Ithomo Rĩa 5

Arata a Ngai Nĩmagaatũũra Thĩinĩ Wa Paradaisi

Paradaisi ndĩgakorũo ĩhaana ta thĩ ĩrĩa tũtũũraga rĩu. Ngai ndarĩ hingo o na rĩ endete thĩ ĩiyũrũo nĩ thĩna na kĩeha, ruo na gũthĩnĩka. Ihinda-inĩ rĩrĩa rĩũkĩte, Ngai nĩarĩthondeka thĩ ĩtuĩke paradaisi. Paradaisi ĩgaakorũo ĩhaana atĩa? Reke tuone ũrĩa Bibilia yugaga:

Andũ ega. Paradaisi ĩgaakorũo ĩrĩ mũciĩ wa arata a Ngai. Magekanagĩra maũndũ mega. Magatũũraga kũringana na njĩra cia ũthingu cia Ngai.—Thimo 2:21.

Irio Nyingĩ. Thĩinĩ wa Paradaisi, gũtigakoragwo na ngʼaragu. Bibilia yugaga ũũ: “Bũrũri ũrogĩaga na bũthi wa ngano [kana, irio].”—Thaburi 72:16.

Nyũmba njega na wĩra wĩ gĩkeno. Thĩinĩ wa thĩ ya Paradaisi, famĩlĩ o famĩlĩ ĩgakoragwo na mũciĩ wao o ene. Mũndũ o mũndũ akaarutaga wĩra ũrehage gĩkeno kĩa ma.—Isaia 65:21-23.

Thayũ thĩinĩ wa thĩ yothe. Andũ matigacoka rĩngĩ kũrũa na gũkua mbaara-inĩ. Kiugo kĩa Ngai kiugaga ũũ: “[Ngai] nĩ mũnini mbaara nginya o ituri cia thĩ.”—Thaburi 46:8,  9.

Ũgima mwega wa mwĩrĩ. Bibilia ĩĩranagĩra ũũ: “Mũndũ ũrĩa ũtũũraga bũrũri [Paradaisi] ũcio ndarĩ hingo agacoka kuuga ũũ: Ndĩ mũrũaru.” (Isaia 33:24) O na ningĩ, gũtirĩ mũndũ ũgaakoragwo arĩ gĩthua kana mũtumumu kana gĩtaigua kana ũtekũhota kwaria.—Isaia 35:5, 6.

Mũico wa ruo, kĩeha, na gĩkuũ. Kiugo kĩa Ngai kiugaga ũũ: “Gĩkuũ gĩtirĩ hingo gĩgacoka kũgĩa, o na gũtirĩ hingo gũgacoka kũgĩa na kĩeha, kana kĩrĩro, kana ruo; maũndũ marĩa ma mbere nĩ mathengu magathira.”—Kũguũrĩrio 21:4.

Andũ oru magaakorũo mathirĩte. Jehova eranagĩra ũũ: “Andũ arĩa aaganu nĩ kũrindũrũo makarindũrũo bũrũri, mĩgarũka ĩo nĩ kuombororio ĩkombororio kuo.”—Thimo 2:22.

Andũ nĩmakendana na matĩĩane. Gũtirĩ hingo ĩngĩ gũkaaga kĩhooto, kũhinyanĩrĩrio, kũgĩe ũkoroku, na rũthũũro. Andũ magaakoragwo na ũrũmwe na magatũũraga kũringana na njĩra cia Ngai cia ũthingu.—Isaia 26:9.