Njũragano cia Mĩcinga Thĩinĩ wa Thĩ Yothe—Mawoni ma Bibilia nĩ Marĩkũ?

Mweri wa Julaĩ 2022, nĩ kwagĩire na njũragano cia kũmakania cia mĩcinga thĩinĩ wa thĩ yothe:

• “Kũũragwo kwa mũteti ũmwe ũĩkaine mũno wa bũrũri wa Japan [Shinzo Abe ũrĩa warĩ Minista Mũnene wa bũrũri] nĩ kwahahũrire bũrũri ũcio na gũgĩtũma andũ aingĩ mamake thĩinĩ wa thĩ yothe, makĩria tondũ bũrũri-inĩ ũcio gũtikoragwo na wĩki-naĩ mũingĩ ta ũcio, na nĩ gũkoragwo na mawatho marũmu megiĩ mĩcinga.”—Julaĩ 10, 2022, The Japan Times.

• “Kĩmako kũiyũra Denmark thutha wa mũndũ ũrĩ na mũcinga kũũraga andũ atatũ thĩinĩ wa nduka nene ya Copenhagen.”—Julaĩ 4, 2022, Reuters.

• “South Africa: Andũ 15 gũkua thutha wa andũ kũrathũkia mĩcinga thĩinĩ wa kĩrabu kĩmwe taũni-inĩ ya Soweto.”—Julaĩ 10, 2022, The Guardian.

• “Makĩria ma andũ 220 kũrathwo na kũũragwo thĩinĩ wa Amerika (US), wikendi ya mambura ma Julaĩ 4.”—Julaĩ 5, 2022, Mohoro ma CBS.

Hihi kũrĩ na kĩĩrĩgĩrĩro atĩ wĩki-naĩ ta ũcio nĩ ũgaathira? Bibilia yugaga atĩa?

Gũthira kwa Wĩki-naĩ

Bibilia ĩtĩte ihinda rĩrĩ tũratũũra ‘matukũ ma kũrigĩrĩria,’ ihinda rĩrĩa andũ mangĩgakorũo magĩka ciĩko cia wĩki-naĩ matarĩ na tha. (2 Timotheo 3:1, 3) Ciĩko ta icio cia wĩki-naĩ itũmaga andũ maikare na guoya. (Luka 21:11) O na kũrĩ ũguo, Bibilia nĩ ĩĩranagĩra ũhoro wa ihinda wĩki-naĩ ũgaathira na andũ “magaatũũra handũ harĩ na thayũ, kũndũ kũrĩ na ũgitĩri na kũndũ kũhooreru gwa kũhurũka.” (Isaia 32:18) Hihi wĩki-naĩ ũgaathira atĩa?

Ngai nĩ akaaniina andũ arĩa aganu na anange matharaita mothe.

• “Andũ arĩa aganu, nĩ makaaninwo mehere thĩinĩ wa thĩ.”—Thimo 2:22.

• “[Ngai] aniinaga mbaara kũndũ guothe thĩinĩ wa thĩ. Oinangaga ũta na agathũkangia itimũ; acinaga ngaari cia mbaara na mwaki.”—Thaburi 46:9.

Ngai nĩ akaaruta andũ gũtũũrania na njĩra ya thayũ na kwoguo aniine wĩki-naĩ wothe.

• “Gũtikageranwo ngero, kana kũninanwo, kũu kĩrĩma-inĩ gĩakwa kĩrĩa gĩtheru guothe, nĩ gũkorũo thĩ yothe nĩĩkaiyũrũo nĩ ũhoro wa kũmenya Jehova o ta ũrĩa maĩ maiyũrĩte iria-inĩ.”—Isaia 11:9, The Bible in Gikũyũ.

• O na ũmũthĩ, Ngai nĩ araruta andũ gwĩthema wĩki-naĩ na ũhũthĩri wa matharaita, “[magatura] hiũ ciao cia njora ituĩke hiũ cia mĩraũ na matimũ mao matuĩke hiũ cia gũceha.”—Mika 4:3.

Nĩguo wĩrute makĩria igũrũ rĩgiĩ kĩĩranĩro kĩa Bibilia gĩa thĩ ĩtarĩ na maũndũ mangĩtũma mũndũ aigue guoya, thoma gĩcunjĩ kĩrĩ na kĩongo “Je, Inawezekana Kuishi Bila Woga?”

Nĩguo wĩrute makĩria ũrĩa wĩki-naĩ ũkaaniinwo kaimana, thoma gĩcunjĩ kĩrĩ na kĩongo, “Hatimaye Amani Duniani!”