Inki Kimfumu ya Nzambi Ta Sala Sambu na Ntoto, Mupepe, Masa, Banti mpi Buna na Buna?

Inger Andersen ya kele kilandi ya sekretere ya Nations Unies mpi ntwadisi ya manaka ya Nations Unies sambu na mambu ya me tala ntoto, mupepe, masa, banti mpi buna na buna (sous-secrétaire générale des Nations Unies et directrice exécutive du Programme des Nations Unies pour l’environnement) tubaka na Kizole 25 juillet 2023 nde: “Mambu ya me tala climat ke natila bantu, bambanza mpi bima yonso ya ke zinga bampasi mingi. Mipepe ya ngolo ya ke landa kukuma ngolo sambu na nsoba ya climat ke bebisa banzo mpi mambu yina bantu lenda sala sambu na kuzinga na ntoto. Bisika yina bima ya ke zingaka kele na masa ke kuma tiya mingi, yo yina mitindu mingi ya bima ya ke zingaka ta zinga diaka ve.”

Keti baluyalu lenda vukana sambu na kusala nde bima yina ke bebisaka ntoto kubebisa yo diaka ve? Keti bo kele ti ngolo ya kusala nde mambu yai kumana dibela?

Biblia ke tubila luyalu mosi ya lenda katula bima yonso yina ke bebisaka ntoto mpi yo ta katula yo. Biblia ke tuba nde “Nzambi ya zulu ta tula kimfumu mosi,” luyalu mosi ya ta yala ntoto mpi ya ta manisa mambu yonso ya ke bebisaka yo. (Daniele 2:44) Ntangu luyalu yina ta yala, bantu ta “sala ata mbi mosi ve mpi ta bebisa ata kima mosi ve” ya muntu ya nkaka to ya ntoto.—Yezaya 11:9.