Lukutakanu ya Distrike ya Bambangi ya Yehowa ya Mvu 2008

1. (a) Sambu na nki ndongisila yina Polo kupesaka na Bakristu ya Baebreo kele mpenza mfunu bubu yai? (Tanga Baebreo 10:​24, 25.) (b) Inki dibaku ya kekwisa beto tavanda na yo sambu na kusadila ndongisila ya Polo?

¹ Ntumwa Polo kulongisilaka Bakristu ya Baebreo na kuvukana kumosi mpi kupesana kikesa kuluta mingi mutindu bo vandaka kumona nde kilumbu mefinama. (Baeb. 10:​24, 25) Banzikisa kele mingi ya kemonisa nde “kilumbu” yina Polo kutubilaka mefinama mpenza! Yo yina, beto kevingilaka mabaku ya kuvukana ti bampangi na beto sambu na kuzwa malongi ya kimpeve yina lenda twadisa beto na “bilumbu ya nsuka” yai ya kekuma kaka mbi. (2 Tim. 3:⁠1) Beto tavanda ti dibaku ya mutindu yina na balukutakanu ya distrike ya mvu 2008 yina kekwisa.

2. (a) Sambu na nki yo kele mfunu na kukwenda na balukutakanu ya distrike bilumbu yonso tatu? (b) Inki mutindu beto fwete yantika kudibongisa sambu na kuvanda pana?

² Vanda Bilumbu Yonso Tatu: Beto kesyamisa nge na kukwenda na balukutakanu bilumbu yonso tatu. Kana beto kele ti kikalulu ya ‘kukwenda’ na balukutakanu, beto tabaka malongi ya kimpeve ya mfunu. (Baeb. 10:25) Yantika kudibongisa kukonda kusukinina. Yo tavanda mbote nde nge zabisa na ntwala mfumu na nge ya kisalu na mpila nde yandi baka bangidika yina mefwana. Kana bana na nge tavanda na nzo-nkanda na nsungi yina lukutakanu ya distrike tasalama, zabisa balongi na bo bangidika ya nge mebaka. Zabisa bo nde balukutakanu ya distrike kele kitini mosi ya lusambu na beto yina beto kesalaka mbala na mbala. Nge lenda tula mpenza ntima nde Yehowa tasakumuna bikesa ya nge kesala sambu na kutula mambote ya Kimfumu na kisika ya ntete.​—⁠Mat. 6:⁠33.

3. Inki beto lenda sala sambu na kumonisa nde beto ketudila bankaka dikebi?

³ Sadisa Bankaka na Kukwenda na Lukutakanu ya Distrike: Polo kulombaka mpi bampangi na yandi na ‘kutalanaka bo na bo.’ (Baeb. 10:24) Keti bampangi ya kimvuka na beno ya Kulonguka ya Mukanda ya Dibundu kele na mfunu ya lusadisu sambu na kukwenda na lukutakanu? Keti nge lenda sadisa bantu yina nge kelongukaka ti bo Biblia sambu bo kwenda ti nge, ata kana bo lenda kwenda kaka kilumbu mosi? Ntangu nge kezabisa bangidika ya nge mebaka sambu na balukutakanu na bantu ya dibuta na nge yina kele ve Bakristu, lomba bo na kukwenda ti nge. Bikesa ya nge kesala na zola yonso lenda natila nge balusakumunu mingi mpenza.

4. Sambu na nki beto fwete kwenda na lukutakanu ya distrike yina bo metinda dibundu na beto?

⁴ Kwenda na Lukutakanu Yina Bo Metinda Dibundu na Beno: Bo tatula lisiti ya bisika yonso yina balukutakanu ya distrike tasalama na tablo ya bansangu ya dibundu na nima ya kutadila ngika yai na Lukutakanu ya Kisalu. Beto kelomba bansamuni yonso na kutadila na kisambu na nki lukutakanu bo takwenda na mvu 2008. Sambu bampangi kubongisa bisika ya kuvanda ya kufwana, mikanda, bisika ya kulala, mpi mambu yankaka, beto kesyamisa beno na kukwenda na lukutakanu ya distrike yina bo metinda dibundu na beno. Kansi, kana kele ti mambu ya kepesa nge ve nzila ya kukwenda na lukutakanu yina bo metinda dibundu na beno, nge lenda kwenda na lukutakanu ya distrike yankaka.

