ITHOMO RĨA 13

Ũrĩa Ndini cia Maheeni Ciagagĩra Ngai Gĩtĩo

Rĩrĩa Icabe

Angĩkorũo Ngai nĩ wendo-rĩ, nĩ kĩĩ gĩtũmĩte gũkorũo na ciĩko nyingĩ ũguo njũru ciĩkĩtwo nĩ ndini iria ciugaga atĩ ihunjagia ũhoro wĩgiĩ Ngai? Tondũ ndini icio nĩ cia maheeni; maũndũ marĩa ciĩkaga na ikarutana nĩ magagĩra Ngai gĩtĩo. Imwagagĩra gĩtĩo na njĩra ĩrĩkũ? Ngai aiguaga atĩa igũrũ rĩgiĩ ũndũ ũcio? Na nĩ ikinya rĩrĩkũ akooya?

1. Ndini cia maheeni ciagagĩra Ngai gĩtĩo atĩa kũgerera maũndũ marĩa irutanaga?

Ndini cia maheeni nĩ “[ikũũranĩtie] ũhoro wa ma wa Ngai na maheeni.” (Aroma 1:25) Kwa ngerekano, ndini nyingĩ itirutĩte arũmĩrĩri a cio rĩĩtwa rĩa Ngai. No Bibilia ĩrutanaga atĩ no mũhaka tũhũthagĩre rĩĩtwa rĩa Ngai. (Aroma 10:13, 14) Rĩrĩa ũndũ mũũru wekĩka, atongoria amwe a ndini moigaga atĩ nĩ wendi wa Ngai. No ũcio ti ũhoro wa ma. Ngai ndarĩ atuĩka kĩhumo kĩa maũndũ moru. (Thoma Jakubu 1:13.) Ũndũ wa kĩeha nĩ atĩ maheeni marĩa marutanagwo nĩ ndini nĩ matũmĩte andũ maremwo nĩ kwenda Ngai.

**2. Ndini cia maheeni ciagagĩra Ngai gĩtĩo atĩa kũgerera ciĩko ciacio?**

Ndini cia maheeni itirũmbũyanagia na andũ ta ũrĩa Jehova arũmbũyanagia na andũ. Bibilia yugaga atĩ “mehia [ma ndini cia maheeni] meiganĩrĩire magakinya o nginya igũrũ.” (Kũguũrĩrio 18:5) Kwa ihinda rĩa mĩaka mĩingĩ, ndini ikoretwo ikĩĩingĩria maũndũ-inĩ ma kĩũteti, ikanyita mbaara mbaru, na igatũma gũkorũo na ikuũ cia andũ aingĩ. Atongoria amwe a ndini mendaga kũgĩa na ũtonga mũnene, kwoguo metagia arũmĩrĩri ao mbeca. Ciĩko icio ironania atĩ atongoria acio a ndini matiũĩ Ngai, na o na matiagĩrĩirũo kwĩĩtania nake.—Thoma 1 Johana 4:8.

3. Ngai aiguaga atĩa igũrũ rĩgiĩ ndini cia maheeni?

Angĩkorũo wee nĩ ũrakaragio nĩ maũndũ marĩa mekagwo nĩ ndini cia maheeni-rĩ, ũkuona ta Jehova aiguaga atĩa? Nĩ endete andũ, no nĩ arakaragio nĩ atongoria a ndini arĩa mamwagagĩra gĩtĩo na mageeka arũmĩrĩri ao maũndũ moru. Eranĩire atĩ ndini cia maheeni nĩ ikaaniinwo na “[itigaacoka] kuoneka rĩngĩ.” (Kũguũrĩrio 18:21) Ica ikuhĩ Ngai nĩ ekũniina ndini ciothe cia maheeni.—Kũguũrĩrio 18:8.

