Marũa Kũrĩ Tito
1 Nĩ niĩ Paulo, ngombo ya Ngai na mũtũmwo wa Jesu Kristo kũringana na wĩtĩkio wa arĩa athuure nĩ Ngai na ũmenyo wa ma wĩgiĩ ũhoro ũrĩa wa ma o ũcio ũringaine na wĩrutĩri Ngai 2 na wĩhocetie harĩ kĩĩrĩgĩrĩro kĩa muoyo wa tene na tene+ ũrĩa weranĩirũo tene nĩ Ngai, o we ũtangĩheenania;+ 3 no ihinda rĩake rĩrĩa aatuire, nĩ aamenyithanirie kiugo gĩake kũgerera wĩra wa kũhunjia ũrĩa ndehokeirũo+ kũringana na watho wa Ngai, o we Mũhonokia witũ; 4 kũrĩ Tito, mwana wakwa kũna kũringana na wĩtĩkio ũrĩa tũnyitanagĩra:
Ũrogĩa na ũtugi mũnene na thayũ kuuma kũrĩ Ngai Ithe witũ, na Mũhonokia witũ Kristo Jesu.
5 Ndagũtigire Kirete nĩgetha ũrũnge maũndũ marĩa maahĩtanĩte* na wamũre athuri thĩinĩ wa itũũra rĩmwe nginya rĩrĩa rĩngĩ, o ta ũrĩa ndagũtaarĩte: 6 angĩkorũo nĩ harĩ mũndũrũme ũtarĩ ũndũ angĩĩcukĩrũo, mũthuri wa mũtumia ũmwe, ũrĩ na ciana ciĩtĩkĩtie, citathitangagĩrũo waganu kana ũremi.+ 7 Nĩ gũkorũo mũrori nĩ mũramati wamũrĩtwo nĩ Ngai, na agĩrĩirũo gũkorũo atarĩ na ũndũ angĩĩcukĩrũo, atarĩ na mwĩĩkĩrĩro,+ mũndũ ũtarakaraga na ihenya,+ ũtakoragwo arĩ mũrĩĩu, ũtarĩ wa ngũĩ, ũtakorokagĩra uumithio ũtarĩ wa kĩhooto, 8 ĩndĩ agĩrĩirũo gũkorũo arĩ mũnyitani ũgeni,+ wendete maũndũ mega, ũrĩ na meciria mega,*+ mũthingu, mwĩhokeku,+ wĩgiragĩrĩria,+ 9 ũrũmagia kiugo kĩrĩa kĩa wĩhokeku* ũhoro-inĩ wĩgiĩ ũhoti wake wa kũrutana,+ nĩgetha ahotage gwĩkĩrana ngoro kũgerera ũrutani ũrĩa wagĩrĩire*+ na gũkaania+ arĩa mareganaga naguo.
10 Nĩ gũkorũo nĩ kũrĩ andũ aingĩ aremi, maragia maũndũ matarĩ ũguni, na aheenania, na makĩria andũ arĩa marũmagĩrĩra ũhoro wa kũrua.+ 11 Nĩ harĩ bata kũhinga tũnua twao, tondũ andũ acio maikaraga makĩgarũraga wĩtĩkio wa famĩlĩ irĩ ngʼima na njĩra ya kũrutana maũndũ matagĩrĩirũo nĩ ũndũ wa uumithio ũtarĩ wa kĩhooto. 12 Mũndũ ũmwe wa kwao, mũnabii wao ene, ooigire ũũ: “Andũ a Kirete makoragwo marĩ aheenania hĩndĩ ciothe, nyamũ ndĩani, matiendaga kũruta wĩra na nĩ akoroku.”
13 Ũira ũcio nĩ wa ma. Nĩ ũndũ ũcio-rĩ, ikaraga ũkĩmarũngaga ũgwatĩirie nĩgetha mehande wega thĩinĩ wa wĩtĩkio, 14 ũtegũthikĩrĩria ngʼano cia Ayahudi na maathani ma andũ arĩa matiganagĩria ũhoro ũrĩa wa ma. 15 Maũndũ mothe nĩ matheru harĩ andũ atheru;+ no harĩ arĩa mathahĩtio na matarĩ wĩtĩkio, gũtirĩ ũndũ mũtheru, nĩ gũkorũo meciria na thamiri ciao nĩ ithahĩtio.+ 16 Moimbũraga mbere ya andũ atĩ nĩ moĩ Ngai, ĩndĩ nĩ mamũkaanaga kũgerera ciĩko ciao,+ tondũ nĩ andũ marĩ magigi na matarĩ athĩki na matetĩkĩrĩkĩte harĩ wĩra o na ũrĩkũ mwega.