5. Inki mambu ya mfunu beto fwete vila ve kana beto kesosa kisika ya kulala, mpi sambu na nki?

⁵ Bisika ya Kulala: Kana nge kezola kuzwa kisika ya kulala na nzo (ya mpangi mosi) to na Nzo ya Kimfumu, beto kelomba nde sekretere kusala na ntwala mpenza lisiti ya bansamuni yonso yina kelomba kisika ya kulala mpi kutinda yo na Departema ya Kupesa Bisika ya Kulala na bwala yina lukutakanu ya distrike tasalama. Yandi fwete sonika zina, kumonisa kana mpangi yango kele bakala to nkento, mvula na yandi, mpi kumonisa kana yandi kele tata, mama to mwana. Kusala mutindu yai tapesa bampangi yina kesalaka na Departema ya Kupesa Bisika ya Kulala ntangu ya kusosila bantu yonso bisika ya kulala. Komite ya Kisalu ya Dibundu fwete tadila bikalulu ya bansamuni na ntwala ya kutinda formilere ya mutindu yai na Departema ya Kepesaka Bisika ya Kulala. Kana bo mepesa beto kisika mosi ya kulala, yo tavanda mbote ve nde beto wakana na mpila na beto mosi sambu na kuvanda ti mpangi to ti nduku yankaka. Kusala mutindu yai takumisa kisalu ya bampangi ya Departema ya Kupesa Bisika ya Kulala mpasi. Kansi, kana muntu mosi kezola kuvanda na nzo ya mpangi na yandi ya kinsuni na bilumbu yina lukutakanu tasalama, yo kele ve mfunu nde yandi lomba sekretere na kusonika zina na yandi na formilere yina bo tatinda sambu na kulomba kisika ya kulala.

6. (a) Inki bangidika bo fwete baka kana bampangi ya babakala ti ya bankento talala na Nzo ya Kimfumu? (b) Tanga mwa mambu ya kutadila ti ngindu ya kukwenda na Lukutakanu ya Distrike. (Tala lupangu “Mwa Mambu ya Kutadila . . . ”)

⁶ Beto kepesa awa mwa bantuma ya kemonisa mutindu ya kuyidika bisika ya kulala na Banzo ya Kimfumu. Komite ya Lukutakanu ya Distrike tapona nkuluntu mosi sambu na kutwadisa ngidika yai. Yandi tasala ti nkuluntu yankaka to nsadi ya kisalu mosi ya kufwana yina kele ti kimpeve ya mbote. Bo fwete kabisa Nzo ya Kimfumu na bitini zole, disongidila kitini mosi sambu na bampangi ya bankento ti bana na bo, mpi bana-bankento yankaka. Kitini yankaka sambu na bampangi ya babakala ti bana babakala yankaka. Nzo ya Kimfumu fwete vanda kaka kisika ya kulala mpamba. Na mwini, ntangu bantu yonso takwenda na lukutakanu ya distrike, bo tayidika bimvuka yina takengidilaka nzo sambu na miyibi na mpila nde kana kimvuka mosi kukatuka bankaka kuyinga bo. Beno fwete pona bampangi yina ke na kimpeve ya mbote sambu bo sala kisalu yina ya kukengidila. Ata muntu mosi ve kele ti nswa ya kulamba madya na kati ya Nzo ya Kimfumu. Bo tayidika kamwa kisasa mosi ya kulambila na kibansala na mpila nde bampangi kusadila yo kaka na bilumbu yina bo tavanda na lukutakanu ya distrike. Na nsuka ya lukutakanu ya distrike, bo fwete panza kamwa kisasa yango. Yo kele mfunu nde beto tanina Nzo ya Kimfumu na kati mpi na nganda na mpila nde yo vanda kaka bunkete mpi na ndonga. Bo fwete keba sambu na kubebisa ve ata kima mosi. Bantu yina talalaka na kati ya Nzo ya Kimfumu tasala kikesa sambu na kumonisa bikalulu yina mefwana na Bakristu ya kyeleka na mutindu na bo ya kuzinga bo na bo mpi ti bantu ya kartie.​—⁠1 Kor. 10:⁠31.

7. (a) Na nki mitindu beto lenda kumisa Yehowa na ntangu beto kekwenda na lukutakanu ya distrike? (b) Sambu na bisalu mpi bikalulu ya mbote ya bampangi na beto, inki mambu bantu yina ketalaka beto mpi muntu mosi ya kesalaka na hotele kutubaka?