THUTHURIA MAKĨRIA

Reke tũthuthurie makĩria ũrĩa Ngai aiguaga igũrũ rĩgiĩ ndini cia maheeni. Ningĩ nĩ tũkwĩruta makĩria tuone maũndũ mangĩ ciĩkĩte na tuone nĩkĩ maũndũ macio matiagĩrĩire gũtũma ũtige kwĩruta ũhoro wĩgiĩ Jehova.

4. Ngai ndetĩkagĩra ndini ciothe

Andũ aingĩ metĩkĩtie atĩ ndini nĩ ta njĩra ngũrani na ciothe itongoragia andũ harĩ Ngai. No hihi ũcio nĩ ũhoro wa ma? Thomai Mathayo 7:13, 14, mũcoke mwarĩrĩrie kĩũria gĩkĩ:

Bibilia yugĩte atĩa igũrũ rĩgiĩ njĩra ĩrĩa ĩtongoragia andũ muoyo-inĩ?

Mwĩrorerei VIDEO ĩno, mũcoke mwarĩrĩrie kĩũria kĩrĩa kĩrũmĩrĩire.

VIDEO: Hihi Ngai Etĩkagĩra Ũthathaiya O Wothe?—Gacunjĩ ka Video (3:22)

Hihi Bibilia ĩrutanaga atĩ nĩ kũrĩ ndini nyingĩ iria ikenagia Ngai?

5. Ndini cia maheeni itiĩgerekanagia na Ngai harĩ kuonania wendo

Ndini nĩ ciagĩire Ngai gĩtĩo na njĩra nyingĩ. Njĩra ĩmwe nene nĩ kũgerera kwĩingĩria mbaara-inĩ. Nĩguo muone ngerekano ĩmwe ya ũndũ ũcio, mwĩrorerei VIDEO ĩno, mũcoke mwarĩrĩrie ciũria iria irũmĩrĩire.

VIDEO: Itemi rĩa Kanitha Thĩinĩ wa Mbaara ya Kerĩ ya Thĩ (2:22)

Ndini nyingĩ ciekire atĩa hĩndĩ ya Mbaara ya Kerĩ ya Thĩ?
Wee ũkuona atĩa ũndũ ũcio ciekire?

Thomai Johana 13:34, 35 na 17:16, mũcoke mwarĩrĩrie ciũria ici:

Ũkuona ta Jehova aiguaga atĩa rĩrĩa ndini cieingĩria mbaara-inĩ?
Ndini cia maheeni nĩ itũmĩte gũkorũo na maũndũ maingĩ mũno moru. Nĩ maũndũ-inĩ ta marĩkũ wonete ndini ikĩaga kwĩgerekania na Ngai harĩ kuonania wendo?

Mbica irĩ hamwe: Mbica ya kanitha, na mbica ingĩ ironania ũrĩa ndini cia maheeni ikoretwo ikĩĩingĩria mbaara-inĩ kwa ihinda rĩa mĩaka mĩingĩ. 1. Akristiano kũrũa na Aithĩramu thĩinĩ wa Palestina. 2. Mbaara ya Mbere ya Thĩ. 3. Mũhunjia wa Kanitha wa Orthodox akĩrathima mũthigari. 4. Mũhunjia ũmwe kuuma Afrika agĩcogera mbaara cia gĩĩkabira. 5. Thigari cia bũrũri wa Japan igĩthathaiya mũthamaki. — Ndini cia maheeni itiĩgerekanagia na Ngai harĩ kuonania wendo

6. Ngai nĩ endaga gũteithia andũ moime ndini-inĩ cia maheeni

Thomai Kũguũrĩrio 18:4,a mũcoke mwarĩrĩrie kĩũria gĩkĩ:

Kũmenya atĩ Ngai nĩ endaga gũteithia andũ arĩa mahĩtithĩtio nĩ ndini cia maheeni kũratũma ũigue atĩa?

