NEHEMIA

1 Ici nĩ ciugo cia Nehemia*+ mũrũ wa Hakalia: Na rĩrĩ, mweri-inĩ wa Kisilevu,* mwaka wa 20, ndarĩ Shushani,*+ nyũmba-inĩ ya mũthamaki.* 2 Ihinda-inĩ rĩu Hanani,+ ũmwe wa ariũ a baba, o hamwe na andũ angĩ magĩũka moimĩte Juda, ngĩmoria ũhoro wĩgiĩ Ayahudi arĩa maatigarĩte, arĩa maahonokete kuuma ithamĩrio,+ na ngĩmoria ũhoro wa Jerusalemu. 3 Nao makĩnjokeria atĩrĩ: “Arĩa matigarĩte kũu gĩcigo-inĩ kĩa bũrũri o acio maahonokire kuuma ithamĩrio, nĩ marathĩnĩka mũno na makanyararũo.+ Thingo cia Jerusalemu nĩ momoku,+ na ihingo ciayo igacinwo na mwaki.”+

4 Rĩrĩa ndaiguire ciugo icio, o hĩndĩ ĩyo ngĩikara thĩ na ngĩambĩrĩria kũrĩra na gũcakaya thikũ cigana ũna, ngĩikara ndĩhingĩte+ na ngĩhoyaga ndĩ mbere ya Ngai wa igũrũ. 5 Ngiuga atĩrĩ: “Wee Jehova Ngai wa igũrũ, Ngai mũnene na wa magegania ũrĩa ũhingagia kĩrĩkanĩro gĩake na akonania wendo mwĩhokeku harĩ arĩa mamwendete na makahingia maathani make,+ 6 ndagũthaitha ũtege gũtũ gwaku na ũhingũre maitho maku nĩguo ũthikĩrĩrie mahoya ma ndungata yaku marĩa ndĩrakũhoya ũmũthĩ, ũtukũ na mũthenya,+ megiĩ ndungata ciaku Aisiraeli, o ngiumbũraga mehia marĩa andũ a Isiraeli makwĩhĩirie. Nĩ twĩhĩtie, niĩ na nyũmba ya ithe witũ.+ 7 Nĩ twĩkĩte ũndũ mũũru mũno harĩ wee+ nĩ ũndũ wa kwaga kũhingia maathani, mawatho, na matuĩro ma ciira marĩa waheire Musa ndungata yaku.+

8 “Ndagũthaitha ũririkane uuge ũrĩa waathire* Musa ndungata yaku ũkĩmwĩra ũũ: ‘Mũngĩkaaga kwĩhokeka, ngaamũhurunja gatagatĩ-inĩ ga ikundi cia andũ.+ 9 No mũngĩkanjokerera na mũhingie maathani makwa na mũmathĩkĩre, o na andũ anyu mangĩgakorũo mahurunjũkĩte o nginya gĩturi-inĩ kĩa igũrũ, nĩ ngaamacokanĩrĩria+ kuuma kũu na ndĩmarehe handũ harĩa thuurĩte nĩguo rĩĩtwa rĩakwa rĩikarage ho.’+ 10 O nĩ ndungata ciaku na andũ aku, arĩa wakũũrire kũgerera hinya waku mũingĩ na guoko gwaku kũrĩ hinya.+ 11 Wee Jehova, ndagũthaitha ũtege gũtũ gwaku ũthikĩrĩrie mahoya ma ndungata yaku na mahoya ma ndungata ciaku iria ikenagio nĩ gwĩtigĩra rĩĩtwa rĩaku, ningĩ ndagũthaitha ũtũme ndungata yaku ĩgaacĩre ũmũthĩ, na ũreke mũndũ ũyũ anjaĩre.”+

Hĩndĩ ĩyo niĩ ndarĩ mũtwarĩri mũthamaki gĩa kũnyua.+

2 Mweri-inĩ wa Nisani,* mwaka wa 20+ wa wathani wa Mũthamaki Aritashashita,+ ndibei nĩ yatwarirũo mbere yake, na o ta mũtugo ngĩoya ndibei ĩyo na ngĩnengera mũthamaki.+ No ndirĩ hĩndĩ ĩngĩ ndatukĩte gĩthiithi ndĩ mbere yake. 2 Nĩ ũndũ ũcio mũthamaki akĩnjũria: “Nĩ kĩĩ watuka gĩthiithi ũguo na ndũkĩrĩ mũrwaru? No mũhaka ũkorũo nĩ ũhehenjekete ngoro.” Ndaigua ũguo ngĩĩtigĩra mũno.

3 Ngĩcoka ngĩra mũthamaki atĩrĩ: “Mũthamaki arotũũra ihinda iraya! Hihi no njage gũtuka gĩthiithi na itũũra rĩrĩa maithe maitũ ma tene mathikĩtwo nĩ rĩanangĩku, na ihingo ciarĩo igacinwo na mwaki?”+ 4 Nake mũthamaki akĩnjũria ũũ: “Nĩ ũndũ ũrĩkũ ũkwenda?” Na hĩndĩ o ĩyo ngĩhoya Ngai wa igũrũ.+ 5 Ngĩcoka ngĩra mũthamaki atĩrĩ: “Angĩkorũo mũthamaki nĩ ekuona kwagĩrĩire na angĩkorũo ndungata yaku nĩ ĩgwĩtĩkĩrĩka harĩ wee-rĩ, njĩtĩkĩria thiĩ Juda, itũũra rĩrĩa maithe maitũ ma tene mathikĩtwo, nĩgetha ngarĩake rĩngĩ.”+ 6 Na rĩrĩ, mũthamaki arĩ hamwe na mũtumia wake ũrĩa waikarĩte hakuhĩ nake, akĩnjũria: “Rũgendo rwaku rũkuoya ihinda rĩigana atĩa, na ũgaacoka rĩ?” Kwoguo mũthamaki akĩona kwagĩrĩire anjĩtĩkĩrie thiĩ,+ na niĩ ngĩmwĩra ihinda rĩrĩa ndabangĩte gũcoka.+

7 Ngĩcoka ngĩra mũthamaki ũũ: “Angĩkorũo mũthamaki nĩ ekuona kwagĩrĩire, nĩ heo marũa ma gũtwarĩra mangavana a gĩcigo kĩa Mũrĩmo wa Rũũĩ,*+ ma kũũhe rũtha rwa kũhĩtũkĩra kuo o nginya nginye Juda, 8 o hamwe na marũa kũrĩ Asafu ũrĩa ũroraga Mũtitũ wa Mũthamaki, nĩgetha aahe mĩtĩ ya gũthondeka itugĩ cia ihingo cia Nyũmba Njirigĩre+ ya Hekarũ, na ya gũthondeka thingo cia itũũra rĩu,+ na ya nyũmba ĩrĩa ndĩrathiĩ gũikara.” Nĩ ũndũ ũcio mũthamaki akĩĩnengera marũa macio,+ nĩ gũkorũo guoko kwega kwa Ngai wakwa kwarĩ hamwe na niĩ.+

9 Thutha-inĩ ngĩgĩkinya kũrĩ mangavana a gĩcigo kĩa Mũrĩmo wa Rũũĩ na ngĩmanengera marũa macio ma mũthamaki. Ningĩ mũthamaki nĩ aaheete anene a mbũtũ na atwarithia a mbarathi. 10 Rĩrĩa Sanibalati+ ũrĩa Mũhoroni na Tobia+ Mũamoni+ ũrĩa warĩ ndungata maaiguire ũhoro ũcio, makĩrakara mũno kũigua atĩ harĩ mũndũ wokĩte gwĩka ũndũ mwega harĩ andũ a Isiraeli.

11 Thutha wa ihinda ngĩkinya Jerusalemu, na ngĩikara kuo thikũ ithatũ. 12 Ngĩũkĩra ũtukũ, tũrĩ hamwe na arũme maigana ũna, na ndirĩ mũndũ o na ũmwe nderire ũndũ ũrĩa Ngai wakwa eekĩrire ngoro-inĩ yakwa njĩke nĩ ũndũ wa Jerusalemu, na gũtirĩ nyamũ ĩngĩ ndarĩ nayo o tiga ĩrĩa yanguuĩte. 13 Na ngĩthiĩ ũtukũ ngĩgera Kĩhingo-inĩ kĩa Mũkuru,+ ngĩhĩtũkĩra mbere ya Itherũkĩro rĩa Nyoka Ĩrĩa Nene njerekeire Kĩhingo-inĩ kĩa Hĩba cia Mũhu,+ na ngĩthuthuria thingo cia Jerusalemu iria ciamomokete na ihingo ciayo iria ciahĩte nĩ mwaki.+ 14 Na ngĩthiĩ njerekeire Kĩhingo-inĩ gĩa Itherũkĩro+ na Karia-inĩ ka Mũthamaki, no hatiarĩ na handũ haiganu hangĩagereirũo nĩ nyamũ ĩyo yanguuĩte. 15 No ngĩthiĩ na mbere ngĩambata na mũkuru+ ũtukũ, o ngĩthuthuragia rũthingo rũu, thutha ũcio ngĩcoka na ngĩingĩrĩra Kĩhingo kĩa Mũkuru, na ngĩcoka ngĩhũndũka.

16 Atongoria+ matiamenyaga kũrĩa ndathiĩte na ũrĩa ndekaga, tondũ ndirĩ ũndũ nderĩte Ayahudi, athĩnjĩri-Ngai, andũ arĩa marĩ igweta, atongoria, na aruti acio angĩ a wĩra. 17 Mũthia-inĩ ngĩmeera ũũ: “Nĩ mwĩyoneire thĩna mũnene ũrĩa tũrĩ naguo, ũrĩa Jerusalemu kwanangĩkĩte na ihingo ciakuo igacinwo na mwaki. Ũkai, twake rĩngĩ thingo cia Jerusalemu, nĩgetha gĩconoko gĩkĩ gĩtigathiĩ na mbere.” 18 Ngĩcoka ngĩmeera ũrĩa guoko kwega kwa Ngai wakwa kwarĩ hamwe na niĩ+ na ũhoro wĩgiĩ ciugo iria mũthamaki aanjĩrĩte.+ Maigua ũguo makiuga: “Nĩ twarahũkei na twake.” Kwoguo makĩĩhe hinya* nĩ ũndũ wa wĩra ũcio mwega.+

19 Na rĩrĩ, rĩrĩa Sanibalati ũrĩa Mũhoroni na Tobia+ Mũamoni+ ũrĩa warĩ ndungata, na Geshemu Mũarabia+ maiguire ũhoro ũcio, makĩambĩrĩria gũtũthirĩkia+ na gũtũnyũrũria makiugaga: “Nĩ atĩa ũũ mũreka? Kaĩ mũraremera mũthamaki?”+ 20 No niĩ ngĩcokia atĩrĩ: “Ngai wa igũrũ Nĩwe ũgũtũma tũgaacĩre,+ na ithuĩ ndungata ciake nĩ tũkwarahũka na twake; ĩndĩ inyuĩ mũtirĩ na igai o na kana itemi kana kĩririkano gũkũ Jerusalemu.”+

3 Eliashibu+ mũthĩnjĩri-Ngai ũrĩa mũnene hamwe na ariũ a ithe arĩa angĩ athĩnjĩri-Ngai makĩambĩrĩria gwaka Kĩhingo kĩa Ngʼondu.+ Magĩkĩamũra+ na magĩĩkĩra mĩrango yakĩo; magĩkĩamũra o nginya Nyũmba-inĩ Ndaya na Igũrũ ya Mea,+ nginya Nyũmba-inĩ Ndaya na Igũrũ ya Hananeli.+ 2 Na kũrigania nao, hagĩakwo nĩ arũme a Jeriko;+ na kũrigania nao, hagĩakwo nĩ Zakuri mũrũ wa Imuri.

3 Nao ariũ a Hasenaa magĩaka Kĩhingo gĩa Thamaki;+ magĩgĩĩkĩra mbaũ+ na magĩĩkĩra mĩrango yakĩo, icũhĩ ciakĩo, na mĩgamba yakĩo. 4 Na kũrigania nao, hagĩcokererio nĩ Meremothu+ mũrũ wa Urija mũrũ wa Hakozu, na kũrigania nao, hagĩcokererio nĩ Meshulamu+ mũrũ wa Berekia mũrũ wa Meshezabeli, na kũrigania nao, hagĩcokererio nĩ Zadoku mũrũ wa Baana. 5 Na kũrigania nao, hagĩcokererio nĩ Atekoa,+ ĩndĩ arũme ao arĩa maarĩ igweta matienyihirie nĩguo manyite itemi* ũtungata-inĩ wa athani ao.

