Jesu Mũthĩnjĩri-Ngai Witũ Mũnene nĩ arĩ Tha

1-2. (a) Jehova aatũmire Mũrũwe gũkũ thĩ nĩkĩ? (b) Nĩ kĩĩ tũkwarĩrĩria gĩcunjĩ-inĩ gĩkĩ? (Ahibirania 5:​7-9)

KĨNDŨ mĩaka 2,000 mĩhĩtũku, Jehova nĩ aatũmire Mũrũ wake endete mũno gũkũ thĩ. Ũndũ ũmwe watũmire oke gũkũ thĩ nĩ gũkũũra andũ kuumana na mehia na gĩkuũ na kweheria mathĩna marĩa maarehirũo nĩ Shaitani. (Joh. 3:16; 1 Joh. 3:8) Ningĩ Jehova nĩ aamenyaga atĩ maũndũ marĩa Jesu angĩagereire gũkũ thĩ nĩ mangĩamũteithirie gũtuĩka Mũthĩnjĩri-Ngai Mũnene ũrĩ na tha, ũrataũkĩrũo nĩ maũndũ marĩa tũragerera, na ũrĩ na ũcayanĩri. Jesu aatuĩkire Mũthĩnjĩri-Ngai Ũrĩa Mũnene thutha wa kũbatithio, mwaka wa 29 M.M.a

² Gĩcunjĩ-inĩ gĩkĩ, nĩ tũkwarĩrĩria ũrĩa ũtũũro wa Jesu gũkũ thĩ wamũteithirie kwagĩrĩra makĩria gũtuĩka Mũthĩnjĩri-Ngai Mũnene ũrĩ na tha. Tũngĩtaũkĩrũo wega nĩ ũrĩa Jesu ‘aatuirũo mũkinyanĩru’ wĩra-inĩ ũcio, no ũkorũo ũrĩ ũndũ mũhũthũ kũhoya Jehova na kũmũkuhĩrĩria, o na rĩrĩa tũkuĩte ngoro nĩ ũndũ wa mehia kana mawathe maitũ.—Thoma Ahibirania 5:​7-9.

MŨRŨ WA NGAI GŨKA GŨKŨ THĨ

3-4. Ũtũũro wa Jesu wacenjirie atĩa oka gũkũ thĩ?

³ Aingĩ aitũ twanacemania na mogarũrũku ũtũũro-inĩ, ta gũthaama kũrĩa tũikaraga tũgatiga arata na andũ aitũ a famĩlĩ. Mogarũrũku ta macio matikoragwo marĩ mahũthũ. No gũtirĩ mũndũ ũrĩ wacemania na mogarũrũku manene ta Jesu. Nĩwe warĩ mũraika ũrĩ na gaturũa kanene kũrĩa igũrũ. Nĩ eendetwo mũno nĩ Jehova na nĩ aakenagĩra kũrutithania wĩra na Ithe arĩ “guoko-inĩ [gwake] kwa ũrĩo.” (Thab. 16:11; Thim. 8:30) No o ta ũrĩa Afilipi 2:7 yonanagia, nĩ “aatiganire na kĩrĩa gĩothe aarĩ nakĩo” kũrĩa igũrũ eyendeire, na agĩũka gũkũ thĩ gũtũũrania na andũ matarĩ akinyanĩru.

⁴ Ningĩ ta wĩcirie ũtũũro wa Jesu arĩ mũnini. Jesu aaciarĩirũo famĩlĩ-inĩ ya andũ maarĩ athĩni. Tũmenyaga ũguo tondũ wa igongona rĩrĩa aciari ake maarutire rĩrĩa aaciarirũo. (Alaw. 12:8; Luk. 2:24) Na rĩrĩa Mũthamaki Herode aamenyire atĩ Jesu nĩ mũciare, nĩ aageririe kũmũũraga. Nĩguo aciari ake mamũgitĩre, nĩ moorĩire Misiri kwa ihinda. (Mat. 2:​13, 15) Hatarĩ nganja ũtũũro wa Jesu gũkũ thĩ warĩ ngũrani mũno na ũrĩa aarĩ naguo kũrĩa igũrũ.

