Ũrĩa Ũthamaki wa Ngai Ũgeeka Igũrũ Rĩgiĩ Ũthũkia wa Rĩera

“Ũthũkia mũnene wa rĩera nĩ ũrehete moritũ maingĩ kũrĩ andũ, mataũni, na kũrĩ indo iria ciothe irĩ muoyo. Ihuhũkanio nene, iria irathiĩ igĩte hinya makĩria nĩ ũndũ wa mogarũrũku ma rĩera, nĩ irathũkangia mĩciĩ na ũtũũro wa andũ aingĩ thĩinĩ wa thĩ yothe. Maĩ ma iria-inĩ nĩ marathiĩ na mbere kũhiũha, na ũndũ ũcio ũgatũma nyamũ nyingĩ cia iria-inĩ ikorũo ũgwati-inĩ.”—Inger Andersen, mũteithia wa mũnini wa mwandĩki mũnene wa kĩama kĩa Ũrũmwe wa Mabũrũri na mũrũgamĩrĩri mũnene wa Rũhonge rwa Kũramata Marĩa Matũrigicĩirie Kĩama-inĩ kĩa Ũrũmwe wa Mabũrũri, Julaĩ 25, 2023.

Hihi thirikari no ihote kũrutithania wĩra hamwe nĩguo irũe na mathĩna macio marĩa marahutia thĩ yothe? Hihi no ihote kũrehe kĩhonia gĩa gũtũũra?

Bibilia nĩ yarĩtie ũhoro wa thirikari ĩrĩ na ũhoti ĩrĩa ĩrĩniina mathĩna mothe ma rĩera thĩinĩ wa thĩ. Yugĩte atĩ “Ngai wa igũrũ nĩ akaahanda ũthamaki,” kana thirikari ĩrĩa ĩkaaramata maũndũ mothe thĩinĩ wa thĩ. (Danieli 2:44) Rungu rwa thirikari ĩyo ya thĩ yothe, andũ ‘matikaagerana ngero o na hanini, kana marehe mwanangĩko o wothe’ kũrĩ thĩ.—Isaia 11:9.