⁷ Bisalu ya Mbote: Kulemfuka na ntuma ya Yehowa ya kuvukana kumosi sambu na lusambu kevandaka sambu na “mambote” na beto mosi. Kima ya kuluta mfunu, yo kepesaka beto mabaku ya kukumisa zina ya Yehowa. (Yez. 48:17) Bantu mingi kemonaka ‘bisalu na beto ya mbote’ na balukutakanu ya distrike, mpi yo kepusaka bankaka na kumonisa mawi na bo. (1 Tim. 5:25) Ntangu bampangi vandaka kuyidika kisika ya lukutakanu, muntu mosi ya vandaka kutala bo kutubaka nde: “Ntangu mu kemonaka bifwanisu ya Paladisu na mikanda na beno, mu keyindulaka ntangu yonso nde, ‘Bambangi ya Yehowa kelalaka bandosi kibeni.’ Kansi, ntangu yai mu kebakisa mpenza nde beno lenda balula ntoto yai yo kituka Paladisu!” Na nima, yandi pesaka babolo zole ya bo ketulaka bintuntu, mpi yandi tubaka nde: “Beno baka yai, sambu munu mpi kezola kupesa maboko na kisalu yai.” Na mbanza mosi ya bo kesalaka balukutakanu ya distrike banda ntama, mfumu ya hotele mosi kutubaka nde: “Bantu mingi na mbanza yai ketubilaka Bambangi ya Yehowa mpi nki balukutakanu na beno ketendula sambu na beto. Beto mezaba mutindu bantu na beno ketulaka bunkete na bisika yina beno kesalaka balukutakanu na beno mpi na baparkingi. Beto kevandaka na kyese na kulutisa ntangu ti bantu na beno na kisiwu. Beto ketula kivuvu nde beto talanda na kuvanda ti bangwisana ya mbote na bamvula kekwisa.” Ntembe kele ve nde, bikalulu ya bampangi na beto yina menataka bantu na kutuba mambu yai mpi yankaka ya mutindu mosi kesepedisaka ntima ya Nzambi na beto, Yehowa!

8. Inki mutindu Matayo 4:4 kemonisa mfunu ya kutula mpenza dikebi na konso kitini ya manaka ya lukutakanu?

⁸ Yezu kutubaka nde luzingu na beto mesimbama na “mambu yina yonso ya Nzambi ke tubaka.” (Mat. 4:⁠4) Na balukutakanu na beto ya distrike ya beto kesalaka konso mvula, Yehowa kepesaka “madia” ya kimpeve “na ntangu ya mbote,” yina “mpika ya kwikama mpi ya mayele” (NW) keyidikaka. (Mat. 24:45) Yo kelombaka kisalu mingi sambu na kuyidika mpi kupesa madya yai ya kimpeve. Bika beto vanda na lukutakanu ya distrike mpi beto tula mpenza dikebi na konso kitini ya manaka sambu na kumonisa ntonda na beto na dikebi ya zola ya Yehowa.

[Lupangu ya kele na lutiti 3]

Manaka

Kitanu mpi Mposo

9:20 - 16:⁠55

Lumingu

9:20 - 16:⁠00

[Lupangu ya kele na lutiti 4]

Mwa Mambu ya Kutadila ti Ngindu ya Kukwenda na Lukutakanu ya Distrike:

1. Kana nge fwete sala kitamina ya nda sambu na kukwenda na lukutakanu, yantika kubumba mbongo kukonda kusukinina sambu na transpore mpi madya na nge mosi ti ya dibuta na nge.

2. Yindula mpi na kupesa makabu na nge ya luzolo ya mbote sambu na kusimba bisalu ya kuyidika lukutakanu yango. ‘Kukwisa maboko-mpamba ve na ntwala ya Mfumu Nzambi,’ kansi ‘zitisa yandi na bima na nge ya mbote mpenza.’​—⁠Kul. 16:16; Bing. 3:⁠9.

3. Na ntangu lukutakanu kesalama, beto kekumisaka zina ya Yehowa na bikalulu na beto ya mbote, na kulwata ya bunkete mpi na kudiyidika na mutindu mosi ya mbote.​—⁠1 Kor. 10:⁠31.

4. Baka lukanu ya kusala kumosi ti bampangi yina keyamba bantu mpi ti bampangi yankaka yina ke na mukumba ya kukeba nde mambu kusalama na ndonga. Kubumba ve bisika ya kuvanda, katula kaka sambu na bantu ya dibuta na nge to sambu na bantu yina mesala nzyetelo kumosi ti nge.

5. Na ntangu ya kupema, yo tavanda mbote na kudya madya ya kilo mingi ve sambu nge landa mbote malongi ya nima ya midi. Madya ya kilo kepesaka mpongi.​—⁠Luka 8:⁠18.

6. Bunkete kepesaka Yehowa lukumu. Na nsuka ya konso kitini ya lukutakanu, konso muntu lenda lokuta bapapie ti bima yonso ya mvindu mpi kulosa yo na bisika yina bo meyidikaka na kulosa mvindu sambu nde kisika ya lukutakanu kubikala bunkete.​—⁠1 Pie. 1:​15, 16.