Lukutakanu ya Distrike ya Bambangi ya Yehowa ya Mvu 2009
1. (a) Inki balusakumunu beto tabaka na kukwendaka bilumbu yonso tatu na lukutakanu ya distrike? (b) Inki bangidika beto fwete sala banda ntangu yai?
1 Beto yonso kevingila lukutakanu ya distrike ya mvu 2009 mpi dibaku ya mpa ya kuvukana ti bansambidi yankaka ya Yehowa, bayina “ke zabaka na ntima na bo nde bo kele bansukami” na kimpeve. (Mat. 5:3) Sambu kilumbu ya Yehowa mefinama mpenza, beto kelongisila konso muntu na kukwenda na lukutakanu bilumbu yonso tatu sambu na kubaka mambote mingi na kinduku ya tiya ya Bukristu mpi na mambu ya kimpeve yina kepesaka kikesa sambu na kuvanda kaka na lukwikilu ya ngolo. (Sof. 1:14) Bika nde balongi mpi bamfumu ya kisalu kuzaba nde lukutakanu ya distrike kele kitini ya mfunu ya lusambu na beto. Sala bangidika na kikesa yonso kukonda kusukinina mpi sosa lusakumunu ya Yehowa. Nge lenda ndima mpenza nde yandi tasadisa nge.—Yez. 50:10.
2. Ata bo mebinga beto ve na balukutakanu ya bansi mingi, na nki mutindu balukutakanu ya distrike tavanda bonso balukutakanu yina ya bansi mingi?
2 Balukutakanu ya Bansi Mingi: Sambu balukutakanu yai tasalama na bansi ti bambanza mingi ve, kaka bantu yina bo mebingisa fwete kwenda. Kana beto kesala na kuwakana ti ngidika yai, yo tasala nde bantu kulutana mingi ve. (1 Kor. 14:40; Baeb. 13:17) Kansi, balukutakanu mingi ya distrike tavanda na kyese bonso yina tavanda na balukutakanu yai ya bansi mingi, sambu bampangi mingi yina kele bamisionere, yina kesalaka na babetele ya bansi yankaka, mpi yina kesalaka kisalu ya kutunga banzo ya la Société na bansi mingi takwenda na balukutakanu na bansi na bo.
3. Inki mutindu beto lenda monisila bampangi yankaka ya dibundu zola ya Bukristu?
3 Sadisa Bankaka na Kukwenda na Lukutakanu ya Distrike: Keti bampangi yankaka ya dibundu na beno kele na mfunu ya lusadisu sambu na kukwenda na lukutakanu? Na kusadisaka bankaka na kusala mutindu yina, nge tamonisa nde nge kesosa “mpi mambote ya bantu ya nkaka kansi mambote na [nge] mosi mpamba ve.”—Filp. 2:4.
4-6. (a) Inki mambu ya mfunu beto fwete vila ve kana beto kesosa kisika ya kulala, mpi sambu na nki? (b) Inki bangidika beno fwete baka kana bampangi ya babakala ti ya bankento talala na Nzo ya Kimfumu? (c) Tanga mwa mambu ya kutadila ti ngindu ya kukwenda na Lukutakanu ya Distrike. (Tala lupangu na lutiti 4.)
4 Bisika ya Kulala: Na babwala yina lukutakanu ya distrike kesalamaka, bisika ya kulala kevandaka mbala mingi na banzo ya bampangi Bakristu, na Banzo ya Kimfumu to na banzo ya bampangi na beto ya kinsuni. Bo tatula lisiti ya bisika yonso yina balukutakanu ya distrike tasalama na tablo ya bansangu na nima ya kutadila ngika yai na Lukutakanu ya Kisalu. Yo kelomba nde bantu yonso kutadila na kisambu lukutakanu ya distrike yina bo takwenda na mvu 2009.
5 Kana nge tazola nde bo sosila nge kisika ya kulala na nzo ya mpangi mosi to na Nzo ya Kimfumu, beto kelomba nde sekretere kusala na ntwala mpenza lisiti ya bansamuni yonso yina kelomba kisika ya kulala mpi kutinda yo na Departema ya Kupesa Bisika ya Kulala na bwala yina lukutakanu ya distrike tasalama. Yandi fwete monisa kana mpangi yango kele bakala to nkento, kana yandi kele tata, mama to mwana mpi kusonika zina ti mvula na yandi. Kusala mutindu yai tapesa bampangi yina kesalaka na Departema ya Kupesa Bisika ya Kulala ntangu ya kusosila bantu yonso bisika ya kulala. Komite ya Kisalu ya Dibundu fwete tadila bikalulu ya bansamuni na ntwala ya kutinda formilere ya mutindu yai na Departema ya Kepesaka Bisika ya Kulala. Kana bo mepesa beto kisika mosi ya kulala, yo tavanda mbote ve nde beto wakana na mpila na beto mosi sambu na kuvanda ti mpangi to ti nduku yankaka. Kusala mutindu yai takumisa kisalu ya bampangi ya Departema ya Kupesa Bisika ya Kulala mpasi. Kansi, kana muntu mosi kezola kuvanda na nzo ya mpangi na yandi ya kinsuni na bilumbu yina lukutakanu tasalama, yo kele ve mfunu nde yandi lomba sekretere na kusonika zina na yandi na formilere yina bo tatinda sambu na kulomba bisika ya kulala.
