Johana

6 Thutha ũcio Jesu akĩringa Iria rĩa Galili, na norĩo rĩtagwo rĩa Tiberia. 2 Na andũ aingĩ nĩ maathiaga mamuumĩte thutha, tondũ nĩ moonaga ciama iria aaringaga akĩhonia arwaru. 3 Nĩ ũndũ ũcio Jesu akĩambata kĩrĩma-inĩ agĩikara thĩ hau hamwe na arutwo ake. 4 Hĩndĩ ĩyo gĩathĩ kĩa Ayahudi kĩrĩa gĩetagwo Pasaka nĩ gĩakuhĩrĩirie. 5 Rĩrĩa Jesu aarorire akĩona andũ aingĩ magĩũka harĩ we, akĩũria Filipu: “Tũkũgũra mĩgate kũ nĩguo andũ aya marĩe?” 6 No oririe ũguo amũgerie, nĩ gũkorũo nĩ aamenyaga ũrĩa eendaga gwĩka. 7 Filipu akĩmũcokeria atĩrĩ: “Mĩgate ya dinari* magana merĩ ndĩngĩmaigana o mũndũ na arĩ kenyũ kanini.” 8 Ũmwe wa arutwo ake wetagwo Andrea mũrũ wa nyina na Simoni Petero, akĩmwĩra: 9 “Haha harĩ na kahĩĩ karĩ na mĩgate ĩtano ya cairi na tũthamaki twĩrĩ tũnini. No icio nĩ kĩĩ harĩ kĩrĩndĩ kĩnene ũũ?”

10 Nake Jesu akiuga: “Ĩrai andũ maikare thĩ.” Na tondũ kũu kwarĩ na nyeki nyingĩ mũno, magĩikara thĩ, na arũme maarĩ ta ngiri ithano. 11 Jesu akĩoya mĩgate ĩyo, na thutha wa gũcokeria Ngai ngatho akĩmĩgayania kũrĩ arĩa maaikarĩte thĩ; na noguo eekire na tũthamaki tũu, nao makĩrĩa makĩhũna. 12 Na rĩrĩa maarĩire makĩigania, akĩra arutwo ake: “Cokanĩrĩriai cienyũ iria ciatigara, nĩguo hatikagĩe kĩndũ o na kĩmwe gĩkũũra.” 13 Nĩ ũndũ ũcio magĩcokanĩrĩria cienyũ iria ciatigirio nĩ arĩa maarĩte mĩgate ĩyo ĩtano ya cairi, ikĩiyũra ikabu ikũmi na igĩrĩ.

14 Hĩndĩ ĩrĩa andũ acio moonire kĩama kĩrĩa aaringire, makĩambĩrĩria kuuga: “Hatarĩ nganja ũyũ nĩwe Mũnabii ũrĩa weranĩirũo atĩ nĩ agooka gũkũ thĩ.” 15 Nake Jesu, rĩrĩa aamenyire atĩ meendaga gũka mamũnyite nĩguo mamũtue mũthamaki, akĩũra agĩthiĩ o rĩngĩ kĩrĩma-inĩ arĩ wiki.

16 Na gwakinya hwaĩ-inĩ, arutwo ake magĩikũrũka iria-inĩ, 17 makĩingĩra gatarũ, makĩringa iria marorete Kaperinaumu. Gũkinyĩria hĩndĩ ĩyo, nduma nĩ yaingĩrĩte na Jesu ndookĩte kũrĩ o. 18 Ningĩ gũkĩgĩa na makũmbĩ manene ma iria, tondũ rũhuho rũnene nĩ rwahurutanaga. 19 O na kũrĩ ũguo, rĩrĩa maakoretwo mathiĩte mairo ta ithatũ kana inya,* makĩona Jesu agereire maĩ igũrũ o agĩkuhagĩrĩria gatarũ, nao magĩĩtigĩra. 20 No we akĩmeera: “Nĩ niĩ, tigai gwĩtigĩra!” 21 Nao makĩmũkuua na gatarũ, na hĩndĩ o ĩyo gatarũ gagĩkinya thĩ nyũmũ kũrĩa maathiaga.

22 Mũthenya ũyũ ũngĩ kĩrĩndĩ kĩrĩa kĩarĩ mwena ũcio ũngĩ wa iria gĩkĩona atĩ hatiarĩ na gatarũ kangĩ tiga o kamwe kanini, na atĩ Jesu ndaatonyete gatarũ-inĩ kau hamwe na arutwo ake, ĩndĩ arutwo maathiĩte marĩ oiki. 23 No rĩrĩ, tũtarũ twa kuuma Tiberia tũgĩkinya hakuhĩ na harĩa maarĩrĩire mĩgate thutha wa Mwathani gũcokia ngatho. 24 Kwoguo rĩrĩa moonire atĩ Jesu na arutwo ake matiarĩ hau, makĩingĩra tũtarũ-inĩ tũu magĩthiĩ Kaperinaumu gũcaria Jesu.

