Regana na Ndini ya Maheeni na Ũrũmĩrĩre Ndini ya Ma

1. Nĩ itua rĩrĩkũ arĩ o mũhaka andũ matue rĩgiĩ ũthathaiya?

JESU ooigire ũũ: “Ũrĩa wothe ũtarĩ mwena wakwa nĩ kũregana areganaga na niĩ.” (Mathayo 12:30) Angĩkorũo tũtirĩ mwena wa Jehova, tũrĩ mwena wa Shaitani. Andũ aingĩ meciragia atĩ matungatagĩra Ngai na njĩra ĩrĩa endaga, no Bibilia yugaga atĩ Shaitani nĩwe “ũhĩtithagia thĩ yothe ĩrĩa ĩikaragwo.” (Kũguũrĩrio 12:9) Andũ milioni nyingĩ metĩkĩtie atĩ mathathayagia Ngai, no ma nĩ atĩ matungatagĩra Shaitani ũrĩa Mũcukani! Ũmũthĩ andũ no mũhaka matue itua: No mũhaka mathuure kana megũtungatĩra Jehova, “Ngai wa ũhoro wa ma,” kana Shaitani, “ithe wa maheeni.”—Thaburi 31:5; Johana 8:44.

Uma Ndini-inĩ ya Maheeni

2. Nĩ njĩra ĩrĩkũ ĩmwe Shaitani ahũthagĩra kũgeria kũgirĩrĩria andũ mathathaiye Jehova?

² Gũthuura gũtungatĩra Jehova nĩrĩo itua rĩa ũũgĩ, na nĩ rĩtũmaga mũndũ etĩkĩrĩke nĩ Ngai. No Shaitani ndakenagio nĩ mũndũ wothe ũtungatagĩra Ngai, na nĩ ũndũ ũcio nĩ arehaga mathĩna kũrĩ arĩa matungatagĩra Ngai. Njĩra ĩmwe ekaga ũguo nĩ kũhũthĩra andũ angĩ nginya arata na andũ a famĩlĩ kũnyũrũria na gũkararia arĩa matungatagĩra Ngai. Jesu aaheanire mũkaana ũyũ: “Thũ cia mũndũ igaakorũo irĩ andũ a nyũmba yake mwene.”—Mathayo 10:36.

3. Ũngĩka atĩa andũ a famĩlĩ yanyu kana arata mangĩgũkararia nĩ ũndũ wa ũthathaiya waku?

³ Hihi wee ũngĩka atĩa ũngĩcemania na ũndũ ta ũcio? Andũ aingĩ nĩ moĩ atĩ njĩra yao ya ũthathaiya ndĩagĩrĩire, no makaga gũtua itua rĩa gũtigana nayo. Monaga gũtiga ũthathaiya ũcio ta arĩ kwaga kwĩhokeka harĩ famĩlĩ yao. No hihi nĩ wega gwĩciria ũguo? Ũngĩmenya atĩ harĩ andũ a famĩlĩ marahũthĩra ndawa cia kũrebia-rĩ, na githĩ to ũmeere atĩ ndawa icio nĩ ikũmathũkia? Ndũngĩnyitanĩra nao harĩ kũhũthĩra ndawa icio.

4. Joshua eerire Aisiraeli a matukũ make atĩa ũhoro-inĩ wĩgiĩ ũthathaiya?

⁴ Joshua eerire Aisiraeli matigane na mĩtugo ĩtaagĩrĩire ya ndini na ũndũire wa maithe mao ma tene. Aameerire ũũ: “Mwĩtigĩrei Jehova na mũmũtungatagĩre mũrĩ na wĩkindĩru na wĩhokeku, na mweherie ngai iria maithe manyu ma tene maatungatagĩra mwena ũrĩa ũngĩ wa Rũũĩ na thĩinĩ wa Misiri, na mũtungatagĩre Jehova.” (Joshua 24:14) Joshua aarĩ mwĩhokeku harĩ Ngai, na Jehova nĩ aamũrathimire. O na ithuĩ tũngĩkorũo tũrĩ ehokeku harĩ Jehova, nĩ arĩtũrathimaga.—2 Samueli 22:26.

Eheria Indo Iria Ihũthagĩrũo Ũthathaiya-inĩ wa Maheeni

5. Twagĩrĩirũo kweheria indo ciothe cia ũgo na ũragũri nĩkĩ?

⁵ Kũregana na ndini ya maheeni ningĩ nĩ kuuga atĩ no mũhaka twanange indo ciothe cia ũragũri iria tũngĩkorũo nacio, ta ithitũ, icũhĩ na mĩgathĩ ya ũgo, na indo ingĩ ta icio. Ũndũ ũcio nĩ wa bata tondũ nĩ wonanagia atĩ tũigĩte mwĩhoko witũ wothe harĩ Jehova.

6. Akristiano a karine ya mbere meekire atĩa na mabuku mao ma ũragũri?

⁶ Ta wĩcirie ũrĩa Akristiano amwe a karine ya mbere meekire rĩrĩa maatuire itua rĩa kũrũmĩrĩra ndini ya ma. Bibilia yugaga ũũ: “Andũ aingĩ arĩa meekaga maũndũ na hinya wa ũragũri magĩcokanĩrĩria mabuku mao na makĩmacina andũ othe makĩĩyonagĩra.”—Atũmwo 19:19.