7. Thiĩ na mbere kwĩruta ũhoro wĩgiĩ Ngai ũrĩa wa ma

Hihi maũndũ moru marĩa ndini cia maheeni ciugaga na igeka nĩ magĩrĩire gũtũma ũtige kwenda Ngai? Ta wĩcirie ũhoro wa mwanake ũregete gwathĩkĩra ithe. Akoima mũciĩ na ageka maũndũ moru mũno. Ithe ndarakenio nĩ ciĩko icio cia mwanake wake. Nĩkĩ ti ũndũ wa kĩhooto gũcokereria ithe mahĩtia nĩ ũndũ wa ũremi wa mũrũwe?

Hihi no ũkorũo ũrĩ ũndũ wa kĩhooto gũcokereria Jehova mahĩtia na gũtiga kwĩruta ũhoro wake nĩ ũndũ wa ciĩko cia ndini cia maheeni?

ANDŨ AMWE MOIGAGA: “Niĩ ndiendaga ũhoro wa Ngai tondũ ndini nĩ itũmĩte gũkorũo na mathĩna maingĩ mũno.”

Hihi wee nĩguo ũiguaga?
Nĩkĩ ciĩko cia ndini cia maheeni itiagĩrĩire gũtũma ũtige kwenda Jehova?

ŨRĨA TWERUTA

Ndini cia maheeni nĩ ciagĩire Ngai gĩtĩo kũgerera maũndũ ma maheeni marĩa irutanaga na ciĩko ciacio njũru. Ngai nĩ arĩniina ndini cia maheeni.

Ciũria cia gũcokera

Ũrona atĩa maũndũ marĩa ndini cia maheeni irutanaga na maũndũ marĩa ciĩkaga?
Ngai aiguaga atĩa igũrũ rĩgiĩ ndini cia maheeni?
Ngai akoera ndini cia maheeni ikinya rĩrĩkũ?

Ndarĩkia ithomo rĩrĩ tarĩki:

Geria gwĩka ũũ

Hĩndĩ ya mũcemanio wa kĩũngano ũrĩa ũkũrũmĩrĩra, ũria mũndũ ũmwe kĩũria gĩkĩ, “Watuĩkire Mũira wa Jehova nĩkĩ?”

Ũndũ ũngĩ ũngĩka:

Ũndũ ũngĩ ũngĩgeria gwĩka

RIKĨRA

Wĩrute maũndũ merĩ ndini nyingĩ ciĩkaga marĩa marakaragia Ngai.

“Hihi Ndini Ciothe nĩ Ihaanaine? Hihi Ciothe Cierekagĩria Andũ Kũrĩ Ngai?” (Gĩcunjĩ thĩinĩ wa jw.org/ki)

Jehova endaga tũmũthathaiye tũrĩ hamwe na andũ arĩa angĩ nĩkĩ?

“Hihi no Mũhaka Mũndũ Akorũo Arĩ wa Ndini?” (Gĩcunjĩ thĩinĩ wa jw.org/ki)

Batĩrĩ ũmwe ndaakenagio nĩ kanitha yao, no ũndũ ũcio ndwamũgirĩrĩirie kwĩruta ũhoro wa ma wĩgiĩ Ngai.

“Kĩrĩa Gĩatũmire Batĩrĩ Oime Ndini Ĩrĩa Aarĩ” (Arahũkai!, Ĩpuro 2015)

Kwa ihinda rĩa mĩaka mĩingĩ, ndini ikoretwo ikĩrutana maũndũ ma maheeni marĩa matũmĩte andũ mone Ngai ta atamarũmbũyagia na ta atarĩ tha. Wĩrute ũhoro wa ma wĩgiĩ maheeni matatũ marĩa irutanaga.

“Maheeni Mamwe Marutanagwo Megiĩ Ngai” (Mũrangĩri, Novemba 1, 2013)

a Nĩguo wone kĩrĩa gĩtũmĩte ndini cia maheeni iringithanio na mũtumia ũrĩa wĩtagwo Babuloni Ũrĩa Mũnene thĩinĩ wa ibuku rĩa Kũguũrĩrio, rora Kohoro ka 1 Mũico-inĩ wa Ibuku.