6 Joiada mũrũ wa Pasea na Meshulamu mũrũ wa Besodeia nĩo maacokereirie Kĩhingo gĩa Itũũra Rĩrĩa rĩa Tene;+ magĩgĩĩkĩra mbaũ na magĩĩkĩra mĩrango yakĩo, icũhĩ ciakĩo, na mĩgamba yakĩo. 7 Kũrigania nao, hagĩcokererio nĩ Melatia ũrĩa Mũgibeoni+ na Jadoni Mũmeronothi, nĩo arũme a Gibeoni na Mizipa+ arĩa maarĩ rungu rwa wathani wa* ngavana wa gĩcigo kĩa Mũrĩmo wa Rũũĩ.*+ 8 Kũrigania nao, hagĩcokererio nĩ Uzieli mũrũ wa Harihaia, ũmwe wa arĩa maaturaga thahabu, na kũrigania nake, hagĩcokererio nĩ Hanania, ũmwe wa arĩa maatukanagia maguta manungi wega; na makĩara mahiga kũu Jerusalemu o nginya Rũthingo-inĩ Rũrĩa Rwariĩ.+ 9 Na kũrigania nao, hagĩcokererio nĩ Refaia mũrũ wa Huri, mũnene wa nuthu ya gĩcigo kĩa Jerusalemu. 10 Na kũrigania nao, Jedaia mũrũ wa Harumafu agĩcokereria rũthingo rũu mwena wa mbere wa nyũmba yake, na kũrigania nake, hagĩcokererio nĩ Hatushu mũrũ wa Hashabineia.

11 Malikija mũrũ wa Harimu+ na Hashubu mũrũ wa Pahathu-moabi+ magĩcokereria gĩcigo kĩngĩ* kĩa rũthingo rũu, o hamwe na Nyũmba Ĩrĩa Ndaya ya Mariiko.+ 12 Na kũrigania nao, hagĩcokererio nĩ Shalumu mũrũ wa Haloheshu, mũnene wa gĩcigo nuthu kĩa Jerusalemu, marĩ hamwe na airĩtu ake.

13 Nake Hanuni na aikari a Zanoa+ magĩcokereria Kĩhingo kĩa Mũkuru;+ magĩgĩaka na magĩĩkĩra mĩrango yakĩo, icũhĩ ciakĩo, na mĩgamba yakĩo, na magĩcokereria rũthingo rũu mĩkono* 1,000 o nginya Kĩhingo-inĩ kĩa Hĩba cia Mũhu.+ 14 Nake Malikija mũrũ wa Rekabu, mũnene wa gĩcigo kĩa Bethi-hakeremu,+ agĩcokereria Kĩhingo kĩa Hĩba cia Mũhu; agĩgĩaka na agĩĩkĩra mĩrango yakĩo, icũhĩ ciakĩo, na mĩgamba yakĩo.

15 Shaluni mũrũ wa Kolihoze, mũnene wa gĩcigo kĩa Mizipa,+ agĩcokereria Kĩhingo gĩa Itherũkĩro;+ agĩgĩaka na agĩkĩgita, agĩĩkĩra mĩrango yakĩo, icũhĩ ciakĩo, mĩgamba yakĩo, na agĩcokereria rũthingo rwa Karia+ ka Mũtaro kũrigania na Mũgũnda wa Mũthamaki+ o nginya Ngathĩ-inĩ+ ĩrĩa ĩikũrũkĩte kuuma Itũũra rĩa Daudi.+

16 Na kuuma harĩ we, Nehemia mũrũ wa Azibuku, mũnene wa gĩcigo nuthu kĩa Bethi-zuru,+ agĩcokereria rũthingo rũu kuuma mwena wa mbere wa Mbĩrĩra cia Daudi+ nginya karia-inĩ+ karĩa gaakĩtwo na gũthiĩ nginya Nyũmba-inĩ ya Arĩa Marĩ Hinya.

17 Kuuma harĩ we, Alawii magĩcokereria rũthingo rũu: Rehumu mũrũ wa Bani; na kũrigania nake Hashabia, mũnene wa gĩcigo nuthu gĩa Keila,+ akĩruta wĩra ũcio wa gũcokereria nĩ ũndũ wa gĩcigo gĩake. 18 Kuuma harĩ we, hagĩcokererio nĩ ariũ a ithe: Bavai mũrũ wa Henadadi, mũnene wa gĩcigo nuthu gĩa Keila.

19 Na kũrigania nake, Ezeri mũrũ wa Jeshua,+ mũnene wa Mizipa, agĩcokereria gĩcigo kĩngĩ kĩa rũthingo rũu mwena ũrĩa wangʼetheire mwambato ũrĩa wathiĩte Nyũmba-inĩ ya Indo cia Mbaara ĩrĩa yarĩ Gĩtugĩ-inĩ.+

20 Kuuma harĩ we, Baruku mũrũ wa Zabai+ nĩ aarutire wĩra ũcio na kĩyo na agĩcokereria gĩcigo kĩngĩ kĩa rũthingo rũu, kuuma Gĩtugĩ-inĩ kĩu o nginya mũromo-inĩ wa nyũmba ya Eliashibu+ mũthĩnjĩri-Ngai ũrĩa mũnene.

21 Na kuuma harĩ we, Meremothu+ mũrũ wa Urija mũrũ wa Hakozu agĩcokereria gĩcigo kĩngĩ, kuuma mũromo-inĩ wa nyũmba ya Eliashibu o nginya mũthia-inĩ wa nyũmba ya Eliashibu.

22 Na kuuma harĩ we, hagĩcokererio nĩ athĩnjĩri-Ngai, arũme a gĩcigo kĩa Jorodani.*+ 23 Kuuma harĩ o, Benjamini na Hashubu magĩcokereria rũthingo rũu mwena wa mbere wa nyũmba yao. Kuuma harĩ o, Azaria mũrũ wa Maaseia mũrũ wa Anania agĩcokereria hakuhĩ na nyũmba yake. 24 Kuuma harĩ we, Binui mũrũ wa Henadadi agĩcokereria gĩcigo kĩngĩ kĩa rũthingo rũu, kuuma nyũmba-inĩ ya Azaria nginya Gĩtugĩ-inĩ+ na gũthiĩ nginya kona-inĩ.

25 Kuuma harĩ we, hagĩcokererio nĩ Palali mũrũ wa Uzai kũngʼethera Gĩtugĩ na nyũmba ndaya na igũrũ ĩrĩa yanyitanĩte na Nyũmba ya Mũthamaki,+ ĩrĩa ya igũrũ yarĩ ya Nja ya Arangĩri.+ Kuuma harĩ we hagĩcokererio nĩ Pedaia mũrũ wa Paroshu.+

26 Nacio ndungata cia hekarũ,*+ iria ciaikaraga Ofeli+ igĩcokereria rũthingo rũu o nginya Kĩhingo-inĩ kĩa Maĩ+ mwena wa irathĩro na nyũmba-inĩ ndaya na igũrũ ĩrĩa yacomokete.

27 Kuuma harĩ o, Atekoa+ magĩcokereria gĩcigo kĩngĩ kĩa rũthingo rũu, kuuma mwena wa mbere wa nyũmba ĩrĩa nene ndaya na igũrũ yacomokete o nginya rũthingo-inĩ rwa Ofeli.

28 Athĩnjĩri-Ngai magĩcokereria igũrũ rĩa Kĩhingo kĩa Mbarathi,+ o mũndũ mbere ya nyũmba yake.

29 Kuuma harĩ o, Zadoku+ mũrũ wa Imeri agĩcokereria rũthingo rũu mwena wa mbere wa nyũmba yake.

Na kuuma harĩ we, hagĩcokererio nĩ Shemaia mũrũ wa Shekania, ũrĩa warangagĩra Kĩhingo kĩa Mwena wa Irathĩro.+

30 Kuuma harĩ we, Hanania mũrũ wa Shelemia na Hanuni mũrũ wa gatandatũ wa Zalafu magĩcokereria gĩcigo kĩngĩ kĩa rũthingo rũu.

Kuuma harĩ we, Meshulamu+ mũrũ wa Berekia agĩcokereria rũthingo rũu mwena wa mbere wa nyũmba yake.

31 Kuuma harĩ we, Malikija wa kĩama kĩa aturi a thahabu, agĩcokereria rũthingo rũu o nginya nyũmba-inĩ ya ndungata cia hekarũ*+ na onjorithia, kũngʼethera Kĩhingo gĩa Gũtuĩria na o nginya kanyũmba-inĩ ka igũrũ ga kona-inĩ.

32 Nao aturi a thahabu na onjorithia makĩruta wĩra wa gũcokereria rũthingo rũu gatagatĩ-inĩ ga kanyũmba ka igũrũ ga kona-inĩ na Kĩhingo kĩa Ngʼondu.+

4 Na rĩrĩa Sanibalati+ aaiguire atĩ nĩ tũraaka rũthingo rĩngĩ, akĩrakara na akĩigua ũũru mũno, na agĩikara akĩnyũrũragia Ayahudi. 2 Na arĩ hamwe na ariũ a ithe na mbũtũ ya Samaria akĩũria ũũ: “Ayahudi aya matarĩ hinya nĩ kĩĩ mareka? Nĩ mekũhota gwĩka ũũ marĩ oiki? Nĩ mekũruta magongona? Nĩ mekũrĩkia na mũthenya ũmwe? Nĩ mekũriũkia mahiga maya mahĩĩte kuuma hĩba-inĩ cia gĩko kĩiyũire rũkũngũ?”+

3 Nake Tobia+ Mũamoni,+ ũrĩa warũgamĩte hakuhĩ nake akiuga atĩrĩ: “O na mbwe ĩngĩhaica igũrũ rĩa kĩrĩa maraaka-rĩ, no kũgũithia ĩngĩgũithia rũthingo rũu rwao rwa ihiga.”

4 Thikĩrĩria, wee Ngai witũ, nĩ gũkorũo nĩ tũrekwo maũndũ ma kwagĩrũo gĩtĩo,+ na ũtũme kĩnyũrũri kĩao gĩcokerere mĩtwe yao,+ na ũmaneane matahwo bũrũri-inĩ mũgeni. 5 Na ndũkahumbĩre mahĩtia mao o na kana ũhuure mehia mao mbere yaku,+ tondũ nĩ marumĩte aaki.

6 Nĩ ũndũ ũcio tũgĩthiĩ na mbere gwaka rũthingo, na rũthingo rũu ruothe rũkĩnyitithanio, rũgĩgĩcokererio rũgĩkinya nuthu yaruo kwambata na igũrũ, nao andũ magĩthiĩ na mbere kũiga ngoro ciao wĩra-inĩ ũcio.

7 Na rĩrĩa Sanibalati, Tobia,+ andũ a Arabia,+ Aamoni, na Aashidodi+ maaiguire atĩ wĩra wa gwaka rĩngĩ thingo cia Jerusalemu nĩ wathiaga na mbere wega na atĩ mĩanya nĩ yathingagwo, makĩrakara mũno. 8 Makĩbanga njama marĩ hamwe ya gũka kũrũa na Jerusalemu na gũtũma kũgĩe na ngũĩ. 9 No tũkĩhoya Ngai witũ na tũkĩiga mũrangĩri wa kũrangĩra mũthenya na ũtukũ nĩ ũndũ wao.

10 No rĩrĩ, andũ a Juda moigaga atĩrĩ: “Aruti wĩra* nĩ morĩtwo nĩ hinya, na kũrĩ na gĩko kĩingĩ; gũtirĩ hĩndĩ tũkaahota gwaka rũthingo rũrũ.”

11 Nacio thũ citũ igĩthiĩ na mbere kuuga ũũ: “Matanamenya o na kana magatuona-rĩ, tũgũthiĩ gatagatĩ-inĩ kao na tũmoorage na tũrũgamie wĩra ũcio.”

12 Rĩrĩa rĩothe Ayahudi arĩa maaikaraga gũkuhĩ nao maaingĩraga itũũra-inĩ, maatwĩraga rĩngĩ na rĩngĩ* atĩrĩ: “Nĩ megũtũtharĩkĩra kuuma mĩena yothe.”

13 Nĩ ũndũ ũcio ngĩiga arũme handũ harĩa haarĩ thĩ mũno thutha wa rũthingo harĩa hataarĩ kĩndũ, na ngĩmaiga kũringana na famĩlĩ ciao marĩ na hiũ ciao cia njora, matimũ mao, na mota mao. 14 Rĩrĩa ndonire ũrĩa maarĩ na guoya, o hĩndĩ ĩyo ngĩũkĩra na ngĩra andũ arĩa maarĩ igweta+ na atongoria na andũ acio angĩ ũũ: “Mũtikametigĩre.+ Ririkanai Jehova, o we mũnene na wa magegania;+ na mũrũĩrĩre ariũ a ithe wanyu, aarĩ na ariũ anyu, atumia anyu na mĩciĩ yanyu.”

15 Na rĩrĩa thũ citũ ciaiguire atĩ nĩ twamenyete ũrĩa ciekaga na atĩ Ngai ũrĩa wa ma nĩ aaharaganĩtie mĩbango yacio-rĩ, ithuothe tũgĩcoka wĩra-inĩ wa gwaka rũthingo. 16 Kuuma mũthenya ũcio na gũthiĩ na mbere, nuthu ya arũme arĩa ndarĩ nao maarutaga wĩra,+ nao acio angĩ nuthu makanyita matimũ, ngo, mota, na tũgooti twa cuma. Nao anene+ makarũgama thutha wa andũ a nyũmba yothe ya Juda magĩteithĩrĩria 17 arĩa maakaga rũthingo rũu. Arĩa maakuuaga mĩrigo maarutaga wĩra na guoko kũmwe nakuo kũu kũngĩ gũkanyita itharaita rĩa mbaara. 18 Na o mwaki eeyohete rũhiũ rwa njora njohero-inĩ agĩaka, nake mũndũ wa kũhuuha coro+ akarũgama hakuhĩ na niĩ.