5. Nĩ ũndũ ũrĩkũ Jesu eeyoneire gũkũ thĩ, na maũndũ marĩa aagereire maamũhaarĩirie atĩa gũtuĩka Mũthĩnjĩri-Ngai Ũrĩa Mũnene? (Ningĩ rora mbica.)

⁵ Jesu arĩ gũkũ thĩ nĩ eeyonagĩra mathĩna marĩa andũ maageragĩra. Nĩ aataũkĩirũo ũrĩa andũ maiguaga rĩrĩa makuĩrũo nĩ endwa ao, tondũ no gũkorũo nĩ aakuĩrĩirũo nĩ andũ a hakuhĩ, ta hihi Jusufu ũrĩa warĩ ithe mũmũreri. Ningĩ hĩndĩ ya ũtungata wake, nĩ aacemanagia na andũ arwaru ta mũrimũ wa mangũ, atumumu, andũ marĩ na wonje, kana makuĩrĩirũo nĩ ciana ciao, na nĩ aamacayagĩra mũno. (Mat. 9:​2, 6; 15:30; 20:34; Mar. 1:​40, 41; Luk. 7:13) O na gũtuĩka Jesu arĩ kũrĩa igũrũ nĩ oonaga andũ magĩthĩnĩka, arĩ gũkũ thĩ nĩ aahotire kwĩyonera wega mathĩna marĩa andũ mageragĩra. (Isa. 53:4) Maũndũ marĩa Jesu aagereire nĩ maamũteithirie gũtaũkĩrũo nĩ moritũ marĩa andũ macemanagia namo na ruo rũrĩa mageragĩra. Na tondũ Jesu aahaanaga ta andũ arĩa angĩ, o nake nĩ aanyitagwo nĩ kĩeha, agakorũo na mĩtangĩko na akanoga.

JESU NĨ AAIGUAGĨRA ANDŨ THA

6. Ngerekano iria mũnabii Isaia aahũthĩrire itũrutaga atĩa igũrũ rĩgiĩ tha na ũcayanĩri wa Jesu? (Isaia 42:3)

⁶ Ũtungata-inĩ wake wothe, Jesu nĩ oonanagia tha nyingĩ kwerekera andũ arĩa moonagwo matarĩ kĩene. Na rĩrĩa eekire ũguo nĩ aahingirie ũrathi. Maandĩko-inĩ ma Kĩhibirania, andũ arĩa marĩ na hinya rĩmwe nĩ maringithanagio na mũgũnda mũnoru kana mĩtĩ mĩnene ĩrĩ na hinya. (Thab. 92:12; Isa. 61:3; Jer. 31:12) No andũ arĩa athĩni na arĩa monagwo matarĩ kĩene maringithanagio na ithanjĩ igonyoku na rũtambĩ rũratoga. (Thoma Isaia 42:3.) Mũnabii Isaia atongoretio nĩ roho nĩ aahũthĩrire ngerekano icio kũratha atĩ Jesu nĩ angĩkonania wendo na tha harĩ andũ arĩa moonagwo matarĩ kĩene.

7-8. Jesu aahingirie atĩa ũrathi wa Isaia?

⁷ Mathayo nĩ oonanirie atĩ Jesu nĩ aahingirie ũrathi wa mũnabii Isaia rĩrĩa aandĩkire ũũ: ‘Ndakoina ithanjĩ igonyoku, na ndakaahoria rũtambĩ rũratoga.’ (Mat. 12:20) Jesu nĩ aaringire ciama nyingĩ nĩguo ateithie arĩa moonagwo matarĩ kĩene na arĩa mataarĩ na mwĩhoko, arĩa maaiguaga matariĩ ta ithanjĩ igonyoku kana rũtambĩ rũratoga rũkiriĩ kũhora. Kwa ngerekano, nĩ aahonirie mũndũ ũmwe waiyũrĩtwo nĩ mangũ. No gũkorũo mũndũ ũcio ndaarĩ na mwĩhoko wa kũhona kana wa gũkorũo hamwe na arata na andũ ao a famĩlĩ rĩngĩ. (Luk. 5:​12, 13) Ningĩ nĩ aahonirie mũndũ ũtaahotaga kũigua na kwaria wega. Ta wĩcirie ũrĩa mũndũ ũcio angĩkorũo aaiguaga ona andũ makĩaranĩria ategũtaũkĩrũo nĩ ũrĩa marauga. (Mar. 7:​32, 33) Jesu nĩ aaringire ciama ingĩ nyingĩ.

