‘Madya na Ntangu ya Mbote’
1. Inki mutindu lukutakanu ya sipesiali ya kilumbu mosi ya mvula yai kusadisaka nge mpi bankaka?
1 Na nima ya kulanda lukutakanu na beto ya sipesiali ya kilumbu mosi, mbala mingi beto ketubaka nde, “Yai mpenza mambu ya beto vandaka na yo mfunu!” Nkengi ya nzyunga mosi kutubaka nde na nima ya kulanda manaka, bampangi yankaka ya nzyunga na yandi kumonisaka mpusa ya kukumisa mingi ntangu ya bo kelutisaka na kisalu ya kusamuna. Nkengi-ntambudi mosi kutubaka nde: “Yo sadisaka beto na kuyindula mbote-mbote nsungi ya ntangu yina beto kezinga na ntangu beto ketadila bansola ya beto kesala na luzingu.” Yankaka kutubaka nde, “Bansamuni mingi kutubaka nde yo vandaka ngibusa ya pwelele yina vandaka kulomba bo na kuzikisa nde bo ketula dikebi na dyambu yina kele mfunu kuluta, kisalu ya kusamuna.” Inki mutindu lukutakanu ya sipesiali ya kilumbu mosi kusadisaka nge?
2. Inki mambu beto tatadila na manaka ya mvula ya kisalu ya kekwisa?
2 Manaka ya mvula ya kisalu ya kekwisa tavanda mpi mambu ya beto kele na yo mfunu. Ntu-dyambu na yo kele ‘Tina na Mfumu Nzambi’ ya mekatuka na Nkunga 118:8, 9. Tala mwa bantu-dyambu ya masolo yina yo tatubila: “Mutindu Yehowa Kele Kitininu na Bantangu ya Mpasi,” “Sadisa Bankaka na Kubumbana na Nsi ya Mapapu ya Yehowa,” “Landa Mbandu ya Yehowa na Kupesaka Bankaka Kitininu,” “Baleke, Beno Tula Ntima na Beno na Yehowa!” mpi “Paladisu na Beto ya Kimpeve Kele Ngidika ya Yehowa Mebakaka Sambu na Kutanina Beto.”
3. Inki mutindu beto lenda baka mambote mingi kana beto kwenda na lukutakanu yai?
3 Mutindu ya Kubakila Yo Mambote: Kana bo mezabisa dati na yo, baka bangidika sambu na kuvanda na lukutakanu yango, mpi zabisa balongoki na nge ya Biblia na kukwenda ti nge. Sambu beto “buta bambuma” ti kukanga-ntima, beto fwete kanga mambu ya beto kewa. (Luka 8:15) Yo yina, widikila manaka na dikebi yonso, mpi baka banoti ya nkufi ya bangindu ya mfunu mpi ya bantuma yina nge kekana na kusadila na luzingu na nge mpi na kisalu na nge ya kusamuna. Na nima ya lukutakanu, baka ntangu ya kutubila manaka ti dibuta na nge, mpi tadila mitindu ya sikisiki yina nge mpi dibuta na nge lenda sadila bansangu yango.
4. Sambu na inki beto kevingila ti mpusa ya ngolo lukutakanu na beto ya sipesiali ya kilumbu mosi yina kekwisa?
4 Bonso madya mosi ya ntomo mpi ya mfunu, bo yindulaka mingi na ntwala ya kuyidika lukutakanu ya sipesiali ya kilumbu mosi ya mvula yai mpi bo salaka yo ti zola mingi. Bika nde Yehowa kusakumuna bikesa na beno sambu na kuvukana mpi kubaka mambote na ‘madia na ntangu ya mbote’ ya bo mepesa sambu na kudisa baministre ya Bakristu na kimpeve.—Mat. 24:45.