19 Ngĩcoka ngĩra andũ arĩa maarĩ igweta na atongoria na andũ acio angĩ ũũ: “Wĩra ũyũ nĩ mũnene na nĩ mũingĩ, na nĩ tũraihanĩrĩirie rũthingo-inĩ kuuma harĩ mũndũ ũmwe nginya ũrĩa ũngĩ. 20 Rĩrĩa mũrĩigua mũgambo wa coro, mũcokanĩrĩre harĩa tũrĩ. Ngai witũ nĩ egũtũrũĩrĩra.”+

21 Nĩ ũndũ ũcio tũgĩthiĩ na mbere kũruta wĩra nao andũ acio angĩ nuthu maaikaraga manyitĩte matimũ, kuuma rũcinĩ nginya hwaĩ-inĩ njata cioimĩra. 22 Hĩndĩ ĩyo ngĩra andũ acio atĩrĩ: “Rekei arũme, o mũndũ na ũrĩa ũramũteithĩrĩria, maraarage gũkũ Jerusalemu, magatũrangĩra ũtukũ na makaruta wĩra mũthenya.” 23 Kwoguo niĩ na ariũ a baba, arĩa maandeithagĩrĩria,+ na arangĩri arĩa maanũmagĩrĩra, gũtirĩ o na ũmwe warutire nguo ciake, na o ũmwe witũ aaikaraga anyitĩte itharaita rĩake rĩa mbaara na guoko kwa ũrĩo.

5 Na rĩrĩ, nĩ kwagĩire kĩrĩro kĩnene kuuma kũrĩ andũ na atumia ao nĩ ũndũ wa ariũ a ithe wao Ayahudi.+ 2 Amwe mooigaga atĩrĩ: “Ithuĩ hamwe na anake na airĩtu aitũ tũrĩ aingĩ. No nginya tũkorũo na irio nĩguo tũrĩe na tũtũũre muoyo.” 3 Angĩ nao mooigaga ũũ: “Tũneanaga ithaka na mĩgũnda itũ ya mĩthabibũ na nyũmba citũ itũrũgamĩrĩre nĩguo tũheo irio hĩndĩ ya ngʼaragu.” 4 Nao angĩ makoiga atĩrĩ: “Tũkombete mbeca na tũkaneana ithaka na mĩgũnda itũ ya mĩthabibũ itũrũgamĩrĩre, nĩguo tũhote kũrĩha igooti rĩa mũthamaki.+ 5 Tũrĩ a mwĩrĩ na thakame ĩmwe na ariũ a ithe witũ,* na ciana citũ itariĩ o ta ciana ciao; ĩndĩ tũrabatara kũneana anake na airĩtu aitũ matuĩke ngombo, na airĩtu amwe aitũ nĩ marĩkĩtie gũtuĩka ngombo.+ No tũtirĩ na ũhoti wa kũgirĩrĩria ũndũ ũcio, tondũ ithaka na mĩgũnda itũ ya mĩthabibũ irĩ moko-inĩ ma andũ angĩ.”

6 Nĩ ndarakarire mũno rĩrĩa ndaiguire kĩrĩro kĩao na ciugo icio. 7 Kwoguo ngĩĩcũrania maũndũ macio ngoro-inĩ, na ngĩcokereria mahĩtia harĩ arĩa maarĩ igweta na atongoria ngĩmeera atĩrĩ: “O ũmwe wanyu nĩ aretia ariũ a ithe wanyu maciaro.”*+

Ningĩ ngĩtana mũcemanio mũnene nĩ ũndũ wao. 8 Ngĩmoria atĩrĩ: “Tũgeretie o ũrĩa wothe tũngĩhota gũkũũra ariũ a ithe witũ Ayahudi arĩa meendirio kũrĩ ndũrĩrĩ; hihi na inyuĩ mũrenda kwendia ariũ a ithe wanyu,+ na hihi macoke mendio kũrĩ ithuĩ rĩngĩ?” Maigua ũguo magĩkira ki, makĩaga wa kuuga. 9 Ngĩcoka ngĩmeera ũũ: “Ũguo mũreka ti wega. Githĩ mũtiagĩrĩirũo gũkorũo na mĩthiĩre ya gwĩtigĩra Ngai witũ+ nĩgetha ndũrĩrĩ, o icio thũ citũ, itigatũnyũrũrie? 10 Ningĩ-rĩ, niĩ na ariũ a baba, na ndungata ciakwa nĩ tũramakombera mbeca na irio. Ndamũthaitha twakombithia mbeca rekei tũtige gwĩtia maciaro.+ 11 Ngũmũũria mũmacokerie ũmũthĩ ũyũ ithaka ciao,+ mĩgũnda yao ya mĩthabibũ, mĩgũnda yao ya mĩtamaiyũ, na nyũmba ciao, o hamwe na gĩcunjĩ kĩmwe harĩ igana kĩa mbeca icio, irio, ndibei njerũ,* na maguta marĩa mũrametia marĩ maciaro.”

12 Nao makiuga ũũ: “Nĩ tũkũmacokeria indo icio na tũtikũmetia kĩndũ. Tũgwĩka o ta ũguo woiga.” Nĩ ũndũ ũcio ngĩta athĩnjĩri-Ngai na ngĩra andũ acio mehĩte atĩ nĩ mekũhingia kĩĩranĩro kĩu. 13 Ngĩcoka ngĩribariba nguo* yakwa na ngiuga atĩrĩ: “Na njĩra o ta ĩyo-rĩ, mũndũ wothe ũtekũhingia kĩĩranĩro kĩu, Ngai ũrĩa wa ma aromũribariba kuuma nyũmba-inĩ yake na kuuma indo-inĩ ciake, na o ta ũguo-rĩ, aroribaribwo atigwo atarĩ kĩndũ.” Kĩũngano gĩothe kĩaigua ũguo gĩkiuga: “Ameni!”* Na makĩgooca Jehova, na andũ acio magĩka o ta ũrĩa meranĩire.

14 Ningĩ-rĩ, kuuma mũthenya ũrĩa aaheire wĩra wa gũtuĩka ngavana+ bũrũri-inĩ wa Juda, kuuma mwaka wa 20+ nginya wa 32+ wa Mũthamaki Aritashashita,+ mĩaka 12, niĩ o na kana ariũ a baba gũtirĩ o na ũmwe witũ warĩire irio iria ciaheagwo ngavana.+ 15 No mangavana arĩa maarĩ mbere yakwa nĩ maaritũhĩirie andũ na nĩ moonganagia kuuma kũrĩ o cekeri* 40 cia betha nĩ ũndũ wa mũgate na ndibei o mũthenya. Ningĩ, arĩa maamateithagĩrĩria nĩ maahinyagĩrĩria andũ. No niĩ nĩ ũndũ wa gwĩtigĩra Ngai,+ ndiekire ũguo.+

16 Makĩria ma ũguo, nĩ ndateithĩrĩirie wĩra-inĩ wa gwaka rũthingo rũrũ, na gũtirĩ gĩthaka twegĩĩrĩire nakĩo;+ arĩa othe maandungataga nĩ mookĩte kũruta wĩra ũcio. 17 Kwarĩ na Ayahudi na atongoria 150 arĩa maarĩaga metha-inĩ yakwa, o hamwe na arĩa mookaga kũrĩ ithuĩ moimĩte kũrĩ ndũrĩrĩ. 18 O mũthenya ndegwa ĩmwe, ngʼondu ithathatũ iria njega mũno, na nyoni, nĩ ciahaaragĩrio nĩ ũndũ wakwa,* na riita rĩmwe o thutha wa thikũ ikũmi nĩ twakoragwo na ndibei nyingĩ ya mĩthemba yothe. O na kũrĩ ũguo-rĩ, ndiigana gwĩtia irio iria ciaheagwo ngavana, nĩ gũkorũo andũ nĩ maaritũhĩirũo nĩ ũndũ wa ũtungata ũcio. 19 Ndagũthaitha wee Ngai wakwa ũndirikane na ũnjĩke wega, nĩ ũndũ wa maũndũ mothe marĩa njĩkĩte nĩ ũndũ wa andũ aya.+

6 Na rĩrĩ, rĩrĩa Sanibalati, Tobia,+ Geshemu ũrĩa Mũarabia,+ na thũ icio ingĩ citũ meerirũo atĩ nĩ ndakĩte rũthingo rũu rĩngĩ+ na atĩ rũtiarĩ na mĩanya yatigarĩte (o na gũtuĩka gũkinyĩria hĩndĩ ĩyo ndiekĩrĩte mĩrango ihingo-inĩ),+ 2 o hĩndĩ ĩyo Sanibalati na Geshemu makĩndũmĩra ndũmĩrĩri ĩno, makiuga: “Ũka, na ũreke tũbange ihinda rĩrĩa tũngĩcemania icagi-inĩ cia Mũkuru Mwaraganu wa Ono.”+ Ĩndĩ maabangaga kũnjĩka ũũru. 3 Nĩ ũndũ ũcio ngĩmatũmĩra atũmwo mameere ũũ: “Ndĩ na wĩra mũnene mũno ndĩraruta, na ndingĩhota gũikũrũka. Wĩra ũngĩkĩrũgama nĩkĩ ndĩũtige nĩguo njũke kũrĩ inyuĩ?” 4 Nao makĩndũmĩra ndũmĩrĩri o ĩyo maita mana, na niĩ ndamaheaga macokio o macio hĩndĩ ciothe.

5 Thutha ũcio Sanibalati agĩtũma ndungata yake kũrĩ niĩ na ndũmĩrĩri o ĩyo riita rĩa gatano, ĩkuuĩte marũa guoko-inĩ kwayo mataarĩ matume. 6 Marũa macio maandĩkĩtwo ũũ: “Thĩinĩ wa ndũrĩrĩ nĩ kũiguĩtwo, o na Geshemu+ nĩ aroiga ũndũ ũcio, atĩ wee mũrĩ hamwe na Ayahudi mũrabanga kũrema.+ Nĩkĩo mũraaka rũthingo rũu; na kũringana na ũhoro ũcio, kũratuĩka atĩ wee nĩwe ũgũtuĩka mũthamaki wao. 7 Ningĩ nĩ wamũrĩte anabii nĩguo mahunjie ũhoro waku Jerusalemu yothe atĩrĩ, ‘Kũrĩ na mũthamaki thĩinĩ wa Juda!’ Na rĩu mũthamaki nĩ ekwĩrũo maũndũ macio. Kwoguo ũka nĩguo twarĩrĩrie ũndũ ũcio hamwe.”

8 Ĩndĩ niĩ ngĩtũmana erũo atĩrĩ: “Maũndũ macio ũroiga gũtirĩ o na ũmwe wĩkĩkĩte; ũramoiga kuumana na mwĩcirĩrie waku mwene.”* 9 Tondũ othe maageragia gũtwĩkĩra guoya, makoiga: “Moko mao nĩ mekũregera wĩra-inĩ ũcio, na ndũkũrutwo.”+ No rĩu wee Ngai, ndakũhoya wĩkĩre moko makwa hinya.+

10 Ngĩcoka ngĩthiĩ nyũmba-inĩ ya Shemaia mũrũ wa Delaia mũrũ wa Mehetabeli rĩrĩa eehingĩrĩte kuo. Nake akiuga: “Reke tũbange ihinda rĩrĩa tũngĩcemania nyũmba-inĩ ya Ngai ũrĩa wa ma, kũu hekarũ-inĩ, na tũhinge mĩrango ya hekarũ, tondũ nĩ megũka gũkũũraga. Megũka gũkũũraga ũtukũ.” 11 No niĩ ngĩmwĩra atĩrĩ: “Hihi mũndũ ta niĩ nĩ agĩrĩirũo kũũra? Mũndũ ta niĩ no athiĩ thĩinĩ wa hekarũ na atũũre?+ Ndikũingĩra kuo!” 12 Ngĩcoka ngĩmenya atĩ ti Ngai wamũtũmĩte, no nĩ Tobia na Sanibalati+ maamũrĩhĩte nĩguo arie ũrathi ũcio ũnjĩgiĩ. 13 Aarĩhĩtwo nĩguo anjĩkĩre guoya na atũme njĩhie, nĩguo magĩe na gĩtũmi gĩa gũũthũkĩria rĩĩtwa nĩgetha maanyũrũrie.

14 Wee Ngai wakwa, ririkana Tobia+ na Sanibalati na ũririkane maũndũ maya, o na ningĩ Noadia mũtumia ũrĩa mũnabii na anabii acio angĩ, arĩa maageragia hingo ciothe kũnjĩkĩra guoya.

