Omapsalme

145 Ohandi ku tumbalekifa Omwene Kalunga kange Ohamba,

Ohandi tange edina loye alushe fiyo alushe.

 2 Ohandi ku tange efimbo alishe;

Ohandi tange edina loye alushe fiyo alushe.

 3 Jehova omunene, nokwa wana filufilu okutangwa;

Ounene waye otau nyengana.*

 4 Epupi nepupi otali ka tanga oilonga yoye;

Otali ka popya kombinga yoinenelonga yoye.

 5 Otali ka popya kombinga yetumbalo loye linene nefimano loye,

Nohandi ka dilonga kombinga yoilonganghono yoye.

 6 Otali ka popya kombinga yoilonga yoye ikumwifi,*

Nohandi ka shiivifa ounene woye.

 7 Otali ka popya nehafo, eshi tali dimbuluka ouwa woye munene,

Notali ka ingida nenyaku omolwouyuki woye.

 8 Jehova omunalukeno* nomunanghenda,

Iha handuka diva, noku na ohole inene i na oudiinini.

 9 Jehova omuwa kwaaveshe,

Nefilonghenda laye oli liwetikile moilonga yaye aishe.

10 Omwene Jehova, oilonga yoye aishe otai ke ku tumbalekifa,

Novadiinini voye otave ke ku tanga.

11 Otava ka shiivifa kombinga yefimano louhamba woye,

Nokupopya kombinga yeenghono doye dinene,

ל [Lamed]

12 Opo va shiivifile ovanhu oinenelonga yoye,

Netumbalo linene louhamba woye.

13 Ouhamba woye oo ouhamba waalushe,

Nepangelo loye otali kala po fiyo okomapupi aeshe.

14 Jehova oha yambidida aveshe ovo tava punduka,

Noha yambula po aveshe ovo va nyongamekwa.

15 Omesho aeshe okwa tala kwoove e na eteelelo;

Oho va pe oikulya yavo pefimbo la wapala.

16 Oho kamutulula eke loye,

Nokuwanifa po ehalo lakeshe shimwe osho shi na omwenyo.

17 Jehova omuyuki meendjila daye adishe,

Nomudiinini mwaashishe osho ha ningi.

18 Jehova oku li popepi naaveshe ovo tave mu ifana,

Naaveshe ovo tave mu ifana moshili.*

19 Oha wanifa po ehalo laavo have mu tila;

Oha udu, eshi tave mu lilile ekwafo, nohe va xupifa.

20 Jehova oha amene aveshe ovo ve mu hole,

Ashike ovakolokoshi aveshe ote ke va hanauna po.

21 Okanya kange otaka ka tanga Jehova;

Keshe shimwe shi na omwenyo* nashi tange edina laye liyapuki alushe fiyo alushe.