7. Tũngĩka atĩa tũngĩthumbũrũo nĩ ndaimono?

⁷ Andũ amwe arĩa mambagĩrĩria gũtungatĩra Jehova no nĩ mareingĩrĩtie maũndũ-inĩ ma ũgo, ũrogi na ũragũri no mathumbũrũo nĩ ndaimono. Ũngĩcemania na ũndũ ta ũcio kaĩra Jehova na mũgambo mũnene mahoya-inĩ, ũkĩhũthagĩra rĩĩtwa rĩake. Nĩ egũgũteithia.—Thimo 18:10; Jakubu 4:7.

8. Akristiano makoragwo na mawoni marĩkũ igũrũ rĩgiĩ mĩhianano, na mbica iria ihũthagĩrũo ũthathaiya-inĩ wa maheeni?

⁸ Arĩa marenda gũtungatĩra Jehova matiagĩrĩirũo kũiga kana kũhũthĩra mĩhianano, kana mbica iria ihũthagĩrũo ũthathaiya-inĩ wa maheeni. Akristiano a ma mathiaga na “wĩtĩkio no ti na kuona.” (2 Akorintho 5:7) Nĩ matĩĩte watho wa Ngai ũrĩa ũgirĩtie kũhũthĩra mĩhianano o yothe ũthathaiya-inĩ.—Thama 20:4, 5.

Nyitanĩra na Andũ a Jehova

9. Bibilia ĩheanĩte ũtaaro ũrĩkũ igũrũ rĩgiĩ gũkorũo tũrĩ andũ ogĩ?

⁹ Bibilia yugaga ũũ: “Mũndũ ũrĩa ũtwaranaga na andũ arĩa ogĩ nĩ arĩũhĩgaga.” (Thimo 13:20) Angĩkorũo nĩ tũkwenda gũkorũo tũrĩ andũ ogĩ, twagĩrĩirũo gũtwaranaga kana kũnyitanĩra na Aira a Jehova. Nĩo andũ arĩa maragerera njĩra ĩrĩa yerekagĩria andũ muoyo-inĩ.—Mathayo 7:14.

10. Aira a Jehova mangĩgũteithia atĩa gũtungatĩra Ngai?

¹⁰ Aira a Jehova nĩ marũmbũyagia andũ arĩa angĩ. Wĩra wao nĩ gũteithia andũ arĩa marĩ na ngoro njega mataũkĩrũo nĩ ma ya Bibilia ĩrĩa yerekagĩria andũ muoyo-inĩ wa tene na tene. No magũteithie na njĩra ya kwĩruta Bibilia hamwe nawe hatarĩ marĩhi. Nĩ megũgũcokeria ciũria ciaku na makuonie ũrĩa ũngĩhũthĩra ũũgĩ wa Bibilia ũtũũro-inĩ waku.—Johana 17:3.

11. Mĩcemanio ya Gĩkristiano ĩngĩgũteithia atĩa?

¹¹ No wĩrute makĩria ũhoro wĩgiĩ njĩra cia Jehova mĩcemanio-inĩ yao, ĩrĩa ĩkagĩrũo Nyũmba-inĩ ya Ũthamaki. Ũndũ ũcio no wĩkĩre hinya itua rĩaku rĩa kũrũmĩrĩra ndini ĩrĩa ya ma. Ningĩ no ũmenyerio ũrĩa ũngĩteithia andũ angĩ kwĩruta ũhoro wĩgiĩ ma cia Bibilia.—Ahibirania 10:24, 25.

12. Mahoya mangĩgũteithia atĩa gũtungatĩra Ngai?

¹² O ũrĩa ũgũthiĩ na mbere kwĩruta igũrũ rĩgiĩ wendi na muoroto wa Jehova, noguo ũgũthiĩ na mbere gũtaũkĩrũo nĩ njĩra ciake iria cionanagia nĩ atwendete. Ningĩ nĩ ũgũkũria wendi wa gwĩka maũndũ marĩa mamũkenagia na gwĩthema maũndũ marĩa matamũkenagia. Ririkana atĩ no ũhoe Jehova agũteithie gwĩka maũndũ marĩa magĩrĩire na gwĩthema maũndũ marĩa matagĩrĩire.—1 Akorintho 6:9, 10; Afilipi 4:6.

13. Ũngĩkenia ngoro ya Jehova atĩa?

¹³ O ũrĩa ũgũthiĩ ũgĩkũraga kĩĩroho, hatarĩ nganja nĩ ũrĩona bata wa gũtua itua rĩa kwĩyamũrĩra Ngai na ũbatithio ũtuĩke Mũira wa Jehova. Ũngĩnyitanĩra na andũ a Jehova, nĩ ũgũkenia ngoro yake. (Thimo 27:11) Ũrĩkoragwo gatagatĩ-inĩ ka andũ marĩ gĩkeno arĩa Ngai oigĩte ũũ igũrũ rĩao: “Nĩ ndĩikaranagia nao na thiage ndĩ gatagatĩ-inĩ kao, na nĩ ngaatuĩka Ngai wao, nao matuĩke andũ akwa.”—2 Akorintho 6:16.