15 Kwoguo rũthingo rũu rũkĩrĩkio thutha wa thikũ 52 mũthenya wa 25 wa mweri wa Eluli.*

16 Hĩndĩ ĩrĩa thũ citũ ciothe ciaiguire ũhoro ũcio na ndũrĩrĩ iria ciothe ciatũrigicĩirie ikĩona rũthingo rũu, nĩ ciaconokire* mũno+ na ikĩmenya atĩ wĩra ũcio warutĩtwo nĩ ũndũ wa ũteithio wa Ngai witũ. 17 Matukũ-inĩ macio andũ arĩa maarĩ igweta+ a Juda nĩ maatũmaga marũa maingĩ kũrĩ Tobia, nake Tobia akamacokeria. 18 Andũ aingĩ thĩinĩ wa Juda nĩ meehĩtĩte kũmwathĩkagĩra tondũ aarĩ mũthoniwe wa Shekania mũrũ wa Ara,+ nake mũriũ wake Jehohanani aahikĩtie mwarĩ wa Meshulamu+ mũrũ wa Berekia. 19 Ningĩ nĩ maaikaraga makĩnjĩraga maũndũ mega mamwĩgiĩ magacoka magathiĩ makamwĩra ũrĩa ndoiga. Tobia agacoka akandũmĩra marũa ma kũnjĩkĩra guoya.+

7 Na rĩrĩa rũthingo rwarĩkire gwakwo,+ ngĩĩkĩra mĩrango;+ nao arangĩri a ihingo,+ aini,+ na Alawii+ makĩamũrũo. 2 Ngĩcoka ngĩiga Hanani+ mũrũ wa baba arũgamĩrĩre Jerusalemu, marĩ hamwe na Hanania mũnene wa Nyũmba Njirigĩre,+ tondũ aarĩ mũndũ mwĩhokeku mũno na nĩ eetigĩrĩte Ngai ũrĩa wa ma+ gũkĩra andũ angĩ aingĩ. 3 Na ngĩmeera atĩrĩ: “Ihingo cia Jerusalemu itiagĩrĩirũo kũhingũrũo o nginya rĩrĩa riũa rĩrĩara, na rĩrĩa mararangĩra-rĩ, magĩrĩirũo kũhinga mĩrango na mamĩkĩre icũhĩ ciayo. Nao aikari a Jerusalemu maheo wĩra wa kũrangĩra, o mũndũ handũ hake ha kũrangĩra na o mũndũ mwena wa mbere wa nyũmba yake.” 4 Na rĩrĩ, itũũra rĩu rĩarĩ rĩaramu na inene, na andũ arĩa maarĩ thĩinĩ warĩo matiarĩ aingĩ,+ nacio nyũmba itiaakĩtwo.

5 No Ngai wakwa akĩĩhe rĩciria rĩa* gũcokanĩrĩria andũ arĩa maarĩ igweta na atongoria o hamwe na andũ nĩguo meyandĩkithie kũringana na ndĩra ciao.+ Ngĩcoka ngĩona ibuku rĩa rekondi ya arĩa maandĩkithĩtio kũringana na ndĩra ciao arĩa maambatĩte marĩ a mbere, na ngĩona rĩandĩkĩtwo ũũ:

6 Na rĩrĩ aya nĩo andũ arĩa maarĩ a gĩcigo kĩa bũrũri arĩa mooimire ithamĩrio, o acio Mũthamaki Nebukadineza+ wa Babuloni aatwarĩte ithamĩrio+ na nĩo thutha-inĩ maacokire Jerusalemu na Juda, o mũndũ agĩcoka itũũra rĩake,+ 7 arĩa mookire hamwe na Zerubabeli,+ Jeshua,+ Nehemia, Azaria, Raamia, Nahamani, Moridekai, Bilishani, Misiperethu, Bigivai, Nehumu, na Baana.

Ũyũ nĩguo warĩ mũigana wa arũme Aisiraeli:+ 8 ariũ a Paroshu, 2,172; 9 ariũ a Shefatia, 372; 10 ariũ a Ara,+ 652; 11 ariũ a Pahathu-moabi,+ arĩa maarĩ a ariũ a Jeshua na Joabu,+ 2,818; 12 ariũ a Elamu,+ 1,254; 13 ariũ a Zatu, 845; 14 ariũ a Zakai, 760; 15 ariũ a Binui, 648; 16 ariũ a Bebai, 628; 17 ariũ a Azigadi, 2,322; 18 ariũ a Adonikamu, 667; 19 ariũ a Bigivai, 2,067; 20 ariũ a Adini, 655; 21 ariũ a Ateri, wa Hezekia, 98; 22 ariũ a Hashumu, 328; 23 ariũ a Bezai, 324; 24 ariũ a Harifu, 112; 25 ariũ a Gibeoni,+ 95; 26 arũme a Bethilehemu na Netofa, 188; 27 arũme a Anathothi,+ 128; 28 arũme a Bethi-azamavethu, 42; 29 arũme a Kiriathu-jearimu,+ Kefira, na Beerothu,+ 743; 30 arũme a Rama na Geba,+ 621; 31 arũme a Mikimasi,+ 122; 32 arũme a Betheli+ na Ai,+ 123; 33 arũme a Nebo ĩyo ĩngĩ, 52; 34 ariũ a Elamu ũcio ũngĩ, 1,254; 35 ariũ a Harimu, 320; 36 ariũ a Jeriko, 345; 37 ariũ a Lodi, Hadidi, na Ono,+ 721; 38 ariũ a Senaa, 3,930.

39 Athĩnjĩri-Ngai maarĩ:+ ariũ a Jedaia wa nyũmba ya Jeshua, 973; 40 ariũ a Imeri, 1,052; 41 ariũ a Pashuru,+ 1,247; 42 ariũ a Harimu,+ 1,017.

43 Alawii maarĩ:+ ariũ a Jeshua, wa Kadimieli,+ arĩa maarĩ a ariũ a Hodeva, 74. 44 Aini maarĩ:+ ariũ a Asafu,+ 148. 45 Arangĩri a ihingo maarĩ:+ ariũ a Shalumu, ariũ a Ateri, ariũ a Talimoni, ariũ a Akubu,+ ariũ a Hatita, ariũ a Shobai, 138.

46 Ndungata cia hekarũ ciarĩ:*+ ariũ a Ziha, ariũ a Hasufa, ariũ a Tabaothu, 47 ariũ a Keroso, ariũ a Sia, ariũ a Padoni, 48 ariũ a Lebana, ariũ a Hagaba, ariũ a Salimai, 49 ariũ a Hanani, ariũ a Gideli, ariũ a Gahari, 50 ariũ a Reaia, ariũ a Rezini, ariũ a Nekoda, 51 ariũ a Gazamu, ariũ a Uza, ariũ a Pasea, 52 ariũ a Besai, ariũ a Meunimu, ariũ a Nefushesimu, 53 ariũ a Bakabuku, ariũ a Hakufa, ariũ a Harihuru, 54 ariũ a Bazilithu, ariũ a Mehida, ariũ a Harasha, 55 ariũ a Barikosi, ariũ a Sisera, ariũ a Tema, 56 ariũ a Nezia, ariũ a Hatifa.

57 Ariũ a ndungata cia Suleimani maarĩ:+ ariũ a Sotai, ariũ a Soferethu, ariũ a Perida, 58 ariũ a Jaala, ariũ a Darikoni, ariũ a Gideli, 59 ariũ a Shefatia, ariũ a Hatili, ariũ a Pokerethu-hazebaimu, ariũ a Amoni. 60 Ndungata ciothe cia hekarũ*+ o hamwe na ariũ a ndungata cia Suleimani maarĩ 392.

61 Nao aya nĩo maambatire kuuma Teli-mela, Teli-harasha, Kerubu, Adoni, na Imeri, no matiahotire kuonania nyũmba ya maithe mao na kĩhumo kĩao, nĩguo kũmenyeke kana maarĩ Aisiraeli:+ 62 ariũ a Delaia, ariũ a Tobia, ariũ a Nekoda, 642. 63 Na kuuma harĩ athĩnjĩri-Ngai: ariũ a Habaia, ariũ a Hakozu,+ ariũ a Barizilai, ũrĩa wahikirie mũtumia kuuma harĩ airĩtu a Barizilai+ ũrĩa Mũgileadi na agĩĩtanio na rĩĩtwa rĩao. 64 Acio meethire marĩĩtwa mao rekondi-inĩ nĩguo mamenye ndĩra ciao, no matiamonire, kwoguo makĩaga kwagĩrĩra gũtuĩka athĩnjĩri-Ngai.*+ 65 Ngavana*+ akĩmeera atĩ matiaagĩrĩirũo kũrĩa indo iria theru mũno+ nginya rĩrĩa hangĩagĩire na Mũthĩnjĩri-Ngai ũngĩatuĩririe ũhoro akĩhũthĩra Urimu na Thumimu.+

66 Mũigana wa kĩũngano kĩu gĩothe warĩ 42,360,+ 67 hatatarĩtwo ngombo ciao cia arũme na atumia,+ iria ciarĩ 7,337; ningĩ nĩ maarĩ na aini 245 arũme na atumia.+ 68 Maarĩ na mbarathi 736, nyũmbũ 245, 69 ngamĩra 435, ndigiri 6,720.

70 Amwe arĩa maarĩ atongoria a nyũmba cia maithe mao nĩ maarutire mĩhothi nĩ ũndũ wa wĩra ũcio.+ Ngavana* akĩheana drakma* 1,000 cia thahabu, mbakũri 50, na kanjũ 530 cia athĩnjĩri-Ngai ciigwo kĩgĩna-inĩ.+ 71 Nao amwe arĩa maarĩ atongoria a nyũmba cia maithe mao makĩheana drakma 20,000 cia thahabu na mina* 2,200 cia betha ciigwo kĩgĩna-inĩ nĩ ũndũ wa wĩra ũcio. 72 Nao andũ acio angĩ makĩheana drakma 20,000 cia thahabu, mina 2,000 cia betha, na kanjũ 67 cia athĩnjĩri-Ngai.

73 Na athĩnjĩri-Ngai, Alawii, arangĩri a ihingo, aini,+ andũ amwe, na ndungata cia hekarũ,* na andũ acio angĩ othe a Isiraeli* makĩambĩrĩria gũikara matũũra-inĩ mao.+ Rĩrĩa mweri wa mũgwanja wakinyire,+ Aisiraeli nĩ maakoretwo mambĩrĩirie gũikara matũũra-inĩ mao.+

8 Nao andũ othe makĩũngana marĩ kĩndũ kĩmwe kĩhaaro-inĩ kĩa mũingĩ kĩrĩa kĩarĩ mbere ya Kĩhingo kĩa Maĩ,+ na makĩra Ezara+ ũrĩa mwandĩki* oke na ibuku rĩa Watho wa Musa,+ ũrĩa Jehova aathĩte Isiraeli.+ 2 Nĩ ũndũ ũcio mũthenya wa mbere wa mweri wa mũgwanja,+ Ezara ũcio mũthĩnjĩri-Ngai agĩtwara Watho ũcio mbere ya kĩũngano+ kĩu kĩa arũme, atumia, na andũ othe arĩa mangĩahotire gũthikĩrĩria na mataũkĩrũo. 3 Nake agĩthoma ibuku rĩu anĩrĩire+ kuuma rũcinĩ gũgĩthererũka nginya mũthenya gatagatĩ arĩ hau mbere kĩhaaro-inĩ kĩa mũingĩ kĩu kĩarĩ mbere ya Kĩhingo kĩa Maĩ, akĩrĩthomera arũme, atumia, na andũ arĩa othe mangĩataũkĩirũo; nao andũ magĩthikĩrĩria na kinyi+ ũhoro ũrĩa warĩ ibuku-inĩ rĩu rĩa Watho. 4 Na Ezara ũcio mwandĩki* aarũgamĩte handũ igũrũ haakĩtwo na mbaũ, harĩa haathondeketwo tondũ wa ũndũ ũcio; na arĩa maarũgamĩte mwena wake wa ũrĩo maarĩ, Matithia, Shema, Anaia, Uria, Hilikia, na Maaseia; nao arĩa maarũgamĩte mwena wake wa ũmotho maarĩ, Pedaia, Mishaeli, Malikija,+ Hashumu, Hashi-badana, Zekaria, na Meshulamu.