⁸ Matukũ-inĩ ma Jesu, Ayahudi aingĩ meetĩkĩtie atĩ andũ arĩa maakoragwo na mathĩna ma mwĩrĩ nĩ kũherithio maaherithagio nĩ ũndũ wa mehia mao kana ma aciari ao. (Joh. 9:2) Nĩ ũndũ wa wĩtĩkio ũcio mũhĩtanu, andũ ta acio nĩ meekagwo maũndũ maatũmaga maigue matarĩ kĩene. No o ta ũrĩa Isaia aarathĩte, Jesu nĩ aamahonagia na akamateithia kũmenya atĩ Ngai nĩ aamarũmbũyagia. Ũndũ ũcio ũratũruta atĩa igũrũ rĩgiĩ Jesu?

9. Rĩandĩko rĩa Ahibirania 4:​15, 16 rĩonanagia atĩa atĩ Mũthĩnjĩri-Ngai Witũ Ũrĩa Mũnene nĩ aiguagĩra tha andũ matarĩ akinyanĩru?

⁹ Thoma Ahibirania 4:​15, 16. No tũkorũo na ma atĩ hingo ciothe Jesu nĩ arĩtũiguagĩra tha. Hihi ũguo nĩ kuuga atĩa? Mũndũ ũrĩ na tha nĩ aiguaga ũũru ona mũndũ ũngĩ agĩthĩnĩka. Kiugo gĩa Kĩngiriki kĩrĩa gĩtaũrĩtwo “kũigua tha” kiugĩte kwĩĩkĩra iratũ-inĩ cia mũndũ ũngĩ. Ciama iria Jesu aaringire nĩ cionanagia ũrĩa aaiguaga ona andũ magĩthĩnĩka. Ndaahonagia andũ no ũndũ wa kũigua arĩ na ũigĩrĩrĩki wa gwĩka ũguo. Ĩndĩ eekaga ũguo tondũ nĩ aamarũmbũyagia mũno na nĩ eendaga kũmateithia. Kwa ngerekano, Jesu nĩ angĩahonirie mũndũ ũcio warĩ na mangũ arĩ o haraihu, no nĩ aamũkuhĩrĩirie na akĩmũhutia. No kũhoteke mũndũ ũcio nĩ aaikarĩte mĩaka mĩingĩ atahutĩtio nĩ mũndũ. Na rĩrĩa aahonagia mũndũ ũrĩa ũtaahotaga kũigua, nĩ oonanirie atĩ nĩ aramwĩciria na njĩra ya kũmũtwara keheri-inĩ handũ hataarĩ na inegene. Ningĩ ta wĩcirie ũrĩa gwathiire harĩ mũtumia ũmwe werirĩte ũrĩa wathambirie Jesu magũrũ na maithori make. Mũfarisai ũmwe nĩ aaririe ciugo cia kũnyarara mũtumia ũcio, no Jesu nĩ aamũteteire o rĩo. (Mat. 8:3; Mar. 7:33; Luk. 7:44) Jesu ndeyamũranagia na arĩa maarĩ na mathĩna ma mwĩrĩ kana arĩa meekĩte mehia maritũ. Handũ ha ũguo, nĩ aamamũkagĩra na akamonia wendo. No tũkorũo na ma atĩ ũguo noguo atuonagia tha.

NĨ TWĨGEREKANAGIA NA MŨTHĨNJĨRI-NGAI WITŨ ŨRĨA MŨNENE

10. Nĩ indo irĩkũ irutĩtwo cia gũteithia atumumu na arĩa matahotaga kũigua? (Ningĩ rora mbica.)

¹⁰ Tondũ tũrĩ arũmĩrĩri a Jesu, nĩ twĩrutanagĩria kwĩgerekania nake harĩ kuonania wendo, tha na ũcayanĩri. (1 Pet. 2:21; 3:8) O na gũtuĩka tũtingĩhota kũhonia atumumu na arĩa matahotaga kũigua, no tũmateithie kwĩruta ũhoro wa Jehova nĩguo mamũkuhĩrĩrie. Kwa ngerekano, mabuku mararĩrĩria Bibilia rĩu no moneke na thiomi makĩria ma 100 cia kwaria na ciĩko. Na nĩ kũrutĩtwo mabuku ma braille na thiomi makĩria ma 60 nĩ ũndũ wa andũ atumumu kana arĩa matahotaga kuona wega. Ningĩ kũrĩ na thiomi makĩria ma 100 irutaga video irĩ na mũgambo ũrataarĩria kĩrĩa kĩronanio video-inĩ. Indo icio irutĩtwo nĩguo iteithie atumumu na arĩa matahotaga kũigua gũkuhĩrĩria Jehova na Mũrũwe.

