo” to “dimbuma.” (Yezaya 40:22) Sambu bantu yina sonikaka Biblia zabaka mambu yai banda ntama, yo ke pusaka bantu mingi na kundima nde mambu ya bo sonikaka katukaka na Nzambi.

• Biblia ke pesaka bamvutu na bangiufula yina bantu mingi ke monaka mpasi mpi ya lenda pusa bantu ya nkaka na kubuya kundima nde Nzambi kele kana bo baka ve bamvutu ya mbote. Mu mbandu: Kana Nzambi ke zolaka bantu to yandi me luta bantu yonso na ngolo, sambu na nki bantu ke niokwamaka mpi ke salaka mambu ya mbi na ntoto? Sambu na nki mabundu ke pusaka bantu na kusala mambu ya mbi kansi ve mambu ya mbote?—Tito 1:16.