5 Ezara agĩkĩhingũra ibuku rĩu andũ acio othe makĩonaga nĩ gũkorũo aarĩ handũ igũrũ rĩa andũ othe. Na rĩrĩa aarĩhingũrire, andũ othe makĩrũgama. 6 Ezara agĩcoka akĩgooca Jehova Ngai ũrĩa wa ma, o we Ũrĩa mũnene, nao andũ acio othe makiuga, “Ameni!* Ameni!”+ na makĩoya moko mao na igũrũ. Magĩcoka makĩinamĩrĩra Jehova maturumithĩtie mothiũ mao thĩ. 7 Nao Jeshua, Bani, Sherebia,+ Jamini, Akubu, Shabethai, Hodia, Maaseia, Kelita, Azaria, Jozabadu,+ Hanani, Pelaia, arĩa maarĩ Alawii, nĩ maataaragĩria andũ Watho ũcio,+ nao andũ acio magĩikara o marũgamĩte. 8 Na magĩthiĩ na mbere gũthoma ibuku rĩu na kayũ, kuuma Watho-inĩ wa Ngai ũrĩa wa ma, magĩtaaragĩria na njĩra ĩrataũkĩka na makonania wega ũrĩa Watho uugĩte; nĩ ũndũ ũcio magĩteithia andũ gũtaũkĩrũo nĩ ũhoro ũcio wathomagwo.+

9 Nake Nehemia, ũrĩa warĩ ngavana* hĩndĩ ĩyo, Ezara+ mũthĩnjĩri-Ngai na mwandĩki,* na Alawii arĩa maarutaga andũ ũhoro, makĩra andũ othe ũũ: “Mũthenya ũyũ nĩ mũtheru harĩ Jehova Ngai wanyu.+ Mũtigacakae kana mũrĩre.” Tondũ andũ othe nĩ maarĩraga maigua ciugo cia Watho. 10 Akĩmeera ũũ: “Thiĩi, mũrĩe indo iria njega* biũ na mũnyue kĩrĩa kĩrĩ cama, nao arĩa matarĩ na kĩndũ mahaarĩirie mũmaneanĩre irio;+ nĩ gũkorũo mũthenya ũyũ nĩ mũtheru harĩ Mwathani witũ, na mũtikaigue kĩeha, tondũ gĩkeno kĩrĩa kiumaga kũrĩ Jehova nĩkĩo mwĩgitio* wanyu.” 11 Nao Alawii nĩ maahooragĩria andũ, makĩmeeraga atĩrĩ: “Mũtikarĩre! tondũ mũthenya ũyũ nĩ mũtheru, na mũtikaigue kĩeha.” 12 Nĩ ũndũ ũcio andũ othe magĩthiĩ kũrĩa na kũnyua na kũneanĩra arĩa angĩ irio na gũkena mũno,+ nĩ gũkorũo nĩ maataũkĩirũo nĩ ciugo icio maamenyithĩtio.+

13 Na mũthenya wa kerĩ, arĩa maarĩ atongoria a nyũmba cia maithe ma andũ othe, athĩnjĩri-Ngai, na Alawii magĩcokanĩrĩra hamwe mathiũrũrũkĩirie Ezara ũcio mwandĩki* nĩgetha magĩe na ũtaũku makĩria wĩgiĩ ciugo cia Watho ũcio. 14 Nao makĩona handĩkĩtwo Watho-inĩ ũrĩa Jehova aathanĩte kũgerera kũrĩ Musa atĩ Aisiraeli maagĩrĩirũo gũikara ithũnũ-inĩ* hĩndĩ ya gĩathĩ mweri-inĩ wa mũgwanja,+ 15 na atĩ maagĩrĩirũo kwanĩrĩra+ na kũmenyithania matũũra-inĩ mao mothe na Jerusalemu guothe, makiugaga: “Thiĩi gĩcigo-inĩ kĩrĩa kĩrĩ irĩma na mũrehe mathangũ ma mĩtĩ ya mĩtamaiyũ, mĩtĩ ya mĩcinda-nũgũ,* mĩtĩ ya mĩhandathi na mĩtĩ ya mĩkĩndũ, na mathangũ ma mĩtĩ ĩngĩ ma gũthondeka ithũnũ, kũringana na ũrĩa kwandĩkĩtwo.”

16 Nĩ ũndũ ũcio andũ magĩthiĩ na makĩrehe mathangũ ma gũthondeka ithũnũ ciao, o mũndũ igũrũ rĩa nyũmba yake, o hamwe na thĩinĩ wa nja ciao, thĩinĩ wa nja cia nyũmba ya Ngai ũrĩa wa ma,+ kĩhaaro kĩa mũingĩ gĩa Kĩhingo kĩa Maĩ,+ na kĩhaaro kĩa mũingĩ gĩa Kĩhingo kĩa Efiraimu.+ 17 Nĩ ũndũ ũcio, andũ othe a kĩũngano kĩu acio mooimĩte ithamĩrio magĩthondeka ithũnũ na maaikaraga ithũnũ-inĩ icio, nĩ gũkorũo Aisiraeli matierĩgĩte gwĩka ũndũ ũcio na njĩra ĩyo kuuma hĩndĩ ya matukũ ma Joshua+ mũrũ wa Nuni nginya mũthenya ũcio, kwoguo gũkĩgĩa na gĩkeno kĩnene mũno.+ 18 Na mũthenya o mũthenya ibuku rĩa Watho wa Ngai ũrĩa wa ma nĩ rĩathomagwo,+ kuuma mũthenya wa mbere nginya mũthenya wa mũico. Na makĩgĩa na gĩkũngũĩro kĩu thikũ mũgwanja, naguo mũthenya wa kanana gũkĩgĩa na kĩgomano gĩtheru, o ta ũrĩa maagĩrĩirũo nĩ gwĩka.+

9 Na rĩrĩ, mũthenya wa 24 mweri-inĩ o ũcio, Aisiraeli makĩũngana; mehingĩte kũrĩa mehumbĩte nguo cia makũnia na makehaka tĩri.+ 2 Nao andũ a rũciaro rwa Isiraeli makĩĩyamũrania na andũ othe a kũngĩ,+ na makĩrũgama makiumbũra mehia mao o hamwe na mahĩtia ma maithe mao.+ 3 Magĩcoka makĩrũgama o hau maarĩ na magĩthoma manĩrĩire ibuku rĩa Watho+ wa Jehova Ngai wao ta ihinda rĩa mathaa matatũ;* na mathaa mangĩ matatũ nĩ kumbũra mooimbũraga mehia mao na makainamĩrĩra Jehova Ngai wao.

4 Nao Jeshua, Bani, Kadimieli, Shebania, Buni, Sherebia,+ Bani, na Kenani makĩrũgama handũ haarĩ igũrũ+ ha Alawii, na magĩkaĩra Jehova Ngai wao na mũgambo mũnene. 5 Na Jeshua, Kadimieli, Bani, Hashabineia, Sherebia, Hodia, Shebania, na Pethahia, arĩa maarĩ Alawii makiuga atĩrĩ: “Rũgamai mũgooce Jehova Ngai wanyu nginya tene na tene.+ Reke magooce rĩĩtwa rĩaku rĩrĩ riri, rĩrĩa rĩtũũgĩrĩtio igũrũ rĩa kĩrathimo na rũgooco o ruothe.

6 “Wee wiki nowe Jehova;+ nĩwe wombire igũrũ, o nginya igũrũ rĩrĩa rĩrĩ igũrũ mũno na mbũtũ ciarĩo, ũkĩũmba thĩ na kĩrĩa gĩothe kĩrĩ kuo, iria na kĩrĩa gĩothe kĩrĩ thĩinĩ warĩo. Na ciothe nĩwe ũcitũũragia muoyo, na mbũtũ cia igũrũ nĩ ikũinamagĩrĩra. 7 Wee nĩwe Jehova Ngai ũrĩa wa ma, o wee wathuurire Aburamu+ na ũkĩmũruta Uru+ kwa Akalidei na ũkĩmũhe rĩĩtwa Iburahimu.+ 8 Nĩ woonire ngoro yake ĩĩhokekete maitho-inĩ maku,+ kwoguo ũkĩgĩa kĩrĩkanĩro nake atĩ nĩ ũkaamũhe bũrũri wa Akanaani, Ahiti, Aamori, Aperizi, Ajebusi, Agirigashi, ũũhe rũciaro rwake;*+ na nĩ wahingirie ciĩranĩro ciaku, tondũ ũrĩ mũthingu.

9 “Nĩ woonire mĩnyamaro ya maithe maitũ ma tene rĩrĩa maarĩ Misiri,+ na ũkĩigua kĩrĩro kĩao marĩ Iria-inĩ Itune. 10 Ningĩ nĩ waringire ciama ũgĩũkĩrĩra Firauni na ndungata ciake ciothe na andũ othe a bũrũri wake,+ tondũ nĩ wamenyaga atĩ nĩ maahinyagĩrĩria andũ aku marĩ na mwĩtĩo.+ Na ũgĩĩthondekera rĩĩtwa rĩrĩa rĩtũũraga nginya ũmũthĩ.+ 11 Na ũkĩgayania iria mbere yao, nĩ ũndũ ũcio magĩtuĩkania iria magereire thĩ nyũmũ,+ nao arĩa maamoimĩte thutha ũkĩmaikia kũrĩa kũriku o ta ihiga rĩikĩtio maĩ-inĩ marĩ na hinya mũingĩ.+ 12 Ũkĩmatongoria mũthenya na gĩtugĩ gĩa itu, naguo ũtukũ ũkĩmatongoria na gĩtugĩ kĩa mwaki, nĩguo ũmamũrĩkĩre njĩra ĩrĩa maagĩrĩirũo nĩ gũthiĩra.+ 13 Na ũgĩikũrũka igũrũ rĩa Kĩrĩma gĩa Sinai+ na ũkĩaria nao kuuma igũrũ+ na ũkĩmahe matuĩro ma ũthingu, mawatho ma ũhoro wa ma,* matua o na maathani mega.+ 14 Ũkĩmamenyithia Thabatũ yaku theru,+ na ũkĩmahe maathani, matua, na watho kũgerera kũrĩ Musa ndungata yaku. 15 Ũkĩmahe mũgate kuuma igũrũ rĩrĩa maarĩ ahũtu,+ na ũkĩruta maĩ kuuma ihiga-inĩ hĩndĩ ĩrĩa maarĩ anyotu,+ na ũkĩmeera maingĩre na megwatĩre bũrũri ũrĩa wehĩtĩte* atĩ nĩ ũngĩkamahe.

16 “Ĩndĩ maithe maitũ ma tene, magĩĩtĩa+ na makĩũmia ciongo,*+ na matiathikagĩrĩria maathani maku. 17 Nao makĩrega gũthikĩrĩria,+ na makĩaga kũririkana ciĩko ciaku cia magegania iria wekĩte gatagatĩ-inĩ kao, no makĩũmia ciongo* na magĩthuura mũtongoria wa kũmacokia Misiri ũkombo-inĩ wao.+ Ĩndĩ wee wĩ Ngai ũkoragwo ehaarĩirie kuohanĩra,* mũcayanĩri* na mũigua tha, ndũhiũhaga kũrakara na ũiyũirũo nĩ wendo mwĩhokeku,+ na ndwamatiganĩirie.+ 18 O na rĩrĩa meethondekeire mũhianano wa njaũ ya cuma* na makiuga, ‘Ũyũ nĩwe Ngai waku, ũrĩa wagũtongoririe agĩkũruta bũrũri wa Misiri,’+ na magĩka maũndũ manene ma gũkwagĩra gĩtĩo, 19 o na hĩndĩ ĩyo, wee nĩ ũndũ wa tha ciaku nyingĩ, ndwamatiganĩirie werũ-inĩ.+ Gĩtugĩ gĩa itu kĩrĩa kĩamatongoragia njĩra-inĩ mũthenya gĩtieherire igũrũ rĩao, o na kana itu rĩa mwaki rĩkĩehera rĩrĩa rĩamamũrĩkagĩra ũtukũ njĩra ĩrĩa maagĩrĩirũo nĩ gũthiĩra.+ 20 Na ũkĩmahe roho waku mwega wa kũmahe ũũgĩ,+ na ndwagire kũmahe maana,+ na nĩ wamaheaga maĩ rĩrĩa manyota.+ 21 Wamaheire irio werũ-inĩ mĩaka 40.+ Matirĩ kĩndũ maagire. Nguo ciao itiigana gũthira,+ o na magũrũ mao matiaimbire.

22 “Nĩ wamaheire mothamaki na ikundi cia andũ, ũkĩmagaĩra gĩcunjĩ kĩmwe thutha wa kĩrĩa kĩngĩ,+ nginya makĩĩgwatĩra bũrũri wa Sihoni,+ na nĩguo bũrũri wa mũthamaki wa Heshiboni,+ o hamwe na bũrũri wa Ogu+ mũthamaki wa Bashani. 23 Nao ariũ ao ũkĩmatua aingĩ mũno o ta njata cia igũrũ.+ Ũgĩcoka ũkĩmakinyia bũrũri ũrĩa werĩire maithe mao ma tene atĩ nĩ maagĩrĩirũo kũingĩra na mawĩgwatĩre.+ 24 Kwoguo ariũ ao makĩingĩra na makĩĩgwatĩra bũrũri ũcio,+ na ũgĩtooria Akanaani mbere yao,+ o acio maarĩ aikari a bũrũri ũcio, na ũkĩneana athamaki ao na andũ a bũrũri ũcio guoko-inĩ kwao, mameke ũrĩa mangĩonire arĩ wega. 25 Na magĩtunyana matũũra marĩa marĩ na ũgitĩri+ o hamwe na bũrũri mũnoru,*+ na makĩĩgwatĩra nyũmba ciaiyũire indo njega cia mĩthemba yothe, ithima cia maĩ cienjetwo, mĩgũnda ya mĩthabibũ, mĩgũnda ya mĩtamaiyũ+ na mĩtĩ mĩingĩ ya matunda. Nĩ ũndũ ũcio makĩrĩa makĩhũna na magĩtunguha, na makĩĩrahĩra wega waku mũingĩ.

