Keti Yo Kele Mfunu na Kuvanda ti Dibundu?

Mvutu ya Biblia

Ee, sambu Nzambi ke zolaka nde bantu kuvukana kisika mosi sambu na kusambila yandi. Biblia ke tuba nde: “Beto tudila bankaka dikebi sambu na kupusa bo na kumonisa zola mpi na kusala bisalu ya mbote, beto yambula ve kuvukana kumosi.”—Baebreo 10:24, 25, noti ya nsi ya lutiti.

Yezu monisaka nde balongoki na yandi ta sala dibundu, yo yina yandi songaka bo nde: “Na diambu yai, bantu yonso ta zaba nde beno kele balongoki na mono—kana beno ke zolana beno na beno.” (Yoane 13:35) Sambu balongoki ya Kristu kumonisilana mpenza zola, yo kele mfunu mingi nde bo kutana kisika mosi ti bampangi na bo Bakristu. Bo fwete kutana mbala na mbala sambu na kusambila Nzambi. (1 Bakorinto 16:19) Balongoki yonso ya Yezu ke salaka dibuta ya bampangi ya ntoto ya mvimba.—1 Piere 2:17.

Kuvanda kaka mundimi na dibundu mosi me fwana ve

Biblia ke tubaka nde bantu fwete vukana sambu na kusambila Nzambi, kansi yo ke tubaka ve nde muntu ke sepedisaka nzambi kaka kana yandi kele mundimi na dibundu mosi buna. Sambu Nzambi kundima dibundu na yandi, yo fwete sadisa yandi mpenza na kusoba konso kilumbu bikalulu na yandi. Mu mbandu, Biblia ke tubaka nde: “Lusambu ya bunkete mpi ya kukonda mvindu na meso ya Nzambi mpi Tata na beto yo yai: kusadisa bana-nsiona mpi mifwidi ya bankento na bampasi na bo, mpi kubikala kukonda ditono ya nsi-ntoto.”—Yakobo 1:27.