Tũngĩonania Atĩa atĩ nĩ Twendete Jehova?

1, 2. Kũringana na mũtũmwo Johana-rĩ, Ngai atuonetie ũrĩa twagĩrĩirũo nĩ kũmwenda na njĩra ĩrĩkũ?

NJĨRA ĩrĩa njega biũ mũthuri angĩruta ciana ciake nayo nĩ kĩonereria gĩake kĩega. Mũtũmwo Johana aandĩkire atĩ, “twendanaga nĩ ũndũ [Ngai] nĩwe waambire gũtwenda mbere.” (1 Joh. 4:19) Nĩ ũndũ ũcio, Jehova nĩ atũigĩire kĩonereria kĩega biũ gĩa kuonania wendo, kĩrĩa kĩngĩtũteithia kũmwenda.

² Nĩ na njĩra ĩrĩkũ Ngai ‘aambire gũtwenda’? Mũtũmwo Paulo oigire: “Ũndũ ũrĩa Ngai onanĩtie ũtwendi wake naguo-rĩ, nĩ ũyũ, atĩ Kristo aatũkuĩrĩire rĩrĩa twatũire tũrĩ o ehia.” (Rom. 5:8) Kũgerera kũruta Mũrũ wake arĩ igongona nĩ ũndũ wa arĩa metĩkĩtie, Jehova nĩ onanirie ũrĩa wendo wa ma ũtariĩ. Wonanagio na njĩra ya kũheana, na gwĩka maũndũ na njĩra ĩtarĩ ya kwĩyenda. Wendo mũnene ũrĩa Jehova aatuonirie kũgerera ũkũũri nĩ ũtũhotithagia gũthiĩ harĩ we na tũkagunĩka nĩ wendo wake na tũkahota kuonania atĩ nĩ tũmwendete.—1 Joh. 4:10.

3, 4. Tũngĩonania atĩa wendo witũ harĩ Jehova?

³ Wendo nĩyo ngumo ĩrĩa nene ya Ngai, kwoguo no tũtaũkĩrũo nĩ kĩrĩa gĩatũmire Jesu oige atĩ rĩathani rĩrĩa rĩa bata mũno nĩ: “Enda Mwathani Ngai waku na ngoro yaku yothe, na muoyo waku wothe, na gwĩciria gwaku guothe, o na hinya waku wothe.” (Mar. 12:30) Kuumana na ciugo cia Jesu, tũreruta atĩ kwenda Ngai kwambagĩrĩria ngoro-inĩ citũ. Jehova ndakenagio nĩ ũthathayia ũtarĩ wa ngoro yothe. Twagĩrĩirũo kwenda Ngai na ngoro itũ yothe, meciria maitũ mothe, na hinya witũ wothe. Ũguo nĩ kuuga atĩ, harĩ maũndũ maingĩ mabataranagia nĩguo mũndũ onanie wendo wa ma harĩ Jehova. Twagĩrĩire kuonania wendo witũ harĩ Ngai na njĩra ya ciĩko na mwĩcirĩrie witũ. Kũringana na mũnabii Mika, ũcio nĩguo ũndũ ũrĩa Jehova endaga kuuma kũrĩ ithuĩ.—Thoma Mika 6:8.

⁴ Tũngĩonania atĩa atĩ nĩ twendete Ithe witũ wa igũrũ? Nĩ na njĩra ya kũmũiga mbere ũtũũro-inĩ witũ. O ta ũrĩa Jesu onanirie, twagĩrĩirũo kuonania ũndũ ũcio na hinya witũ wothe, meciria maitũ mothe, o hamwe na ngoro itũ yothe. Gĩcunjĩ-inĩ kĩrĩa kĩhĩtũku, nĩ tũraarĩrĩirie njĩra inya iria Jehova onagia ciana ciake wendo wake mũnene. Rekei rĩu twarĩrĩrie ũrĩa tũngĩonania na twĩkĩre hinya wendo witũ harĩ Jehova.