25 Rĩrĩa maamuonire mũrĩmo ũcio ũngĩ wa iria, makĩmũũria: “Rabii, ũkinyire gũkũ rĩ?” 26 Jesu akĩmeera: “Ngũmwĩra atĩrĩ na ma, mũtiranjaria tondũ wa ciama iria mũronire, ĩndĩ nĩ ũndũ nĩ mũrarĩire mĩgate mũrahũna. 27 Mũtikarutagĩre wĩra irio iria ithũkaga, ĩndĩ rutagĩrai wĩra irio iria itũũraga nĩ ũndũ wa muoyo wa tene na tene, iria Mũrũ wa mũndũ ekũmũhe; nĩ gũkorũo Awa, Ngai we mwene, nĩ amwĩkĩrĩte mũhũũri wa kuonania nĩ amwĩtĩkĩrĩte.”

28 Nĩ ũndũ ũcio makĩmũũria: “Twagĩrĩirũo gwĩka atĩa nĩguo tũrute mawĩra ma Ngai?” 29 Jesu akĩmacokeria atĩrĩ: “Ũyũ nĩguo wĩra wa Ngai, atĩ muonanie wĩtĩkio harĩ ũrĩa aatũmire.” 30 Nao makĩmũũria: “Nĩ kĩama kĩrĩkũ ũkũringa nĩguo tuone na tũgwĩtĩkie? Nĩ ũndũ ũrĩkũ ũgwĩka? 31 Maithe maitũ ma tene maarĩire mana werũ-inĩ, o ta ũrĩa kwandĩkĩtwo atĩrĩ: ‘Nĩ aamaheire mũgate wa kuuma igũrũ marĩe.’” 32 Jesu agĩcoka akĩmeera ũũ: “Ngũmwĩra atĩrĩ na ma, Musa ndaamũheire mũgate kuuma igũrũ, ĩndĩ Awa amũheaga mũgate ũrĩa wa ma kuuma igũrũ. 33 Tondũ mũgate wa Ngai nĩ mũndũ ũrĩa uumaga igũrũ kũhe kĩrĩndĩ muoyo.” 34 Nao makĩmwĩra: “Mwathani, tũheage mũgate ũcio hingo ciothe.”

35 Jesu akĩmeera: “Nĩ niĩ mũgate wa muoyo. Mũndũ o wothe ũũkaga kũrĩ niĩ ndarĩ hĩndĩ akaahũta, nake ũrĩa wothe wonanagia wĩtĩkio harĩ niĩ ndarĩ hĩndĩ akaanyota. 36 No o ta ũrĩa ndamwĩra, o na nĩ mũnyonete ĩndĩ mũtirĩ mũretĩkia. 37 Arĩa othe heagwo nĩ Awa nĩ marĩũkaga kũrĩ niĩ, na ndirĩ hĩndĩ ngaingata ũrĩa ũrĩũkaga kũrĩ niĩ; 38 tondũ ndiumĩte igũrũ gwĩka wendi wakwa niĩ mwene, ĩndĩ nĩ gwĩka wendi wa ũrĩa wandũmire. 39 Ũyũ nĩguo wendi wa ũrĩa wandũmire, atĩ hatikagĩe mũndũ o na ũmwe ũkũũra harĩ arĩa othe aheete, no atĩ ngaamariũkia mũthenya wa mũthia. 40 Nĩ gũkorũo ũyũ nĩguo wendi wa Awa, atĩ mũndũ o wothe ũkũũranaga Mũriũ na akonania wĩtĩkio harĩ we agĩe na muoyo wa tene na tene, na nĩ ngaamũriũkia mũthenya wa mũthia.”

41 Nao Ayahudi makĩambĩrĩria kũngʼungʼua nĩ ũndũ wake tondũ nĩ oigĩte: “Nĩ niĩ mũgate ũrĩa waikũrũkire kuuma igũrũ.” 42 Na makĩambĩrĩria kuuga ũũ: “Githĩ ũyũ ti Jesu mũrũ wa Jusufu, na ithe na nyina githĩ tũtimoĩ? Rĩu aroiga atĩa atĩ, ‘Niĩ ndaikũrũkire kuuma igũrũ’?” 43 Nake Jesu akĩmacokeria akĩmeera: “Tigai kũngʼungʼua. 44 Gũtirĩ mũndũ ũngĩũka kũrĩ niĩ atagucĩrĩirio nĩ Awa ũrĩa wandũmire na nĩ ngaamũriũkia mũthenya wa mũthia. 45 Nĩ kwandĩke ũũ mabuku-inĩ ma anabii: ‘Andũ othe nĩ makaarutwo nĩ Jehova.’* Mũndũ o wothe ũthikĩrĩirie Awa na akeruta nĩ okaga kũrĩ niĩ. 46 Ti atĩ nĩ kũrĩ mũndũ wonete Awa, tiga o ũrĩa uumĩte kũrĩ Ngai; ũcio nĩ onete Awa. 47 Ngũmwĩra atĩrĩ o ma o ma, mũndũ o wothe wĩtĩkagia, arĩ na muoyo wa tene na tene.

