Luka
3 Mwaka-inĩ wa ikũmi na ĩtano wa ũthamaki wa Kaisari Tiberio, rĩrĩa Pontio Pilato aarĩ ngavana wa Judea, Herode* nĩwe waathanaga Galili, Filipu mũrũ wa ithe nĩwe waathanaga bũrũri wa Iturea na Tarakoniti, nake Lusania agathana Abilene, 2 matukũ-inĩ ma mũthĩnjĩri-Ngai mũnene Anasi na ma Kaiafa, uuge wa Ngai nĩ wakinyĩire Johana mũrũ wa Zekaria arĩ werũ-inĩ.
3 Nĩ ũndũ ũcio agĩthiĩ bũrũri-inĩ wothe ũrĩa wathiũrũrũkĩirie Jorodani, akĩhunjagia atĩ andũ mabatithio ĩrĩ njĩra ya kuonania kwĩrira nĩguo moherũo mehia, 4 o ta ũrĩa handĩkĩtwo ibuku-inĩ rĩa mũnabii Isaia: “Harĩ mũgambo wa mũndũ ũraanĩrĩra werũ-inĩ akoiga: ‘Haarĩriai njĩra ya Jehova!* Rũngai barabara ciake. 5 Mĩkuru yothe no mũhaka ĩthikwo na irĩma ciothe na ithũngũri ciaraganio; ithioro ituĩke njĩra nũngarũ, nacio njĩra iria itarĩ nyoroku inyoroke; 6 na andũ othe nĩ makeyonera ũrĩa Ngai ahonokanagia.’”
7 Nĩ ũndũ ũcio, akĩambĩrĩria kwĩra kĩrĩndĩ kĩrĩa gĩokĩte kũbatithio nĩwe: “Inyuĩ njiarũa cia nyoka irĩ thumu, nũ ũmwĩrĩte atĩ no mũũrĩre marakara marĩa maroka? 8 Nĩ ũndũ ũcio, ciarai maciaro maronania atĩ nĩ mwĩrirĩte. Mũtikeĩre atĩrĩ, ‘Ithuĩ tũrĩ ciana cia Iburahimu.’ Tondũ ngũmwĩra atĩ Ngai no ahote gũtũma Iburahimu agĩe na ciana kuuma mahiga-inĩ maya. 9 Ti itherũ, ithanwa nĩ rĩigĩtwo gĩtina-inĩ kĩa mũtĩ. Kwoguo mũtĩ ũrĩa wothe ũtaciaraga maciaro mega nĩ ũgũtemwo na ũikio mwaki-inĩ.”
10 Nakĩo kĩrĩndĩ kĩamũũragia atĩrĩ: “Twagĩrĩirũo nĩ gwĩka atĩa?” 11 Nake agagĩcokeria: “Mũndũ ũrĩa ũrĩ na nguo igĩrĩ nĩ agaĩre ũrĩa ũtarĩ, na ũrĩa ũrĩ na kĩndũ gĩa kũrĩa eke o taguo.” 12 O na etia a mbeca cia igooti magĩũka kũbatithio, na makĩmũũria atĩrĩ: “Mũrutani, twagĩrĩirũo nĩ gwĩka atĩa?” 13 Nake akĩmeera: “Mũtigetagie mbeca ikĩrĩte iria ituĩtwo cia igooti.” 14 Nacio thigari ikĩmũũria: “Twagĩrĩirũo nĩ gwĩka atĩa?” Nake agĩcicokeria atĩrĩ: “Mũtikanatunye mũndũ kĩndũ kana mũthitange mũndũ na ũira wa maheeni, no mũiganagwo nĩ mũcara wanyu.”
15 Na rĩrĩ, tondũ andũ othe nĩ maatanyaga na makeyũria ũũ ngoro-inĩ ciao ũhoro wĩgiĩ Johana, “To gũkorũo ũyũ nĩwe Kristo?” 16 Johana akĩmacokeria othe akĩmeera atĩrĩ: “Niĩ ndĩmũbatithagia na maĩ, no ũrĩa ũroka nĩ mũnene kũngĩra, na ndirĩ mwagĩrĩru wa kuohora ndigi cia iratũ ciake. Ũcio akaamũbatithagia na roho mũtheru na mwaki. 17 Gĩtarũrũ gĩake gĩa kũhuuha nĩ akĩnyitĩte , nĩguo atherie biũ kĩhuuhĩro gĩake na acokanĩrĩrie ngano thĩinĩ wa ikũmbĩ rĩake, no mahuti nĩ gũcina akaamacina na mwaki ũrĩa ũtangĩhoreka.”