ONANAGIA NGATHO NĨ ŨNDŨ WA MAŨNDŨ MARĨA JEHOVA ATŨHEAGA

5. Tũngĩonania ngatho citũ atĩa nĩ ũndũ wa maũndũ marĩa mothe Jehova atwĩkĩire?

⁵ Wĩkaga atĩa rĩrĩa wamũkĩra kĩheo? Hatarĩ nganja, nĩ wĩkaga ũndũ mũna nĩguo wonanie ngatho. Makĩria ma ũguo, nĩ ũhũthagĩra kĩheo kĩu na njĩra ĩrĩa yagĩrĩire. Mũrutwo Jakubu aandĩkire ũũ: “Ũheani o wothe wa maũndũ mega, o na kĩheo o gĩothe kĩrĩa kĩagĩrĩire kũna, nĩciumaga Igũrũ, igaikũrũka ciumĩte kũrĩ Ithe witũ, mwene motheri ma Igũrũ, ũrĩa ũtagariũkaga, na ndarĩ na kĩĩruru gĩa kũgarũrũka.” (Jak. 1:17) Hingo ciothe Jehova nĩ atũheaga kĩrĩa tũrabatara nĩguo tũtũũre na tũgĩe na gĩkeno. Na githĩ ũndũ ũcio ndũtũtindĩkaga twende kũmuonia wendo!

6. Aisiraeli maagĩrĩirũo nĩ gwĩka atĩa nĩguo mathiĩ na mbere kũrathimwo nĩ Jehova?

⁶ Aisiraeli nĩ maamũkĩrire indo nyingĩ njega kuuma kũrĩ Jehova. Kwa ihinda rĩa mĩaka mĩingĩ, aamatongoririe na mawatho make na akĩmahe kĩrĩa gĩothe maabataraga nĩguo matũũre. (Gũcok. 4:7, 8) O na kũrĩ ũguo, nĩguo mathiĩ na mbere kwamũkĩra irathimo cia Jehova, no mũhaka mangĩaathĩkĩire Watho wa Ngai. Kwa ngerekano, rĩrĩa maarutagĩra Jehova magongona, no mũhaka mangĩamũheire “maciaro ma mbere” ma mĩgũnda yao. (Tham. 23:19) Aisiraeli nĩ mooĩ atĩ Jehova nĩ angĩathire na mbere kũmarathima mangĩamwathĩkĩire na mamũtungatĩre na ngoro yothe.—Thoma Gũcokerithia Maathani 8:7-11.

7. Tũngĩhũthĩra atĩa ‘indo iria tũrĩ nacio’ kuonia Jehova atĩ nĩ tũmwendete?

⁷ O na ithuĩ no tuonie Jehova nĩ tũmwendete na njĩra ya kũmũhe ‘indo iria tũrĩ nacio.’ (Thim. 3:9) Tũngĩonania ũguo atĩa? No tũhũthĩre indo citũ kũnyita mbaru wĩra wa Ũthamaki kĩũngano-inĩ gitũ na thĩinĩ wa thĩ yothe. Ithuothe no tuonanie wendo witũ harĩ Jehova, tũkorũo tũrĩ na indo nyingĩ kana nyinyi. (2 Kor. 8:12) O na kũrĩ ũguo, nĩ kũrĩ njĩra ingĩ tũngĩonia Jehova atĩ nĩ tũmwendete.

8, 9. Kwĩhoka kĩĩranĩro kĩa Jehova kuonanagia atĩa atĩ nĩ tũmwendete? Heana ngerekano.