48 “Nĩ niĩ mũgate wa muoyo. 49 Maithe manyu ma tene maarĩire mana werũ-inĩ ĩndĩ nĩ maakuire. 50 Ũyũ nĩguo mũgate ũrĩa ũikũrũkĩte kuuma igũrũ nĩguo mũndũ o wothe aũrĩa ndagakue. 51 Nĩ niĩ mũgate ũrĩa ũrĩ muoyo waikũrũkire kuuma igũrũ. Mũndũ o wothe angĩrĩa mũgate ũyũ egũtũũra tene na tene; na ũrĩa kũrĩ nĩ atĩ, mũgate ũrĩa ngũheana nĩ mwĩrĩ wakwa nĩ ũndũ wa muoyo wa andũ.”

52 Nao Ayahudi makĩambĩrĩria gũkararania o ene makiugaga: “Mũndũ ũyũ angĩtũhe atĩa mwĩrĩ wake tũrĩe?” 53 Nĩ ũndũ ũcio Jesu akĩmeera: “Ngũmwĩra na ma atĩrĩ, mũngĩaga kũrĩa mwĩrĩ wa Mũrũ wa mũndũ na kũnyua thakame yake, mũtingĩgĩa na muoyo thĩinĩ wanyu. 54 Mũndũ o wothe ũrĩaga mwĩrĩ wakwa na akanyua thakame yakwa, arĩ na muoyo wa tene na tene, na nĩ ngaamũriũkia mũthenya wa mũthia; 55 nĩ gũkorũo mwĩrĩ wakwa nĩ irio cia ma na thakame yakwa nĩ kĩndũ kĩa ma gĩa kũnyuo. 56 Mũndũ o wothe ũrĩaga mwĩrĩ wakwa na akanyua thakame yakwa atũũraga arĩ na ũiguano na niĩ, na niĩ ngatũũra ndĩ na ũiguano nake. 57 O ta ũrĩa Awa ũrĩa ũrĩ muoyo aandũmire na niĩ ngatũũra nĩ ũndũ wa Awa, noguo mũndũ o wothe ũrĩaga mwĩrĩ wakwa agaatũũra nĩ ũndũ wakwa. 58 Ũyũ nĩguo mũgate ũrĩa waikũrũkire kuuma igũrũ. Ti ta hĩndĩ ĩrĩa maithe manyu ma tene maarĩire na no maakuire. Mũndũ o wothe ũrĩaga mũgate ũyũ egũtũũra tene na tene.” 59 Oigire maũndũ macio hĩndĩ ĩrĩa aarutanaga thĩinĩ wa thunagogi ĩmwe kũu Kaperinaumu.

60 Rĩrĩa arutwo ake aingĩ maaiguire maũndũ macio, makiuga: “Ũhoro ũcio nĩ wa kũmakania; nũ ũngĩũthikĩrĩria?” 61 No rĩrĩa Jesu aamenyire atĩ arutwo ake nĩ maangʼungʼuaga nĩ ũndũ wa ũhoro ũcio-rĩ, akĩmoria: “Kaĩ ũhoro ũcio ũramũhĩnga? 62 Ĩ mũngĩkĩona Mũrũ wa mũndũ akĩambata athiĩte kũrĩa aatũũraga tene? 63 Roho nĩguo ũheanaga muoyo; mwĩrĩ ndũrĩ kĩene o na hanini. Maũndũ marĩa ndĩmwĩrĩte-rĩ, macio nĩ roho na nĩ muoyo. 64 No nĩ harĩ na amwe anyu matetĩkagia.” Nĩ gũkorũo Jesu nĩ aamenyaga kuuma o kĩambĩrĩria arĩa matetĩkagia na mũndũ ũrĩa ũngĩkamũkunyanĩra. 65 Agĩthiĩ na mbere kuuga: “Nĩkĩo ndamwĩra atĩ gũtirĩ mũndũ o na ũmwe ũngĩũka kũrĩ niĩ, tiga etĩkĩririo nĩ Awa.”

66 Nĩ ũndũ ũcio arutwo ake aingĩ makĩmũtiganĩria magĩcokerera maũndũ marĩa maatigĩte na matiatwaranire nake rĩngĩ. 67 Kwoguo Jesu akĩũria arĩa Ikũmi na Erĩ: “O na inyuĩ nĩ mũkwenda gũthiĩ?” 68 Simoni Petero akĩmũcokeria ũũ: “Mwathani, tũgũgĩthiĩ kũrĩ ũ? Wee ũrĩ na ciugo cia muoyo wa tene na tene. 69 Nĩ twĩtĩkĩtie na tũkamenya atĩ wee nĩwe Ũrĩa Mũtheru wa Ngai.” 70 Jesu akĩmacokeria atĩrĩ: “Githĩ ti niĩ ndaamũthuurire inyuĩ ikũmi na erĩ? No ũmwe wanyu nĩ mũcukani.”* 71 Aaragia ũhoro wa Judasi mũrũ wa Simoni Isikariote, tondũ ũcio nĩ aacokire akĩmũkunyanĩra, o na gũtuĩka aarĩ ũmwe wa arĩa Ikũmi na Erĩ.