Sambu na Nki Mabundu ya Bukristu Kele Mingi Mutindu Yai?
Mvutu ya Biblia
Bantu me sadila malongi ya Yezu Kristu sambu na kusala mabundu ya mutindu na mutindu ya “Bukristu.” Kansi Biblia ke monisa nde dibundu ya Bukristu ya kieleka kele kaka mosi. Tadila mambu tatu yina ke pusa na kutuba mpidina.
Yezu tubaka nde yandi longaka “kieleka,” mpi Bakristu ya ntete vandaka kubinga dibundu na bo nde “kieleka.” (Yoane 8:32; 2 Piere 2:2; 2 Yoane 4; 3 Yoane 3) Bangogo yai ke monisa nde bantu yina ke longaka mambu yina ke wakana ve ti malongi yina Yezu longaka kele ve na dibundu ya Bukristu ya kieleka.
Biblia ke longaka nde Bakristu ‘fwete vanda na bumosi na mambu ya bo ke tuba.’ (1 Bakorinto 1:10) Kansi, mabundu mingi ya Bukristu ke tubaka ve mambu ya mutindu ata na malongi ya ntete ya Bukristu, mu mbandu ntendula ya ngogo ya Mukristu. Mabundu yina yonso lenda vanda ve mabundu ya kieleka.—1 Piere 2:21.
Yezu tubaka dezia na ntwala nde bantu mingi ta tuba nde bo kele Bakristu kansi bo ta zitisa ve bansiku na yandi mpi nde yandi ta kula bantu ya mutindu yina. (Matayo 7:21-23; Luka 6:46) Bamfumu ya mabundu ta kusa bantu ya nkaka. Bamfumu yango ya mabundu ke bebisaka lusambu ya kieleka sambu na kusosa mambote na bo mosi. (Matayo 7:15) Kansi, bantu ya nkaka ta pona kulanda mabundu ya Bukristu ya luvunu sambu na mabundu yina, bo ta longa bo mambu yina makutu na bo ke zola kuwa na kisika ya kulonga bo malongi ya kieleka yina kele na Biblia.—2 Timoteo 4:3, 4.
Na mbandu ya ble mpi ya matiti ya mbi yina Yezu pesaka, yandi tubaka dezia nde kukolama (apostazi) ta basika sambu na kufwa Bukristu ya kieleka. (Matayo 13:24-30, 36-43) Ntangu mosi ya nda ta luta kukonda nde bantu kuzaba nde yai kele dibundu ya kieleka mpi yai ya nkaka kele dibundu ya luvunu. Kaka mutindu Yezu tubaka yo dezia na ntwala, kukolama kumaka ngolo na nima ya lufwa ya bantumwa. (Bisalu 20:29, 30) Malongi yina bantu ya me kolama ke longaka lenda vanda ve mutindu mosi. Ata mpidina, mabundu yango yonso ya Bukristu “me yambulaka kieleka.”—2 Timoteo 2:18.
Yezu tubaka mpi dezia na ntwala nde nsuka-nsuka, bantu ta mona pwelele luswaswanu na kati ya dibundu ya kieleka mpi ya dibundu ya luvunu. Diambu yai ke salama na bilumbu na beto, na ntangu yai ya nsuka ya nsi-ntoto.—Matayo 13:30, 39.