⁸ Jesu aatũrutire tũcaragie Ũthamaki mbere na tũtigatangĩkage nĩ kĩrĩa tũkũrĩa kana kĩrĩa tũkwĩhumba. Oigire atĩ Ithe witũ nĩ amenyaga kĩrĩa tũbataraga. (Mat. 6:31-33) Kwĩhoka atĩ Jehova nĩ arĩhingagia kĩĩranĩro kĩu kuonanagia atĩ nĩ tũmwendete biũ, tondũ gũkorũo wĩhokete mũndũ kuonanagia nĩ ũmwendete. Ma nĩ atĩ, o ũrĩa tũrehoka Jehova makĩria noguo tũmuonagia atĩ nĩ tũmwendete. (Thab. 143:8) Kwoguo twagĩrĩirũo nĩ kwĩyũria ũũ: ‘Hihi maũndũ marĩa thingataga ũtũũro-inĩ wakwa nĩ monanagia atĩ nĩ nyendete Jehova? Hihi nĩ njĩtĩkĩtie atĩ Jehova arĩ na ũhoti wa kũũhingagĩria mabataro makwa ma o mũthenya?’

⁹ Mũrũ wa Ithe witũ wĩtagwo Mike nĩ onanirie wendo na wĩtĩkio ta ũcio. Arĩ mwanake nĩ aambĩrĩirie gũkũria wendo mũnene wa gũthiĩ gũtungatĩra bũrũri-inĩ ũngĩ. O na thutha wa kũhikania na kũgĩa na ciana igĩrĩ no aathire na mbere kwĩrirĩria ũndũ ũcio. Nĩ ũndũ wa gũthoma ũhoro wa aarĩ na ariũ a Ithe witũ arĩa matungataga kũndũ kũrĩ na bata mũnene wa ahunjia, Mike na famĩlĩ yake nĩ maatuire itua rĩa kũhũthahũthia mũtũũrĩre wao. Makĩendia nyũmba yao na magĩthamĩra ĩngĩ nini. Mike agĩcoka akĩnyihanyihia biacara yake na akĩbanga ũrĩa angĩmĩtwarithia na mbere akĩhũthĩra Intaneti arĩ bũrũri-inĩ ũngĩ. Nĩ maathamĩire bũrũri ũngĩ, na thutha wa gũtungatĩra marĩ na gĩkeno ihinda rĩa mĩaka ĩrĩ Mike oigire ũũ: “Nĩ tweyoneire ũma wa ciugo cia Jesu iria irĩ thĩinĩ wa Mathayo 6:33.”

WĨCŨRANAGIE MAŨNDŨ MARĨA JEHOVA AKŨRUTAGA

10. O ta Mũthamaki Daudi-rĩ, tũrĩgunĩkaga atĩa twecũrania ũhoro wa Jehova?

¹⁰ Mĩaka ta 3,000 mĩhĩtũku, Mũthamaki Daudi nĩ aagegire mũno erorera igũrũ. Aandĩkire ũũ: “Igũrũ nĩ kũmemerekia rĩmemerekagia riri wa Mũrungu, mũtambũrũko wa matu-mairũ ũgakĩonania wĩra wa moko make.” Agĩcoka akiuga ũũ: “Kĩrĩra kĩa Jehova nĩ gĩkinyanĩru, gĩthondekaga roho wa mũndũ; ũira wa Jehova nĩ mwĩhokeku, ũũhĩgagia ũrĩa ũtarĩ mũũgĩ.” Gwĩcũrania na njĩra ĩyo gwateithirie Daudi atĩa? Aathire na mbere kuuga ũũ: “Ciugo cia kanua gakwa, o na mwĩrurumio wa ngoro, iroetĩkĩrĩka mbere yaku, wee Jehova, o wee ndũmba yakwa ya ihiga, o na ningĩ mũngũũri.” Hatarĩ nganja, gwĩka ũguo nĩ gwatũmire ũkuruhanu wa Daudi hamwe na Ngai ũgĩe na hinya makĩria.—Thab. 19:1, 7, 14.

11. Wendo witũ harĩ Ngai wagĩrĩirũo gũtũtindĩka tũhũthagĩre atĩa ũmenyo mũingĩ wa Bibilia ũrĩa atũheaga? (Rora mbica kĩambĩrĩria-inĩ gĩa gĩcunjĩ gĩkĩ.)

