Sambu na Nki Bambangi ya Yehowa Ke Kotaka Ve na Mambu ya Politiki?
Bambangi ya Yehowa ke kotaka ve na mambu ya politiki sambu bo ke sadilaka malongi yina me katuka na Biblia. Beto ke pesaka ve bangindu na beto na balukutakanu yina bantu ya politiki ke salaka, beto ke salaka ve voti, beto ke pesaka ve zina sambu bo pona beto, mpi beto ke salaka ve ata kima mosi sambu na kusoba mambu na luyalu ya bansi. Beto ke ndimaka nde Biblia ke monisaka nde beto fwete sala ve mambu yina. Sambu na nki?
Beto ke landaka mbandu ya Yezu. Yandi buyaka kukuma mfumu ya politiki. (Yoane 6:15) Yandi longaka balongoki na yandi nde ‘bo vanda ve bantu ya nsi-ntoto’ mpi yandi monisaka bo pwelele nde bo fwete kota ve na mambu ya politiki.—Yoane 17:14, 16; 18:36; Marko 12:13-17.
Beto kele na simu ya Kimfumu ya Nzambi yina Yezu tubaka sambu na yo nde: “Bo ta samuna nsangu yai ya mbote ya Kimfumu na ntoto ya mvimba sambu na kuta kimbangi na makanda yonso, ebuna nsuka ta kwisa.” (Matayo 24:14) Mutindu beto kele bantu ya Kimfumu ya Nzambi mpi beto kele ti mukumba ya kulonga nde yo ke kwisa, beto ke kotaka ve na mambu ya politiki ata ya insi mosi, yo vanda ya insi yina beto ke zinga.—2 Bakorinto 5:20; Baefezo 6:20.
Mutindu beto ke kotaka ve na mambu ya politiki, beto ke waka ve boma ya kulonga bantu yonso nsangu ya mbote ya Kimfumu ya Nzambi, yo vanda bantu ya konso kimvuka yina ya politiki. Beto ke salaka ngolo sambu mambu ya beto ke tubaka mpi ya beto ke salaka kumonisa nde beto ke ndimaka kibeni nde Kimfumu ya Nzambi mpamba ta manisa bampasi ya bantu.—Nkunga 56:11.
Mutindu beto ke kotaka ve na mavwanga ya politiki, beto ke vandaka na bumosi ti bampangi na beto ya ntoto ya mvimba. (Bakolosai 3:14; 1 Piere 2:17) Kansi bandimi ya mabundu yina ke kotaka na mambu ya politiki ke vandaka ve na bumosi na kati na bo.—1 Bakorinto 1:10.
Kuzitisa baluyalu. Ata beto ke kotaka ve na mambu ya politiki, beto ke zitisaka bamfumu ya insi yina beto ke zinga. Kusala mutindu yai ke wakana ti mambu yai ya Biblia ke tuba nde: “Konso muntu fweti lemfuka na bamfumu ya leta.” (Baroma 13:1, Bible en Kituba) Beto ke zitisaka bansiku ya insi ya beto ke zinga, beto ke futaka mpaku mpi beto ke salaka mambu yina luyalu ke lomba na kusala sambu na mambote ya bantu yonso ya insi. Beto ke sadilaka ndongisila ya Biblia ya ke tubaka nde beto fwete “samba sambu na bantotila mpi bantu yonso yina kele na bisika ya lukumu,” na kisika ya kuvukana ti bantu ya nkaka sambu na kusosa kubwisa baluyalu. Beto ke sambaka sambu na bamfumu mingi-mingi kana bo me buyisa mambu ya me tala lusambu na beto.—1 Timoteo 2:1, 2.
Beto ke ndimaka nde konso muntu fwete baka yandi mosi lukanu na yina me tala mambu ya politiki. Mu mbandu, beto ke nataka ve mavwanga ntangu bantu ke pona bantwadisi mpi beto ke buyisaka ve bantu na kukwenda kusala voti.
Keti kubuya kukota na mambu ya politiki me banda bubu? Ve. Bantumwa mpi Bakristu ya nkaka ya mvu-nkama ya ntete buyaka mpi kukota na mambu ya politiki. Mukanda mosi (Beyond Good Intentions) ke tuba nde: “Ata Bakristu ya ntete zabaka nde bo kele ti mukumba ya kuzitisa bamfumu ya leta, bo vandaka ve kundima kukota na mambu ya politiki.” Mutindu mosi mpi, mukanda mosi (On the Road to Civilization) ke tuba nde Bakristu ya ntete “vandaka ve kundima kubaka mikumba na politiki.”
Keti mutindu beto ke buyaka kukota na mambu ya politiki beto ke tulaka ngemba ya insi na kigonsa? Ve. Bamfumu ya leta ke vandaka ve na boma sambu na beto sambu beto ke vandaka bantu ya ngemba. Beto baka mbandu ya rapore mosi ya 2001 yina kimvuka mosi (National Academy of Sciences of Ukraine) basisaka. Rapore yina tubaka mambu yai mutindu beto ke kotaka ve na mambu ya politiki: “Bubu yai bantu ya nkaka lenda zola ve ata fioti Bambangi ya Yehowa sambu na lukanu yina bo me bakaka. Bamfumu ya Nazi mpi bakoministe fundaka bo na ntangu ya ntama sambu na lukanu yina.” Ata bantu ya Union soviétique niokulaka bo, Bambangi ya Yehowa “landaka kuzitisa bansiku ya insi. Bo landaka kusala na baferme mpi na bilanga ya nene mpi bo vandaka ve kigonsa sambu na luyalu ya bakoministe.” Mutindu nsuka ya rapore yai me monisa yo, bubu yai, malongi mpi mambu yina Bambangi ya Yehowa ke salaka “ke tulaka ve ngemba ya insi na kigonsa.”