11. Ithondeka rĩa Jehova rĩĩgerekanagia na Jesu atĩa harĩ gũcaĩra andũ a mĩthemba yothe? (Atũmwo 2:​5-7, 33) (Ningĩ rora mbica.)

¹¹ Ithondeka rĩa Jehova nĩ rĩĩrutanĩirie gũteithia andũ a mĩthemba yothe. Thutha wa Jesu kũriũkio, nĩ aaitĩrĩirie arutwo ake roho mũtheru nĩguo andũ arĩa othe maagomanĩte gĩathĩ-inĩ kĩa Pentekoste maigue ũhoro ũrĩa mwega, o mũndũ na “rũthiomi rwake mwene.” (Thoma Atũmwo 2:​5-7, 33.) Kũgerera ũtongoria wa Jesu, ithondeka rĩa Jehova nĩ rĩrutĩte mabuku mararĩrĩria Bibilia na thiomi makĩria ma 1,000, na thiomi imwe harĩ icio ciaragio nĩ andũ anini mũno. Kwa ngerekano, Amerika ya Rũgongo na ya Mũhuro nĩ kũrĩ thiomi imwe ciaragio nĩ andũ gakundi kanini. No nĩguo ũhoro ũrĩa mwega ũkinyĩre andũ aingĩ o ũrĩa kwahoteka, mabuku maitũ nĩ marutĩtwo na thiomi makĩria ma 160 harĩ icio. Ningĩ mabuku maitũ nĩ monekaga na thiomi makĩria ma 20 cia Romani. Andũ ngiri nyingĩ arĩa maragia thiomi icio nĩ mambĩrĩrie gũtungatĩra Jehova.

12. Nĩ atĩa ũngĩ ithondeka rĩa Jehova rĩkagĩra andũ ũmũthĩ?

¹² Ithondeka rĩa Jehova to gũteithia rĩteithagia andũ makinyĩrũo nĩ ũhoro mwega, no ningĩ nĩ rĩteithagia arĩa mahutĩtio nĩ icanjama cia ndũire. Aarĩ na ariũ a Ithe witũ ngiri nyingĩ nĩ merutagĩra nĩguo mateithie Akristiano arĩa marabatara ũteithio. Ithondeka rĩa Jehova ningĩ nĩ rĩteithĩrĩirie harĩ gwaka nyũmba cia gũthathaĩria, kũrĩa andũ macemanagia nĩguo marutwo ũhoro wĩgiĩ wendo wa Jehova.

MŨTHĨNJĨRI-NGAI WITŨ ŨRĨA MŨNENE NO AGŨTEITHIE

13. Jesu atũteithagia na njĩra ta irĩkũ?

¹³ Jesu arĩ we mũrĩithi witũ ũrĩa mwega, nĩ arũmbũyagia mabataro ma kĩĩroho ma o ũmwe witũ. (Joh. 10:14; Ef. 4:7) Rĩmwe moritũ ma ũtũũro no matũme tũigue tũtariĩ ta ithanjĩ igonyoku kana rũtambĩ rũratoga. Maũndũ ta mũrimũ, mahĩtia twekire tene, kana kwaga kũiguana na Mũkristiano ũngĩ, no matũme tũigue tũkuĩte ngoro mũno. No tũritũhĩrũo kũiga meciria maitũ harĩ kĩĩrĩgĩrĩro kĩa ihinda rĩũkĩte, na handũ ha ũguo tũgaikara tũgĩciragia ũhoro wa mathĩna marĩa tũracemania namo. No ririkanaga atĩ Jesu nĩ onaga moritũ marĩa ũragerera na agataũkĩrũo nĩ ũrĩa ũraigua ngoro-inĩ. Na tondũ Jesu nĩ arĩ tha, nĩ akoragwo ehaarĩirie gũgũteithia. Kwa ngerekano rĩrĩa ũtarĩ hinya, no ahũthĩre roho mũtheru gũgwĩkĩra hinya. (Joh. 16:7; Tit. 3:6) Ningĩ no ahũthĩre athuri a kĩũngano na Akristiano arĩa angĩ gũgwĩkĩra ngoro, gũgũtiirĩrĩra na gũgũteithia.—Ef. 4:8.