¹¹ Mahinda-inĩ maya, nĩ tũgĩte na ũmenyo mũingĩ wĩgiĩ ũũmbi wa Jehova na wĩgiĩ muoroto wake. Thĩ ĩkĩraga andũ ngoro mathingate gĩthomo kĩa igũrũ, no kaingĩ gĩthomo kĩu nĩ gĩtũmaga andũ maage gũthiĩ na mbere kwenda Jehova. No handũ ha gũtwĩkĩra ngoro tũgĩe na ũmenyo tu, Bibilia ĩtwĩkĩraga ngoro tũgĩe na ũũgĩ na ũtaũku. Ũguo nĩ kuuga twĩrute kũhũthĩra ũmenyo ũrĩa Ngai atũheete nĩguo tũgunĩke na tũgune andũ arĩa angĩ. (Thim. 4:5-7) Ngai ‘endaga andũ othe mahonokio na matuĩke a kũmenya ũhoro-wa-ma.’ (1 Tim. 2:4) Nĩ tuonanagia wendo witũ harĩ Jehova rĩrĩa tũrerutanĩria kũhunjĩria arĩa angĩ ũhoro ũrĩa mwega wa Ũthamaki na kũmateithia mataũkĩrũo nĩ muoroto wa Ngai harĩ andũ.—Thoma Thaburi 66:16, 17.

12. Mwarĩ wa Ithe witũ ũmwe mwĩthĩ oigire atĩa nĩ ũndũ wa kĩheo kĩrĩa aamũkĩrĩte kuuma kũrĩ Jehova?

¹² O na andũ ethĩ no mahote kuonania atĩ nĩ mendete Jehova na njĩra ya gũkorũo na ngatho nĩ ũndũ wa maũndũ ma kĩĩroho marĩa Jehova amaheaga. Mwarĩ wa Ithe witũ Shannon oigaga atĩ, arĩ na mĩaka 11 na mwarĩ wa nyina arĩ na mĩaka 10, marĩ na aciari ao nĩ maathire kĩgomano gĩa thikũ ithatũ kĩa “Wĩyamũrĩri Ngai.” Kĩgomano-inĩ kĩu, nĩ harĩ hĩndĩ andũ othe ethĩ meerirũo maikare hamwe. Kĩambĩrĩria-inĩ Shannon nĩ aaiguire amaka no nĩ aacokire agĩikara harĩa meerĩtwo. No nĩ aakenire mũno rĩrĩa o mũndũ wothe mwĩthĩ aaheirũo kĩheo kĩa ibuku rĩa Maswali Ambayo Vijana Huuliza—Majibu Yafanyayo Kazi. Ũndũ ũcio watũmire Shannon aigue atĩa igũrũ rĩgiĩ Jehova? Oigire ũũ: “Hĩndĩ ĩyo nĩrĩo ndoonire Jehova arĩ mũrata wa biũ na ngĩmenya atĩ nĩ anyendete mũno.” Shannon aathire na mbere kuuga ũũ: “Nĩ gĩkeno kĩnene kuona atĩ Jehova Ngai witũ nĩ atũheaga iheo ta icio njega!”

ĨTĨKAGĨRA ŨTAARO WA JEHOVA

13, 14. Mawoni maitũ kwerekera ũtaaro wa Jehova monanagia atĩa igũrũ rĩgiĩ wendo witũ harĩ we?

¹³ Bibilia ĩtũririkanagia atĩ, “Jehova arũithagia ũrĩa endete, o ta ũrĩa ithe wa mũndũ arũithagia mũriũ o ũcio akenagĩra.” (Thim. 3:12) Twagĩrĩirũo gwĩka atĩa rĩrĩa twaheo ũtaaro? Mũtũmwo Paulo oigire atĩ: “Kũherithio o guothe kuonagwo o ihinda rĩakuo ta gũtarĩ gĩkeno, tiga o kĩeha.” Paulo ti kũhũthia aahũthagia ũguni ũrĩa umanaga na ũtaaro, tondũ aathire na mbere kuuga ũũ: “No rĩrĩ, thutha-inĩ nĩkũrehagĩre andũ arĩa mamenyeretio nakuo maciaro me na thayũ, marĩa moimanĩte na ũthingu.” (Ahib. 12:11) Tũtiagĩrĩirũo kũrega ũtaaro wa Jehova kana gũthiĩ na mbere kũrakara angĩkorũo tũtinakenio nĩ ũtaaro mũna. Tondũ nĩ twendete Jehova, nĩ tũmũthikagĩrĩria na tũgeka mogarũrũku marĩa marabatarania ũtũũro-inĩ witũ.