26 “No rĩrĩ, makĩaga gwathĩka na magĩkũremera+ na makĩhũgũkĩra Watho waku.* Makĩũraga anabii aku arĩa maamakaanagia nĩgetha mamacokie kũrĩ we, na magĩka maũndũ manene ma gũkwagĩra gĩtĩo.+ 27 Nĩ ũndũ ũcio ũkĩmaneana guoko-inĩ gwa thũ ciao,+ iria ciaikaraga ikĩmarehagĩra mĩtangĩko.+ No nĩ maagũkayagĩra hĩndĩ ya mĩtangĩko yao, nawe ũkamaigua ũrĩ kũu igũrũ; na nĩ ũndũ wa tha ciaku nyingĩ, nĩ wamaheaga andũ a kũmahonokia kuuma guoko-inĩ gwa thũ ciao.+

28 “No marĩkia kuona ũhonokio, nĩ meekaga maũndũ moru maitho-inĩ maku+ o na ihenya, nawe ũkamatiganĩria guoko-inĩ gwa thũ ciao, iria ciamaathaga.*+ Thutha ũcio magagũcokerera na magagũkaĩra ũmateithie,+ nawe ũkamaigua ũrĩ kũu igũrũ na ũkamahonokia rĩngĩ na rĩngĩ nĩ ũndũ wa tha ciaku nyingĩ.+ 29 O na gũtuĩka nĩ wamakaanagia nĩgetha ũmacokie Watho-inĩ waku-rĩ, nĩ meetĩire na makĩrega gũthikĩrĩria maathani maku;+ na makĩremera matua maku, marĩa mangĩtũũria mũndũ muoyo angĩmarũmĩrĩra.+ Ĩndĩ nĩ ũndũ wa ũremi magĩkũhũgũkĩra na makĩũmia ciongo ciao, na makĩrega gũthikĩrĩria. 30 Nĩ wamakirĩrĩirie+ mĩaka mĩingĩ na ũgĩikara ũkĩmakaanagia na roho waku kũgerera kũrĩ anabii aku, no makĩrega gũthikĩrĩria. Marigĩrĩrio-inĩ ũkĩmaneana guoko-inĩ kwa andũ a mabũrũri.+ 31 Na nĩ ũndũ wa tha ciaku nyingĩ, ndwamaniinire+ o na kana ũkĩmatiganĩria, nĩ gũkorũo wee wĩ Ngai mũcayanĩri* na mũigua tha.+

32 “Na rĩu Ngai witũ-rĩ, wee Ngai mũnene, ũrĩ hinya, na wa magegania, wee ũhingĩtie kĩrĩkanĩro gĩaku na ũkonania wendo mwĩhokeku,+ ndũkahũthie moritũ mothe marĩa matũkorete, magakora athamaki aitũ, anene aitũ,+ athĩnjĩri-Ngai aitũ,+ anabii aitũ,+ maithe maitũ ma tene, na andũ aku othe kuuma o matukũ-inĩ ma athamaki a Ashuri+ nginya ũmũthĩ. 33 Wee ũkoretwo ũrĩ mũthingu maũndũ-inĩ mothe marĩa matũkorete, nĩ gũkorũo wĩkĩte maũndũ ma wĩhokeku; no ithuĩ nĩ ithuĩ twĩkĩte maũndũ moru.+ 34 Nao athamaki aitũ, anene aitũ, athĩnjĩri-Ngai aitũ, na maithe maitũ ma tene, matirũmagĩrĩra Watho waku o na kana magaathĩkĩra maathani maku o na iririkania ciaku* iria wanamakaania nacio. 35 O na rĩrĩa maarĩ ũthamaki-inĩ wao magĩkenera wega mũingĩ ũrĩa wamaheete rĩrĩa maarĩ bũrũri-inĩ mwariĩ na mũnoru* ũrĩa wamaheete, matiigana gũgũtungatĩra+ na matiatigire mĩtugo yao mĩũru. 36 Rĩu ũmũthĩ ithuĩ tũrĩ ngombo,+ ngombo bũrũri-inĩ ũrĩa waheire maithe maitũ ma tene marĩage maciaro maguo na indo ciaguo iria njega. 37 Maciaro maguo maingĩ marĩagwo nĩ athamaki arĩa ũigĩte igũrũ ritũ nĩ ũndũ wa mehia maitũ.+ Mathaga mĩĩrĩ itũ na mahiũ maitũ o ta ũrĩa monaga kwagĩrĩire, na rĩu tũrĩ mĩtangĩko-inĩ mĩnene.

38 “Kwoguo nĩ ũndũ wa maũndũ macio mothe, nĩ tũgũthondeka kĩrĩkanĩro kĩrũmu+ na tũkĩandĩke, na gĩĩkĩrũo mũkonde na njĩra ya kũhũũrũo mũhũũri nĩ anene aitũ, Alawii aitũ na athĩnjĩri-Ngai aitũ.”+

10 Arĩa meekĩrire kĩrĩkanĩro kĩu mũkonde na njĩra ya kũhũũra mũhũũri+ maarĩ:

9 Nao Alawii arĩa meekĩrire mũkonde maarĩ: Jeshua mũrũ wa Azania, Binui wa ariũ a Henadadi, Kadimieli,+ 10 na ariũ a ithe wao, nĩo Shebania, Hodia, Kelita, Pelaia, Hanani, 11 Mika, Rehobu, Hashabia, 12 Zakuri, Sherebia,+ Shebania, 13 Hodia, Bani, na Beninu.

14 Nao atongoria a andũ maarĩ: Paroshu, Pahathu-moabi,+ Elamu, Zatu, Bani, 15 Buni, Azigadi, Bebai, 16 Adonija, Bigivai, Adini, 17 Ateri, Hezekia, Azuri, 18 Hodia, Hashumu, Bezai, 19 Harifu, Anathothi, Nebai, 20 Magipiashu, Meshulamu, Heziri, 21 Meshezabeli, Zadoku, Jadua, 22 Pelatia, Hanani, Anaia, 23 Hoshea, Hanania, Hashubu, 24 Haloheshu, Piliha, Shobeku, 25 Rehumu, Hashabina, Maaseia, 26 Ahija, Hanani, Anani, 27 Maluku, Harimu, na Baana.

28 Nao andũ acio angĩ othe—athĩnjĩri-Ngai, Alawii, arangĩri a ihingo, aini, na ndungata cia hekarũ,* na andũ othe arĩa meeyamũranirie na andũ a mabũrũri nĩguo marũmĩrĩre Watho wa Ngai ũrĩa wa ma,+ o hamwe na atumia ao, ariũ ao, na airĩtu ao, arĩa othe maarĩ na ũmenyo na ũtaũku*— 29 makĩnyitanĩra na ariũ a ithe wao, andũ ao arĩa maarĩ igweta, na makĩĩyoha na kĩrumi na mwĩhĩtwa, atĩ nĩ marĩrũmagĩrĩra Watho wa Ngai ũrĩa wa ma, ũrĩa waheanĩtwo kũgerera Musa ndungata ya Ngai ũrĩa wa ma, na atĩ nĩ marĩhingagia biũ maathani mothe ma Jehova Mwathani witũ, matuĩro make, na matua make. 30 Tũtikaneana airĩtu aitũ kũrĩ andũ a bũrũri, na tũtikoya airĩtu ao nĩguo mahikio nĩ ariũ aitũ.+

31 Andũ a bũrũri mangĩrehe indo ciao na irio* cia mĩthemba yothe kwendia mũthenya wa Thabatũ, tũtikagũra kĩndũ o na kĩrĩkũ kuuma kũrĩ o mũthenya wa Thabatũ+ kana mũthenya mwamũre.+ Ningĩ tũtirĩrĩmaga mĩgũnda mwaka wa mũgwanja+ na nĩ tũrĩohanagĩra thiirĩ o wothe.+

32 Ningĩ nĩ twetuĩra ithuĩ ene atĩ o mwaka o mũndũ nĩ arĩrutaga gĩcunjĩ kĩmwe harĩ ithatũ gĩa cekeri* nĩ ũndũ wa ũtungata wa nyũmba* ya Ngai witũ,+ 33 nĩ ũndũ wa mĩgate ya kũiganĩrĩrũo,*+ igongona rĩa mũtu rĩrĩa rĩrutagwo hingo ciothe,+ igongona rĩa njino rĩrĩa rĩrutagwo hingo ciothe rĩa Thabatũ+ na tũrũgamo twa mweri,+ na nĩ ũndũ wa ciathĩ cia mahinda marĩa matuĩtwo,+ nĩ ũndũ wa indo iria nyamũre, na nĩ ũndũ wa magongona ma mehia+ ma kũhumbĩra mehia ma Isiraeli, na nĩ ũndũ wa wĩra wothe wa nyũmba ya Ngai witũ.

34 Ningĩ nĩ tũgũcuka mĩtĩ nĩ ũndũ wa ngũ iria athĩnjĩri-Ngai, Alawii, na andũ acio angĩ magĩrĩirũo kũrehe nyũmba-inĩ ya Ngai witũ kũringana na nyũmba cia maithe maitũ, mahinda marĩa matuĩtwo, mwaka o mwaka, cia gwakanaga kĩgongona-inĩ kĩa Jehova Ngai witũ, kũringana na ũrĩa kwandĩkĩtwo Watho-inĩ.+ 35 Ningĩ mwaka o mwaka nĩ tũrĩrehaga nyũmba-inĩ ya Jehova maciaro ma mbere ma mĩgũnda itũ na matunda ma mbere ma mũtĩ o wothe wa matunda,+ 36 o hamwe na ariũ aitũ a irigithathi na marigithathi ma mahiũ maitũ+—kũringana na ũrĩa kwandĩkĩtwo Watho-inĩ—na marigithathi ma ngʼombe citũ na ma ngʼondu citũ. Nĩ tũrĩcirehaga nyũmba-inĩ ya Ngai witũ, kũrĩ athĩnjĩri-Ngai arĩa matungataga nyũmba-inĩ ya Ngai witũ.+ 37 Ningĩ mũtu witũ wa mbere ũrĩa ũtarĩ mũkonyore,+ mĩhothi itũ, maciaro ma mũtĩ wa mũthemba o wothe,+ ndibei njerũ,* na maguta,+ nĩ twagĩrĩirũo gũcitwara kũrĩ mũthĩnjĩri-Ngai rumu-inĩ cia kũiga indo* nyũmba-inĩ ya Ngai witũ,+ o hamwe na gĩcunjĩ gĩa ikũmi kuuma mĩgũnda-inĩ itũ gĩa gũtwarĩra Alawii,+ tondũ Alawii nĩo macokanagĩrĩria icunjĩ cia ikũmi matũũra-inĩ maitũ mothe marĩa makoragwo na ũrĩmi.

38 Nake mũthĩnjĩri-Ngai, mũrũ wa Haruni, agĩrĩirũo gũkorũo hamwe na Alawii rĩrĩa Alawii maracokanĩrĩria gĩcunjĩ gĩa ikũmi; na Alawii nĩ magĩrĩirũo kũruta gĩcunjĩ gĩa ikũmi kuuma harĩ gĩcunjĩ kĩu gĩa ikũmi matware nyũmba-inĩ ya Ngai witũ,+ rumu-inĩ* cia thitoo. 39 Nĩ gũkorũo rumu-inĩ cia kũiga indo* nĩkuo Aisiraeli na ariũ a Alawii magĩrĩirũo gũtwara mĩhothi+ ĩyo ya irio, ndibei njerũ,* na maguta,+ na kũu nĩkuo indo cia harĩa hatheru irĩ, o hamwe na athĩnjĩri-Ngai arĩa matungataga, arangĩri a ihingo, na aini. Tũtigatiganĩria nyũmba ya Ngai witũ.+

11 Na rĩrĩ, anene a andũ maaikaraga Jerusalemu;+ no andũ acio angĩ magĩcuka mĩtĩ+ nĩguo matware mũndũ ũmwe harĩ andũ ikũmi aikarage Jerusalemu, itũũra rĩrĩa itheru, nao acio angĩ kenda maikarage matũũra-inĩ macio mangĩ. 2 Nao andũ makĩrathima arũme othe arĩa meerutĩire gũikaraga Jerusalemu.

3 Aya nĩo atongoria a gĩcigo kĩa bũrũri arĩa maaikaraga Jerusalemu. (Aisiraeli acio angĩ, athĩnjĩri-Ngai, Alawii, na ndungata cia hekarũ,*+ na ariũ a ndungata cia Suleimani,+ maaikaraga matũũra-inĩ macio mangĩ ma Juda, o mũndũ harĩa aagaĩirũo itũũra-inĩ rĩake.+

4 O na andũ amwe a Juda na a Benjamini maaikaraga Jerusalemu.) Andũ a Juda maarĩ, Athaia mũrũ wa Uzia mũrũ wa Zekaria mũrũ wa Amaria mũrũ wa Shefatia mũrũ wa Mahalaleli mũrũ wa Perezu,+ 5 na Maaseia mũrũ wa Baruku mũrũ wa Kolihoze mũrũ wa Hazaia mũrũ wa Adaia mũrũ wa Joiaribu mũrũ wa Zekaria mũrũ wa Mũshela. 6 Ariũ othe a Perezu arĩa maaikaraga Jerusalemu maarĩ arũme 468 marĩ na ũhoti.

7 Nao andũ a Benjamini maarĩ: Salu+ mũrũ wa Meshulamu mũrũ wa Joedi mũrũ wa Pedaia mũrũ wa Kolaia mũrũ wa Maaseia mũrũ wa Ithieli mũrũ wa Jeshaia, 8 na thutha wake Gabai na Salai, andũ 928; 9 na Joeli mũrũ wa Zikiri nĩwe warĩ mũrori wao, nake Juda mũrũ wa Hasenua nĩwe warĩ mũnini wake itũũra-inĩ rĩu.

