Ndinga ya Nzambi Kele Ngolo
1. Inki kele ntu-diambu ya lukutakanu ya sipesiali ya kilumbu mosi sambu na mvula ya kisalu 2014?
1 Biblia me swaswana ti konso kima yina bantu ya kukonda kukuka me basisaka, sambu yo kele ti ngolo ya kusoba beto, mpi ya kusala nde bangindu ti bikalulu na beto kuwakana ti luzolo ya Yehowa. Ndinga ya Nzambi kele na ngolo ya nki mutindu? Inki mutindu beto lenda sadila mpenza ngolo na yo na luzingu na beto? Inki mutindu beto lenda sadila yo mbote-mbote sambu na kusadisa bankaka? Beto ke tula ntima nde bantu yonso ta baka kikesa na kimpeve ntangu beto ta tadila bangindu yai na manaka ya lukutakanu ya sipesiali ya kilumbu mosi yina bo me bongisa sambu na mvula ya kisalu 2014. Ntu-diambu na yo kele “Ndinga ya Nzambi Kele Ngolo;” yo me katuka na Baebreo 4:12.
2. Beto fwete tula dikebi na bamvutu ya nki bangiufula?
2 Sosa Bamvutu na Bangiufula yai: Ntangu nge ke landa manaka, sonika bamvutu ya bangiufula yai na nsi.
• Sambu na nki beto fwete tudila ndinga ya Yehowa ntima? (Nk. 29:4)
• Inki mutindu beto lenda baka mambote ya ngolo ya Ndinga ya Nzambi na luzingu na beto? (Nk. 34:9)
• Inki mutindu nge lenda pesa ngolo ya Ndinga ya Nzambi nzila na kisalu na nge ya kusamuna? (2 Tim. 3:16, 17)
• Inki mutindu beto lenda tina ngolo ya luvunu ya nsi-ntoto ya Satana? (1 Yoa. 5:19)
• Inki mutindu baleke lenda nunga na kimpeve? (Yer. 17:7)
• Inki mutindu beto lenda kuma ngolo ata ntangu beto kele ya kulemba? (2 Bak. 12:10)
• Inki ta sadisa beto na kulanda kusala bansoba ata beto ke vandaka na bikalulu ya mbi mpi nkandilu ya mbi banda ntama? (Baef. 4:23)
3. Katula kulanda monaka, nki kima ya nkaka lenda pesa beto mambote na lukutakanu ya sipesiali ya kilumbu mosi?
3 Beto ta baka mpenza mambote ya mingi na kuwa bansangu yai ya mfunu! Diaka, lukutakanu ya sipesiali ya kilumbu mosi ta pesa beto mabaku ya kuzabana na bampangi mingi mpi kusala kinduku ti bampangi ya mabundu ya nkaka, kaka bonso na lukutakanu ya nziunga mpi ya distrike. (Nk. 133:1-3; 2 Bak. 6:11-13) Yo yina, baka ntangu ya kuvukana ti banduku ya ntama mpi ya kusosa banduku ya mpa. Kana bo me tinda nkengi ya distrike to mpangi mosi ya Betele bonso mutubi ya nzenza na lukutakanu na beno ya sipesiali, yo ta vanda mbote na kusosa mabaku ya kuyamba yandi mbote ti nkento na yandi. Ya kieleka, beto kele ti bikuma mingi ya kuvingila lukutakanu ya sipesiali ya kilumbu mosi yina ke kwisa!