6 Beto kepesa awa mwa bantuma ya kemonisa mutindu ya kuyidika bisika ya kulala na Banzo ya Kimfumu. Komite ya Lukutakanu ya Distrike tapona nkuluntu mosi sambu na kutwadisa ngidika yai. Yandi tasala ti mpangi yankaka, mingimingi nkuluntu mosi to nsadi ya kisalu ya kufwana ya kele ti kimpeve ya mbote. Bo fwete kabisa Nzo ya Kimfumu na bitini zole, disongidila kitini mosi sambu na bampangi ya bankento ti bana na bo, mpi baleke-bankento yankaka. Kitini yankaka sambu na bampangi ya babakala ti bana babakala yankaka. Nzo ya Kimfumu fwete vanda kaka kisika ya kulala mpamba. Na mwini, ntangu bantu yonso takwenda na lukutakanu ya distrike, bo tayidika bimvuka yina takengidilaka bima ya bampangi na mpila nde kana kimvuka mosi kukatuka bankaka kuyinga bo. Beno fwete pona bampangi yina ke na kimpeve ya mbote sambu bo sala kisalu yina ya kukengidila. Ata muntu mosi ve kele ti nswa ya kulamba madya na kati ya Nzo ya Kimfumu. Bo tayidika kamwa kisasa mosi ya kulambila na kibansala na mpila nde bampangi kusadila yo kaka na bilumbu yina bo tavanda na lukutakanu ya distrike. Na nsuka ya lukutakanu ya distrike, bo fwete panza kamwa kisasa yango. Yo kele mfunu nde beto tanina Nzo ya Kimfumu na kati mpi na nganda na mpila nde yo vanda kaka bunkete mpi na ndonga. Beno fwete keba sambu na kubebisa ve ata kima mosi. Bantu yina talalaka na kati ya Nzo ya Kimfumu tasala kikesa sambu na kumonisa bikalulu yina mefwana na Bakristu ya kyeleka na mutindu na bo ya kuzinga bo na bo mpi ti bantu ya kartie.—1 Kor. 10:31.
7. Inki fwete vanda susi na beto ya ntetentete ntangu beto kekudibongisa sambu na kukwenda na Lukutakanu ya Distrike ya mvu 2009?
7 Bisalu Yina Kepesaka Nzambi Lukumu: Ntangu beto kemonisaka mbuma ya mpeve na mambu na beto yonso mpi ketulaka dikebi ya sikisiki na bangogo mpi na bikalulu na beto ti bantu yankaka na bisika yina lukutakanu kesalama, beto keyikaka lukumu ya mbote ya bantu ya Yehowa mpi kebuyaka kubudisa bankaka dibaku. (1 Kor. 10:31; 2 Kor. 6:3, 4) Bika nde kuvanda mpi bikalulu na nge na lukutakanu ya distrike ya mvu 2009 kupesa Nzambi lukumu!—1 Pie. 2:12.
[Lupangu ya kele na lutiti 3]
Manaka:
Kiya (Kaka Sambu na Balukutakanu ya Bansi Mingi)
13:20 - 16:55
Kitanu mpi Mposo
9:20 - 16:55
Lumingu
9:20 - 16:00
[Lupangu ya kele na lutiti 4]
Mwa Mambu ya Kutadila ti Ngindu ya Kukwenda na Lukutakanu ya Distrike:
◼ Kana nge fwete sala kitamina ya nda sambu na kukwenda na lukutakanu ya distrike, yantika kubumba mbongo kukonda kusukinina sambu na transpore mpi madya na nge mosi ti ya dibuta na nge.
◼ Yindula mpi na kupesa makabu na nge ya luzolo ya mbote sambu na kupesa maboko na bangidika ya lukutakanu yango. ‘Kukwisa maboko-mpamba ve na ntwala ya Mfumu Nzambi,’ kansi ‘Zitisa yandi na bima na nge ya mbote mpenza.’—Kul. 16:16; Bing. 3:9.
◼ Na ntangu ya lukutakanu, beto kekumisaka zina ya Yehowa na bikalulu na beto ya mbote, na kulwata ya bunkete mpi na mutindu na beto ya kudiyidika mbote.—1 Kor. 10:31.
◼ Baka lukanu ya kusala kumosi ti bampangi yina keyamba bantu mpi bampangi yankaka yina ke na mukumba ya kukeba nde mambu kusalama na ndonga. Kubumba ve bisika ya kuvanda, katula kaka sambu na bantu ya dibuta na nge to sambu na bantu yina mesala nzyetelo kumosi ti nge.
◼ Na ntangu ya kupema, yo tavanda mbote na kudya madya ya kilo mingi ve sambu nge landa mbote malongi ya nima ya midi. Kudya mingi to madya ya kilo lenda pesa mpongi.—Luka 8:18.
◼ Bunkete kepesaka Yehowa lukumu. Na nsuka ya konso kitini ya lukutakanu, konso muntu lenda lokuta bapapie ti bima yonso ya mvindu mpi kulosa yo na bisika yina bo meyidikaka sambu na kulosa mvindu na mpila nde kisika ya lukutakanu kubikala bunkete. —1 Pie. 1:15, 16.