18 Ningĩ akĩruta andũ maũndũ mangĩ maingĩ ma kũmekĩra hinya na agĩthiĩ na mbere kũmahunjĩria ũhoro ũrĩa mwega. 19 No Johana nĩ aakaanagia Herode ũrĩa waathanaga Galili ũhoro wĩgiĩ Herodia, mũtumia wa mũrũ wa ithe, na wĩgiĩ maũndũ mothe moru marĩa Herode eekĩte. 20 Nĩ ũndũ ũcio, Herode agĩka ũndũ ũngĩ mũru: akĩhingĩra Johana njera.
21 Na rĩrĩ, andũ othe marĩkia kũbatithio, Jesu o nake akĩbatithio. Na rĩrĩa aahoyaga-rĩ, igũrũ rĩkĩhingũka, 22 na roho mũtheru ũgĩikũrũka igũrũ rĩake ũhaana ta ndutura, na mũgambo ũkiuma igũrũ ũkiuga atĩrĩ: “Wee nĩwe Mũrũ wakwa, ũrĩa nyendete mũno; nĩ ngwĩtĩkĩrĩte.”
23 Rĩrĩa Jesu aambĩrĩirie wĩra wake, aarĩ wa mĩaka ta mĩrongo ĩtatũ, na ta ũrĩa andũ aingĩ meciragia,
aarĩ mũrũ wa Jusufu,
mũrũ wa Heli,
24 mũrũ wa Mathati,
mũrũ wa Lawii,
mũrũ wa Meliki,
mũrũ wa Janai,
mũrũ wa Jusufu,
25 mũrũ wa Matathia,
mũrũ wa Amosi,
mũrũ wa Nahumu,
mũrũ wa Esili,
mũrũ wa Nagai,
26 mũrũ wa Maathi,
mũrũ wa Matathia,
mũrũ wa Semeini,
mũrũ wa Joseki,
mũrũ wa Joda,
27 mũrũ wa Joanani,
mũrũ wa Resa,
mũrũ wa Zerubabeli,
mũrũ wa Shealitieli,
mũrũ wa Neri,
28 mũrũ wa Meliki,
mũrũ wa Adi,
mũrũ wa Kosamu,
mũrũ wa Elimadami,
mũrũ wa Eri,
29 mũrũ wa Jesu,
mũrũ wa Eliezeri,
mũrũ wa Jorimu,
mũrũ wa Mathati,
mũrũ wa Lawii,
30 mũrũ wa Simeoni,
mũrũ wa Judasi,
mũrũ wa Jusufu,
mũrũ wa Jonamu,
mũrũ wa Eliakimi,
31 mũrũ wa Melea,
mũrũ wa Mena,
mũrũ wa Matatha,
mũrũ wa Nathani,
mũrũ wa Daudi,
32 mũrũ wa Jesii,
mũrũ wa Obedi,
mũrũ wa Boazu,
mũrũ wa Salimoni,
mũrũ wa Nahashoni,
33 mũrũ wa Aminadabu,
mũrũ wa Aruni,
mũrũ wa Hezironi,
mũrũ wa Perezu,
mũrũ wa Juda,
34 mũrũ wa Jakubu,
mũrũ wa Isaaka,
mũrũ wa Iburahimu,
mũrũ wa Tera,
mũrũ wa Nahori,
35 mũrũ wa Serugu,
mũrũ wa Reu,
mũrũ wa Pelegi,
mũrũ wa Eberi,
mũrũ wa Shela,
36 mũrũ wa Kainani,
mũrũ wa Aripakishadi,
mũrũ wa Shemu,
mũrũ wa Nuhu,
mũrũ wa Lameki,
37 mũrũ wa Methusela,
mũrũ wa Enoko,
mũrũ wa Jaredi,
mũrũ wa Mahalaleli,
mũrũ wa Kainani,
38 mũrũ wa Enosi,
mũrũ wa Sethi,
mũrũ wa Adamu,
mũrũ wa Ngai.