Russia Gũtharĩkĩra Ukraine

Rũcinĩ rwa Februarĩ 24, 2022, Russia nĩ yambĩrĩirie gũtharĩkĩra Ukraine ĩkĩhũthĩra mbũtũ, o na gũtuĩka atongoria a mabũrũri maingĩ nĩ maageretie kũgirĩrĩria mbaara ĩyo. Hihi mbaara ĩyo ĩngĩhutia thĩ na njĩra ĩrĩkũ? Mũtongoria ũmwe wa Ũrũmwe wa Mabũrũri wĩtagwo António Guterres, araugire ũũ thikũ nini hĩtũku: “O na tũtingĩhota gwĩcirĩria ũhoro wĩgiĩ mĩnyamaro na mwanangĩko ũrĩa mbaara ĩno ĩkũrehe na ũrĩa ĩgũthũkia ũgitĩri wa mabũrũri marĩa marĩ Europe na kũndũ guothe thĩinĩ wa thĩ.”

Maũndũ ta macio monanagia ũndũ ũrĩkũ kũringana na Bibilia?

• Jesu Kristo nĩ aarathire ũhoro wa ihinda rũrĩrĩ “rũgookĩrĩra rũrĩrĩ rũrĩa rũngĩ na ũthamaki ũũkĩrĩre ũthamaki ũrĩa ũngĩ.” (Mathayo 24:7) Nĩguo wone ũrĩa Bibilia yonanagia atĩ mbaara ũmũthĩ nĩ ihingagia ũrathi wa Jesu, thoma gĩcunjĩ kĩrĩ na kĩongo “Ni Nini Ishara ya ‘Siku za Mwisho’?

• Ibuku rĩa Kũguũrĩrio rĩringithanagia mbaara na mũtwarithia wa mbarathi ũikarĩire ‘mbarathi ya rangi ta wa mwaki,’ ũrĩa weheragia “thayũ thĩinĩ wa thĩ.” (Kũguũrĩrio 6:4) Nĩguo wone ũrĩa ũrathi ũcio ũhutanĩtie na mbaara ũmũthĩ, thoma gĩcunjĩ kĩrĩ na kĩongo “Atwarithia Arĩa ana a Mbarathi nĩ A?”

• Ibuku rĩa Danieli nĩ rĩarathĩte ũhoro wa ngucanio gatagatĩ ka “mũthamaki wa mwena wa rũgongo” na “mũthamaki wa mwena wa mũhuro.” (Danieli 11:25-45) Wĩrorere video ĩrĩ na kĩongo “Kũhinga kwa Ũrathi wa Danieli Mũrango wa 11” nĩguo wone kĩrĩa kĩngĩtũma tuuge atĩ Russia na mabũrũri marĩa mamĩnyitaga mbaru no metwo mũthamaki wa mwena wa rũgongo.a

• Ibuku rĩa Kũguũrĩrio ningĩ nĩ rĩtaaragĩria ũhoro wa “mbaara ya mũthenya ũrĩa mũnene wa Ngai Mwene-Hinya-Wothe.” (Kũguũrĩrio 16:14, 16) O na kũrĩ ũguo, ĩyo ti mbaara gatagatĩ ka mabũrũri ta ĩyo tũreyonera. Thoma gĩcunjĩ kĩrĩ na kĩongo “Mbaara ya Hari-Magedoni nĩ Kĩĩ?” nĩguo wone ũhoro makĩria wĩgiĩ mbaara ĩyo ĩrĩa ĩriumĩra ihinda rĩũkĩte.

Nĩ kĩĩ kĩngĩtũma ũkorũo na mwĩhoko wĩgiĩ ihinda rĩũkĩte?

• Bibilia yugaga atĩ Ngai nĩ akaaniina “mbaara kũndũ guothe thĩinĩ wa thĩ.” (Thaburi 46:9) Thoma gĩcunjĩ kĩrĩ na kĩongo “Tumaini Bora la Wakati Ujao” nĩguo wĩrute makĩria ũhoro wĩgiĩ ihinda rĩũkĩte rĩrĩa Ngai eranĩire.

• Jesu aarutire arũmĩrĩri ake mahoyage Ũthamaki wa Ngai Ngai ũũke. (Mathayo 6:9, 10) Ũthamaki ũcio nĩ thirikari ya igũrũ ĩrĩa ĩkaahingia wendi wa Ngai gũkũ thĩ, na wendi wa Ngai nĩ hamwe na thĩ gũkorũo ĩrĩ na thayũ. Nĩguo wĩrute ũrĩa Ũthamaki ũcio ũngĩkũguna, wĩrorere video ĩrĩ na kĩongo Ũthamaki wa Ngai nĩ Kĩĩ?

Thĩinĩ wa Ukraine, kũrĩ na Aira a Jehova makĩria ma 129,000 arĩa maikaraga kuo. O ta Aira a Jehova thĩinĩ wa mabũrũri marĩa mangĩ mothe, megerekanagia na Jesu na njĩra ya kwaga kũnyita mbaru mwena o wothe wa gĩũteti na kwaga kwĩingĩria mbaara-inĩ. (Johana 18:36) Thĩinĩ wa thĩ yothe, Aira a Jehova nĩ marathiĩ na mbere kũhunjia atĩ “ũhoro [ũrĩa] mwega wa Ũthamaki” nĩguo kĩhonia kĩa mathĩna ma andũ, nginya mbaara. (Mathayo 24:14) Nĩ tũrakũũria waranĩrie na ithuĩ nĩguo wĩrute makĩria ũhoro wa ndũmĩrĩri ya Bibilia ĩrĩa ĩtũheaga kĩĩrĩgĩrĩro.