10 Kuuma harĩ athĩnjĩri-Ngai haarĩ na: Jedaia mũrũ wa Joiaribu, Jakini,+ 11 Seraia mũrũ wa Hilikia mũrũ wa Meshulamu mũrũ wa Zadoku mũrũ wa Meraiothu mũrũ wa Ahitubu,+ ũrĩa warĩ mũtongoria nyũmba-inĩ* ya Ngai ũrĩa wa ma, 12 na ariũ a ithe wao arĩa maarutire wĩra wa nyũmba ĩyo, maarĩ 822; na Adaia mũrũ wa Jerohamu mũrũ wa Pelalia mũrũ wa Amuzi mũrũ wa Zekaria mũrũ wa Pashuru+ mũrũ wa Malikija, 13 na ariũ a ithe, arĩa maarĩ atongoria a nyũmba cia maithe mao, andũ 242; na Amashusai mũrũ wa Azareli mũrũ wa Ahazai mũrũ wa Meshilemothu mũrũ wa Imeri, 14 na ariũ a ithe wao arĩa maarĩ andũ marĩ hinya, arũme marĩ ũcamba, andũ 128; nake mũrori wao aarĩ Zabedieli, ũrĩa woimĩte famĩlĩ-inĩ ĩrĩ igweta.

15 Kuuma harĩ Alawii haarĩ na: Shemaia+ mũrũ wa Hashubu mũrũ wa Azirikamu mũrũ wa Hashabia mũrũ wa Buni, 16 na Shabethai+ na Jozabadu,+ arĩa maarĩ atongoria gatagatĩ-inĩ ka Alawii, na nĩo maarũgamĩrĩire maũndũ ma nja ma nyũmba ya Ngai ũrĩa wa ma; 17 na Matania,+ mũrũ wa Mika mũrũ wa Zabedi mũrũ wa Asafu,+ ũrĩa watongoragia ũini, na nĩ aatongoragia nyĩmbo hĩndĩ ya mahoya,+ na Bakabukia, ũrĩa warĩ wa kerĩ harĩ ariũ a ithe wao, na Abada mũrũ wa Shamua mũrũ wa Galali mũrũ wa Jeduthuni.+ 18 Alawii othe arĩa maarĩ Itũũra-inĩ rĩu itheru maarĩ 284.

19 Nao arangĩri a ihingo, nĩo Akubu, Talimoni,+ na ariũ a ithe wao arĩa maarangagĩra ihingo, andũ 172.

20 Aisiraeli acio angĩ, athĩnjĩri-Ngai, na Alawii maarĩ matũũra-inĩ macio mangĩ mothe ma Juda, o mũndũ harĩa aagaĩirũo.* 21 Ndungata cia hekarũ*+ ciaikaraga Ofeli,+ na Ziha marĩ hamwe na Gishipa nĩo maarũgamĩrĩire ndungata cia hekarũ.*

22 Mũrori wa Alawii thĩinĩ wa Jerusalemu aarĩ Uzi mũrũ wa Bani mũrũ wa Hashabia mũrũ wa Matania+ mũrũ wa Mika, wa ariũ a Asafu, arĩa maarĩ aini; nĩwe warũgamĩrĩire wĩra wa nyũmba ya Ngai ũrĩa wa ma. 23 Tondũ nĩ kwarĩ na watho ũmegiĩ woimĩte kũrĩ mũthamaki,+ na nĩ haarĩ indo ciaagĩrĩire kũneagwo aini kũringana na mabataro mao ma o mũthenya. 24 Nake Pethahia mũrũ wa Meshezabeli wa ariũ a Zera mũrũ wa Juda nĩwe wataaraga mũthamaki* maũndũ-inĩ mothe megiĩ andũ.

25 Ũhoro-inĩ wĩgiĩ matũũra na ithaka ciamo, andũ amwe a Juda maaikaraga Kiriathu-ariba+ na taũni ciakuo iria ciathiũrũrũkĩirie, Diboni na taũni ciakuo iria ciathiũrũrũkĩirie, Jekabizeeli+ na matũũra makuo, 26 thĩinĩ wa Jeshua, thĩinĩ wa Molada,+ thĩinĩ wa Bethi-peletu,+ 27 thĩinĩ wa Hazaru-shuali,+ thĩinĩ wa Biri-shiba, na taũni ciakuo iria ciathiũrũrũkĩirie, 28 thĩinĩ wa Zikilagi,+ thĩinĩ wa Mekona na taũni ciakuo iria ciathiũrũrũkĩirie, 29 thĩinĩ wa Eni-rimoni,+ thĩinĩ wa Zora,+ na thĩinĩ wa Jaramuthu, 30 thĩinĩ wa Zanoa,+ thĩinĩ wa Adulamu na matũũra makuo, thĩinĩ wa Lakishi,+ na ithaka ciakuo, na thĩinĩ wa Azeka+ na taũni ciakuo iria ciathiũrũrũkĩirie. Magĩikara* kuuma Biri-shiba nginya Mũkuru wa Hinomu.+

31 Nao andũ a Benjamini maarĩ thĩinĩ wa Geba,+ Mikimashi, Aija, Betheli,+ na taũni ciakuo iria ciathiũrũrũkĩirie, 32 Anathothi,+ Nobu,+ Anania, 33 Hazoru, Rama,+ Gitaimu, 34 Hadidi, Zeboimu, Nebalati, 35 Lodi, na Ono,+ mũkuru wa mabundi. 36 Na Alawii amwe a kuuma Juda makĩgaĩrũo Benjamini.

12 Aya nĩo athĩnjĩri-Ngai na Alawii arĩa maambatire hamwe na Zerubabeli+ mũrũ wa Shealitieli+ na Jeshua:+ Seraia, Jeremia, Ezara, 2 Amaria, Maluku, Hatushu, 3 Shekania, Rehumu, Meremothu, 4 Ido, Ginethoi, Abija, 5 Mijamini, Maadia, Biliga, 6 Shemaia, Joiaribu, Jedaia, 7 Salu, Amoku, Hilikia, na Jedaia. Acio nĩo maarĩ atongoria a athĩnjĩri-Ngai na a ariũ a ithe wao matukũ-inĩ ma Jeshua.

8 Nao Alawii maarĩ, Jeshua, Binui, Kadimieli,+ Sherebia, Juda, na Matania,+ ũrĩa watongoragia nyĩmbo cia gũcokia ngatho marĩ hamwe na ariũ a ithe. 9 Nao ariũ a ithe wao, Bakabukia na Uni maarũgamaga mangʼethanĩire nao makĩruta wĩra wao wa kũrangĩra.* 10 Jeshua agĩtuĩka ithe wa Joiakimu, nake Joiakimu agĩtuĩka ithe wa Eliashibu,+ nake Eliashibu agĩtuĩka ithe wa Joiada.+ 11 Nake Joiada agĩtuĩka ithe wa Jonathani, nake Jonathani agĩtuĩka ithe wa Jadua.

12 Matukũ-inĩ ma Joiakimu, aya nĩo maarĩ athĩnjĩri-Ngai, atongoria a nyũmba cia maithe mao: nyũmba ya Seraia,+ nĩ Meraia; nyũmba ya Jeremia, nĩ Hanania; 13 nyũmba ya Ezara,+ nĩ Meshulamu; nyũmba ya Amaria, nĩ Jehohanani; 14 nyũmba ya Maluki, nĩ Jonathani; nyũmba ya Shebania, nĩ Jusufu; 15 nyũmba ya Harimu,+ nĩ Adina; nyũmba ya Meraiothu, nĩ Helikai; 16 nyũmba ya Ido, nĩ Zekaria; nyũmba ya Ginethoni, nĩ Meshulamu; 17 nyũmba ya Abija,+ nĩ Zikiri; nyũmba ya Miniamini, . . . ;* nyũmba ya Moadia, nĩ Pilitai; 18 nyũmba ya Biliga,+ nĩ Shamua; nyũmba ya Shemaia, nĩ Jehonathani; 19 nyũmba ya Joiaribu, nĩ Matenai; nyũmba ya Jedaia,+ nĩ Uzi; 20 nyũmba ya Salai, nĩ Kalai; nyũmba ya Amoku, nĩ Eberi; 21 nyũmba ya Hilikia, nĩ Hashabia; nyũmba ya Jedaia, nĩ Nethaneli.

22 Atongoria a nyũmba cia maithe ma Alawii matukũ-inĩ ma Eliashibu, Joiada, Johanani, na Jadua,+ nĩ maandĩkĩtwo rekondi-inĩ, o hamwe na athĩnjĩri-Ngai, o nginya hĩndĩ ya ũthamaki wa Dario ũrĩa Mũperisia.

23 Alawii arĩa maarĩ atongoria a nyũmba cia maithe mao maandĩkĩtwo ibuku-inĩ rĩa maũndũ ma matukũ macio, o nginya matukũ-inĩ ma Johanani mũrũ wa Eliashibu. 24 Atongoria a Alawii maarĩ, Hashabia, Sherebia, na Jeshua+ mũrũ wa Kadimieli,+ nao ariũ a ithe wao maarũgamaga mangʼethanĩire nao nĩguo magooce na macokie ngatho kũringana na uuge wa Daudi+ mũndũ wa Ngai ũrĩa wa ma, gĩkundi gĩa kũrangĩra gĩkarigania na gĩkundi kĩngĩ gĩa kũrangĩra. 25 Nao Matania,+ Bakabukia, Obadia, Meshulamu, Talimoni, na Akubu+ maarĩ arangĩri a ihingo,+ makarangĩra rumu cia kũiga indo iria ciarĩ hakuhĩ na ihingo. 26 Acio nĩo maatungataga matukũ-inĩ ma Joiakimu mũrũ wa Jeshua+ mũrũ wa Jozadaki na matukũ-inĩ ma Nehemia ũrĩa ngavana na Ezara+ ũrĩa mũthĩnjĩri-Ngai na mwandĩki.*

27 Na hĩndĩ ya kũrugũrio gwa thingo cia Jerusalemu, magĩcaria Alawii kũrĩa guothe maaikaraga makĩmatwara Jerusalemu nĩguo makũngũĩre kũrugũrio gwa thingo icio makenete na nyĩmbo cia gũcokia ngatho,+ na thani iria ihũũrithanagio, inanda cia ndigi, na inanda cia mũgeeto. 28 Nao ariũ a aini* makĩũngana moimĩte gĩcigo-inĩ* kĩu, kuuma matũũra mothe marĩa maathiũrũrũkĩirie Jerusalemu, kuuma matũũra-inĩ ma Anetofathi,+ 29 kuuma Bethi-giligali,+ na kuuma ithaka cia Geba+ na Azamavethu,+ tondũ aini meeyakĩire matũũra kũndũ guothe kũrĩa gwathiũrũrũkĩirie Jerusalemu. 30 Nao athĩnjĩri-Ngai na Alawii magĩĩtheria, na magĩtheria andũ,+ ihingo,+ na rũthingo rũu.+

31 Thutha ũcio ngĩtwara anene a Juda rũthingo-inĩ rũu igũrũ. Ngĩcoka ngĩamũra ikundi igĩrĩ nene cia aini a nyĩmbo cia gũcokia ngatho na ikundi cia kũmarũmĩrĩra, na kĩmwe gĩkĩgerera mwena wa ũrĩo igũrũ rĩa rũthingo rũu kĩerekeire Kĩhingo-inĩ kĩa Hĩba cia Mũhu.+ 32 Hoshaia na nuthu ya anene a Juda magĩthiĩ mamoimĩte thutha, 33 marĩ hamwe na Azaria, Ezara, Meshulamu, 34 Juda, Benjamini, Shemaia, na Jeremia. 35 Maarĩ hamwe na ariũ amwe a athĩnjĩri-Ngai arĩa maarĩ na tũrumbeta:+ Zekaria mũrũ wa Jonathani mũrũ wa Shemaia mũrũ wa Matania mũrũ wa Mikaia mũrũ wa Zakuri mũrũ wa Asafu,+ 36 na ariũ a ithe, Shemaia, Azareli, Milalai, Gilalai, Maai, Nethaneli, Juda, na Hanani, marĩ na indo cia ũini cia Daudi+ mũndũ wa Ngai ũrĩa wa ma; nake Ezara+ ũrĩa mwandĩki* agĩthiĩ arĩ mbere yao. 37 Na Kĩhingo-inĩ gĩa Itherũkĩro+ magĩthiĩ marũngĩrĩirie mahĩtũkĩire igũrũ rĩa Ngathĩ+ ya Itũũra rĩa Daudi+ mwambato-inĩ wa rũthingo igũrũ rĩa Nyũmba ya Daudi o nginya Kĩhingo-inĩ kĩa Maĩ+ mwena wa irathĩro.

38 Nakĩo gĩkundi kĩu kĩngĩ kĩa aini a nyĩmbo cia gũcokia ngatho gĩkĩgerera mwena ũcio ũngĩ,* na ngĩkiuma thutha tũrĩ hamwe na nuthu ya andũ, tũgereire rũthingo igũrũ Nyũmba-inĩ Ndaya na Igũrũ ya Mariiko+ o nginya Rũthingo-inĩ Rũrĩa Rwariĩ,+ 39 na igũrũ rĩa Kĩhingo kĩa Efiraimu+ kũgerera igũrũ rĩa Kĩhingo Kĩrĩa gĩa Tene+ o nginya Kĩhingo-inĩ gĩa Thamaki,+ Nyũmba-inĩ Ndaya na Igũrũ ya Hananeli,+ Nyũmba-inĩ Ndaya na Igũrũ ya Mea, o nginya Kĩhingo-inĩ kĩa Ngʼondu;+ makĩrũgama Kĩhingo-inĩ kĩa Arangĩri.

