Mukanda ya Nto-kimvuka
Bampangi na Beto Bambangi ya Yehowa:
Ntumwa Polo kusadilaka mabaku yonso sambu na kumonisa zola mpi ntonda sambu na bampangi na yandi Bakristu. Yandi sonikilaka Bakristu ya Roma nde: “Mono ke pesa mersi na Nzambi na beto sambu na beno yonso na zina ya Yesu Kristo, sambu bantu ya ntoto ya mvimba ke tuba nde, beno ke tulaka ntima na Yesu Kristo.” (Roma 1:8) Ee, na Kintinu ya mvimba ya Roma, Bakristu yina ya mvu-nkama ya ntete kuzabanaka sambu na lukwikilu na bo ya ngolo mpi na kikesa na bo na kisalu ya kusamuna. (1 Tes. 1:8) Mpila ya kuyituka kele ve na kumona nde Polo vandaka kuzola bampangi na yandi mingi mpenza!
Bonso Polo, beto kepesaka mersi na Yehowa ntangu yonso ya beto keyindulaka beno. Beto kezolaka beno mingi kibeni! Mpi beno lenda ndima mpenza nde Yehowa kezolaka konso muntu na kati na beno. Mingi na kati na beno kekutana ti kimbeni ya ngolo, kansi beno kelanda kaka na kusamuna. Ntembe kele ve nde kikesa mpi kikalulu ya kukonda boma yina beno kemonisa kesepedisaka ntima ya Yehowa.—Bing. 27:11.
Na ntangu beno ketanga mpi keyindulula na dikebi yonso disolo ya “Actes des Témoins de Jéhovah dans les temps modernes” yina kele na Annuaire yai ya kitoko mpi ya ketunga lukwikilu, beno tamona nzikisa ya nene nde Mfumu Yezu Kristu yina ‘vandaka ntete me nunga mingi na bitumba; yandi kekwenda sambu na kununga diaka,’ mpi nde konso tolotolo yina bo tasala sambu na kufwa balongoki ya Kristu tanunga ve.—Kus. 6:2; Yez. 54:17.
Na Bakristu ya Filipi, Polo kusonikaka nde: ‘Mono kepesa Nzambi mersi sambu beno kesadisaka na kuzabisa bantu nsangu ya mbote.’ (Filp. 1:3-5) Beto bamambre ya Nto-Kimvuka mpi kewa mutindu mosi sambu na beno. Na mvula ya kisalu 2007, bansamuni 6691790 salaka kimvuka ya bangunga 1431761554 na kisalu ya kusamuna nsangu ya mbote na bansi 236 na ntoto ya mvimba. Mambu yai kemonisa mpenza kikesa ya beno kesala sambu na kulanda kuzabisa nsangu ya mbote! Yindula mafunda ya bantu yina beto kesadisa sambu na kikesa ya beto yonso kesala, yonso yai sambu na lukumu ya Yehowa!
Na dibaku yankaka, Polo kumonisaka nde yandi vandaka mpenza kuditula na kisika ya bampangi na yandi. Yandi sonikilaka Bakristu ya Tesalonika nde: ‘Beto keyibukaka nki mutindu beno songaka lukwikilu na beno, ti nki mutindu beno ke tulaka kaka ntima na Mfumu na beto Yesu Kristo.’ (1 Tes. 1:2, 3) Ya kyeleka, luzingu kele ti bampasi mingi. Bampasi kebasikaka, kansi yo kele mfunu nde beto kanga ntima. Inki bampasi nge kekutana ti yo? Keti nge kele na mawa sambu maladi mosi ya ngolo kekanga nge nzila na kusala mingi na kisalu ya Yehowa? Keti nkwelani na nge ya beno kwelanaka bamvula mingi mefwaka? (Bing. 30:15, 16) Keti nge kesosa, kansi nge kezwa ve, nkwelani yina kezolaka Yehowa bonso nge, mpi ata mpidina nge kezitisa ndongisila ya Masonuku ya ketuba na kukwela kaka na Mfumu? (1 Kor. 7:39) Keti nge kenwana na kusansa bana na nge ata nge kele mpenza na mpasi ya mbongo? Ata konso mpasi yina beno kekutana ti yo, kana beno landa na kutula mambote ya Kimfumu na kisika ya ntete, beno lenda ndima mpenza nde Yehowa “ta vila ve kuzola ya ntima yina ya beno ke songaka yandi na bisalu ya beno salaka.” Bampangi, beto kelomba beno na ‘kulemba ve na kusala mambu ya mbote.’—Baeb. 6:10; Gal. 6:9.
Inki tasadisa beno na kukanga ntima? Bonso Bakristu ya Tesalonika, kima tasadisa beno kele ‘kutula ntima na Mfumu na beto Yesu Kristo.’ Polo kuvandaka ti kikuma ya mbote ya kufwanisa na nima kivuvu ya ‘kuguluka’ ti mpu ya ngolo yina lenda tanina Mukristu na mabanza ya mbi mpi na badute.—1 Tes. 5:8.
Ya kyeleka, na ntangu beno kekanga ntima na kyese yonso, beno kepesa mvutu na masota ya Satana na ntembe ya metala kimfumu ya Yehowa. Satana ketubaka nde bansadi ya Nzambi kevandaka bwimi mpi, ata bo lenda vanda ti luzolo ya kusadila Nzambi sambu na ntangu mosi buna, bo talemba kana bampasi kukuma mingi to kana nsuka ya ngidika ya bima kukwisa ve nswalu mutindu bo keyindulaka. Beno kele ti dibaku ya kumonisa nde Satana kele luvunu mpenza! Konso kilumbu ya luzingu na beno kepusa beto penepene ya kulungana ya kivuvu na beto.
Kaka mutindu Polo kusadilaka mabaku ya kusikisa bampangi na yandi sambu na lukwikilu na bo ya ngolo, lusadisu na bo na kisalu ya kusamuna, mpi kukanga ntima na bo, beto kesadila mpi dibaku yai sambu na kusikisa beno mpi kundimisa beno zola na beto sambu na beno. Beno landa na kusala kisalu mbote!
Bika nde mvula ya kekwisa kunatila beto mambote mingi ya kimpeve. Beto kezodila beno mambote,
Bampangi na beno,
Nto-Kimvuka ya Bambangi ya Yehowa