¹⁴ Matukũ-inĩ ma mũnabii Malaki, Ayahudi aingĩ matiathikagĩrĩria ũtaaro wa Jehova. O na gũtuĩka nĩ mooĩ Watho ũrĩa Jehova aaheanĩte wĩgiĩ kũruta magongona, nĩ maaregire kũwathĩkĩra nginya Jehova akĩmahe mũkaana. (Thoma Malaki 1:12, 13.) Andũ acio nĩ maakĩririe njano. Jehova aamerire ũũ: “Nĩngamũrehithĩrie kĩrumi mũgwatwo nĩkĩo, o nacio irathimo cianyu iria mũrathimanaga nacio ndĩcigeke; ĩĩ, ti-itherũ o na rĩu nĩ ndĩkĩtie gũcigeka, nĩ ũndũ nĩmũregete gwĩcũrania rĩathani rĩu rĩakwa na ngoro cianyu.” (Mal. 2:1, 2) Kũrega na rũtũrĩko gwathĩkĩra ũtaaro wa Jehova no gũkorũo na moimĩrĩro moru mũno.

15. Nĩ muonere ũrĩkũ ũrĩ na andũ aingĩ thĩinĩ wa thĩ twagĩrĩirũo kwĩmenyerera?

¹⁵ Tondũ mahinda-inĩ maya andũ aingĩ nĩ meyendete, ti ũndũ mũhũthũ kwaria ũhoro wa ũtaaro nĩ gũkorũo andũ aingĩ o na matiwamũkagĩra. O na arĩa monekaga ta maraamũkĩra ũtaaro rĩmwe na rĩmwe nĩ maiguaga hinya kũwĩtĩkĩra. O na kũrĩ ũguo, Akristiano mekĩragwo ngoro ‘matikehaananie na andũ a gũkũ thĩ.’ Twagĩrĩirũo gũtaũkĩrũo nĩ ũrĩa Jehova endaga twĩke, na twĩkage maũndũ marĩa mamũkenagia. (Rom. 12:2) Kũgerera ithondeka rĩake, Jehova nĩ atũheaga ũtaaro wa ihinda rĩrĩa rĩagĩrĩire ũhutĩtie maũndũ matiganĩte ũtũũro-inĩ witũ, ta mĩthiĩre ĩrĩa twagĩrĩire gũkorũo nayo harĩ andũ arĩa tũtahikanĩtie nao, thiritũ citũ, na maũndũ ma gwĩkenia. Rĩrĩa twarũmĩrĩra ũtongoria ũrĩa tũheagwo maũndũ-inĩ macio, tuonanagia atĩ tũrĩ na ngatho na atĩ nĩ twendete Jehova kuuma ngoro.—Joh. 14:31; Rom. 6:17.

WĨHOKAGE JEHOVA AKŨGITĨRE NA AKŨHONOKIE

16, 17. (a) Twagĩrĩirũo gũcaria ũtongoria wa Jehova mbere ya gũtua matua nĩkĩ? (b) Nĩ ũndũ ũrĩkũ Aisiraeli meekire handũ ha kwĩhoka Jehova?