40 Thutha ũcio ikundi icio cierĩ cia aini a nyĩmbo cia gũcokia ngatho ikĩrũgama mbere ya nyũmba ya Ngai ũrĩa wa ma; na o na niĩ ngĩrũgama tũrĩ hamwe na nuthu ya atongoria, 41 o na athĩnjĩri-Ngai, nĩo Eliakimu, Maaseia, Miniaminu, Mikaia, Elioenai, Zekaria, na Hanania, marĩ na tũrumbeta, 42 na Maaseia, Shemaia, Eliazaru, Uzi, Jehohanani, Malikija, Elamu, na Ezeri. Nao aini makĩina manĩrĩire marũgamĩrĩirũo nĩ Izirahia.

43 Mũthenya ũcio makĩruta magongona maingĩ na magĩkena+ tondũ Ngai ũrĩa wa ma nĩ aatũmĩte macanjamũke marĩ na gĩkeno kĩnene. O na atumia na ciana magĩkena,+ nginya gĩkeno kĩu kĩarĩ Jerusalemu gĩkĩiguĩka kũndũ kũraya.+

44 Na mũthenya ũcio nĩ kwaamũrirũo andũ a kũrũgamĩrĩra nyũmba+ cia kũiga mĩhothi,+ maciaro ma mbere,+ na icunjĩ cia ikũmi.+ Nyũmba icio nĩcio andũ acio maagĩrĩirũo gũtwara indo iria ciarutagwo kuuma mĩgũnda-inĩ ya matũũra iria Watho woigĩte irutagwo+ irĩ cia athĩnjĩri-Ngai na Alawii,+ nĩ gũkorũo nĩ kwarĩ na gĩkeno thĩinĩ wa Juda tondũ wa athĩnjĩri-Ngai na Alawii arĩa maatungataga. 45 Nao makĩambĩrĩria ũtungata wa Ngai wao hamwe na gwĩtheria, na o na aini na arĩa maarangagĩra ihingo makĩambĩrĩria wĩra wao, kũringana na uuge wa Daudi na wa mũrũwe Suleimani. 46 Nĩ gũkorũo tene matukũ-inĩ ma Daudi na Asafu, nĩ gwakoragwo na arũgamĩrĩri* a aini na a kũrũgamĩrĩra nyĩmbo cia kũgooca na cia gũcokeria Ngai ngatho.+ 47 Na matukũ-inĩ ma Zerubabeli+ na matukũ-inĩ ma Nehemia, Aisiraeli othe nĩ maarutire indo iria ciarutagwo kũrĩ aini+ na arĩa maarangagĩra,+ kũringana na mabataro ma o mũthenya. Ningĩ nĩ maamũraga indo iria ciarutagwo nĩ ũndũ wa Alawii,+ nao Alawii makaamũra indo iria ciarutagwo nĩ ũndũ wa njiarũa cia Haruni.

13 Mũthenya ũcio, ibuku rĩa Musa nĩ rĩathomirũo andũ mathikĩrĩirie,+ na gũkĩoneka rĩandĩkĩtwo atĩ gũtirĩ Mũamoni kana Mũmoabi+ waagĩrĩirũo kũingĩra o na rĩ kĩũngano-inĩ kĩa Ngai ũrĩa wa ma,+ 2 tondũ matiigana gũtũnga Aisiraeli na mũgate na maĩ, no handũ ha ũguo maarĩhire Balaamu amarume.+ O na kũrĩ ũguo, Ngai witũ nĩ aagarũrire kĩrumi kĩu gĩgĩtuĩka kĩrathimo.+ 3 Rĩrĩa maiguire Watho ũcio, makĩambĩrĩria kwamũrania andũ othe arĩa maarĩ a kũngĩ* kuuma harĩ Isiraeli.+

4 Mbere ĩyo, Eliashibu+ ũrĩa metainwo na Tobia,+ nĩwe warĩ mũthĩnjĩri-Ngai ũrĩa warũgamĩrĩire rumu cia kũiga indo* cia nyũmba* ya Ngai witũ.+ 5 Nĩ aaheete Tobia rumu nene ya kũiga indo,* ĩrĩa hau kabere yaigagwo igongona rĩa mũtu, ũbani, na indo cia wĩra wa hekarũ na indo iria ciakoragwo irĩ cia Alawii,+ aini, na arangĩri a ihingo, nĩcio gĩcunjĩ gĩa ikũmi kĩa ngano na indo ingĩ ta icio, ndibei njerũ,* na maguta,+ o hamwe na mũhothi wa kũheo athĩnjĩri-Ngai.+

6 Ihinda rĩu rĩothe niĩ ndiarĩ thĩinĩ wa Jerusalemu, tondũ nĩ ndathiĩte kũrĩ mũthamaki mwaka-inĩ wa 32+ wa Mũthamaki Aritashashita+ wa Babuloni; na ihinda rĩna thutha ũcio ngĩhoya mũthamaki rũtha ngorũo itarĩ kuo. 7 Ngĩũka Jerusalemu na ngĩona ũndũ ũcio mũũru Eliashibu+ eekĩte, wa kũhe Tobia+ rumu ya kũiga indo thĩinĩ wa nja ya nyũmba ya Ngai ũrĩa wa ma. 8 Ũndũ ũcio nĩ wandakaririe mũno, kwoguo ngĩruta indo cia Tobia cia nyũmba na ngĩcikia nja ya rumu ĩyo ya kũiga indo.* 9 Thutha ũcio ngĩruta watho, na magĩtheria rumu icio cia kũiga indo;* na ngĩcokia indo cia nyũmba ya Ngai ũrĩa wa ma rumu-inĩ icio,+ hamwe na igongona rĩa mũtu na ũbani.+

10 Ningĩ ngĩmenya atĩ Alawii+ matiaheagwo indo iria maabatiĩ kũheo,+ na nĩ ũndũ ũcio Alawii na aini arĩa maarutaga wĩra nĩ maathiĩte, o mũndũ agathiĩ mũgũnda-inĩ wake.+ 11 Kwoguo ngĩnegenia atongoria+ ngĩmoria atĩrĩ: “Nĩ kĩĩ gĩtũmĩte nyũmba ya Ngai ũrĩa wa ma ĩtiganĩrio?”+ Ningĩ ngĩcokanĩrĩria Alawii na ngĩmacokia wĩra-inĩ wao. 12 Nao andũ othe a Juda makĩrehe icunjĩ cia ikũmi+ cia ngano, ndibei njerũ,* na maguta rumu-inĩ icio cia kũiga indo.+ 13 Ngĩcoka ngĩiga Shelemia ũrĩa mũthĩnjĩri-Ngai, na Zadoku ũrĩa mwandĩki,* na Pedaia ũrĩa Mũlawii marũgamagĩrĩre rumu icio cia kũiga indo, nake Hanani mũrũ wa Zakuri mũrũ wa Matania nĩwe wamateithagĩrĩria, tondũ athuri acio nĩ moonagwo marĩ ehokeku. Nĩo meehokeirũo wĩra wa kũgayagĩra ariũ a ithe wao indo iria marabatara.

14 Ndagũthaitha wee Ngai wakwa ũndirikane+ ũhoro-inĩ ũcio, na ndũkeherie ciĩko ciakwa cia wendo mwĩhokeku iria njĩkĩte nĩ ũndũ wa nyũmba ya Ngai wakwa na mawĩra mayo.*+

15 Matukũ-inĩ macio-rĩ, nĩ ndonire andũ thĩinĩ wa Juda makĩruta wĩra kĩhihĩro-inĩ kĩa ndibei mũthenya wa Thabatũ,+ makarehe ciohe cia ngano na magacigĩrĩra igũrũ rĩa ndigiri, ningĩ makarehe ndibei, thabibũ, ngũyũ, na mĩrigo ya mĩthemba yothe thĩinĩ wa Jerusalemu mũthenya wa Thabatũ.+ Kwoguo ngĩmakaania matige kwendia indo mũthenya ũcio.* 16 Na Aturo arĩa maaikaraga itũũra-inĩ rĩu nĩ maarehaga thamaki na indo cia kwendia cia mĩthemba yothe, magaciendia kũrĩ andũ a Juda na Jerusalemu mũthenya wa Thabatũ.+ 17 Nĩ ũndũ ũcio ngĩnegenia andũ arĩa maarĩ igweta a Juda ngĩmeera atĩrĩ: “Nĩ ũndũ ũrĩkũ ũyũ mũũru mũreka, nginya mũgathahia mũthenya wa Thabatũ?” 18 Na githĩ ũguo tiguo maithe manyu ma tene meekire, magĩtũma Ngai witũ arehe mathĩna maya mothe harĩ ithuĩ o na harĩ itũũra rĩrĩ? Na rĩu nĩ kuongerera mũrongerera marakara mahiũ kwerekera Isiraeli na njĩra ya gũthahia Thabatũ.”+

19 Na rĩrĩ, rĩrĩa kwambĩrĩirie kũgĩa nduma ihingo-inĩ cia Jerusalemu mbere ya Thabatũ, ngiuga mĩrango ĩhingwo. Ningĩ ngĩmeera matikae kũmĩhingũra nginya Thabatũ ĩthire, na ngĩiga ndungata imwe ciakwa ihingo-inĩ nĩgetha hatikagĩe mũrigo ũkũingĩrio mũthenya wa Thabatũ. 20 Kwoguo onjorithia na endia a indo cia mĩthemba yothe makĩraara nja ya Jerusalemu riita rĩmwe kana maita merĩ. 21 Na niĩ ngĩmakaania ngĩmeera atĩrĩ: “Nĩ kĩĩ kĩratũma mũraare mbere ya rũthingo? Mweka ũguo rĩngĩ, ngũmũingata kĩa hinya.” Kuuma hĩndĩ ĩyo matiokire rĩngĩ mũthenya wa Thabatũ.

22 Na ngĩra Alawii atĩ nĩ maagĩrĩirũo gwĩtheria hingo ciothe na magoka kũrangĩra ihingo nĩguo mũthenya wa Thabatũ ũigwo ũrĩ mũtheru.+ Wee Ngai wakwa, ririkana ũndũ ũcio o naguo nĩ ũndũ wakwa, na ũnjiguĩre tha tondũ wee nĩ ũiyũirũo nĩ wendo mwĩhokeku.+

23 Ningĩ matukũ-inĩ macio, nĩ ndonire Ayahudi maahikĩtie* atumia+ Aashidodi,+ Aamoni, na Amoabi.+ 24 Nuthu ya ariũ ao maaragia ­Kĩashidodi na nuthu yao makaria rũthiomi rwa ikundi cia andũ ngũrani, no gũtirĩ o na ũmwe woĩ kwaria rũthiomi rwa Ayahudi. 25 Kwoguo ngĩmanegenia na ngĩmetĩria kĩrumi na ngĩhũũra arũme amwe+ na ngĩmamunya njuĩrĩ ngĩmeera ũũ: “Mwĩhĩtei na Ngai atĩ mũtikaneana airĩtu anyu kũrĩ ariũ ao, na mũtikoya mũirĩtu o na ũmwe wao nĩ ũndũ wa ariũ anyu o na kana nĩ ũndũ wa inyuĩ ene.+ 26 Na githĩ ũndũ ũcio tiguo watũmire Suleimani Mũthamaki wa Isiraeli ehie? Gatagatĩ-inĩ ka ndũrĩrĩ nyingĩ gũtiarĩ mũthamaki ũngĩ take;+ na nĩ eendetwo nĩ Ngai wake,+ na nĩkĩo Ngai aamũtuire mũthamaki wa andũ othe a Isiraeli. No atumia a kũngĩ nĩ maatũmire ehie.+ 27 Na githĩ ti ũndũ ũtangĩĩcirĩrio atĩ inyuĩ nĩ mwĩkĩte ũndũ ũyũ mũũru mũkaga wĩhokeku harĩ Ngai witũ na njĩra ya kũhikia atumia a kũngĩ?”+

28 Mũriũ ũmwe wa Joiada+ mũrũ wa Eliashibu+ mũthĩnjĩri-Ngai ũrĩa mũnene nĩ aatuĩkĩte mũthoniwe wa Sanibalati+ ũrĩa Mũhoroni. Nĩ ũndũ ũcio ngĩmũingata oime harĩ niĩ.

29 Wee Ngai wakwa, maririkane nĩ gũkorũo nĩ mathahĩtie ũthĩnjĩri-Ngai na magathahia kĩrĩkanĩro kĩa athĩnjĩri-Ngai+ na Alawii.+

30 Ningĩ ngĩmatheria kuumana na thahu o wothe wa andũ a kũngĩ, na ngĩhe athĩnjĩri-Ngai na Alawii wĩra, o mũndũ ũtungata-inĩ wake,+ 31 na ngĩbanga ũrĩa ngũ irĩrehagwo+ mahinda marĩa matuĩtwo o hamwe na maciaro ma mbere.

Ndagũthaitha wee Ngai wakwa ũndirikane na ũnjĩke wega.+