Ndini ya ma no Ĩkũgune Tene na Tene!

1. Kũngĩthiĩ atĩa ‘tũngĩkuhĩrĩria Ngai’?

JEHOVA nĩ endete arĩa mamũtungatagĩra. Ũngĩthathaiya Jehova, egũkũrathima ihinda-inĩ rĩrĩ na rĩrĩa rĩũkĩte. Bibilia yugaga ũũ: “Kuhĩrĩriai Ngai, nake nĩ ekũmũkuhĩrĩria.”—Jakubu 4:8.

2. Tũngĩhota atĩa gũkuhĩrĩria Ngai, na ũndũ ũcio ũngĩhutia mahoya maitũ atĩa?

² Nĩguo ũkuhĩrĩrie Ngai, no mũhaka wĩrute na wathĩkĩre kiugo gĩake. Ũngĩhoya kũringana na wendi wake, Jehova nĩ egũthikĩrĩria mahoya maku na amacokie. Mũtũmwo Johana aandĩkire ũũ: “Na ũyũ nĩguo ũũma ũrĩa tũkoragwo naguo harĩ [Ngai], atĩ tũngĩhoya ũndũ o na ũrĩkũ kũringana na wendi wake, nĩ atũiguaga. Na angĩkorũo nĩ tũĩ atĩ nĩ atũiguaga ũhoro-inĩ o wothe twamũhoya-rĩ, nĩ tũĩ atĩ nĩ tũkũheo indo iria tũhoyaga, nĩ gũkorũo nĩ tũmũhoete.”—1 Johana 5:14, 15.

3-7. Tũngĩhota atĩa kũgĩa na ũũgĩ wa Ngai, na ũũgĩ ũcio ũngĩtũteithia atĩa?

³ Makĩria ma ũguo, o ũrĩa ũgũkuhĩrĩria Ngai, noguo egũkũhe ũũgĩ wa kũhiũrania na mathĩna ma o mũthenya. Bibilia yugaga ũũ: “Mũndũ o na ũrĩkũ wanyu angĩkorũo atarĩ na ũũgĩ, nĩ athiĩ na mbere kũhoya Ngai.”—Jakubu 1:5.

⁴ Ũũgĩ wa kuuma kwĩ Ngai ũngĩgũteithia atĩa? Njĩra ĩmwe, no ũgũteithie kũmenya maũndũ marĩa matakenagia Jehova. Ningĩ no ũmenye nĩkĩ maũndũ macio matiagĩrĩire, na ũrĩa ũngĩka nĩguo ũmetheme. Ũũgĩ ta ũcio no ũkũgitĩre kuumana na mathĩna maingĩ marĩa mathumbũraga andũ. Kwa ngerekano, gwathĩkĩra ũtaaro wa Ngai wĩgiĩ ũtheru wa kĩĩmĩtugo nĩ kũgitagĩra andũ a Ngai kuumana na kũgĩa nda itagĩrĩire, mĩrimũ ya kũgwatanio kũgerera ngomanio, na kwaga gĩkeno kĩhiko-inĩ kana kũharagana kwa ihiko nyingĩ.

⁵ Ũũgĩ ũcio wa Ngai ũngĩgũteithia na njĩra irĩkũ ingĩ? No ũkũhotithie gũkenera ũtũũro. No ũgũteithie gũtua matua mega, ta ũhoro-inĩ wĩgiĩ kũhũthĩra mbeca. Nĩ ũgũkũhotithia gũthingata mĩoroto ĩrĩa ĩngĩkũguna, na kũregana na mĩoroto ĩrĩa ĩtarĩ na ũguni.

⁶ Ningĩ ũũgĩ wa Ngai no ũgũteithie ũhoro-inĩ wĩgiĩ ũrata waku na andũ arĩa angĩ. No ũgĩe na ũtũũro wa famĩlĩ ũrĩ na gĩkeno. Ningĩ no ũgĩe na ũrata wa ma na wa gũtũũra hamwe na andũ arĩa angĩ, na ũheo gĩtĩo nginya nĩ andũ arĩa matatungatagĩra Ngai.

⁷ Makĩria ma ũguo, gũkorũo na ũũgĩ wa Ngai nĩ gũgũgũteithia gũkorũo na muonere ũrĩa wagĩrĩire wĩgiĩ ũtũũro. Gũgũteithie kũhiũrania na moritũ na maũndũ ma gũkũũraga ngoro. Na ũgĩe na mawoni mega na marĩ na ũigananĩru megiĩ ihinda rĩũkĩte. Gũkorũo na mawoni mega nakuo gũgũteithie kũgĩa na ũgima mwega wa mwĩrĩ na wa meciria.—Thimo 14:30; Isaia 48:17.

8. Watungatĩra Ngai-rĩ, nĩ maũndũ marĩkũ ũtarĩĩtigagĩra?

⁸ Ũngĩtungatĩra Ngai ũrĩa wa ma, ndũrĩkoragwo na guoya ũrĩa ũkoragwo na arĩa matamũtungatagĩra. Tondũ nĩ ũĩ atĩ arĩa makuĩte marĩ mbĩrĩra-inĩ na matirĩ ũndũ mangĩhota gwĩka, ndũrĩĩtigagĩra arĩa makuĩte. Na tondũ nĩ wĩtĩkĩtie kĩĩranĩro kĩa Ngai gĩa gũkaariũkia arĩa makuĩte, ndũrĩĩtigagĩra gũkua. Na ningĩ tondũ nĩ ũĩ atĩ Ngai nĩwe mwene hinya wothe, ndũrĩĩtigagĩra ũgo kana ũragũri.—Johana 8:32.

Arĩa Athingu nĩ Makaagaya Thĩ

9-11. Nĩa magaatũũra thĩinĩ wa Paradiso, na nĩa matagatũũra?