¹⁶ Rĩrĩa ciana ciona ũgwati, ciũragĩra kũrĩ aciari a cio. O ũrĩa irathiĩ igĩkũraga, nĩ ithiaga ikĩĩmenyagĩria gwĩtuagĩra matua. Ũndũ ũcio nĩ wonanagia atĩ no irathiĩ igĩtuĩkaga andũ agima. O na kũrĩ ũguo, ciana iria ikoragwo na ũrata wa hakuhĩ na aciari a cio, nĩ icaragia ũtaaro wao mbere ya gũtua matua. Ũguo noguo twagĩrĩirũo nĩ gwĩka o na maũndũ-inĩ ma kĩĩroho. Jehova nĩ atũheete roho wake ũrĩa ‘ũtwendithagia na ũgatũma twĩke maũndũ.’ Tuonanagia atĩ nĩ twendete Jehova na tũkamwĩhoka rĩrĩa twacaria ũtongoria wake hĩndĩ ciothe mbere ya gũtua matua.—Afil. 2:13.

¹⁷ Hĩndĩ ĩmwe matukũ-inĩ ma mũnabii Samueli, Aisiraeli nĩ maatoririo mbaara-inĩ nĩ Afilisiti. Andũ acio a Ngai nĩ maabataraga ũteithio na ũgitĩri. Meekire atĩa? Mooigire ũũ: “Rekei tũgĩre ithandũkũ rĩa kĩrĩkanĩro kĩa Jehova, tũrĩrute Shilo, tũrĩrehe gũkũ tũrĩ nĩ getha rĩikare thĩinĩ witũ, nĩguo rĩtũhonokie rĩtũrute moko-inĩ ma thũ ciitũ.” Moimĩrĩro maarĩ marĩkũ? “Afilisiti magĩkĩhũrana nao, nao Aisiraeli makĩhũrũo, makĩũrĩra mũndũ o mũndũ hema-inĩ yake; gũgĩkĩũraganwo mũno mũno; nĩ ũndũ kũu kwagũire andũ a Isiraeli ngiri mĩrongo ĩtatũ arĩa maathiaga na magũrũ, moragĩtwo.” (1 Sam. 4:2-4, 10, 11) Nĩ ũndũ wa kuoya Ithandũkũ rĩa kĩrĩkanĩro, Aisiraeli nĩ maangĩonekire ta maacaragia ũteithio wa Jehova. No matiacaririe ũtongoria wa Jehova, maarũmĩrĩire meciria mao na nĩkĩo maatoririo nĩ thũ ciao.—Thoma Thimo 14:12.

18. Bibilia ĩtũrutaga atĩa igũrũ rĩgiĩ gũcaria ũteithio wa Jehova?

¹⁸ Mwandĩki ũmwe wa thaburi wendete Jehova mũno na wamwĩhokete oigire: “Wĩrĩgagĩrĩre o Ngai; amu no ndĩĩmũcokeria ngatho nĩ ũndũ wa ũhonokio wa gĩthiithi gĩake. Ĩ Ngai, ngoro yakwa nĩ nyinamu gũkũ thĩinĩ wakwa: nĩkĩo ngũkũririkana.” (Thab. 42:5, 6) Hihi wee nĩ ũkũrĩtie wendo na mwĩhoko ta ũcio harĩ Ithe witũ wa igũrũ? Angĩkorũo nĩ wĩkĩte ũguo, no wĩkĩre hinya mwĩhoko waku harĩ Jehova o ta ũrĩa Bibilia ĩtwĩraga: “Ĩhokage Jehova na ngoro yaku yothe, ũtigage gwĩtiirania na mbuguĩro yaku mwene; Mwĩtĩkagĩre o we mĩthiĩre-inĩ yaku yothe, nacio njĩra ciaku nĩarĩkũrũngagĩra.”—Thim. 3:5, 6.

19. Nĩ na njĩra irĩkũ ũngĩenda kwĩrutanĩria kuonia Jehova atĩ nĩ ũmwendete?

¹⁹ Nĩ ũndũ wa gũkorũo nĩwe wambire gũtwenda, Jehova nĩ atuonetie ũrĩa twagĩrĩirũo kũmwenda. Rekei hingo ciothe tũririkanage kĩonereria gĩake, na tũthiĩ na mbere kuonania wendo witũ harĩ we na ‘ngoro itũ yothe, muoyo witũ wothe, na gwĩciria gwitũ guothe, o na hinya witũ wothe.’—Mar. 12:30.