14. Tũngĩka atĩa rĩrĩa twaigua tũkuĩte ngoro?

¹⁴ Rĩrĩa worũo nĩ hinya kana waigua ũkuĩte ngoro, wĩcũranagie itemi rĩa Jesu arĩ Mũthĩnjĩri-Ngai Witũ Ũrĩa Mũnene. Ririkanaga atĩ Jehova ndaamũtũmire gũkũ thĩ nogetha tu arute muoyo wake ũrĩ ũkũũri, no ningĩ nĩguo amũteithie gũtaũkĩrũo wega nĩ moritũ marĩa andũ matarĩ akinyanĩru mageragĩra. Hĩndĩ ĩrĩa twaigua tũkuĩte ngoro nĩ ũndũ wa mehia maitũ kana kwaga gũkinyanĩra, Jesu nĩ akoragwo ehaarĩirie gũtũteithia ‘ihinda-inĩ rĩrĩa rĩagĩrĩire.’—Ahib. 4:​15, 16.

15. Nĩ kĩĩ gĩateithirie mũrũ wa Ithe witũ ũmwe gũcoka kĩũngano-inĩ?

¹⁵ Ningĩ Jesu nĩ atongoragia andũ ake rĩrĩa marateithĩrĩria andũ arĩa meherete rũũru-inĩ rwa Jehova. (Mat. 18:​12, 13) Ta wĩcirie ũhoro wa Stefano.b Thutha wa gũkorũo eheretio kĩũngano-inĩ kwa ihinda rĩa mĩaka 12, mũthenya ũmwe nĩ eeciririe gũthiĩ mũcemanio. Aaugire ũũ: “Ndwarĩ ũndũ mũhũthũ, no nĩ ndendaga gũcoka famĩlĩ-inĩ ya Jehova. Athuri a kĩũngano arĩa maanyitire ũgeni nĩ maatũmire ndĩigue ndĩ mũciĩ. Rĩmwe nĩ ndaiguaga itarĩ kĩene nĩ ũndũ wa gũtiganĩria Jehova, na ngaigua ta itekũhota gũthiĩ na mbere. No athuri a kĩũngano nĩ maandirikanagia atĩ Jehova na Jesu matingĩendire njoke na thutha. Rĩrĩa ndacokirio kĩũngano-inĩ, aarĩ na ariũ a Ithe witũ nĩ maanyonirie wendo hamwe na famĩlĩ yakwa. Thutha ũcio mũtumia wakwa nĩ etĩkĩrire kwĩruta Bibilia, na rĩu tũtungatagĩra Jehova tũrĩ famĩlĩ.” Hatarĩ nganja Mũthĩnjĩri-Ngai Witũ Ũrĩa Mũnene nĩ akenaga mũno ona tũgĩteithĩrĩria arĩa merirĩte gũcoka kĩũngano-inĩ.

16. Ũkoragwo na ngatho nĩkĩ nĩ ũndũ wa Mũthĩnjĩri-Ngai Witũ Ũrĩa Mũnene?

¹⁶ Rĩrĩa Jesu aarĩ gũkũ thĩ, nĩ aaheanaga ũteithio ihinda-inĩ rĩrĩa rĩagĩrĩire. O na ũmũthĩ no tũkorũo na ma biũ atĩ nĩ arĩtũheaga ũteithio rĩrĩa twaũbatara. Na thĩinĩ wa thĩ njerũ, nĩ agaakũũra biũ andũ arĩa athĩki kuumana na maumĩrĩro ma mehia na kwaga gũkinyanĩra. Nĩ tũcokagĩria Jehova ngatho tondũ nĩ aatuonirie wendo mũnene, akĩamũra Mũrũ wake arĩ Mũthĩnjĩri-Ngai Witũ Mũnene ũrĩ tha.