⁹ Ũngĩkuhĩrĩria Ngai, ndũrĩĩtigagĩra ihinda rĩrĩa rĩũkĩte. O ta ũrĩa tũrĩkĩtie kuona, Bibilia nĩ yarathĩte ũhoro wĩgiĩ mathĩna maingĩ marĩa tũrona gũkũ thĩ ũmũthĩ. Jehova atwĩrĩte atĩ maũndũ macio no ma ihinda inini tu, tondũ ica ikuhĩ Ũthamaki wa Ngai nĩ ũrĩtua thĩ ĩno paradiso.—Luka 21:10, 11, 31; 23:43.

¹⁰ No arĩa tu makuhagĩrĩria Jehova na makamũtungatĩra magatũũra thĩinĩ wa Paradiso. Bibilia yugaga ũũ: “No kahinda kanini gatigaru, na andũ arĩa aganu matigaakorũo kuo rĩngĩ; ũkaarora kũrĩa maakoragwo, na matigaakorũo kuo. No andũ arĩa ahooreri nĩ makaagaya thĩ, na nĩ magaakena mũno nĩ ũndũ wa kũingĩhĩrũo nĩ thayũ.”—Thaburi 37:10, 11.

¹¹ Arĩa maregaga gwathĩkĩra mawatho ma Ngai ma ũthingu nĩ makoorũo nĩ mĩoyo yao tene na tene. (2 Athesalonike 1:8, 9) Matigaakorũo kuo rĩngĩ. Magaaturanĩrũo hamwe na Shaitani na ndaimono ciake thĩinĩ wa gĩkuũ gĩa tene na tene. (Kũguũrĩrio 20:10, 14) No arĩa merutaga ũhoro wa Jehova na makamũtungatĩra nĩ magaakena nĩ ũndũ wa kũingĩhĩrũo nĩ thayũ thĩinĩ wa Paradiso gũkũ thĩ.

Ihinda Rĩega Rĩũkĩte!

12. Bibilia yugĩte atĩa igũrũ rĩgiĩ ihinda rĩrĩa rĩũkĩte?

¹² Jehova aigĩire andũ arĩa mamwendete maũndũ mega! Ta rora ũrĩa Kiugo gĩake kiugĩte igũrũ rĩgiĩ muoyo thĩinĩ wa Paradiso gũkũ thĩ:

• Irio nyingĩ: “Nĩ gũgaakorũo na ngano nyingĩ [kana irio] thĩinĩ wa thĩ; ĩgaakorũo ĩrĩ nyingĩ mũno irĩma igũrũ.”—Thaburi 72:16.

• Nyũmba njega: “Nĩ magaaka nyũmba na matũũre thĩinĩ wacio.”—Isaia 65:21.

• Wĩra ũrakenerũo: “Andũ akwa arĩa athuure nĩ magaakenagĩra wĩra wa moko mao biũ. Matikaaruta wĩra wa tũhũ.”—Isaia 65:22, 23.

• Gũtigaakorũo na mĩrimũ: “Gũtirĩ mũikari wakuo ũkoiga: ‘Ndĩ mũrwaru.’”—Isaia 33:24.

• Gũtigaakorũo na wonje: “Hĩndĩ ĩyo maitho ma atumumu nĩ makaahingũrũo, na matũ ma arĩa mataiguaga nĩ makaaigua. Hĩndĩ ĩyo mũndũ ũrĩa ũthuaga akaarũgarũga o ta thwariga, na rũrĩmĩ rwa ũrĩa ũtahotaga kwaria rwanĩrĩre nĩ gũkena.”—Isaia 35:5, 6.

• Gũtigaakorũo ruo, kĩeha, kana gĩkuũ: “[Ngai] nĩ ekũmagiria maithori mothe mathire maitho-inĩ mao, na gĩkuũ gĩtigaacoka gũkorũo kuo rĩngĩ, o na gũcakaya kana kĩrĩro kana ruo. Maũndũ marĩa ma tene nĩ mathiru.”—Kũguũrĩrio 21:4.

• Gũtigaakorũo mbaara: “[Ngai araniina] mbaara kũndũ guothe thĩinĩ wa thĩ.”—Thaburi 46:9.

• Muoyo wa tene na tene: “Andũ arĩa athingu nĩ makaagaya thĩ, na magaatũũra thĩinĩ wayo tene na tene.”—Thaburi 37:29.

13. Nũũ tu ũngĩhota gũtua thĩ ĩno Paradiso, na nĩkĩ?

¹³ Andũ matingĩhota gwĩka maũndũ ta macio, no Jehova nĩ arĩ hinya wa gwĩka ũndũ o wothe oigĩte nĩ egwĩka. Gũtirĩ kĩndũ kĩngĩmũgirĩrĩria gwĩka ũrĩa atuĩte. Bibilia yugĩte ũũ: “Gũtirĩ uuge ũngĩrema Ngai.”—Luka 1:37.

14. Ũngĩhota atĩa kũingĩra njĩra-inĩ ĩrĩa yerekagĩria andũ muoyo-inĩ wa tene na tene?

¹⁴ Kũgerera harĩ Aira a Jehova, Jehova nĩ arahe andũ a kũndũ guothe mweke wa ‘gũtonyera mũromo ũrĩa mũceke’ na magerere njĩra ĩrĩa yerekeire muoyo-inĩ wa tene na tene. Ĩtĩkĩra gũtuĩka ũmwe wa andũ arĩa marĩ na gĩkeno arĩa metĩkĩrĩte rĩĩtana rĩu. Rũmĩrĩra ndini ĩrĩa ya ma ũkenere irathimo cia Jehova tene na tene!—Mathayo 7:13, 14.