Ndinga ya Nzambi Kele Mfunu Sambu na Kulonga

1. Inki kele ntu-diambu ya lukutakanu ya nziunga sambu na mvula ya kisalu 2014, mpi monaka ta pesa mvutu na nki ngiufula?

¹ Longi na beto ya Nene Yehowa, kele longi ya kuluta mbote na luyalanganu. (Yez. 30:20, 21) Kansi nki mutindu Yehowa ke longaka beto? Yandi me pesaka beto mukanda yina me luta mikanda yonso ya nkaka—Biblia, Ndinga na yandi ya kupemama. Inki mutindu malongi ya Nzambi lenda natila beto mambote na kinsuni, na mabanza, na mawi mpi na kimpeve? Beto ta tadila mvutu ya ngiufula yai na manaka ya lukutakanu ya nziunga sambu na mvula ya kisalu 2014. Ntu-diambu ya manaka kele, “Ndinga ya Nzambi Kele Mfunu Sambu na Kulonga;” yo me katuka na 2 Timoteo 3:16.

2. Bamvutu na nki bangiufula ta benda dikebi na bangindu yai ya mfunu?

² Sosa Bangindu yai ya Mfunu: Bamvutu ya bangiufula yai ya ke landa ta benda dikebi na bangindu ya mfunu ya manaka:

• Malongi ya Nzambi ke vandaka ti nki bupusi na luzingu na beto? (Yez. 48:17, 18)

• Beto fwete tula ntima na nki mambu, kana beto ke sosa kusala bansoba na luzingu na beto sambu na kusadila Yehowa na kisalu ya ntangu yonso? (Mal. 3:10)

• Inki beto fwete sala kana beto me kutana ti “malongi . . . ya nzenza”? (Baeb. 13:9)

• Inki mutindu beto lenda landa mbandu ya Yezu, na ‘mutindu na yandi ya kulonga’? (Mat. 7:28, 29)

• Sambu na nki balongi na mabundu fwete kudilonga bo mosi? (Bar. 2:21)

• Ndinga ya Nzambi kele mfunu na nki mambu? (2 Tim. 3:16)

• Inki bupusi ‘kunikana’ ya makanda ta vanda na yo na luzingu ya bantu? (Agai 2:6, 7)

• Inki kivuvu Yehowa ke vandaka na yo sambu na beto? (Baef. 5:1)

• Sambu na nki beto fwete sala ngolo sambu na kubikala na malongi ya Yehowa? (Luka 13:24)

3. Sambu na nki yo kele mfunu na kuvukana na manaka ya bo me yidika na ntangu ya mbote mpi kulanda yo na dikebi yonso?

³ Na luyantiku ya 2 Timoteo kapu 3, na ntwala ya kusonika bangogo yai ya me simba ntu-diambu ya manaka ya lukutakanu yai, Polo tubilaka bantangu ya mpasi yina zolaka kumonisa nde beto ke zinga na bilumbu ya nsuka. Yandi sonikaka nde: “Bantu ya mbi mpi bantu ya luvunu ta salaka diaka mbi kuluta, bo ta kusaka bantu mpi bo ta kusamaka.” (2 Tim. 3:13) Sambu bo kusa beto ve, yo kele mfunu mingi kibeni na kuwidikila mpi kusadila malongi ya Nzambi! Yo yina, bika beto baka lukanu ya kuvukana mpi kulanda na dikebi yonso manaka ya bo me yidika na ntangu ya mbote.