Tito
1 Nĩ niĩ Paulo, ndungata ya Ngai na mũtũmwo wa Jesu Kristo kũringana na wĩtĩkio wa arĩa athuure nĩ Ngai na ũmenyo wa ma ũrĩa ũringaine na wĩyamũrĩri Ngai 2 na wĩhocetie harĩ kĩĩrĩgĩrĩro kĩa muoyo wa tene na tene ũrĩa weranĩirũo tene nĩ Ngai, o we ũtangĩheenania; 3 no ihinda rĩake rĩrĩa aatuire, nĩ aamenyithanirie kiugo gĩake kũgerera kũhunjio kũrĩa ndeehokeirũo kũringana na watho wa Ngai, o we Mũhonokia witũ; 4 kũrĩ Tito, mwana wakwa kũna thĩinĩ wa wĩtĩkio ũrĩa tũkoragwo naguo:
Ũrogĩa na ũtugi mũnene na thayũ kuuma kũrĩ Ngai Ithe witũ, na kuuma kũrĩ Mũhonokia witũ Kristo Jesu.
5 Ndaagũtigire Kirete nĩ getha ũrũnge maũndũ marĩa maahĩtanĩte na wamũre athuri thĩinĩ wa itũũra rĩmwe nginya rĩrĩa rĩngĩ, kũringana na motaaro marĩa ndaakũheete, 6 na nĩmo maya, angĩkorũo nĩ harĩ mũndũrũme ũtarĩ ũcuke, mũthuri wa mũtumia ũmwe, ũrĩ na ciana ciĩtĩkĩtie, citathitangagĩrũo waganu kana ũremi. 7 Nĩ gũkorũo mũrori nĩ mũramati wamũrĩtwo nĩ Ngai, agĩrĩirũo gũkorũo atarĩ ũcuke, atarĩ na mwĩĩkĩrĩro, mũndũ ũtarakaraga na ihenya, ũtakoragwo arĩ mũrĩĩu, ũtarĩ wa ngũĩ, ũtakorokagĩra mbeca na indo ingĩ, 8 ĩndĩ agĩrĩirũo gũkorũo arĩ mũtugi, wendete maũndũ mega, ũrĩ na meciria mega, mũthingu, mwĩhokeku, wĩgiragĩrĩria, 9 ũrũmagia kiugo kĩrĩa kĩa ma ũhoro-inĩ wĩgiĩ njĩra yake ya kũrutana, nĩ getha ahotage gũtaara arĩa angĩ na ũrutani ũrĩa wagĩrĩire na gũkaania arĩa maregana naguo.
10 Nĩ gũkorũo nĩ kũrĩ na andũ aingĩ aremi, maragia maũndũ matarĩ na ũguni, na aheenania, na makĩria andũ arĩa manyitagĩrĩra ũhoro wa kũrua. 11 Nĩ harĩ bata kũmakiria, tondũ andũ acio maikaraga magĩthũkagia wĩtĩkio wa famĩlĩ irĩ ngʼima na njĩra ya kũrutana maũndũ matagĩrĩirũo nĩ getha megune o ene. 12 Mũndũ ũmwe wa kwao, na nĩ mũnabii, oigire ũũ: “Andũ a Kirete makoragwo marĩ aheenania hĩndĩ ciothe, nyamũ ndĩani, matendaga kũruta wĩra na akoroku.”
13 Ũira ũcio nĩ wa ma. Nĩ ũndũ ũcio-rĩ, ikaraga ũkĩmarũngaga ũgwatĩirie nĩ getha matuĩke agima thĩinĩ wa wĩtĩkio, 14 ũtegũthikĩrĩria ngʼano cia Ayahudi na mawatho ma andũ arĩa mahũgũkagĩra ũhoro ũrĩa wa ma. 15 Maũndũ mothe nĩ matheru harĩ andũ atheru; no harĩ arĩa mathahĩtio na matarĩ wĩtĩkio, gũtirĩ ũndũ mũtheru, nĩ gũkorũo meciria na thamiri ciao nĩ ithahĩtio. 16 Moimbũraga mbere ya andũ atĩ nĩ moĩ Ngai, ĩndĩ nĩ mamũkaanaga kũgerera ciĩko ciao, tondũ nĩ andũ marĩ magigi na matarĩ athĩki na matiĩtĩkĩrĩkĩte harĩ wĩra o na ũrĩkũ mwega.