Akristiano na Mbaara—Mawoni ma Bibilia nĩ Marĩkũ?

O ta ũrĩa tuonete mbaara-inĩ ya Ukraine, atongoria aingĩ a ndini nĩ manyitaga mbaru mbaara. Ta rora wone ũrĩa atongoria acio a ndini maranyita mbaru mĩena yerĩ ya mbaara ĩyo:

• “Nĩ tũratĩĩa mũno na tũgacokeria ngatho njamba citũ ciothe iria irarũĩrĩra bũrũri witũ wa Ukraine kuumana na thũ itũ . . . Nĩ tũmwĩciragia mũno, tũkamũhoera kuuma ngoro, na tũkamũnyita mbaru hĩndĩ ciothe.”—Metropolitan Epiphanius I wa Kyiv, ta ũrĩa ngathĩti ya The Jerusalem Post yaugire Machi 16, 2022.

• “Mũnene wa Kanitha wa Orthodox wa Russia nĩ eekire mũcemanio wa kĩĩndini hamwe na thigari cia Russia mũthenya wa Kiumia. Mũcemanio-inĩ ũcio, aamekĩrire ngoro marũĩrĩre bũrũri wao ‘ta Arussia kũna’ ihinda-inĩ rĩrĩ Moscow ĩratharĩkĩra Ukraine.”—Reuters, Ĩpuro 3, 2022.

Hihi Akristiano nĩ magĩrĩirũo kwĩingĩria mbaara-inĩ? Bibilia yugaga atĩa?

Mawoni ma Bibilia nĩ marĩkũ

Bibilia yonanagia atĩ andũ arĩa marũmagĩrĩra Jesu Kristo kũna matiĩingĩragia mbaara-inĩ.

• “Cokia rũhiũ rwaku rwa njora handũ haruo, nĩ gũkorũo arĩa othe moyaga rũhiũ rwa njora makaaniinwo o na rũhiũ rwa njora.”—Mathayo 26:52.

  Hihi mũndũ no akorũo agĩathĩkĩra biũ ciugo cia Jesu angĩkorũo ndareganaga na mbaara kana nĩ eingĩragia mbaara-inĩ?

• “Ndĩramũhe rĩathani rĩerũ, atĩ mwendanage; o ta ũrĩa ndĩmwendete inyuĩ, o na inyuĩ endanagai inyuĩ ene. Nĩ ũndũ ũcio andũ othe nĩ marĩmenyaga atĩ mũrĩ arutwo akwa—mwakorũo na wendo gatagatĩ-inĩ kanyu.”—Johana 13:34, 35.

  Hihi mũndũ ũnyitaga mbaru mbaara nĩ onanagia wendo ta ũrĩa Jesu aaugire ũngĩamenyithanirie arutwo kana arũmĩrĩri ake?

Nĩguo wone ũhoro makĩria, thoma gĩcunjĩ kĩrĩ na kĩongo “Je, Ukristo Unaunga Mkono Vita?”

Akristiano na mbaara ũmũthĩ

Hihi nĩ ũndũ wa kĩhooto Akristiano kwaga kwĩingĩrania na mbaara ũmũthĩ? Ĩĩ. Bibilia nĩ yarathĩte atĩ mahinda-inĩ maitũ, ihinda rĩrĩa rĩtagwo ‘matukũ ma kũrigĩrĩria,’ nĩ kũngĩgakorũo na andũ a kuuma ndũrĩrĩ-inĩ ciothe arĩa “[matakeruta] mbaara rĩngĩ,” makĩrũmĩrĩra morutani ma Jesu.—Isaia 2:2, 4, kohoro ka magũrũ-inĩ.

• Nĩguo wone ũhoro makĩria, thoma kĩrũmanĩrĩrio gĩa icunjĩ thĩinĩ wa ngathĩti ya Mũrangĩri ĩrĩ na kĩongo “Ngai Onaga Mbaara Atĩa?”

Ica ikuhĩ Jehova,a “Ngai wa thayũ,” nĩ ekũhũthĩra thirikari yake ya igũrũ kũhonokia andũ nĩguo “matige kũhinyĩrĩrio na gwĩkwo maũndũ ma ũhinya.” —Afilipi 4:9; Thaburi 72:14.

• Nĩguo wone ũrĩa ageeka ũguo, wĩrorere video ya Ũthamaki wa Ngai nĩ Kĩĩ?